Read Maru APAN AQAO: 43 Bible Online

APAN AQAO: 43 - Maru bible

APAN AQAO: 43

¹Khanan mung" mae bao" khug' wa je: no; li" mung:-

²Yaku yham byu qe wa Egutu mung" mae" vai: to" ra" gaug zo alhab' bin: zo: lao"- Yaku wa yao" yauggai zo: qere- ngonhaung" qhid' mae" zo:ve dajhid' yedam: vai: lo geri:- ga: ta" ra".

³Yuda wa yao: re aiyaug wa- ngonhaung" yao: nhaung: re ngonhaung" we' daga" majhui" li" re wa yao" qhid' kheim: khyo ngonhaung" vao ye: nae" akhang" maqo" nae" khyo re ngonhaung" re gyai thin: ra" khyo" ta" peim" to" ra".

⁴Ngonhaung" yao: nhaung: re ngonhaung" we' daga" ye: nae" nao qad: ngad: re wa ngonhaung" wa ni" qhid' mae" zo:ve yevai nae".

⁵Nao airu: maqad re wa ngonhaung" maye: nae". Pe"mung:ga"re byu aiyaug wa ngonhaung" yao: nhaung: ngonhaung" we' daga" za: mangad: ngad: wa yao" qhid' kheim: khyo vao ye: nae" akhang" ngonhaung" re mabyid: nae"- ga: ngonhaung" re ta" to" ra"- ga: ta" ra".

⁶Yaku wa naonhaung" aiyaug re yao:nhaung: gatau dayaug na: ga: ta" kyo: geyang: ngore qug: khai: myo: sho' pe"mung: boe" nhao ko" i? ga: ta" ra".

⁷Yao: bam wa byu aiyaug wa ngonhaung" re- naonhaung" yao: pho" na shi" i? Naonhaung" yao:nhaung: gatau qo" shiko" i? ga: ngonhaung" khyo re we'- ngonhaung" dinkhu: byu we' sin: yang: ngonhaung" re mathang lo: myid' ra". Ngonhaung" wa yao" dao: myid: re phaug' tau: byid: ca" ra". Ngonhaung" yao: nhaung: re ngonhaung" we' daga" jhui" li" geri: ga: yao: ngonhaung" re ta" nae" rure ngonhaung" khoru: qo" tho' ba nae" i? ga: ta" ako".

⁸Yuda wa yao: pho" re- ai: zolau: re ngonhaung" we' daga" nhao: ke' wa,- ngonhaung" dalhang: dae ye" lo" nae". Ailao" ngonhaung" mae" dayaug re: vae: moe' yang: mashid nae".

⁹Ngo wa ngoyao" kao so' re pakham: kad' nae"- yao: we' sin" ra" qobo nao ngore vhin la,- ngo wa yao: re gug: gug: za: pe" maqo lo: nao jhao" madam: jhui" lo byid: ngad: re ngo wa khonhae" re: nao: yang qobo vhin: rure kham zo: nae"-

¹⁰Ngonhaung" ceru: gyai myao" sho' manai" na ngad: re wa ngonhaung" wa ai: khyo joe" ye: mung: ana" wa shid' lhang lhao" dam: tug' lo yo, ngad va"- ga: ta" ra".

¹¹Yao: bam: yao: pho" wa yao: bam re- airu: ngad lao" wa mung" zug: pho" qhid' mae" jhaung qhu" khyo" ce: mung" mae" gai: thao" ra" Balsam gyid: dajhid'- Byoyhid dajhid'-nae pyo" ra" sag' gyid: jham lashe' shi: dajhid' re yu: vin ge,-

¹²Naonhaung" lo, mae ngaui re: shid' nho" ko yu: vin ge,- pe"mung:ga"re naonhaung" thaung nhad' mae tug' byid' ke' ra" ngaui jham rere: naonhaung" dam: vin: tug' ye: ca" ko" ra". Ai: ngaui wa nghung" ru ngad: re ngad nae".

¹³Naonhaung" yao:nhaung: re jhui" mung:- ana" yao: dam: tug' ye: ge,-

¹⁴Yao: wa Benyamin re we' naonhaung" yao: mao: yao: nhaung: gatau rere: naonhaung" re dam: tug' byid: nae" qhid' mae" Mao"So wa byu aiyaug re naonhaung" re nhag' khyag' myid ke' byid: vashao:- ngo kam" wa- nga" zo: qe re seim" kham: pye' va" re wa ngo wa ai bam re seim" kham: pye' ca" ra"- ga: ta" ra".

¹⁵Airumung: ai tao ho' wa jhaung qhu" jham re we' ngaui shid' nho" yu: vin mung: Benyamin re jhui: yang: Egutu mung" khyo to" ye" lo" ako". Yao: bam wa Egutu mung" mae yao: bam yao" jhaung qhu" jham re Yoseb re byid' ako".

¹⁶Yoseb wa yao: bam we' daga" Benyamin bo: li" rure myao lao"- yao" yham mae" daui daui au: jhaung pho" re- cebam re nga" yham khyo jhui" yu wa,- yao: bam wa ngo we' na" zao: daga" zo: zai ngad: airumung: gug'nyhug' dadau: se' yang: lo" seim" nyhang" wa,- ga: ta" ra".

¹⁷Daui daui yaug wa amyin" byid' to" ru we' dakhyo: kad' mung: ai tao ho' re Yoseb nho: yham khyo jhui" lo" ra".

¹⁸Yao: bam re yham khyo jhui" lo" na: au:- yao: bam wa- ngonhaung" re cekhyo jhui" lo: ru wa sao qhid' lhang ngonhaung" nho: thaung jham mae tug' byid' ke' ra" ngaui mathao mae ngad: nae"- yao: bam wa nyag din taung" ngonhaung" re lhe" li" mung: ngonhaung" nho: loze jham re lhad' pye' byid: yang: yao" jeim kad' nhao: li" nae" ga: myid: gyaug: ako".

¹⁹Airumung: yao: bam wa yham kham: dung: mae ai: daui daui au: jhaung pho" re-

²⁰Lau: de, pho" we"- ngonhaung" wa qhid' phyao: dalhang cekhyo zo:ve li" vai: qu" va".

²¹Yham phao khyo ngonhaung" lo" thang: ra" jo, qo mae joe" lao"- ngonhaung" wa ngonhaung" nho: thaung jham re phung" ke' re- ngonhaung" yaug khao: ngo" wa yao: yao" ngaui re lo, khu malai: lo: yao: yao" thaung nhad' mae bo: jo; rure myao: bam va"- ai: ngaui jham re naonhaung" jhao" dam: tug' vin: li" va"- ga: ta" ako".

²²Amung: ngonhaung" wa zo:ve vai nae" qhid' mae" ngaui aje rere: ngonhaung" vin: li" bam va"- ngonhaung" ngaui re ngonhaung" nho: thaung khug mae khag' yang ke' rure ngonhaung" maba ga: ta" ako".

²³Ai: daui daui yaug wa- gaung dayug ge,- gyaug: re: dagyaug ge,- naonhaung" Mao"So ngad: ra"- naonhaung" yao: pho" nho: Mao"So wa naonhaung" thaung mae naonhaung" qhid' mae" ngaui ke' byid' ru ngad: ra". Naonhaung" byid' ra" aphug' ngaui re ngo khae: yu va"- ga: ta" ra". Ai: thao yao: Simon re yao: bam jhao" jhui" thug' li" byid' ra".

²⁴Ai: daui daui yaug wa ai tao ho' re yham khug khyo jhui" vao lo" ra". Yao: wa yao: bam khyid cid' nae" yao: bam re qid khe' byid: mung:- yao: bam: loze jham re qid byid: jhaug' ra".

²⁵Yao: bam wa na" gaung re Yoseb joe" lo lao"- yao: re byid: nae" yao: bam: jaung qhu" jham re nyhang" seim" to" ako". Pe"mung:ga"re yao: bam Yoseb we' daga" zo: zo: nae" yao: bam re ta" to: yang: ngad: ako".

²⁶Yham khyo Yoseb joe" lo lao"- yao: bam wa jhaung qhu" jham re yham khug khyo yao: jhao" civao ye: gemung:- yao" qhid' kheim: mae myid gaung khyo yegoe; gyo" ako".

²⁷Yoseb wa yao: bam nho: qao" zin" khyo re myid: mung:- ai: thao re naonhaung" ngore ta" kyo" to: ra" naonhaung" yao: pho" mao: zo: wa qao" na: ra" i? Yao: na shi" ra" i? gai: na: ra" i? ga: myid' ra".

²⁸Yao: bam wa- ni" daui daui yaug ngonhaung" yao: pho" wa daui: na mung: qao" zin"na: shi" ra"- ga: tau" ako". Amung: yao: bam wa pad' thaug' thaug' mung: yao" qhid' kheim: mae goe; gyo" ako".

²⁹Yoseb wa yao: nhaung: Benyamin re myao lao"- yao: wa aire ceyaug wa naonhaung" ngore ta" kyo: ko" ra" naonhaung" yao: nhaung: ngai: thao" yaug ngad: i? Nga" zo: we"- Mao"So nao re shaman" byid: vashao:- ga: ta" ra". Pe"mung:ga"re yao" aung khug mae yao: nhaung: re kao taui: myid byang" sho' bo thug' li" ruyang ngad: ra".

³⁰Ai: thao: Yoseb wa yao" nhag' lam: khug mae yao: nhaung: re kao taui: myid byang" sho' bo: thug' li" ruyang yao: nyag din taung" aimae" to" lo" ra". Yao" qe, khyo vao lo" mung: ngug: ra".

³¹Yoseb wa yao" myo, khung: re bin: cid' pye' thao re thug' li" mung: yao: yao" gaung re zang: yang: zo:ve da" byid: nae" qhid' mae" amyin" byid' ke' ra".

³²Yoseb re saboe" dalam: mae da" zho: mung:- yao: mao: yao: nhaung: bam re wa saboe" gatau dalam: mae da" zho: byid' ako". Aitau mae zo" na ko" ra" Egutu byu qere wa gatau kho' yang: da" zho: byid' ako". Pe"mung:ga"re Egutu byu qe wa Hebre byu qe we' daga" zo zo: nae" rure byuqid phoe: ra" khyo" myid jho: yu geyang: ngad: ako".

³³Yao: mao: yao: nhaung" bam wa Yoseb re myo,nho qang yang: yao: bam: apyad re cao" yang: qi" thao" yaug mae" ngai: thao" yaug azo" tai" zaung: jo; ako". Yao: bam airu zaung: jo; rure myao gelao"- mug' yang: yao: cao: jho" qu" ako".

³⁴Zo:ve jham wa Yoseb zaboe" mae da" byid: mung: Benyamin wa dang: ra" mo, tho' ngo" zhao" myo: sho' da" byid' ru qhug' ra". Airumung: yao: bam yid sho' Yoseb we' daga" zo:- shaug' ako".