Read Maru APAN AQAO: 48 Bible Online

APAN AQAO: 48 - Maru bible

APAN AQAO: 48

¹Dayo, kyo thao Yoseb re yao: pho" no: ra" khyo ta" kyo" ako". Airumung: yao: wa yao" yauggai zo: Manashe we' Ephrim tao re jhui: mung: Yaku re yeqhug' ako".

²Yaku wa yao: zo: Yoseb yao: re qhug' nae" joe" li" ra" khyo re the' gyo: lao"- yao" qam: qhao" mung: yab jaung: dao mae zaung: jo; ra".

³Yaku wa Yoseb re- qam: bo: thao" ra" Mao"So wa Khanan mung" mae" Luza mae li" na: qhu" mung: ngore shaman" byid' ra".

⁴Yao: wa- ni" myid:zo: qe byumyu" myo: sho' boe" li" genae" qhid' mae" ngo wa nao re zo: dau myo: sho' byid: nae"- amung: yao: bam: jo,nho" khyo" ce: mung"dan: re ni" myid:zo: qere ngo byid: nae"- ga: ta" ra".

⁵Yaku wa xo' yang: Yoseb we"- ngo cekhyo majoe" li" shire Egutu mung" mae nao qo" ra" ni" nho: yauggai zo: tao wa ngo sang: ra"- Rubin: we' Simon tao wa nga" zo: tao ngad: ra". Ephrim we' Manashe re dakhyo: nga" zo: tao ngad: ako".

⁶Nao yauggai: zo: qe gatau dam: qo" re wa yao: bam wa nga" zo: qe ein: majho nae". Yao: bam qo" nae" ra" ma wa Ephrim we' Manashe khyo" yang ngad: li" nae".

⁷Ngo ceru: kad' na: ru wa ni" myhi" Rakhela mathao mae ngad: ra". Ngo Mesopotamia mae" dam: tug' lo: na: au:- Ephrad we' mataung" va" jo, qo Khanan mung" mae yao: shid: lo" byaug: mung: ngo gyai kaug' ngug: pye' va". Ngo wa yao: re Ephrad khyo lo"ra" khyo nhae mae nyhab' to" ra". (Ephrad wa ana" Betlehem vogaung: ngad: ra".)

⁸Yaku wa Yoseb nho: yauggai zo: tao re myao lao"- ce: zoshao tao khag' ngad: ako" i? ga: myid' ra".

⁹Yoseb wa- Cetao wa ce: Egutu mung" mae Mao"So yang ngore byid' to" ra" nga" zo: tao ngad: ako"- ga: tau" ra". Yaku wa- yao: tao re ngo shaman" byid: nae" qhid' mae" ngojhao" jhui" lo geri:- ga: ta" ra".

¹⁰Yaku wa mao: yang: myo, mamyao ngad: ra". Amung: yao: wa qang: qang: za: maqo" myao ngad: ra". Yoseb wa zoshao tao re yao: jhao" jhui" lo byid: mung: Yaku wa yao: tao re po: ci mung: bobaug baug byid' ra".

¹¹Yaku wa Yoseb re- ngo wa nao re dam: qhug' myao: lo nae" ein: Khonhae" re: majho lo:- ana" Mao"So wa ni" zo: qere lhao" re: ngore myao nhao: ava"- ga: ta" ra".

¹²Ai: thao Yoseb wa Yaku nho: tao: kheim" mae" yao: nhae tao re jhui" yu mung: yao" qhid' kheim: mae yao" myo, khung: re myid gaung khyo goe; gyo" ra".

¹³Yoseb wa Ephrim re Yaku nho: lo, kaung: shad' mae Manashe re wa lo, yo shad' mae nha: to" ra".

¹⁴Ngadqere: Yaku wa yao" lo, jho" shai" mung: yao: wa angai yaug ngad sho' ngadqere:- Yaku wa yao" lo, yo lo, re Ephrim nho: au: dao mae kai: byid: mung: yao" lo, kaung: lo, re qi: yaug ngad: ra" Manashe nho: dao mae kai: byid' ra".

¹⁵Ai: thao Yaku wa Yoseb re- nga" pho" Abraham we' Isag yang caung da" byid' ra" yaug Mao"So wa ce: zoshao tao re shaman" byid' vashao:- Ana" ba joe" sho' ngore jhui" lo: ra" yaug Mao"So wa yao: tao re shaman" byid' vashao:-

¹⁶Shid gyan nogyan alhab' mae" ngore khyad' yu yang: mug: lagyo: wa yao: tao re shaman" byid: vashao:- nga" mang we' nga" pho" Abraham we' Isag mang wa yao: tao khyo" yang dang: jo, vashao:- Yao: tao wa zo: dau myo: sho'- Myid:zo: myo: sho' qo" vageshao: wo" ga: shaman" byid' ra".

¹⁷Yoseb wa yao: pho" nho: lo, yo lo, Ephrim nho: au: dao mae kai" to" rure myao lao" nhag' lam: mamyan ngad: ra". Airumung: Yoseb wa yao: pho" nho: lo, re Ephrim nho: au: dao mae" Manashe nho: au: dao khyo yu: kai: byid' ra".

¹⁸Yoseb wa yao: pho" re nga" pho" we"- ai: khyo" mangad: ceyaug wa zoqhid' yaug ngad: ra". Ni" lo, yo lo, re yao" au: dao mae kai: byid: wa,- ga: ta" ra".

¹⁹Yao: pho" wa ha zo" re"- nga" zo: we"- ngo ba:- ngo ba:- Manashe nho: myid:zo: qere: byumyu" qi: boe" li" li" genae"- ngadqere: yao" yao: nhaung: yaug wa yao: tho' je: qi" li" nae". Amung: yao" myid:zo: qe wa byumyu" qi: boe" li" li" genae"- ga: ta" ra".

²⁰Airumung: Yaku wa ai: ba mae yao: tao re shaman" byid: mung:- Israel byu qe shaman" dao: ta" gelao" yao: bam wa ni" shid' tao: mang re ci: li" genae". Yao: bam wa- Mao"So wa Ephrim re we' Manashe re we' dakhyo: nao re kad' byid: vashao:- ga: ta" li" genae"- ga: ta" ra". Ceru: Yaku wa Ephrim re Manashe nho: qhid' mae to: byid' ra".

²¹Ai: thao Yaku wa Yoseb re nao myao: ru we' dakhyo:- ngo wa shid: lo" na va"- ngadqere: Mao"So wa nao we' daga" na mung: yao: wa nao re ni" phug' pho" bam: mung" khyo dam: jhui" tug' lo" li" nae".

²²Ngo wa nga" shae we' nga" lo, la" yang Amori byu qe mae" lhad' yu: to" ra" ai: myid xau gai: ra" Shekhem mang: re ni" mao:nhaung: qere mabyid: lo: nao re byid' ra"- ga: ta" ra".