Read Maru APAN AQAO: 22 Bible Online

APAN AQAO: 22 - Maru bible

APAN AQAO: 22

¹Dayo, kyo thao re Mao"So wa Abraham re jham" qu" mung:- yao: wa Abraham we"- ga: khai: ra". Abraham wa ngad va" ngo cemae na: ga: phaug' tau" ra".

²Ailao" Mao"So wa nao gyai jhid'de; ra" ni" zote: zo: Isag re jhui: yang: Moria mug: khyo ye" lo" wa, ngo nao re qhu" byid: nae" ra" bam dao mae yao: re ngaui" xeim: khyo" ngore ngaui" byid: la,- ga: ta" ra".

³Thao: ba ne, seim no' Abraham wa ngaui" xeim: qhid' mae" thao: dajhid' dam" yu mung: yao" loze dao mae seim" vhin yang: Isag re jhui" yu mung: yao" daui daui okaung shid' yaug we' daga" ye" lo" ako". Aimung: Mao"So: yang yao: re ta" shid' to" ra" jo, qo khyo yao: bam to" ye" lo" ako".

⁴Sam ba ein: ba re Abraham wa ai: jo, qo re va: mae" the' myao: ra".

⁵Ailao" yao: wa daui daui okaung shid' yaug re loze we' daga" ce: jo, qo mae thang: na ge, yauggai nau" we' ngo wa thoe: khyo do, ye: mung: yecaung:pa nae"- bin lao" nga" shid' pha: ni" shid: zo: jhao" dam: tug' lo nae"- ga: ta" ra".

⁶Abraham wa ngaui" xeim: qhid' mae" thao: re Isag re vin nhao mung:- yao: yao: wa shae dakhyae: re vin yang: myi: mad: qhid nae" myi: de; ra" myi:gyoe: jham re ci:ye" ra". Yao: shid' pha: daga" su" ye" lo" na ko" au:-

⁷Isag wa- Nga" pho"- ga: jhau: ke' ra". Abraham wa nga" zo:- ga: tau" ke' ra". Ailao" Isag wa nao wa thao: we' myi: gyang" ra" myi:gyoe: jham re nao ci: rure ngo myao: ra". Ngadqere: ngaui" xeim: qhid' mae" yao nau" wa khai mae i? ga: myid' ra".

⁸Abraham wa Mao"So yao: yao: nyhang" byid' li" naeva" ga: phaug' tau" ra". Amung: yao: shid' pha: wa daga" za: su" ye" lo" ako".

⁹Mao"So: yang ta" shid' to" ra" jo, qo khyo yao: shid' pha: joe" ye: gelao"- Abraham wa phan dalam: re kad' mung: ai: dao mae thao: re nyhang" to" ra". Yao: wa yao" yauggai zo: re taui" jab yang: phan dao mae" thao bam dao mae yao: re kai" ke' ra".

¹⁰Ai: thao yao: wa yao" shae re gaug: yu mung: Isag re se' nae" qang: ke' ra".

¹¹Ngadqere: ASANG: mug: lagyo: dayaug wa mug:gaung mae" yao: re Abraham- Abraham- ga: khai: ke' ra". Abraham wa ngad va"- ngo cemae na: ga: tau" ke' ra".

¹²Ailao" mug: lagyo: wa ai: yauggai nau" re dae date' wa,-yao: re pe" re: dakad' wa,- ga: ta" ra". Nao wa Mao"So re nga: yhe' byid: yaug we' Mao"So: dao: re phug' cao" yaug ngad: rure ana" ngo ba va". Pe"mung:ga"re ni" zote: zo: re ngore qhaug' byid: nae" rure nao mabyag: to: ngad: ra"- ga: ta" ra".

¹³Abraham wa cao" lhang: qu" ke' re thao" paung" mae khyug mae" qe" jo; ra" yao lo: dadau: re the' myao: ra". Ailao" Abraham wa aire yekhyad' yu mung:- yao" yauggai zo: atha" ai: yao lo: re ngaui" xeim: khyo" phad' ngaui" byid' ra".

¹⁴Amung: Abraham wa ai: jo, qo re ASANG bao" thaug' byid' ra"- ga: mhang" ra". Byu jham wa ana" ba joe" sho' lhao" re:- ASANG: bam dao mae yao: byid' ra" ga: ta" ako".

¹⁵ASANG: mug: lagyo: wa mug:gaung mae" Abraham re shid' lhang ein: lhang dam: khai mung:-

¹⁶Ngo wa nao re myo: sho' shaman" byid: nae" ein: rure ngo wa ngo yao" mang mae lao: yang: jham tang: dao:so: to" ra" ga: ASANG ta" ra". Pe"mung:ga"re nao wa ce:khyo re kad' mung: ni" zote: zo: re ngore qhaug' byid: nae" rure nao matang" to: ngad: ra".

¹⁷Ngo wa nao re mug:gaung mae" kyi jham nho" mangad: lao" panglai: qid yae mae" ma coe nho" myo: sho' myid:zo: qe ngo byid: nae" ein: dao:so: to" ra". Ni" nho: myid:zo: qe wa yao: bam: gyevo jham re aung: pye' li" genae".

¹⁸Nga" amyin" dao: re nao phug' cao" ruyang ngo wa ni" myid:zo: qere shaman" byid: va" ru we' dakhyo:- yao: bam re shaman" byid: nae" qhid' mae" byumyu" alhab' ngore mho' li" genae"- ga: ta" ra".

¹⁹Abraham wa yao" daui daui okaung shid' zo: jhao" tug' lo mung: yao: bam wa Abraham na: ra" Bersheba khyo daga" phao: lo: ako".

²⁰Ai: thao dayo, kyo thao re Milkha wa yao: nhaung: Naho re zoshao she' yaug khau byid' ra" ga" rure Abraham ba: ra".

²¹Ai bam wa zoqhid' Uza we' yao: nhaung: Bu- Aram nho: yao: pho" Kemue

²²Khesed- Hazo- Pilda- Yidlab-

²³Rebekha nho: yao: pho" Bethuela bam ngad: ako". Milkha wa Abraham nho: yao: nhaung: Naho re ce: yauggai zo: she' yaug re khau byid' ra".

²⁴Naho nho: myingai Reuma wa Teba- Gaham- Taha- Makha bam re khau: ra".