Read Maru APAN AQAO: 44 Bible Online

APAN AQAO: 44 - Maru bible

APAN AQAO: 44

¹Yoseb wa yao" yham mae" daui daui au: jhaung pho" re ce: byu qenho: thaung jham mae yao: bam qo" vin: nho" gaug: ke' byid: mung: yao: bam yaug khao: ngo" nho: ngaui re yao: yao" thaung nhad' mae ke' byid: wa,-

²Nga" nho: ngaui keim re wa ngai: thao" ra" yaug: nho: thaung mae yao" gaug phug' ngaui we' daga" ke' byid: wa,- ga: amyin" byid' ra". Yao: re: Yoseb ta" ru we' dakhyo: kad' ra".

³Ai tao ho' re yao: bam: loze jham we' daga" ne, seim no' mae" yao: bam yao" gyaung: khyo khyo to" lo" nhao: ako".

⁴Yao: tao ho' wa vomo" mae" dajhid' za: shi" lai: ye" lo" ko" au:- Yoseb wa yao" yham mae" daui daui au: jhaung pho" re- ai: byu qe: thao phyad cao" khe' ye: wa,- yao: bam re yemyhi lao" naonhaung" wa gai: rure pe"mung: makhyang" ruyang tug' byid: ko" i?

⁵Naonhaung" pe"mung: yang: nga" asang: ngaui keim khug' ko" i? Ai: keim wa yao: shaug' ra" keim ngad mung: yao: boe, phyid' rumae ci: ra" keim ngad: ra". Naonhaung" wa gyai qug: ra" qobo lo, mau" re shad' lhoe" to" avako" ein: yao: bam re yeta" wa,- ga: ta" ra".

⁶Ai: daui daui yaug wa yao: bam re yemyhi lao"- yao: wa ai: dao: jham re dai" kyo: byid' ra".

⁷Yao: bam wa yao: re- nhag' bo pho" we"- pe" ja" lajheim: khyo"- nao ceru: jhau: na: i? ngaonhaung" wa airu" ra" lo, mau" re makad' ein: rure ngonhaung" jham qo" tang" ra".

⁸Ngonhaung" nho: thaung jham anhad' mae" ngonhaung" the' myao: ra" ngaui jham re Khanan mung" mae" nao jhao" ngonhaung" dam: tug' vin: li" byid' ra" khyo re nao ba gau ngad: ra". Aire ngonhaung" wa ni" asang: yham mae" ngaui mangad: lao"- qhang re pe"mung: khug' nae" i?

⁹Nhag bo pho" we" ngonhaung" mae" dayaug yaug lo, mae ai: keim re qhug' myao: ngad: re- yao: wa se' pye' ru qhug' vashao:- amung: ngonhaung" dang: ra" mo, re: ni" jeim qe boe" vashao: ga: phaug' tau" ako".

¹⁰Ailao" yao: wa ngo myid vang" ra". Ngadqere: ai: keim re yu: ci: yaug za: nga" jeim doe; li" nae". Amung: dang: ra" mo, naonhaung" wa pe" maca" lo: qo" phao: lo" ra"- ga: ta" ra".

¹¹Airumung: yao: bam wa yao: bam nho: thaung jham re myid gaung khyo khyo" mung: yaug khao: ngo" yao: yao" thaung re phung" ako".

¹²Yoseb nho: daui daui yaug wa qi" thao" yaug mae" qhid mung: ngai: thao" yaug mae lothao" sho' nyang" za: qho mung: ai: keim re Benyamin nho: thaung khug mae loqho: qhug' ra".

¹³Yao: tao ho' wa nhag' kaug' ru we' yao: bam mai bau: jham re lao" cad' pye' gemung: loze dao mae qo dam: seim" vhin mung: vomo" khug khyo dam: tug' lo" ako".

¹⁴Yuda we' yao: mao: yao: nhaung: bam Yoseb yham khyo joe" loko" au: Yoseb wa aimae na: jo; ashi". Yao: bam yao" qhid' kheim: mae logoe; gyo" ako".

¹⁵Ailao" Yoseb wa naonhaung" pe" kad' vako" i? Ngo ru" ra" aya: qo" ra" byu dayaug wa boe, phyid' yang: naonhaung" pe" kad' rure qo" ba: ra" ein: rure naonhaung" maba ko" i? ga: ta" ra".

¹⁶Ailao" Yuda wa zug: pho" we"- ngonhaung" nao re pe" qo" ta" lo nae" i:- ngonhaung" khoru: qo" ngag nae" i? Ngonhaung" yao" khyo re khoru: qo" sho' kyo: lo nae" i? Mao"So wa ngonhaung" qobo re phung" qhu" byid' ava". Ana" ai: keim re qho: myao: yu qhug' ra" yaug za: mangad: ngonhaung" alhab' wa ni" jeim qe ngad: bam va"- ga: ta" ra".

¹⁷Yoseb wa airu: mangad:- ngo wa airu: manug: kad'- ai: keim bo: ra" yaug za: nga" jeim doe; li" nae". Naonhaung" dang: ra" mo, gu: wa naonhaung" yao: pho" jhao" pe" maqo lo:- qao" za: tug' phao: lo" ge,- ga: ta" ra".

¹⁸Yuda wa Yoseb jhao" te' ye: mung:- zug: pho" we"- jeju khyo" galin: gago: za: nao we' dao: jho" jhau nae" akhang" byid: la, ngore nhag' dayo: la,- nao wa kho:kham ru: yao: ngad: ava".

¹⁹Zug: pho" we"- nao wa ngonhaung" re- naonhaung" wa yao: pho"- mangad: lao"- gatau yao: mao: yao: nhaung: qo" ko" i? ga: myid' ra".

²⁰Ailao" ngonhaung" wa- yao: pho" mao: zo: we' yao: mao: thao re khau: ra" ngonhaung" yao: nhaung: angai dayaug qo" ra". Yao: mao: wa shid va"- yao: wa yao" yao: myhi" nho: yao:zo: qemae" dayaug za: dang: na: ra" yaug ngad: ra". Yao: pho" wa yao: re gyai jhid'de; ra".

²¹Zug: pho" we"- nao wa yao: re qo" myao sho'- yao: re cekhyo jhui" li" byid: nae" qhid' mae" nao wa ngonhaung" re ta" ra".

²²Ngonhaung" wa nao re yao: wa yao: pho" we' maqo" gao: ngad: ra". Yao: airu: kad' re wa yao: pho" shid zai ngad: ra" ein: phaug' tau" bam va".

²³Ailao" nao wa- ngonhaung" naonhaung" yao: nhaung: ngai: thao" yaug we' daga" za: mali" gere wa naonhaung" re nga" qhid' kheim: khyo vao li" nae" akhang" mabyid: nae"- ga: ta" ra".

²⁴Ngonhaung" wa ngonhaung" nho: yao: pho" jhao" phao: joe" lo" lao" nao ta" ra" khyo re yao: re lo" ta" kyo: byid: va".

²⁵Ailao" yao: wa zo:ve dajhid' dam: yevai nae" qhid' mae" dam: tug' ye: ge,- ga: ngonhaung" re ta" ra".

²⁶Ngonhaung" wa- ngonhaung" maqo" ye:- ngonhaung" yao: nhaung: ngai: thao" yaug we' daga" za: mangad: re wa ai: zug: pho" nho: qhid' kheim: khyo vao ye: nae" akhang" maqo" nae"- ngonhaung" nho: yao:nhaung: ngai: thao" yaug ye" re za: ngonhaung" qo" ye: nae" ein: tau" bam va".

²⁷Ngonhaung" yao: pho" wa- nga" yham sang myhi" Rakhela wa ngore yauggai zo: shid zo: za: khau: to: byid' rure naonhaung" ba: ako".

²⁸Yao: tao mae" dayaug wa ngore to: co' ava". Yao: wa gaigai: yao: seyo: gug'nyhug' jham: yang adau atam" bin" cad' se' pye' ru qhug' va" ru ngad: ra"- pe"mung:ga"re yao: thug' lo" ra" ba na mae" ngo wa yao: re mathe' myao lo:-

²⁹Ana" ceyaug re naonhaung" jhui" lo" gemung:- yao: daja: ja: boe" ngad: re wa naonhaung" yang kad' byid' ra" kaug' ngug: ru wa ngo qhi" mao: va" yaug re kaug' shid nhao: li" genae"- ga: ta" ra".

³⁰Yuda wa xo' yang:- zug: pho" we" ana" ngo wa nga" pho" jhao" nga" nhaung: mabo lo: phao: lo" re nga"nhaung: wa ngo we' daga" mabo: lo: rure yao: lham: myao we' shid: li" nae". Nga" pho" nho: kao so' wa nganhaung" nho: kao so' re taui" jo; ra". Ailao" yao: wa gyai mao: va" yaug ngad: rumung:- ngonhaung" yang kad' byid' ra" nhag' kaug' ru wa yao: re shid nhao: li" nae".

³²Ai: tho' mago" ngo wa nga" nhaung" qhid' mae" nga" kao so' we' tha" nae" qhid' mae" nga" pho" re jham tang" to" ru ngad:- ngo wa yao: re nga" nhaung: re yao: jhao" madam: jhui" tug' lo byid: re wa nga" pyad geim" mae qobo vhin: rure kham zo: ca" ra".

³³Ana" zug: pho" we"- ngo wa nga" nhaung" atha" ni" jeim khyo" cemae thang: na nae". Yao: re wa yao: mao: bam we' daga" phao: lo" nhao wa,-

³⁴Ai: zoshao ngo we' daga" mangad: re wa nga" pho" jhao" ngo khoru: qo" phao: lo" nae" i? Ce: mathao mae nga" pho" mae boe" li" ra" kyi" khyag' rure ngo khoru: qo" tho' qu" nae" i? ga: ta" ra".