Read Maru APAN AQAO: 30 Bible Online

APAN AQAO: 30 - Maru bible

APAN AQAO: 30

¹Ngadqere: Rakhela wa Yaku re zo: dau dayaug re: makhau byid: ngad: ra". Airumung: yao: wa yao: bai: re myid nug' li" mung: Yaku re ngore zo: dau byid: la,- mangad: lao" wa ngo shid: li" nae"- ga: ta" ra".

²Yaku wa Rakhela re nhag' yo: mung: ngo wa Mao"So: jo, qo mae maqo" yu ngad: ra". Yao: wa nao re zo: dau maqo" nae" tam" to: yaug ngad: ra"- ga: ta" ra".

³Ailao" Rakhela wa cemae nga" jeim myhi" Billa na:ra"-yao: we' yab wa, airulao" yao: wa nga" qhid' mae" ngore zo: dau qo" khau byid' li" nae" ngad: ra". Ceru: yao: khyo" yang ngo wa yao: myhi" dayaug qo" boe" lo zai ngad: ra"- ga: ta" ra".

⁴Airumung: Rakhela wa Billa re yao" yham sang pho" re byid' ra". Yaku wa Billa we' gaung sho: jho" zam" ako".

⁵Billa wa gaung la" li" mung: Yaku re yauggai zo: dayaug khau byid' ra".

⁶Ailao" Rakhela wa Mao"So wa nga" bo: de,yang: dao: kho' byid' ava". Yao: wa nga" akyu" mho' thoe re the' gyo: mung:- ngore yauggai zo: dayaug byid' ava"- ga: ta" ra". Aimung: Rakhela wa yao: re Dan ga: mhang" ra".

⁷Billa wa gaung dam: la" li" mung: Yaku re yauggai zo: shid' yaug ein: yaug khau byid' ra".

⁸Rakhela wa- ngo wa nga" bai: we' gyai jho" qhao: va"- ngadqere: ngo aung va"- ga: ta" ra". Aimung: Rakhela wa yao: re Nabhtali ga: mhang" ra".

⁹Lea wa zo: dau khau: ru thang: pye' va" rure ba lao"- yao" jeim myhi" Zilpa re yham sang myhi" kad' nae" khyo" Yaku re byid' ra".

¹⁰Airumung: Zilpa wa Yaku re yauggai zo: dayaug khau byid' ra".

¹¹Lea wa- ngo wa zhau: vha: gai va"- ga: ta" ra". Aimung: Lea wa yao: re Gad ga: mhang" byid' ra".

¹²Zilpa wa Yaku re yauggai zo: gatau dayaug dam: khau byid' ra".

¹³Lea wa ngo wa ngaui lho" ra". Ana" myiqe: qe wa ngore ngaui lho" yaug ga: mhang" li" genae"- ga: ta" ra". Amung: yao: re Ashe ga: mhang" byid' ra".

¹⁴Jung: gaug yad yo, gyo: mae Rubin wa Yothaung: khyo ye: mung: bo, de, cid' shi: re yemyao ra". Rubin wa aire yao: myhi" Lea jhao" cilo byid' ra". Rakhela wa Lea re jeju we' ni" zo" nho: bo, de, cid' shi: ngore dajhid' byid: la,- ga: mho' ra".

¹⁵Lea wa nao wa nga" yham sang pho" re lhad' ru za: maga" shi i? Ana" nao wa nga" zo" nho: bo, de, cid' shi: re lhad' yu nae" lhao" re: seim" na: i?- ga: tau" ra". Ailao" Rakhela wa nao ngore ni" nho: bo,de, cid' shi: byid: nae" ngad: re wa ana" myi nao Yaku we' qo" yab zai ngad: ra"- ga: ta" ra".

¹⁶Myi" thao Yaku yothaung: mae" joe" vao lo lao" Lea wa yao: re yetug: yu mung:- nao wa ana" myi ngo we' yab zai ngad:-pe"mung:ga"re ngo wa nga" zo" nho: bo, de, cid' shi: re ni" qhid' mae" aphug' byid' to: va"- ga: ta" ra". Airumung: ai: myi Yaku wa Lea we' gaung sho: jho" zam" ako".

¹⁷Mao"So wa Lea nho: akyu" mho' thoe re tau: byid: mung: yao: wa gaung la" li" yang: Yaku re yauggai zo: ngo" yaug ein: yaug re khau byid' ra".

¹⁸Ailao" Lea wa ngo wa nga" jeim myhi" re nga" yham sang pho" re byid: va" ruyang Mao"So wa ngore aphug' jhaung qhu" byid' ava"- ga: ta" ra". Aimung: Lea wa yao: zo: re Isakha ga: mhang" ra".

¹⁹Lea wa gaung dam: la" li" mung: Yaku re yauggai zo: kyaug' yaug ein: yaug khau byid' ra".

²⁰Ailao" yao: wa Mao"So wa ngore jhaung qhu" gai byid' ava"- ngo wa yao: re yauggai zo: khyaug' yaug khau byid: va" ruyang ana" wa nga" yham sang pho" wa ngore khae: yu nae" va"- ga: ta" ra". Airumung: Lea wa yao: re Zebulun ga: mhang" ra".

²¹Ai: thao re Lea wa myiqe: zo: dayaug khau: ra". Yao: re Dina ga: mhang" byid' ra".

²²Ai: thao re Mao"So Rakhela re myid: beim: byid' ra". Yao: wa Rakhela nho: akyu" mho' thoe re tau: byid: mung:- yao: re zo: dau khau nhao: ra".

²³Rakhela wa gaung la" li" mung: yauggai zo: dayaug khau: ra". Yao: wa Mao"So wa ngore yauggai zo: dayaug re byid' ra" khyo" yang myo, nho ngai: rure yu: pye' ava".

²⁴ASANG wa ngore yauggai zo: gatau dayaug byid: vashao:- ga: ta" ra". Aimung: Rakhela wa yao: re Yoseb ga: mhang" byid' ra".

²⁵Yoseb khau thao re Yaku wa La Ban re ngo nga" pho" yham khyo qo" tug' lo" nae" qhid' mae" ngore akhang" byid: la,-

²⁶Nao re ngo mau" zaui: byid: yang: ngo qo" yu: ra" nga" yham sang myhi" bam re we' nga" zo: qe re ngore byid: la,- amung: ngo to" lo" nae". Ngo nao re khoqhi" gai sho' caung da" byid: va" rure nao ba: ra"- ga: ta" ra".

²⁷Ailao" La Ban wa- ngore ce: dao: ta" nhao la,- ASANG wa ni" mathao: yang ngore shaman" byid: va" rure Byo: qam: so' khyo" ba: yu va".

²⁸Ni" nho: lao jhao: phug' jham re ta" la,- ngo byid: nae"- ga: ta" ra".

²⁹Ailao" Yaku wa ngo wa ni" qhid' mae" khoru: mau" zaui: byid: va" ru we' ngo gun caung yang: ni" nho: yao kyaung" cad' kyaung" jham khonho" je" li" va" rure nao ba: ra".

³⁰Ngo majoe" li" shire nao wa dajhid' za: qo" ru wa gyai laug sho' myo" li" ava". ASANG wa ngo khai: ye: khai: nao re shaman" byid' ava" ana" wa ngoyao" qhid' mae" kad' yu nae" ayo, ngad: ra"- ga: ta" ra".

³¹La Ban wa nao re ngo pe" byid: zai i? ga: myid' ra". Ailao" Yaku wa ngo wa lao jhao: phug' pe" re: ma-o ngad: ra". Ce: pha,jhi" byid' ra" khyo re nao myid vang" yang: ngad: re wa ngo wa ni" yao kyaung" cad' kyaung" jham re xo' yang: gun caung byid: nae".

³²Ana" ba ni" yao kyaung" cad' kyaung" jham re cao" qu" nhao mung: yao nau" ano, dau: khao: ngo" re we' cad' be, nau" ataug' dau: khao: ngo" taung" yu: to: nae" akhang" byid: la,- aigu: wa ngo o: ra" lao jhao: phug' alhab' ngad va"- ga: ta" ra".

³³Ngo din:man: rure thao phyao: nao laui laui za: ba zai ngad: ra". Nao nga" lao jhao: phug' re li" ca: qu" ra" au: ngo wa- ataug' atung" mangad: ra" cad' be, dadau: dau: qo" yang: ngad: re- mangad: lao" yao ano, mangad: ru dadau: dau: qo" yang: ngad: re ai wa khug' to" ru ngad: rure nao ba: li" nae"- ga: ta" ra".

³⁴Ailao"- La Ban wa ngo myid vang" ra"- nga" shid' ug zo: nao pha,jhi" byid' ru we' dakhyo: kad' lang:- ga: tau" ra".

³⁵Ai: ba re La Ban wa akhyo: atung" mung: ra" cad' be, lo: jham re we' akhyo: ataug' atung" mung: ru we' akhyo: aphyu: yang tung" ra" cad' myhi" jham re khyin: pye' ra". Yao: wa yao ano, alhab' rere: khyin: pye' ra". Aimung: aijham re caung nae" qhid' mae" yao" yauggai zo: qe re mau" byid' ra".

³⁶Aimung: ce: yao kyaung" we' daga" Yaku mae" sam ba su" ra" jo, qo khyo ye" lo" ra". Yaku wa La Ban nho: dang: ra" gug'nyhug' kyaung" jham re caung byid' ra".

³⁷Ailao" Yaku wa Libna gae- Luza gae- Almon gae anyug akaung jham mae" thau: yu mung:- akaung jham mae aphyu khyo: sho' akaug' daqhae: re qhid' pye' ra".

³⁸Aimung: Yaku wa ai: sag' kaung jham re yao jham qid shaug' ko" ra" thaung: lhao: qhid' au: mae khyo" to" ra". Gug'nyhug' jham qid shaug' nae" joe" lo gelao" amyug: jho" cao" geyang: Yaku wa ai: akaung jham re aitau mae to" ra".

³⁹Airumung: cad' be, jham ai: sag' kaung jham: qhid' au: mae amyug: do, gelao"-cad' be, jham wa atung"- akhyo: khyo" ra" cad' nau" jham xao" ako".

⁴⁰Yaku wa yao jham re cad' be, jham we' kho' to: mung: La Ban nho: yao kyaung" cad' kyaung" jham mae" ataug' we' ano, jham: shad' khyo myo, nho qang yang: nha: to" ra". Ceru: Yaku wa yao: yao" yao kyaung" cad' kyaung" re kad' yu mung: La Ban nho: gug'nyhug' jham we' gatau kho' to" ra".

⁴¹Qam: bo: ra" gug'nyhug' jham amyug: do, gelao" ai: sag' kaung qhid' kheim: mae amyug: cao" geshao: ga: Yaku wa ai: sag' kaung jham re yao: bam: qhid' kheim: qid thaung: lhao: tau mae khyo" to: byid' ra".

⁴²Ngadqere: yao: wa qam: nang" ra" gug'nyhug' jham: qhid' kheim: mae wa ai: sag' kaung jham re mato: byid: ngad: ra". Mamyao" re qam: nang" ra" gug'nyhug' alhab' wa La Ban nho: ngad mung: qam: bo: ra" gu: alhab' wa Yaku nho: ngad: ra".

⁴³Ceru: kad' mung: Yaku wa gyai qo" yaug boe" li" ra". Yao: wa yao kyaung" jham- jeim jham- Gola:u jham- loze jham myo: sho' qo" li" ra".