Read Maru APAN AQAO: 25 Bible Online

APAN AQAO: 25 - Maru bible

APAN AQAO: 25

¹Abraham wa Ketura ga: mhang" ra" myiqe: dayaug re lo, dam: xo' yu: ra".

²Yao: wa Zimran- Yokshan- Medan- Midian- Ishabag- Shua- bam re khau byid' ra".

³Yugshan wa Sheba we' Dedan tao: yao: pho" ngad mung: Dedan nho: myid:zo: qe wa Ashurim- Letushim- Leumim bam ngad: ako".

⁴Midian nho: yauggai zo: wa - Epha- Ephe- Hanug- Abida- Elda- bam ngad: ako". Cebam alhab' wa Ketura nho: myid:zo: qe ngad: ako".

⁵Abraham wa yao: sang: ra" gu: alhab' Isag re byid: to: co' ra".

⁶Ngadqere: yao: daui: na shi" au: re yao: wa yao" yham sang myhi" gatau qeyang khau byid' ra" yao" yauggai zo: qe re jhaung qhu" byid' ra". Ai: thao re yao: wa ai: yauggai zo: qere yao" yauggai zo: Isag we' va" ra" ba thug' shad' mae" mug: khyo nhao: ke' ra".

⁷Abraham wa yao" apyad 175 zin re shid: lo" ra".

⁹Yao" nho: yauggai zo: Isag we' Ishmae tao wa Hiti byu Zoha nho: yao: zo: Ephron sang: ra" Mamre ba thug' shad' mae jo, ra" maphela laug khyaung mae yao: re nyhab' shaung: ako".

¹⁰Ai: jo, qo wa Hiti byu qe mae" Abraham vai: to" ra" yo myid ngad: ra". Abraham we' yao" yham sang myhi" Sara shid' zo" geim" re ai: mae nyhab' to" ako".

¹¹Mao"So wa Abraham shid thao re Ngo re Myao: Ra" Daui: Na: Ra" Yaug: Qid Thaung: ga" ra" jo, qo nhae mae na: ra" Abraham nho: yauggai zo: Isag re shaman" byid' ra".

¹²Ishmae wa Sara nho: jeim myhi" Egutu myhi" Hagara yang Abraham re khau byid' ra" yaug ngad: mung:-

¹³Yao: myhung: ke' ra" yauggai zo: qe: japhin: wa Nebaiod- Keda- Adbe- Mibsam-

¹⁴Mishma- Duma- Masa

¹⁵Hadad- Tema- Yetu- Naphi- Kedema- bam ngad: ako".

¹⁶Yao: bam wa daxe: shid' kaung: nho: phug' pho" qe ngad: ako". Yao: bam: mang re vogaung: jham thang: na: ra" jo, qo jham re cao" yang: mang mhang" byid' ru qhug' ako".

¹⁷Ishmae wa yao: shid: ra" au: apyad 137 zin ngad: ra".

¹⁸Ishmae nho myid:zo: qe wa Egutu mung" ba thug' shad' Asuri mug: khyo ye" ra" khyodang Havila we' Shura agyo: mae" mug: myid mae na: ako". Yao: bam wa Abraham nho: gatau: myid:zo: qe we' gatau shad' khyo na: ako".

¹⁹Ceru wa Abraham nho: yauggai zo: Isag nho: mhomyi: ngad: ra".

²⁰Isag: nho: kao byid xe zin dau: ra" au: Mesopotamia mung" Aramean byu nho: myiqe: zo: La Ban nho: nhae mo" Rebekha re lo, xo' yu: ra".

²¹Rebekha wa zo: dau mamyhung: ruyang Isag wa Rebekha qhid' mae" ASANG re akyu" mho' ra". ASANG yao" akyu" mho' thoe re tae" gyo: byid: mung: Rebekha wa gaung la" li" ra".

²²Yao: wa zo: zam khau nae" ngad mung:- yao: shid' tao makhau shire yao: shid' tao wa Rebekha nho: aung khug mae yao: cao: jho" byo; ako". Ailao" Rebekha wa ngo mae pe"mung: ceru: boe" ang: i? ga: ta" ra". Airumung: yao: wa ASANG re dao: phyid myid: nae" qhid' mae" ASANG jhao" ye" ra".

²³ASANG wa yao: re- ni" khug mae byumyu" shid' ja: bo: ra". Nao wa jho" qhao: genae" ra" byumyu" shid: ja: re khau: ke' li" nae". Dayaug wa gatau dayaug tho' qam: je: bo: li" nae". Aqi: yaug wa angai yaug re caung da" byid' li" nae"- ga: ta" ra".

²⁴Rebekha wa zo:khau ba na joe" lo: lao" zozam yauggai zo: tao re khau: ra".

²⁵Zoqhid' yaug wa ne mung:- yao" shoqid wa shomug' de; ra" adao: bau: qhang ru" ru ngad: ra". Airumung: yao: re Eso ga: mhang" byid' ra".

²⁶Thao: yaug wa Eso nho: khunhag' thaung: thao re tang za: zaui" ci yang: khau: li" ra". Amung: yao: re Yaku ga: mhang" byid' ra". Yao: shid' tao re khau: ra" au: Isag wa khyaug' xe zin ngad: ava".

²⁷Yauggai nau" tao wa qi" li" gemung:- Eso wa sho: kung" gyai kung yaug boe" li" mung: seyo mae na nug yaug boe" lo: ra". Ngadqere: Yaku wa yham mae sae za: na: ra".

²⁸Isag wa Eso kung" ra" gug'nyhug' sho: re qhug' zo: yang: Eso re je: ngaui: ra". Ngadqere: Rebekha wa Yaku re je: ngaui: ra".

²⁹Daba mae Yaku wa shagyao: zoxeim: xaug' na: au: Eso wa shokung" rumae" joe" lo: ra". Eso wa vae:moe: yang:-

³⁰Yaku re Ngo vae: moe' ra"- ai: zoxeim: mae" ngore byid: zho: la,- ga: ta" ra". (Ce: mathao mae yao: re Edom ga: mhang" ako".)

³¹Yaku wa zoqhid' aya: ngore byid' re wa ai: zo:ve nao re byid: zho: nae"- ga: phaug' tau" ra".

³²Ailao" Eso wa gai va"- ngo shid: lo" na: kyiva"- nga" zoqhid' aya: wa ngo pe" kad' nae" i? ga: ta" ra".

³³Yaku wa ni" zoqhid' aya: ngore byid: nae" ein: rure sao qhid' jham tang: wa,- ga: ta" ra". Ailao" Eso wa jham tang: yang: yao" zoqhid' aya: Yaku re byid' ra".

³⁴Ai: thao Yaku wa Eso re mug we' zoxeim: re byid' ra". Eso wa zo: shaug' mung: to" thug' lo" ra". Airu wa yao" zoqhid' aya: re Eso maphug' makhyad' kad' ra" khyo ngad: ra".