Read Maru APAN AQAO: 47 Bible Online

APAN AQAO: 47 - Maru bible

APAN AQAO: 47

¹Ailao" Yoseb wa yao" mao:nhaung: ngo" yaug re jhui: mung: kho:kham pho" jhao" ye" lo" ra". Yao: wa kho:kham pho" re- Nga" pho" we' nga" mao: nga" nhaung: bam wa yao: bam: yao kyaung" cad' kyaung: we' yao: bam: gug'nyhug' kyaung" jham wa yao: bam qo" gu: alhab' we' Khanan mung" mae" joe" li" avako". Ana" yao: bam wa Goshen mug: mae ngad: ako"- ga: ta" ra".

²Ai: thao yao: wa yao" yao: mao: yao: nhaung: bam re kho:kham pho" qhid' kheim: khyo jhui" qhu" byid' ra".

³Kho:kham pho" wa yao: bam re- naonhaung" pe" mau" kad' zo: mo, ngad ko" i? ga: myid' ra". Yao: bam wa kho:kham pho" we"- ngonhaung" phug' phyid' qe we' dakhyo: ngonhaung: wa yao- cad' khau myhung zo: mo, ngad:-

⁴Khanan mung" mae bao" khug' saung" no, mung: ngonhaung" nho: gug'nyhug' yao- cad' jham: qhid' mae" mhin: gyo, jao: majo, loyang: ce: mung"dan: khyo na nae" qhid' mae" joe" li" bam: ru ngad:- jeju khyo" Goshen mug: mae na nae" akhang" byid: la,- ga: ta" ako".

⁵Kho:kham pho" wa Yoseb re ana"- ni" pho" we' ni" mao: ni" nhaung: bam joe" li" avako".

⁶Egutu mung" wa yao: bam: mae" ngad: ra". Egutu mung" geim" mae" je: gai: thao" ra" Goshen mug: mae yao: bam na vageshao:- yao: bam mae" boe" doe, yaug bo ko" ngad: re nga" nho: gug'nyhug' kyaung" re qu" caung nae" au: jhaung san: to: wa,- ga: ta" ra".

⁷Ai: thao Yoseb wa yao: pho" re jhui" yu mung:- Kho:kham pho" re yejhui" qhu" byid' ra". Yaku wa kho:kham pho" re shaman" byid: mung:-

⁸Kho:kham pho" wa Yaku re- ni" apyad khonho" ngad va" i?- ga: myid' ra".

⁹Yaku wa du" lae" qin" ra" nga" apyad wa dayo: sam xe zin ngad: ai: zin na jham wa lang" yang: qug: ra" zin na jham ngad mung:- nga" phug' pho" qe lae" du" qin" ko" ra" zin na jham nho" maqhang ngad: ra"- ga: ta" mung:-

¹⁰Yaku wa kho:kham re shaman" dao: we'- au" to: co' mung: to" lo" ra".

¹¹Airumung: Yoseb wa Egutu mung" mae yao: pho" we' yao: mao: yao:nhaung: bam re jo, qo te: byid: mung:- kho:kham pho" amyin" byid' to" ru we' dakhyo:- je: gai: thao" mug: myid ngad: ra"- Ramese vomo" nhae mae" mug: myid re yao: bam re byid' ra".

¹²Yoseb wa yao: pho"- yao" yao: mao: yao:nhaung: bam- ngai thao" ra" yaug bobo mung: yao: pho" nho: dang: ra" yham byu qe alhab' mo, qhid' mae" zo:ve bao" thaug' byid' ra".

¹³Bao" khug' wa saung" no; ruyang khyi" khao: ngo" mae zo:ve majo, ngad: ra". Aimung: Egutu byu qe we' Khanan byu qe wa vae: moe; geyang: qam: nang" lo" ako".

¹⁴Yao: bam wa gaug zo vai gemung: Yoseb wa ngaui alhab' re khyui: zhang" yu mung:- Kho:kham kho" khyo civao lo: ra".

¹⁵Egutu mung" we' Khanan mung" mae" ngaui alhab' bin: yhung" pye' gelao"- Egutu byu qe wa Yoseb jhao" li" mung:- ngonhaung" re zo:ve byid: la,- ngonhaung" re dashid nhao la,- daja: ja: kad' wa,- ngonhaung" ngaui alhab' gan byaug va"- ga: ta" ako".

¹⁶Yoseb wa ngaui alhab' gan: byaug gelao" wa aijham re zo:ve tha" byid: geli"- naonhaung" gug'nyhug' jham lo" she: lo geri:- ga: ta" ra".

¹⁷Airumung: yao: bam wa yao: bam: gug'nyhug' jham re Yoseb jhao" she: li" ako". Ailao" Yoseb wa yao: bam: myao:- yao- cad' be,- nung:- loze jham we' zo:ve tha" byid' ra". Ai: zin re Yoseb wa yao: bam: gug'nyhug' alhab' we' zo:ve tha" byid' ra".

¹⁸Thao: zin re yao: bam wa Yoseb jhao" dam: joe" li" gemung:- zug: pho" we"- ngonhaung" ngaui jham gan: byaug va" rure ngonhaung" maqo" zug' to: ngad: ra". Amung: ngonhaung" gug'nyhug' jham re: nao: sang: ava"- ngonhaung" gaung dau: jham we' ngonhaung" nho: mug: myid jham mae" je yang: nao re byid: nae" pe" madang lo:ngad: ra".

¹⁹Ngonhaung" re dashid nhao la,- daja: ja: kad' wa,- ngonhaung" yothaung: jham re cae: jhug tag dakad' pye' nhao wa,- ngonhaung" we' ngonhaung" nho: mug: myid re vai: yu mung: zo:ve tha" byid: la,- ngonhaung" wa kho:kham pho" nho: jeim qe boe" mung: ngonhaung" mug: myid wa yao: sang: li" nae"- ngonhaung" kao so' xo' nae" qhid' mae" gaug we' gaug myug: re byid: la,- airulao"- ngonhaung" nho: yothaung: jham mae ngonhaung" qo" khao" qho: zai ngad: ra"- ga: ta" ako".

²⁰Yoseb wa Egutu mung" geim" mae" mug: myid re kho:kham pho" qhid' mae" vai: yu: ra". Bao" khug' wa saung" no; ruyang Egutu byu qe wa yao: yao" mug: myid re deim" zag: aung" ako". Aimung: mug: myid alhab' wa- Kho:kham pho" nho: jo,nho" zai yo boe" lo: ra".

²¹Yoseb wa Egutu mung" jao: sho' mae" mung" byu qere jeim kad' yu: ra".

²²Yao: mavai: yu: ra" mug: myid wa khinjaung qe sang: ra" mug: myid za: ngad: ra". Khinjaung qe wa yao: bam: mug: myid re maaung: qo ngad: ako". Pe"mung:ga"re kho:kham pho" wa yao: bam re bao" thaug' byid' yang: ngad: ra".

²³Yoseb wa mung" byu qere- ana" ngo wa naonhaung" re we' naonhaung" mug: myid re kho:kham pho" qhid' mae" vai: to: va"- naonhaung" yothaung: mae sin: nae" gaug myug: cemae ngad: ra".

²⁴Naonhaung" wa gaug yad yo, re ngo" bam mae" dabam re kho:kham pho" re byid: ca" ako"- Dang: ra" gu: re gaug myug: we' naonhaung" yao: we' naonhaung" yham byu qenho: zo:ve gai: kad' ra"- ga: ta" ra".

²⁵Yao: bam wa- nao wa ngonhaung" kao so' re khyad' to" ava". Zug: pho" we"- nao wa ngonhaung" re gai kad' ava". Ngonhaung" wa kho:kham pho" nho: jeim doe, nae"- ga: phaug' tau" ako".

²⁶Airumung: Yoseb wa Egutu mung" mae yad: yu yo, re ngo" bam mae" dabam wa kho:kham pho" sang: ru ngad:- ga" ra" mug: myid tarha" dalam: kad' ra". Ce: tarha" wa ana" ba joe" sho' dang: jo; ashi"- khinjaung qe sang: ra" mug: myid jham za: kho:kham pho" mug: myid magai: boe" ngad: ra".

²⁷Israel byu qe wa Egutu mung" Goshen mug: mae na mung: ai: mae yao: bam na: qo" li" ko" ru we' zo: dau myo: sho' na: je" li" ako".

²⁸Yaku wa yao" apyad dayo: byid xe: nhad' zin dau yo, joe" sho' Egutu mung" mae daxe: nhad' zin daui: na: ra".

²⁹Yao: shid yo, jhao" li" lao"- yao: wa yao zo: Yoseb re khai: yu mung:- ni" lo, nga" sin gyo: mae jhoe" ke' mung:- Egutu mung" mae ngore manyhab' nae" ein: thao: ce' to: wa,-

³⁰Ngo wa nga" pho" bam re nyhab' to" ra" jo, qo mae ngore nyhab' byid: nhao nug: ra". Egutu mung" mae" dao: thug' lo" mung: yao: bam re nyhab' to" ra" jo, qo mae ngore nyhab' la,- ga: ta" ra". Yoseb wa nao ta" ru we' dakhyo:- ngo kad' nae"- ga: phaug' tau" ra".

³¹Ailao" Yaku wa- nao kad' nae" ein: thao: ce' to: wa,- ga: ta" ra". Yoseb wa thao: ce' to: mung: Yaku wa yao" yab jaung: dao mae" jeju caung:khin" byid' ra".