Read Maru APAN AQAO: 23 Bible Online

APAN AQAO: 23 - Maru bible

APAN AQAO: 23

¹Sara wa apyad 127 zin joe" sho' na: ra".

²Yao: wa Khanan mung" mae" Hebron mae shid: lo" ra". Amung: Abraham wa yao" mathao mae kaug' ngug: ra".

³Yao: wa yao" yham sang myhi" nao: mao gaung jo; ra" jo, qo mae" to" yang: Hiti byu qejhao" ye: mung:-

⁴Ngo wa ce: naonhaung" phaung mae na: jo; ra" taung bug byu dayaug ngad:- nga" yham sang myhi" re qo" nyhab' nae" qhid' mae" ngore mug: myid dajhid' aung: byid: gela,- ga: ta" ra".

⁵Yao: bam wa- nhag' bo pho" we"- ngonhaung" dao: re tae" gyo: byid: la,- ngonhaung" wa nao re qam: so' bo: ra" au: jhui: yaug dayaug khyo" jho: to" ra". Aimung: ngonhaung" sang: ra" gai: thao" ra" lab qo mae ni" yham sang: myhi" re nyhab' wa,-yao: re nao qo" nyhab' nae" qhid' mae" ngonhaung' mae" khag' re: nao re lab qo byid: nug: ra" ga: ta" ako".

⁷Ailao" Abraham wa yao: bam: qhid' kheim: mae goe; gyo" mung:-Nga" yham sang myhi" re ce: jo, qo mae naonhaung" nyhab' nhao nug ko" ngad: re wa-

⁸Zuha nho: yao: zo: Ephron re yao" yo myid athao mae" Magphela laug khyaung ngore aung: byid: nae" qhid' mae" jeju khyo" ye mho' byid: gela,- ai: mug: myid re gau jho byang" sho' we' naonhaung" qhid' kheim: mae ngore aung: byid: nae" qhid' mae" yao: re mho' byid: gela,- airulao" ngo wa aire lab qo khyo" qo" sang nae" ngad: ra"- ga: ta" ra".

¹⁰Ephron yao: re: Hiti byu gatau qe we' daga" vomo" kham: mae" zabphaung jo, qo mae bozaung: jo; ra". Ailao" yao: wa ai: jo, qo mae na: ra" mo, yaug khao: ngo" the' gyo" rumae-

¹¹Nhag' bo pho" we" tae" gyo: byid: la,- yomyid alhab' re we' aimae" laug khyaung rere: ngo nao re byid: nae". Ni" yham sang myhi" re nao qo" nyhab' nae" qhid' mae" cetau mae" byu qe: qhid' kheim: mae ai: mug: myid re ngo nao re byid: nae" ga: phaug' tau" ra".

¹²Ngadqere: Abraham wa Hiti byuqe: qhid' kheim: mae goe; gyo" mung:-

¹³Ephron re yaug khao: ngo" the' gyo: sho'- jeju khyo" ngo nao re mho' nae" tae" gyo: byid: la,- ai: yo myid alhab' re ngo vai: yu nae". Ngo byid' ra" mug: myid phug' re khae: yu byid: la,- ngo wa ai: jo, qo mae nga" yham sang myhi" re nyhab' nae"- ga: ta" ra".

¹⁴Ailao"- Ephron wa- nhag' bo pho" we"- ai: yo myid wa ngaui byid yo za: aman" ra". Ai za" ru wa nga" shid' zo" agyo: mae pe" ta" nae" made,- ni" yham sang myhi" re ai: jo, qo mae nyhab' wa,- ga: ta" ra".

¹⁶Ailao"- Abraham wa aire myid vang" mung:- Hiti byu qe the' gyo" rumae Ephron ta" thug' ra" gau jho- phaga: byu qe ci: ra" jadang: re ci yang: ngaui thang: the: byid yo re lag byid' ra".

¹⁷Ephron sang: ra" Mamre ba thug' shad' mae" magphela mae jo; ra" yo myid wa- aire"ru: Abraham nho: Yo myid boe" lo: ra". Yo myid we' aimae jo; ra" laug khyaung- Yo myid yogyeim: cao" yang: yaug: ra" sag' gae jham bobo yang:-

¹⁸Ai: zabphaung mae na: jo, ko" ra" Hiti byu qe: qhid' kheim: mae Abraham nho: jo,nho" zai yo khyo" axam: aso: kad' byid' ru qhug' ra".

¹⁹Ai: thao re Abraham wa Khanan mung" mae" ai: laug khyaung mae yao" yham sang myhi" Sara re nyhab' pye' ra".

²⁰Airumung: hiti byu qe sang: ra" yo myid we' aimae" laug khyaung wa lab qo qhid' mae" Abraham nho: jo,nho" zai yo boe" lo: ra".