Read Maru APAN AQAO: 35 Bible Online

APAN AQAO: 35 - Maru bible

APAN AQAO: 35

¹Mao"So wa Yaku re- Dalhang: dae Bethela khyo ye: mung: aimae yena wa,- ni" mao: Eso lo, mae" nao phao: qin" ra" au: nao re na: qhu" ra" Mao"So ngad: ra" nga" qhid' mae" aitau mae phan dalam: kad' wa,- ga: ta" ra".

²Airumung: Yaku wa yao" yham byu qe we' yao: we' daga" ngad: ra" mo, alhab' re naonhaung" qo" ko" ra" taung bug so jham re yu: pye' ge,- naonhaung" yao" gaung re kyang" san: pye' mung:- mai bau: asan gaug: ve, ge,-

³Ngonhaung" wa ce: jo, qo mae" to" mung:- Bethela khyo ye: zai ngad:- aitau mae ngo qug: khai: qhug' ra" ayo, mae ngore bao" thaug' byid: mung:- ngo khai: joe" khai: ngo we' daga" ngad: ra" Mao"So: qhid' mae" phan dalam: re ngo yekad' nae"- ga: ta" ra".

⁴Airumung: yao: bam wa yao: bam qo" ra" taung bug so alhab' re we' yao: bam xaui" ci: ra" noxaui: jham alhab' Yaku re byid' ako". Yaku wa aijham re Shekhem nhae mae" shikhai:: zang qao: mae nyhab' pye' ra".

⁵Yaku we' yao" yauggai zo: qe to" lo" ko" au:- ai: avai: ayae vogaung: jham mae" vobyu qe wa qi: sho' gyaug: pye' geyang: yao: bam: thao macao" khe' ngad: ako".

⁶Yaku wa yao" byu qe alhab' ana" Bethela ga: mang: ra" Khanan mung" Luza vogaung: khyo joe" lo: ako".

⁷Yaku wa aitau mae phan dalam: kad' mung: ai: jo, qo re Mao"So: Bethela ga: mhang" ra". Pe"mung:ga"re yao: wa yao: mao" lo, mae" phao: lo" ra" au: Mao"So aitau mae yao: yao" gaung re Yaku re na: qhu" byid: yang: ngad: ra".

⁸Rebekha nho: zojhui: okaung Debora shid mung: Bethela qid bang: shad mae" zai gae qao: mae nyhab' pye' ako". Airumung: ai: jo, qo re ngug: ra" shikhai: gae ga: mhang" ako".

⁹Yaku Mesopotamia mung" mae" dam: tug' lo lao"- Mao"So wa yao: re dam: na: qhu" mung: yao: re shaman" byid' ra".

¹⁰Mao"So wa yao: re- ni" mang wa Yaku ngad: ra"- ngadqere: ana" mae" thoegu: Israel ngad: li" nae"- ga: ta" mung: Mao"So wa yao: re Israel ga: mhang" ra".

¹¹Aimung: Mao"So wa Yaku re- ngo wa qam: bo: thao" ra" Mao"So ngad:- zo: dau myo: sho' qo" ge,- byumyu" qe wa nao mae" ko' thug' li" genae"- nao wa kho:kham qenho: phug' pho" ngad: li" nae".

¹²Ngo wa Abraham re we' Isag re byid' to" ra" mung"dan: nao re byid: nae". Aire ni" myid:zo: qere re: ngo byid: nae"- ga: ta" ra".

¹³Ai: thao Mao"So wa yao: khyi" mae" lo" byaug: ra".

¹⁴Mao"So yao: re dao: jhau: ra" jo, qo mae Yaku wa myid: beim: nae" axam: laug zang zhaug' mung:- ai: dao mae sabyi qang: we' zhanlun xau vhe' sheim: yang: aire qhaug' byid' ra".

¹⁵Yaku wa ai: jo, qo re Bethela ga: mhang" ra".

¹⁶Yaku we' yao" yham byu qe wa Bethela mae" to" mung:- yao: bam Ephrad joe" nae" dajhid' va: shi" au:- Rakhela wa zo:khau yo, joe" lo mung:- yao: wa zo:khau qug' na: ra".

¹⁷Rakhela wa zo:khau no xo: thao" sho' no: au: zo:khau byid: yaug wa yao: re- Rakhela we" daci" wa,- yauggai zo: ngad: ra"- ga: ta" ra".

¹⁸Ngadqere: Rakhela wa shid: lo" na mung: so' she: thao" lo" na: au: yao: wa yao" yauggai zo: re Benoni ga: mhang" ra". Ngadqere: yao: pho" wa yao: re Benyamin ga: mhang" byid' ra".

¹⁹Rakhela shid lao"- ana" Bethela ga: mhang" ra" Ephrad khyo ye" ra" khyo nhae mae nyhab' pye' ako".

²⁰Yaku wa aitau mae myid: beim: nae" axam: laug zang zhaug' mung: airu ana" ba joe" sho' Rakhela nho: lab aso: ngad: jo, shi" ra".

²¹Yaku wa xo' ye" lo" mung: yao" zaung re Ede gyebyu jamu thoete' mae yekad' ra".

²²Yaku ai mug: mae na: ra" gyo: mae Rubin wa yao: pho" nho: myingai mae" dayaug ngad: ra" Bila we' gaung sho: jho" zam" ako". Yaku wa ai: khyo re the' gyo: mung:- nhag' yo" ra". Yaku wa Yauggai zo: daxe: shid' yaug qo" ra".

²³Lea nho: yauggai zo: qe wa- Rubin (Yaku nho: zoqhid') Simon- Levi- Yuda- Isakha- Zebulun ngad gemung:-

²⁴Rakhela nho: yauggai zo: qe wa- Yoseb we' Benyamin tao ngad: ako".

²⁵Rakhela jeim myhi" Bila nho:yauggai zo: qe wa Dan we' Nabhtali tao ngad: ako".

²⁶Lea jeim myhi" Zilpa nho: yauggai zo: qe wa Gad we' Ashe nhae tao ngad: ako". Ce: yauggai zo: qe wa Mesopotamia mung" mae khau mo, ngad: ako".

²⁷Yaku wa Abraham we' Isag na: lai: loko" ra" Hebron nhae mae" Mamre mae na: ra" yao: pho" Isag jhao" ye" ra".

²⁸Isag wa apyad dayo: she' xe zin daui: na mung:-

²⁹Mao: thao re shid: lo" ra". Yao" nho: yauggai zo: Eso we' Yaku tao wa yao: re nyhab' shaung: pye' ako".