Read Maru APAN AQAO: 49 Bible Online

APAN AQAO: 49 - Maru bible

APAN AQAO: 49

¹Yaku wa yao" yauggai zo: qere khai: yu mung:- lhang" gam: mae zang" lo geri:- joe" lo nae" ayo, mae naonhaung" boe" genae" ra" khyo re ngo ta" kyo: byid: nae".

²Yaku nho: yauggai zo: qe we"- zang" lo mung: tae" gyo: ge,- naonhaung" yao: pho" Israel ta" rure tae" gyo" yu ge,-

³Nga" zoqhid' Rubin we"- nao: wa nga" qam: ngad mung: nga" zo: sao qhid' yaug ngad: ra" nga" qam: zhau: yo, mae" zoqhid' ngad: ra". Nga" zo: alhab' mo, mae" qam: bo: thao" yaug we' nga: qo" yaug ngad: ra".

⁴Nao wa qid gyui we' dau: ra". Ngadqere: nao wa akhyag: thao" ra" yaug boe" nae" mangad:- Pe"mung:ga"re nao wa nga" myingai myhi" re yab mung: ni" pho" nho: yab jaung: re phoe nhao: ra".

⁵Simon we' Levi tao wa yao: tao ngad: ako". Yao: shid' tao wa yao: tao: nho: shae lhae re ci yang: aqan alan mau" re shad' lhoe" ako".

⁶Ngo wa yao: tao: nho: anyham: avho' jho" qham: rumae re: mabo: bo nae". Amung: yao: tao: zabphaung jham mae re: mabo: bo nae" pe"mung:ga"re yao: tao wa nhag' yo" rumae byu se' mung: zojhi jhi nae" qhid' mae" nung: jaung lo: re qhao" kao gyi: zhe' byid' ako".

⁷Yao: tao: nho: nhag' yo" rumae nhang: kheim: zao" vashao:- pe"mung:ga"re ai wa qu" gyaug qu" lhaung sho' ngad yang: ngad: ra". Amung: yao: tao: nho: nhag' jam: yo" rumae nhang: kheim: zao" vashao:- pe"mung:ga"re airu wa dajhid' re: nhag' khyag' myid mabo yang: ngad: ra". Ngo wa yao: tao re Israel mung"dan: geim" khyo pyo: sin" ke' byid: nae". Ngo wa yao: tao re yao: tao: nho: byumyu" phaung gaung: mae" kho' pye' byid: nae".

⁸Yuda we"- ni" mao: ni" nhaung: qe wa nao re khin" byid' li" genae". Nao wa ni" gyevo qere lang zang: mae" zaui" ci: li" nae". Ni" mao: ni" nhaung: qe wa ni" qhid' kheim: mae goe; gyo" li" genae".

⁹Yuda wa yao" zo: sho: re bin" se' yu mung: yao" khyaung khyo tug' lo mung: lang" yao" jo; ra" khang khyi we' dau: ra". Yao: re khag' re: maye: ve" cizai" ngad: ako".

¹⁰Yuda wa kho:kham zaung: bao" re zaui" ci: li" nae". Yao" nho: myid:zo: qe wa khonhae" re: eib: li" genae". Byumyu" qe wa yao: re khang: byid: mung: yao" qhid' kheim: mae goe; gyo" yang: mho dao: tae" gyo" li" genae".

¹¹Yao: wa yao" loze re sabyi naui mae we' gai: thao" ra" sabyi naui mae taui" to" ra". Yao: wa yao" mai bau: jham re sa: ru: ne: ra" sabyi qang: mae cid' ra".

¹²Yao" myo, jid' wa sabyi qang: shaug' yang: ne: ra"- yao" zaui wa nung: nug' shaug' yang: phyu: ra".

¹³Zebulun wa panglai: ayae mae na: li" nae"- yao" qid yae wa qid sang pho gau: khung: ngad: li" nae". Yao" mug: myid wa Sidon joe" sho' ngad: li" nae".

¹⁴Isakha wa qola do: agyo: mae lang" jo; ra" loze tho' maje: gai ngad: ra".

¹⁵Ngadqere: yao: wa- noqo gai mung:- qu" ngaui taung" ra" mug: myid re myao: ra". Airumung: yao: wa yao" dao kao" re qovin nae" gam" gyo" mung: jeim re we' dakhyo:- mau" deim" zag: zaui: nhao: ru qhug' ra".

¹⁶Dan wa yao" byu qere eib: ra" yaug ngad: li" nae". Yao: bam wa Israel byumyu" kaung gatau we' dau: li" nae".

¹⁷Dan wa khyoyae mae na: ra" daug thin: ra" lhao maui boe" li" nae". Aiwa myao: khunhag' thaung: thao re thoe: mung: jhui: yaug re kyilao: nghung" byid: gyo" lo" nhao: li" nae".

¹⁸ASANG we" ngo wa ni" nho: khyad' yu: rure lao" na:.

¹⁹Gad wa damya, jham: yang phyo' zo" ru qhug' li" nae". Ngadqere: yao: wa tug' lo mung: yao: bam: thao re cao" khe' li" nae".

²⁰Ashe nho: mug: myid wa zo: shaug' agai qo" nhao: li" nae". Yao: wa kho:kham re zo:ve bao" thaug' byid: yaug ngad: li" nae".

²¹Nabhtali wa galin: gago: tao" qin" ra" shocid ngad mung:- yaung" ra" shocid nau" khau: ra".

²²Yoseb wa qid thug' nhae mae na: ra" loze lhae: we' dau mung: bug gaung nhae mae na: ra" myao: nau" we' dau: ra".

²³Yao" gyevo qe yao: re qu" gyaug qu" lhaung lhe: mung:- yao: bam: lo, la: jham we' myo: jham: yang cao" khe' ako".

²⁴Ngadqere: yao" lo, la: wa gang: za: ngad: jo, mung: yao" lo, wa qam: bo: thao" ra". Yaku nho: Mao"So: lo; yang re: yao lhaug' yaug ngad: ra" Israel byumyu" nho: gug: gam byid: yaug: yang re: qam: bo: nhao: ra".

²⁵Nao re bao" thaug' byid: yaug ngad: ra" ni" pho" nho: Mao"So- nao re shaman" byid: yaug ngad: ra" qam: bo: thao" ra" Mao"So wa- mug: tho' mae" mug: qu: ra" shaman" jeju- myid gyid' mae" no; ra" qid mae" shaman" jeju- gug'nyhug' we' zo: dau shaman" jeju-

²⁶Gaug zo we' bin: shaman" jeju- ganhae" mae" bam jham: nho: shaman" jeju- apyad ato jo; ra". Bug gaung qu" ngaui sho' ra" jeju jham re shaman" byid: vashao:- Ce: shaman" jeju jham wa yao" mao:nhaung: qe mae" gatau san: to" ra"- Yoseb nho: au: dao mae- myo, keim: mug' dao mae bo: jo, vashao: wo"-

²⁷Benyamin wa qu" gyaug sho' lhe" ra" zag ne we' dau: ra". Yao: wa ne, kao myi" thao se' yang: zo" ra"- ga: ta" ra".

²⁸Cebam wa Israel byumyu" daxe: shid' kaung ngad mung:- ceru wa yao: bam: yao: pho" khyo" mung: yao: zo: yaug khao: ngo" qo" yu ang: ra" shaman" dao: ngad: ra".

²⁹Ai: thao Yaku wa yao" yauggai zo: qere- ana" ngo wa shid: byaug vako" ra" nga" byu qejhao" lo" zai ngad va"- Khanan mung" Mamre ba thug' shad' mae" Hiti byu Ephron nho: yothaung: Magphela jo, qo mae jo; ra" laug' khyaung mae nga" phug' pho" qe we' daga" ngore nyhab' ge,

³⁰Abraham wa ce: laug khyaung re vai: yu mung: Ephron nho: yothaung: re lab kad' ra".

³¹Yao: bam wa ai: mae Abraham we' yao" yham sang myhi" Sara re nyhab' to" ako". Yao: bam wa ai: mae Isag we' yao" yham sang myhi" Rakhela re nyhab' to" ako". Ngo wa ai: mae Lea re nyhab' to" ra".

³²Yothaung: we' aimae" laug khyaung re Hiti byu qe mae" vai: to" ru ngad:- ngore aimae nyhab' gela,- ga: pyang: to: co' ra".

³³Yaku wa yao" yauggai zo: qere dao: bin: pyang lao" dam: lang" lo" mung: shid: lo" ra".