Read Maru APAN AQAO: 41 Bible Online

APAN AQAO: 41 - Maru bible

APAN AQAO: 41

¹Shid' zin: lai: lo" thao re Egutu kho:kham wa yab mo, mo; ra". Yab mo, mae yao: wa Nila gyaung: qid yae mae ye; jo; au:-

²jhad' jhad' mung: xau ra" nung: jaung myhi" nhad' dau: wa qid gyaung: mae" thug' li" gemung: mhin: li" lhae: zo" na: ako".

³Ai: thao gatau nung: jaung myhi" nhad' dau: qid mae" dam: thug' li" ako". Yao: bam wa ngaung: mung: shoqug: za: ngad: ako". Yao: bam wa qid yae mae na ko" ra: gatau nung: jaung myhi" jham: nhae khyo li" mung:-

⁴Ai: nung: ngaung: jham wa xau: ra" nung: jaung jham re zo" pye' ako". Ailao" kho:kham pho" so" li" ra".

⁵Yao: wa dam: yab: myhid' lo" mung:- yab mo, gatau dam: mo; ra". Yab mo, mae ashi: mo, mung: mhang" ra" gaug nhae nhad' nhae de; ra" gaug gae dagae yaug: jo; rure myao: ra".

⁶Ai: thao re din"pyad' la: yang hug' kyaug' pye' mung: seim: ra" gaug nhae nhad' nhae yaug: thug' li" ako".

⁷Seim: ra" gaug nhae jham wa mo: ra" gaug nhae jham re myug: pye' ko" rure myao: ra". Ailao" kho:kham pho" wa so" li" mung: yao: yab mo, mo; na: rure beim" li" ra".

⁸Ne, kao re yao: wa myid myo: sang: kho" ra". Airumung: yao: wa Egutu mung" mae" mandan: sara qe we' pha,jhi" ba: ra" mo, alhab' re khai nhao: ke' ra". Kho:kham pho" wa yao: bam re yao" yab mo, ta" kyo" ra". Ngadqere: dayaug re: ai: yab mo, jham re kho:kham pho" re maqo" pheim: kyo: byid: ngad: ako".

⁹Ai: thao sabyi qang: jaung yaug wa kho:kham pho" re- ngo kad' shad' lo: ra" khyo re ana" ba ngo lhang: yu ca" va" ra".

¹⁰Mug kad' au: jhaung pho" we' ngore nao kho:kham nhag' yo: mung: gug: gam gyezug: pho" yham mae nga" shid' yaug re thaung: lhaung" to" ra".

¹¹Damyi mae nga" shid' zo: wa yab mo, dayaug daja: yab mo, mo, mung: lajheim: re: jho" shai" ra".

¹²Gug: gam gyezug: pho" nho: jeim pho" ngad: ra" Hebre zolau: dayaug wa ai: mae nga" shid' zo: we' daga" na: ra". Nga" shid' zo: wa nga" shid' zo" nho: yab mo, re yao: re ta" kyo: mung: yao: wa nga" shid' zo: re yab mo, pheim: kyo: byid' ra".

¹³Yao: ta" ru we' dakhyo: boe" lo: ra". Nao wa ngore nga" jo, qo mae yao: mau" dam: byid' ra". Ngadqere: nao wa ai: mug kad' yaug re wa se' pye' ra"- ga: ta" ra".

¹⁴Kho:kham pho" wa Yoseb jhao" byu nhao: ke' mung: yao: wa dalhang: dae thaung: khug mae" phoe' yu: ru qhug' ra". Yoseb wa nhad' mug' qaug: pye' thao mai bau: tha" ve; pye' mung: yao: wa kho:kham pho" qhid' kheim: khyo vao ye" ra".

¹⁵Kho:kham pho" wa Yoseb re- ngo wa yab mo, daja: mo, mung: aire khag re: ngore maqo" pheim: kyo: byid: ngad: ako". Nao wa yab mo, qo" pheim: kyo: yaug ngad: ga: ngore ta" kyo" ako"- ga: ta" ra".

¹⁶Yoseb wa- asang kho:kham we"- ngore: maqo" pheim: kyo: ngad: ra". Ngadqere: Mao"So wa gyo" ngaui taung" ra" khyo" lajheim: pheim byid' li" nae"- ga: phaug' tau" ra".

¹⁷Kho:kham pho" wa- ngo wa yab mo, mae Nila gyaung: qid yae mae ye; jo; au:-

¹⁸Jhad' jhad' mung: xau: ra" nung: jaung myhi" nhad' dau: wa qid gyaung: mae" thug' li" gemung: mhin: li" lhae: zo" na: ako".

¹⁹Ai: thao ngaung: mung: shoqug: za: ngad: ra" gatau nung: jaung myhi" nhad' dau: qid gyaung: mae" dam: thug' li" ako". Ai: nung: jaung myhi" jham wa Egutu mung" mae ngo khonhae" re: mamyao: qhu" ra" ngaung" thao" ra" nung: jaung myhi" jham ngad: ako".

²⁰Ai: nung: jaung ngaung: jham wa xau: ra" nung: jaung jham re zo" pye' ako".

²¹Ngadqere: airu: zo" pye' rure khag' maba ko" ngad: ra". Pe"mung:ga"re yao: bam wa qhid' phyao: mae" we' dakhyo: za: ngaung" khyoe" jo, ako" ai: thao re ngo so" li".

²²Ngo wa yab mo, mae mo mung: mhang" ra" gaug nhae nhad' nhae de; ra" gaug gae dagae myao: ra".

²³Ai: thao din" pyad la: yang hug' kyaug' pye' mung: seim: ra" gaug nhae nhad' nhae yaug: thug' li" mung:-

²⁴Ai: gaug seim nhae jham wa mo: ra" gaug nhae jham re myug: pye' ko" rure re: myao: ra". Ngo wa ai: yab mo, jham re mandan: ba mo, re ta" kyo: va"- ngadqere: ai: yab mo, re yao: bam mae" khag' re: ngore maqo" pheim kyo: ngad: ako"- ga: ta" ra".

²⁵Ailao"- Yoseb wa kho:kham pho" re- yab mo, shid' ja: wa lajheim: daja: za: ngad: ra". Mao"So wa yao: pe" kad' nae" ra" khyo nao re- ta" kyo" ava".

²⁶Ai: xau: ra" nung: jaung myhi" nhad' dau: wa nhad' zin ngad mung: mo: ra" gaug nhae nhad' nhae re: nhad' zin ngad: ra". Aijham wa lajheim: daja: za: ngad: ra".

²⁷Ai: thao re thug' li" ko" ra" nung: jaung ngaung:nhad' dau: we' din"pyad' la: yang hug' kyaug' pye' ra" seim: ra" gaug nhae nhad' nhae wa- bao" khug' khug' ru nhad' zin ngad: ra".

²⁸Ngo nao re- ta" ra" ru we' dakhyo:- Mao"So wa yao: pe" kad' nae" rure nao re ta" kyo" ava"

²⁹Egutu mung" alhab'mae nhad' zin wa gaug zo gyai qo" li" nae".

³⁰Ai: thao re bao" khug' nhad' zin khug' li" nae". Ai: gaug zo qo" ra" zin na jham alhab' to" myhid' pye' ru qhug' li" nae". Pe"mung:ga"re ai: bao" khug' wa mung"dan: re phyo' pye' li" nae".

³¹Gaug zo qo" ra" ayo, wa dajhid' re: mabeim: lo: to" myhid' pye' ru qhug' li" nae". Pe"mung:ga"re bao" khug' qu" gyaug qu" lhaung sho' thau: ruyang ngad: li" nae".

³²Nao paug' myao: ra" ni" yab mo, lajheim: wa boe" nae" ra" khyo wa Mao"So: yang kad' ru ngad: mung: airu re Mao"So wa mamyao" re boe" nhao: li" nae".

³³Ana" nao wa pha,jhi" bo mung: suzo: du" ra" byu dayaug re khyin: yu yang: yao: re mung"dan: nho: au: jhaung kad' nhao: re gai ang: ra".

³⁴Nao wa zug: gatau qere re: san: yu mung: gaug zo qo" ra" nhad' zin mae gaug zo jham re ngo" bam mae" dabam re zhang: yu ca" ra".

³⁵Joe" li" na: ra" gaug zo qo" nae" ra" nhad' zin gyo: mae" zo:ve jham alhab' re zhang: yu genae" qhid' mae" yao: bam re amyin" byid: wa,- amung: ai: gaug zo jham re vomo" jham mae qaung" to: mung: zaung" nae" qhid' mae" yao: bam re kheim: so' byid: wa,

³⁶Ai: zo:ve wa Egutu mung" mae joe" li" nae" ngad: ra" bao" khug' ru nhad' zin mae mung"dan: re gae byid: nae" zo:ve ngad: li" nae"- cekhyo" mung: mung" byu qe wa vae: mamoe; genae"- ga: ta" ra".

³⁷Kho:kham pho" we' yao" zug: qe wa ceru yaung: ra" khyo re myid vang" ako".

³⁸Amung: kho:kham pho" wa- yao: bam re Mao"So: byo qo" yaug ngad: ra" Yoseb tho' je: gai yaug re ngonhaung" khonhae" re: qhug' nae" mangad:- ga: ta" ra".

³⁹Kho:kham pho" wa Yoseb re- Mao"So wa cegu: alhab' nao re qhu" byid' ava". Arumung: nao wa gaje tho' pha,jhi" je: qi" bo yaug we' suzo: je: du: yaug ngad: ru wa de: de: za: ngad: ra".

⁴⁰Ngo wa nao re nga" mung"dan: nho: au: jhaung kad' nhao nae". Nga" nho: mung" byu qe wa ni" amyin" dao: re phug' cao" li" genae". Ni" kheim: so' wa nga" o mae" shid' yaug ein: yaug ngad: li" nae".

⁴¹Ana" ngo wa nao re Egutu mung" geim" re eib: nae" mung" zug: khyo" san: to: va"- ga: ta" ra".

⁴²Kho:kham pho" wa Kho:kham nho: dazid de; ra" lo, pin: re yao" lo, nyhug' mae" khyad' yu mung:- Yoseb: nho: lo, nyhug' mae pin: byid' ra". Yao: wa Yoseb re jid: mo" pin: gai bau: qhang vhe' byid: mung: yao" lang zang: mae qhang qui: vhe' byid' ra".

⁴³Kho:kham pho" wa kho:kham nho: myao: lhin" shid' lam" lam: re zaung nae" qhid' mae" Yoseb re byid' ra". Aimung: kho:kham nho: nga: yhe' gug: gam gyezo: qere Yoseb nho: qhid' au: mae ye" lo" nhao mung:- khyo qhui" ge,- khyo qhui" ge,- ga: hug' nhao: ra". Airu: Yoseb wa Egutu mung" geim" re zug: kad' nae" mung" zug: san: yu: ru qhug' ra".

⁴⁴Kho:kham pho" wa Yoseb re ngo wa kho:kham ngad: Egutu mung" geim" mae khag' ngadqere: ni" akhang" maqo" lo:- khyid lo, magai: tau genae"- ga: ta" ra".

⁴⁵Yao: wa Yoseb re Egutu mang:- Zaphenad Panea mhang" byid: mung:- Helipoli vomo" mae" khinjaung pho" Potiphera nho: myiqe zo: Asenad re yham sang myhi" khyo" yu byid' ra". Egutu kho:kham re caung da" byid' ra" au:- Yoseb wa apyad sam xe zin ngad: ra". Yoseb wa kho:kham kho" mae" to" mung: mung" geim" khyo gyaung: su" ye" ra".

⁴⁶

⁴⁷Gaug zo qo" ra" nhad' zin gyo: mae mug: myid wa gaug zo magan: mago" qo" nhao: ra".

⁴⁸Aijham alhab' mae" Yoseb wa zhang: yu mung: vomo" jham mae qaung" to" ra". Yoseb wa vomo" khao: ngo" mae ai: lhang" gam: yothaung: jham mae" zo:ve re qaung" to" ra".

⁴⁹Gaug saung" laug yang: Yoseb wa nghe' rure thang: pye' ra"- aijham wa panglai: mae" ma coe we' dakhyo: ngad: ako".

⁵⁰Bao" khug' zin na jham majoe" lo shire Yoseb wa Asenad yang khau byid' ra" yauggai zo: shid' yaug qo" ava".

⁵¹Yao: wa Mao"So wa nga" nho: qug: khai: jham re we' nga" pho" nho: yham byu qe alhab' re: ngore to" myhid' pye' nhao: ava"- ga: ta" mung:- yao" zoqhid' yaug re Manashe ga: mang mhang" ra".

⁵²Yoseb wa Mao"So re- ngo qug: khai: kham zo" ra" mung" mae ngore zo: dau byid' ava" ga: re: ta" mung: yao" zole; yaug re Ephraim ga: mang mhang" ra".

⁵³Egutu mung" mae ai: gaug zo qo" ra" nhad' zin pyo: pyo: za: lai: lo" byaug mung:-

⁵⁴Yoseb ta" ru we' dakhyo: bao" khug' khug' ru nhad' zin wa qhid: li" ra". Mung"dan: khao: ngo" mae bao" khug' khug' li" ra". Ngadqere: Egutu mung" geim" wa zo:ve qo" ako".

⁵⁵Egutu byu qe vae: moe; qhid: li" gelao"- yao: bam wa kho:kham pho" re zo:ve byid: nae" hug' mho' ako". Airumung: yao: wa yao: bam re Yoseb jhao" ye: genae" we' Yoseb yao: bam re ta" ruru: kad' genae" qhid' mae" amyin" byid' ra".

⁵⁶Bao" khug' wa je: no; li" mung:- mung" geim" khyo byo: lo" ra". Airumung: Yoseb wa gaug jhi alhab' re phung" mung: Egutu byu qere aung: byid' ra".

⁵⁷Mug: myid geim" mae" byu qe wa Yoseb mae" gaug zo vai nae" qhid' mae" Egutu mung" khyo joe" li" ako". Pe"mung:ga"re khyi" khao: ngo" mae bao" khug' wa xo sho' no; ruyang ngad: ako".