Read Maru APAN AQAO: 21 Bible Online

APAN AQAO: 21 - Maru bible

APAN AQAO: 21

¹ASANG wa yao: dao:so: byid' to: va" ru we' dakhyo:- Sara re shaman" byid' ra".

²Abraham mao" lo" lao"- Sara wa gaung la" li" mung:- Abraham re yauggai zo: dayaug khau byid' ra". Ai: yauggai nau" wa yao: khau: li" nae"- ga: Mao"So ta" to" ra" ayo, mae khau: li" ra".

³Abraham wa yao: re Isag ga: mhang" byid' ra".

⁴Isag she' ba ngad lao"-Mao"So amyin" byid' to" ru we' dakhyo:- Abraham wa yao: re au: qid lhai: khyo kad' byid' ra".

⁵Abraham wa Isag re khau: ra" au:- apyad dayo zin ngad: ava".

⁶Ailao"- Sara wa Mao"So wa ngaui bau: yang: qi nhao: ava". Cere the' gyo" ra" mo, yaug khao: ngo" wa ngore qi genaeva"- ga: ta" ra".

⁷Ai: thao yao: wa- Sara wa zoshao nug' jhaug' nae" ga" rure Abraham re khag' qo" ta" nae" i? Ngadqere: ngo wa yao: mao: thao re yao" qhid' mae" yauggai zo:khau byid: va"- ga: xo' ta" ra".

⁸Zoshao wa qi" li" mung: yao: nug' kao" ra" ba na mae Abraham wa zo: shaug' poe aqi: kad' ra".

⁹Daba mae Egutu myhi" Hagara yang Abraham re khau byid' ra" Ishmae we' Sara nho: yauggai zo: Isag wa daga" jhi: na: ako".

¹⁰Sara wa aitao re myao mung:- Abraham re ce: jeim myhi" we' yao" yauggai zo: re nhao: thug' ke' wa,- ce: myiqe: myhi" nho: yauggai zo: wa nga" yauggai zo: Isag sang: yu ang: ra" ni" jo,nho" mae" daja: re: magai: the' ngad: ra"- ga: ta" ra".

¹¹Ceru wa Abraham re gyai myid qug: nhao: ra". Pe"mung:ga" re Ishmae re: yao" yauggai zo: ngad: ra".

¹²Ngadqere: Mao"So wa Abraham re ai: yauggai nau" we' ni" jeim myhi" Hagara khyo we' sin: yang: damyid: ci" wa,- Sara nao re ta" ruru: kad' wa,- pe"mung:ga"re Isag khyo" nao myid:zo: qo" li" nae" rure ngo wa dao:so: byid' to: va".

¹³Ngo wa jeim myhi" nho: yauggai zo: rere: zo: dau myo: sho' byid: nae"- airulao" yao: bam wa byumyu" damyu" boe" li" li" genae"- yao: re: ni" yauggai zo: ngad: ra"- ga: ta" ra".

¹⁴Thao: ba ne, seim no' mae" Abraham wa Hagara re zo:ve dajhid' we' shoqid thaung byang" sho' qid dathaung ke' byid: mung:- aire yao: wa Hagara nho: lo, sin mae kai: byid: yang:- zoshao we' daga" nhao: thug' ke' ra". Hagara wa to" lo" mung:- Bersheba din"pyad' yo mae yedu" lae" qin" ra".

¹⁵Qid alhab' gan: byaug lao"- yao: wa zoshao re thao" paung" khug mae nha: to: co' mung:-

¹⁶Yo dakhyao: vha" ko ye: yang: yezaung: jo; ra". Yao: wa yao" aung khug mae nga" zo: shid: rure ngo matho' qu"- ga: ta" ra". Yao: aimae zaung: jo; ra" au:- yao: wa gyi: ngug: ra".

¹⁷Mao"So wa yauggai nau" ngug thoe re the' gyo: mung:- Mao"So: mug: lagyo: wa mug:gaung mae" Hagara re- Hagara we"- nao pe" ja: we' sin: yang: qug: khai: qhug' na: i? Dagyaug wa- Mao"So wa ai: yauggai nau" ngug thoe re the' gyo" ava".

¹⁸To" wa,- yao: re lo" gaug: vo, mung: jhu" wa,- ngo wa yao" myid:zo: qemae" byumyu" qi: damyu" boe" nhao nae"- ga: jhau: ra".

¹⁹Ai: thao Mao"So wa Hagara re myo, phung" byid: mung:- yao: wa qid thaung: dalam: re myao: ra". Yao: wa shoqid thaung mae qid yekhae: ke' yu mung:- yauggai nau" re byid: jhaug' ra".

²⁰Mao"So wa ai: yauggai nau" we' daga" na mung: yao: wa- qi" qhang: li" ra". Yao: wa Paran din"pyad' yo mae na mung;- jhao: ra" mug khyu dayaug boe" lo: ra".

²¹Yao: myhi" wa yao: re Egutu myhi" dayaug yu byid' ra".

²²Ai: ayo, mae Abimeleg wa yao" gye zug: pho" Phiko we' daga" Abraham jhao" ye: mung:- Mao"So wa nao kad' ra" lo, mau" ja: khao: ngo" mae nao we' daga" ngad: ra".

²³Airumung: nao wa ngo rere:- nga" zo: qere re: mangad: lao"- nga" myid:zo: qere re: mamhug' pyag' nae" ga" rure cetau Mao"So: qhid' kheim: mae thao: ce' to: wa,- ngo wa nao re dao:so: zaung mung: nao re: ngore we' nao na: jo; ra" ce: mung"dan: re dao:so: zaung nae" ein: rure dao:so: to: wa,- ga: ta" ra".

²⁴Abraham wa- ngo dao:so: to" ra"- ga: ta" ra".

²⁵Abraham wa Abimeleg re- yao" daui daui mo; yang lhad' sang: to" ra" qid thaung: khyo we' sin: yang: nyhung: ra".

²⁶Abimeleg wa- ceru khag' kad' rure ngo- nao wa aikhyo we' sin: yang: ngore mata" ngad: ra". Ce wa ai we' sin: yang: ngo sao qhid' lhang the' gyo" ru ngad:- ga: ta" ra".

²⁷Ailao" Abraham wa yao daqhae: we' nung: daqhae: re Abimeleg re byid' ra". Aimung: yao: shid' yaug wa myid vang" khyo dalam: kad' ako".

²⁸Abraham wa yao" yao kyaung" mae" yao nau" nhad' dau: re kho' yu: ra".

²⁹Abimeleg wa yao: re- nao pe"mung: airu: kad' i? ga: myid' ra".

³⁰Abraham wa- ce: yao nau" nhad' dau: re khae: yu byid: la,- ceru: kad' ruyang ngo wa ce: qid thaung: re dau: yaug ngad: rure nao tau" yu: ra"- ga: ta" ra".

³¹Airumung: ai: jo, qo re Bersheba ga: mhang" ako". Pe"mung:ga"re ai: mae yao: shid' yaug thao: ce' to: geyang: ngad: ra".

³²Yao: shid' yaug Bersheba mae ce: myid vang" khyo re bin: kad' thao re Abimeleg we' Phiko wa Philisti mung" khyo tug' phao: lo" ako".

³³Abraham wa Bersheba mae Magyin shi: gae qho: mung: apyad ato: Mao"So ngad: ra" ASANG re caung:pa" byid' ra".

³⁴Abraham wa Philisti mung" mae ayo, myao" sho' na jo; ra".