Read Maru APAN AQAO: 27 Bible Online

APAN AQAO: 27 - Maru bible

APAN AQAO: 27

¹Ana" Isag wa mao: mung: myo, jid: byaug: ra". Yao: wa yao" zoqhid' Eso re khai: yu nhao mung:- Yao: re nga" zo: we"- ga: ta" ra". Eso wa na: ga: tau" ra".

²Ailao" Isag wa- ngo wa mao: va" rumung: mamyao" re shid zai ngad: rure nao ba: myao gau ngad: ra".

³Ni" lo, la: we' ni" myo: re yu: ci yang: seyo khyo ye: mung: nga" qhid' mae" sho: dadau: yebag: lo ri:-

⁴Amung: aimae" dajhid' re ngo o: ra" khyo" myho' sho' yhaung" mung: ngojhao" cilo byid: la,-aire ngo bin: zo: lao" ngo mashid shire nao re lo" thao" shaman" dao: ngo ta" byid: nae"- ga: ta" ra".

⁵Isag wa Eso re airu: jhau: na: au: Rebekha wa tae" gyo" na: ra". Aimung: Eso sho: kung"" thug' ye" lo" lao"-

⁶Rebekha wa Yaku re- ni" pho" wa Eso re gug'nyhug' dadau: kung" lo mung: aire nga" qhid' mae" yhaung" byid: la,- aire ngo bin: zo: thao- ngo mashid shire ngo wa ASANG: qhid' kheim: mae nao re shaman" byid: nae"- ga: ta" rure ngo ana" za: the' gyo: va".

⁸Rebekha wa xo' yang: ana"- nga" zo: we" nga" dao: re tae" gyo: mung: ngo ta" rure kad' wa,-

⁹Cad' kyaung" khyo ye: mung: xau: nyam: ra" cad' be, qae" shid' dau: yetaung" lo ri:- airu: lao" ngo wa aijham re yhaung" mung: aimae" dajhid' re ni" pho" gyai o: ra" khyo" nyhang" byid: nae".

¹⁰Nao wa aire yao: re lo" qo" byid: zho: mung: yao: mashid shire yao: wa nao re yao" shaman" dao: byid' li" nae"- ga: ta" ra".

¹¹Ngadqere: Yaku wa yao: myhi" re- Eso wa shomug' hab' ngad rure nao ba: ra". Ngo wa shomug' mayaug ngad: ra".

¹²Nga" pho" wa ngore li" tin" ke' mung: ngo wa yao: re mhug' pyag' na: rure gai beim" li" nae". Ceru: ngo wa shaman" dao: qo" yu nae" atha" ngo yao" gaung re ngo yao: nhang" yu: ru boe" li" maba- ga: ta" ra".

¹³Ailao" yao: myhi" wa- nga" zo: we" nao re nhang" ra" nhang: kheim: alhab' ngore zao" vashao:- ngo ta" ru we' dakhyo: za: kad' wa,- cad' be, shid' dau: re za: ngore ye taung: byid: la, ga: phaug' tau" ra".

¹⁴Airumung: yao: wa ai: cad' be, shid' dau: re ye taung" yu yang: yao: jhao" cilo byid' ra". Amung: Rebekha wa Yaku nho: yao: pho" o: ra" ja: yhaung" byid' ra".

¹⁵Ai: thao Rebekha wa yao" yham mae shaung: to" ra" gai: thao" ra" Eso nho: mai bau: re yu: yu mung: Yaku re vhe' ra".

¹⁶Rebekha wa ai: cad' be, qid re wa Yaku nho: lo, pau" mae we' shomug' mayaug: ra" Yaku nho: lang zang khaung: mae thab' byid' ra".

¹⁷Rebekha ai: wa ai: myho' ra" sho: we' yao: kad' to" ra" mug re daga" za: Yaku re byid' ra".

¹⁸Ai: thao Yaku wa yao: pho" jhao" ye: mung:- nga" pho" we"- ga: ye jhau: ra". Isag wa cemae na: ga: tau mung:- nao khoyaug lam: ngad: i? ga: myid' ra".

¹⁹Ailao" Yaku wa ngo wa ni" zoqhid' yaug Eso ngad: nao ta" to" ru we' dakhyo: bin: kad' va". Ni" shaman" dao: nao ngore qo" byid: nae" qhid' mae" jeju we' to" zaung mung:- ngo cili" ra" sho: re zo: wa,- ga: ta" ra".

²⁰Isag wa- nga" zo: we" gyai phyad sho' sho: khoru: qo" kung" yu: i? ga: myid' ra". Yaku wa ASANG ni" Mao"So ngore bao" thaug' byid: yang: ngad: ra"- ga: tau" ra".

²¹Isag wa Yaku re jeju khyo" nao re ngo qo" tin: sho' te' lo ri: nao wa gaigai: yao: Eso: ngad: i? ga: ta" ra".

²²Yaku wa yao: pho" jhao" te' sho' qui" ye: mung: yao: pho" wa yao: re soe' qu" yang:- ni" thoe wa Yaku nho: thoe we' dau: kyi:- ngadqere: ni" lo, pau" jham wa Eso nho: lo, ru" ru ngad: kyi:- ga: ta" ra".

²³Isag wa Yaku re maba: kho' ngad: ra". Pe"mung:ga"re yao" lo, wa Eso nho: lo, ru: shomug' hab' yang: ngad: ra". Isag wa Yaku re yao" shaman" dao: byid: nae" qid re-

²⁴Nao wa gaigai: yao: Eso ngad: i? ga: dam: myid' ra". Yaku wa ngo ngad: va"- ga: phaug' tau" ra".

²⁵Ailao" Isag wa sho: ngojhao" cilo ri:-ngo aire bin: zo: lao" nao re ngo shaman" byid: nae"- ga: ta" ra".Yaku wa ai: sho: re Isag jhao" cilo byid: mung:- yao: wa sabyi qang: rere: yao: jhao" cilo byid' ra".

²⁶Ai: thao yao: pho" wa Yaku re nga" zo: we"- te' lo mung: ngore bo baug baug la,- ga: ta" ra".

²⁷Yaku wa yao: re bobaug baug nae" te' lo: au: Isag wa yao" mai bau: re sheim nae: yu mung: yao" shaman" dao: Yaku re byid' ra". Isag wa- nae pyo" ra" nga" zo" nho: sheim wa Mao"So shaman" byid' to" ra" Yothaung: sheim we' dakhyo: ngad: ra".

²⁸Mao"So wa mug:gaung mae" nao re nghin khyo" byid: mung: ni" yothaung: jham re myid xau gai nhao vashao:- yao: wa nao re byid: vashao:-

²⁹Byumyu" qe wa ni" nho: daui daui mo, boe" vageshao:- amung: byu qere ni" qhid' kheim: mae goe; gyo" vageshao:- nao wa ni" ba nam sang: cao: alhab' mo; dao mae eib vashao:- amung: ni" myhi" nho: myid:zo: qe wa ni" qhid' kheim: mae goe; gyo" vageshao:- nao re nhang" ra" mo, wa nhang" ru qhug' vageshao:- amung: nao re shaman" byid' ra" mo, wa shaman" byid' ru qhug' vageshao:- ga: yao: re shaman" byid' ra".

³⁰Isag yao" shaman" dao: bin: ta" thao Yaku thug' lo" we' yao: mao: Eso wa sho: kung" rumae" joe" lo: ra".

³¹Eso re: sho: re gyai myho' sho' yhaung" mung: aire yao: pho" jhao" cilo byid' ra". Yao: wa nga" pho" we" jeju we' to" zaung yang: nao ngore qo" shaman" byid: nae" qhid' mae" nao jhao" ngo cilo byid' ra" sho: re zo: wa,- ga: ta" ra".

³²Ailao" Isag wa nao khag' ngad: i? ga: myid' ra" yao: wa- ni" zoqhid' Eso ngad:- ga: tau" ra".

³³Aimung: Isag wa gaung geim" din: gyaug: nin" ru we' ai: gug'nyhug' re se' yang: ngojhao" sho: yhaung" cili" yaug wa khag' ngad: i? Nao majoe" li" shire ngo zo" pye' va". Ngo wa nga" lo" thao" shaman" dao: re yao: re byid' pye' va". Aimung: ai wa apyad ato yao" mae" ngad: ava"- ga: ta" ra".

³⁴Ce: dao: re the' gyo: lao"- yao: wa thoe qi: ke' yang: ngug mung: gyai nhag' lam: no: ru we' nga" pho" we"- ngore ni" shaman" dao: byid: la,- ga: mho' ra".

³⁵Isag wa ni" nhaung: li" mung: ngore mhug' pyag' zo" pye' ava". Yao: wa ni" nho: shaman" re yu: pye' ava"- ga: tau" ra".

³⁶Ailao" Eso wa yao: ngore mhug' zo" ru celhang wa shid' lhang ein: lhang ngad va". Yao" mang Yaku ngad: rure khag' mug' nae" khyo majo,- yao: wa nga" zoqhid' aya: re yu: pye' byid: mung: ana" re: nga" nho: shaman" jeju re yu: pye' ra". Nga" qhid' mae" shaman" dao: nao matang" to: lo: i? ga: ta" ra".

³⁷Isag wa ngo wa yao: re ni" dao mae zug: kad' nhao: pye' va". Amung: yao" ba nam sang: cao: alhab' re yao" jeim qe doe, nhao: pye' va". Ngo wa yao: re gaug zo maui: lam: we' sabyi qang: byid' to: va". Nga" zo: we"- ana" ngo wa ni" qhid' mae" pe" kad' byid: nae" re: maqo" lo: ga: tau" ra".

³⁸Eso wa xo' yang: yao: pho" re- nga" pho" we"- nga" pho" we" nao wa shaman" dao: daja: za: qo" i? Ngo rere: shaman" byid: la, ga: ngug yang: mho' ra".

³⁹Ailao" Isag wa ni" qhid' mae" mug:gaung mae" nghin magyo" byid: nae"- ni" qhid' mae" myid xau gai: ra" yothaung: majo, nae".

⁴⁰Nao wa nao yao" shae: yang kao so' daui: li" nae". Ngadqere: ni" nhaung" nho: jeim doe; li" nae" ai ngad sho' ngadqere:- nao yao: re geim lau to" lao" wa yao" lo, mae" qo" loe; li" nae"- ga: yao: re ta" ra".

⁴¹Yao: pho" wa Yaku re shaman" dao: byid' pye' va" ruyang Eso wa Yaku re nghang" ra". Eso wa- nga" pho" shid yang: kaug' ngug nae" ba na wa jhao" li" na: ava"- ai:thao re ngo wa Yaku re se' pye' nae"- ga: yao" nhag' khug mae myid: to" ra".

⁴²Ngadqere: Rebekha wa Eso nho: yaung: to" ra" khyo re the' gyo" ra". Amung: yao: wa Yaku re khai: yu yang:- Yaku re- tae" gyo: wa,- ni" mao: Eso wa nao re se' pye' nae" yaung: na: ra".

⁴³Ana" nga" zo: we" ngo ta" rure kad' wa,- Haran mae na: ra" nga" mao: La Ban jhao"- ana" yao: ye: wa,-

⁴⁴Ni" mao" nho: nhag' yo: gyo" mung:- nao yao: re kad' va" khyo re to" myhid' yo, joe" sho'-

⁴⁵La Ban we' dayo, zo: yena: jo, wa,- ai:thao ngo wa byu dayaug yaug re li" dam: jhui: yu nhao nae". Ngo wa pe"mung: yang: daba mae za: nga" yauggai zo: shid' zo" geim" seim" kham nae" i? ga: ta" ra".

⁴⁶Rebekha wa Isag re ngo wa Eso nho: taung bug amyu" yham sang myhi" qe: mathao: yang no boe" mung: shobyo; ra". Yaku re ce: Hiti myiqe: nau" qe mae" dayaug re lo, xo' yu: re wa ngo wa qo" shid nae kyi: ga: ta" ra".