Read Maru APAN AQAO: 33 Bible Online

APAN AQAO: 33 - Maru bible

APAN AQAO: 33

¹Eso wa yao" byu byid yo we' daga" joe" li" na: rure Yaku myao: ra". Airumung: yao: wa zoshao qere Lea- Rakhela- myingai shid' zo: bam re kho' byid' ra".

²Yaku wa myingai shid' zo: re we' yao: shid' tao: zoshao qere sao qhid' mae- ai: dao mae Lea we' yao" zoshao qere- aimae" lo" thao" mae Rakhela we' Yoseb re wa lo" thao" mae su: nhao: ra".

³Yaku wa yao: bam qhid' au: mae ye" lo" mung:- yao: wa yao: mao: khyo te' ye" au: nhad' lhang myid gaung khyo goe; gyo" ra".

⁴Ngadqere: Eso wa Yaku re tug: yu nae" tao" li" mung: yao" lo, yheim" ke' yang: Yaku re li" po: ra". Amung: bobaug baug byid' ra". Yao: shid' tao geim" ngug: ako".

⁵Eso wa gam: sho' lhang: qu" mung: myiqe: qere we' zoshao qere myao lao"- ce: nao we' daga" ngad: mo, wa khag' bam ngad: ako" i? ga: myid' ra". Ailao" Yaku wa- nga" mao: we" cebam Mao"So: yang ngore byid' to" ra" zoshao qe ngad: ako"- ga: phaug' tau" ra".

⁶Ai: myingai shid' yaug wa yao: shid' zo" nho: zoshao qe we' li" mung: goe; gyo" ako".

⁷Ai: thao Lea we' yao" zoshao qe li" mung:- lo" thao" mae Rakhela we' Yoseb li" mung: goe; gyo" ako".

⁸Eso wa ngo we' jho" qhug' ra" ai: gatau: phung: wa pe" ru: i? Airu wa pe" ein: ru ngad: i? ga: myid' ra". Yaku wa- airu wa nao re ngaui nhao nae" qhid' mae" ngad: ra"- ga: phaug' tau" ra".

⁹Ngadqere: Eso wa nga" nhaung: we"- ngo wa laug sho' qo" va"- nao qo" rure nao ngho" wa,- ga: tau" ra".

¹⁰Yaku wa airu: mangad:- nao ngore ngaui: ru ngad: re wa jeju khyo" nga" jhaung qhu" re khae: yu byid: la,- nao ngore jhid' jhid' kug' kug' kad' va" ruyang ni" myo, khung: re the' myao: ru wa nga" qhid' mae" Mao"So: myo, khung: re the' myao: ru we' dakhyo: ngad: ra". Ana" nao wa ngore gyai yao: gai kad' ava".

¹¹Jeju khyo" ni" qhid' mae" ngo cili" ra" ce: jhaung qhu" re khae: yu byid: la,- Mao"So wa ngo nhag' khyag' gai kad' byid: va" ruyang ngo qo" ru ja: khao: ngo" re byid' ava" ga ra". Yaku wa Eso ai: jhaung qhu" re khae: yu sho' xo' yang: jhan: byid' ra".

¹²Ailao" Eso wa- ngonhaung" seim" jin" yang: to" lo" gelang: se,- ni" qhid' au: khyo ngo ye" lo" nae"- ga: ta" ra".

¹³Yaku wa zoshao qe qam: nang" rure nao ba: ra". Amung: ngo wa yao jham we' gug'nyhug' jham yao: bam: anau" qe qhid' mae" myid ca" ra". ` Aijham re daba za: mae za: phin" keim" lo" re phung: geim" shid: pye' li" genae".

¹⁴Jeju khyo" nao wa nga" qhid' au: khyo ye" lo" wa,- ngo wa zoshao qe we' gug'nyhug' jham re daga" ngo qo" myhi: ra" qhi" phyad sho'- su: yang: Edom mae nao re myhi sho' zo" mae" cao" li" nae"- ga: tau" ra".

¹⁵Eso wa- airu: ngad lao" re:- nga" byu qe damyo" re nao we' nha: to: byid: co' nae"- ga: ta" ra". Ngadqere: Yaku wa pe" re: maca" nao ngaui nae" rure za: ngo o: ra"- ga: tau" ra".

¹⁶Airumung: Eso wa ai: ba re yao: Edom khyo to" phao: lo" ra".

¹⁷Ngadqere: Yaku wa Sukhod khyo ye: yang: aitau mae yao" qhid' mae" yham yekad' mung: yao" gug'nyhug' jham: qhid' mae" yham yekad' ra".Ce: mathao mae ai: jo, qo wa Sukhod ga: mhang" ra".

¹⁸Yaku wa Mesopotamia mae" dam: tug' lo mung: Khanan mung" mae" Shekhem vomo" khyo pe" maqo lo: joe" lo mung:- ai: vomo" nhae mae yao" jamu re lokad' ra".

¹⁹Yao: wa ai: yo myid re Shekhem nho: yao: pho" Hamo nho: myid:zo: qe mae" ngaui dayo kye' yang vai: yu: ra".

²⁰Yao: wa aitau mae phan dalam: kad' mung:- aire El Israel nho: Mao"So:- ga: mhang" ra".