Read Maru APAN AQAO: 39 Bible Online

APAN AQAO: 39 - Maru bible

APAN AQAO: 39

¹Ana" Ishmae byu qe wa Yoseb re Egutu mung" khyo jhui" lo" mung: kho:kham kho" zaung" ra" gyezug: ngad mung:- kho:kham pho" nho: zug: ngad: ra" Potipha re aung: byid' ako".

²ASANG wa Yoseb we' daga" ngad mung: yao: re aung myaug nhao: ra". Yoseb wa Egutu byu yao" asang: yham mae na: ra".

³ASANG wa Yoseb we' daga" ngad mung: yao: kad' ra" lo, mau" ja: khao: ngo" mae aung myaug nhao: rure yao" asang myao: ra".

⁴Potipha wa Yoseb re ngaui mung: yao: re yao" daui daui yaug kad' nhao: ra". Airumung: yao: wa Yoseb re yao" yham re we' yao: sang: ra" gu: alhab' re au: jhaung kad' nhao: ra".

⁵Ai: ba na mae"- ASANG wa Yoseb nho: mathao mae ai: Egutu byu asang: nho: yham byu qere- yao" yham mae yao: sang: ra" gu:- alhab' yao" yomyid alhab' re shaman" byid' ra".

⁶Potipha wa yao: qo" ra" gu: Yoseb lo, mae ab byid' to: mung:- yao: zo" ra" zo:ve mae" je yang: pe" rere: gaung mayug lo: na: ra". Yoseb wa byu dau ga" mung: myo,nho yaung" yaug ngad: ra".

⁷Ai: thao mataung" myao" re yao" asang: yham sang myhi" wa Yoseb re qu" shab' mung: yao: we' yab nae" qhid' mae" lhaung: ra".

⁸Yoseb wa aire ha: pye' mung:- yao: re- qu" wa, nga" asang wa ngo cemae na: jo; ruyang yham khug mae" pe" ja: rere: gaung mayug ca" ngad: ra". Yao: wa ngore yao: qo" ra" gu:- alhab' re au: jhaung kad' nhao: to" ra".

⁹Ngo wa ce: yham mae yao: qhi" yao: kheim: so'qo" yaug ngad:- yao: wa nao mae" je yang: ngore pe" rere: matam" to: byid: ngad: ra". Airu: ngad: re ngo wa airu" ra" mangad mangung" lo, mau" re kad' mung: Mao"So re qobo shad' lhoe" nae" i? ga: ta" ra".

¹⁰Yao: wa Yoseb re ba khao: ngo" lhaung sho' ngadqere: Yoseb wa yao: we' mayab qad ngad: ra".

¹¹Ngadqere: daba mae yao" mau" zaui: nae" qhid' mae" yham khug khyo vao lo" ra" au:- yham mae" daui daui mo, dayaug re: ai: mae mana ngad: ako".

¹²Yao: wa Yoseb nho: bau: qhang re zaui: yang: ngo we' yab lang: ga: lhaung: ra". Ngadqere: Yoseb wa phao: loe, mung: yao" lo, mae bau: qhang khao" khyad' to: co' yang: taung gaung khyo tao" thug' lo" ra".

¹³Yoseb wa yao" bau: qhang khao" khyad' to: co' mung: yham taung gaung khyo tao" lo" byaug: rure yao: myao lao"-

¹⁴Yao: wa yham mae" daui daui mo, re yao: khai: yu mung:- cere qu" ge, nga" yham sang pho" jhui" lo: ra" ce: Hebre byu pho" wa ngonhaung" re roe" na: ra". Yao: wa nga" yab qe, khyo vao li" mung:- ngore deim" zag: yab nae" seim" ra". Ngadqere: ngo qo" hug' ra" qhi" zag: hug' ke' ru ngad:.

¹⁵Ngo zag: hug' ke' lao"- yao" bau: qhang nga" nhae mae to: co' yang: yao: wa taung gaung shad' khyo tao" thug' lo" ra"- ga: ta" ra".

¹⁶Yao: wa Yoseb nho: asang yham khyo joe" lo yo, joe" sho' Yoseb nho: bau: qhang re yao" lo, mae zaui" ci: ra".

¹⁷Ai: thao yao: wa Potipha re nao ce: yham khyo jhui" lo: ra" ai: Hebre jeim pho" wa nga" qe, khyo vao li" mung: ngore li" roe" ra".

¹⁸Ngadqere: ngo zag: hug' ke' lao"- yao" bau: qhang nga" nhae mae to: co' yang: yao: wa taung gaung shad' khyo tao" thug' lo" byaug: ra"- ga: ai: khyo re yao: lham: ta" kyo" ra".

¹⁹Yoseb nho: asang wa nhag' kyid kyid yo: mung:-

²⁰Yoseb re taung: mung: kho:kham nho: kyam: byu qere lhaung" to" ra" thaung: khug mae ke' to: mung:- Yoseb wa ai: khug mae na: jo; ra".

²¹Ngadqere: ASANG wa Yoseb we' daga" ngad mung:- yao: re shaman" byid' ra". Airumung: thaung: agyi pho" wa Yoseb re ngaui: ra".

²²Ai: thaung: agyi pho" wa Yoseb re- gatau kyam: byu qe alhab' mo; nho: au: jhaung kad' nhao mung:- thaung: khug mae" mau" zo" ja: khao: ngo" re qo yu nhao: ra".

²³ASANG wa Yoseb we' daga" ngad mung:- yao: kad' ra" lo, mau" ja:khao: ngo" re aung myaug nhao: ruyang thaung: agyi pho" wa Yoseb re qo byid' to" ra" thaung: khug mae" mau" pe" ja: rere: madam: lhang: qu" qo ngad: ra".