Read Maru APAN AQAO: 4 Bible Online

APAN AQAO: 4 - Maru bible

APAN AQAO: 4

¹Ai: thao Adam wa yao" yham sang myhi" we' gaung sho: jho" zam" yang: Eva wa gaung la" li" mung: yauggai zo: dayaug khau: ra". Amung: yao: wa ASANG nao re bao" thaug' byid: yang: ngo wa yauggai zo: qo" va"- ga: ta" mung: Eva wa yao: re Ka-in ga: mhang" byid' ra".

²Ai: thao re Eva wa Abela ga" ra" yauggai zo: gatau dayaug re dam: khau: ra". Abela wa yao zam: yaug boe" lo mung: Ka-in yaug wa yo kad' zo: yaug ngad: ra".

³Dayo, kyo thao mae Ka-in wa yao" gaug zo maui: lam: mae" dajhid' re cili" mung: ASANG re xeim: khyo" li" qhaug' byid' ra".

⁴Ailao" Abela wa sao qhid' khau: ra" yao" yao dadau: re ci: li" mung: aire se' yang: gai: thao" ra" gaung dau jham re xeim: khyo" ASANG re li" qhaug' byid' ra". ASANG wa Abela we' yao" xeim: re ngaui: ra".

⁵Ngadqere: Ka-in we' yao" xeim: re kam" wa yao: ngag ha: pye' ra". Ka-in wa nhag' jam: yo" li" mung: yao: wa myo, nho qeim sho' nhag' yo" ra".

⁶Ailao" ASANG wa Ka-in re pe"mung: nao nhag' yo" i? Ni" myo, khung: pe"mung: qeim: i?

⁷Nao jo: ra" khyo" kad' va" ngad: re wa nao wa qisam: su ngad nae" ngad: ra". Ngadqere: nao wa makhyang" ru kad' va" ruyang qobo wa ni" kham: mo" dung: mae ab' jo; ra". Qobo wa nao re eib nug: na: ra". Nao kam" wa aire aung: pye' ca" ra"- ga: ta" ra".

⁸Ai: thao Ka-in wa yao: nhaung: Abela re- pa din" khyo ye: lang: ga:ta" ra". Yao: shid' tao pa: din" mae na ko" au: Ka-in wa yao: nhaung: shad' khyo lhang: lo mung: yao: nhaung: re se' pye' ra".

⁹ASANG wa Ka-in Ni" nhaung: Abela khai: mae ngad: i? ga: myid' ra". Ka-in wa ngo maba ngo wa nga" nhaung: re jhui: yaug ngad: i? ga: tau" ra".

¹⁰Ailao" ASANG wa ce: qu" gyaug qu" lhaung sho' ra" mau" re nao pe"mung: kad' va" i? Ni" nhaung" nho: sa: wa myid gaung mae" lage, phaug' byid: nae" yao: ra" thoe khyo" ngore yao: na: ra".

¹¹Nao wa nhang: kheim: zao" ava" myid gaung re yo maqo" zaui: zo: lo nae". Nao yao: re se' ra" au: aire khae: yu nae" qhid' mae" myid gaung wa nhad' ho" va" ruyang ni" nhaung" nho: sa: dag: jo; ava".

¹²Nao wa gaug zo maui: lam: re qam: ke' yang: qho: ngadqere: myid gaung wa ashi: pe" mazaui: byid: nae". Nao wa myid gaung dao mae yham yo maqo" lo: du" lae" qin" yaug boe" li" nae"- ga: ta" ra".

¹³Ka-in wa ASANG re ce: qobo dae wa nga" qhid' mae" gyai la" ra".

¹⁴Nao wa ngore myid gaung mae" khe' thug' ke' mung: ni" qhid' kheim: mae" thug' lo" nhao: ava". Ngo wa myid gaung dao mae yham yo maqo" lo: du" lae" qin" yaug boe" mung:- ngore the' myao yaug khag' ngadqere: ngore se' li" nae"- ga: ta" ra".

¹⁵Ngadqere: ASANG wa Mangad: nao re dayaug yaug se' ngad: re wa lage, phaug' ru nhad' zhao" qhug' kham zo" li" nae"- ga: tau" ra". Aimung: yao: re the' myao: ra" yaug khag' yang re: mase' genae" qhid' mae" ASANG wa Ka-in re axam: te' byid' ra".

¹⁶Ka-in wa ASANG: qhid' kheim: mae" thug' lo" mung: Edin khyae ba thug' shad' mae Du" Lae" Qin" ga: mhang" ra" mug: mae yena: ra".

¹⁷Ka-in we' yham sang myhi" wa yauggai zo: dayaug khau mung: yao: re Enog ga: mhang" byid' ako". Ai: thao Ka-in wa vogaung: te: yang: yao: zo" mang re cao" yang: Enog ga: mhang" ra".

¹⁸Enog wa yauggai zo: Irad re myhung: ra"- Irad wa Mehuyae re myhung: ra"- Mehuyae wa Mathushae re myhung: ra". Mathushae wa Lameg re myhung: ra".

¹⁹Lameg wa Ada ga" ru we' Zila ga" ru yao: myi: shid' zo: qo" ra".

²⁰Ada wa Yaba re myhung: ra". Yao: wa pin: zaung mae na mung: gug'nyhug' khau zo: mo; nho: phug' pho" ngad: ra".

²¹Yao: nhaung: wa Yuba ngad mung: tang: be, khalhao: mad: ra". Nghaui" thoe pha,jhi" bo: ra" alhab' mo, nho: phug' pho" ngad: ra".

²²Zila wa Tuba Ka-in re myhung: ra". Yao: wa gyid: ne we' jo, to' zai jham re be, yaug ngad: ra". Tuba Ka-in nho: yao" nhae: mo" wa Naama ngad: ra".

²³Lameg wa yao" yham sang myhi" Ada we' Zila tao re Tae" gyo: ge, zolau: dayaug ngore dae te' yang: ngo wa yao: re se' pye' va".

²⁴Ka-in re se' ru qhid' mae" xao qug: nhad' zhao" khyug' ca" nae" ru wa ngore se' ra" yaug wa nhad' xe: nhad' zhao" xao qug: qhug' khyug' li" nae"- ga: ta" ra".

²⁵Adam we' yao" yham sang myhi" wa yauggai zo: gatau dayaug dam: qo" ako". Eva wa Mao"So wa Ka-in yang se' pye' ra" Abela khu mae yauggai zo: dayaug dam: byid' ra"- ga: ta" ra". Airumung: yao: wa Sed ga: yao: re mhang" ra".

²⁶Sed wa Enu ga: mang: ra" yauggai zo: dayaug myhung: ra". Byu jham wa ai: pyad mae" qhid yang: caung:pa" byid' rumae ASANG: gyang" lho" ra" mang re ci: qhid: ako".