Read Maru APAN AQAO: 6 Bible Online

APAN AQAO: 6 - Maru bible

APAN AQAO: 6

¹Xao su byu qe wa mug: myid geim" khyo na: byo: sin" lo" gelao" myiqe: zo: qe khau: li" ako".

²Mug:gaung dao mae" yauggai zo: qe wa ai: zomyi: zo: qere yaung" qo myao mung: yao: bam wa yao: yao: qu" ngaui: ra" yaug re yu ngho" ako".

³Ailao" ASANG wa ngo wa byu qere apyad ato na nae" akhang" mabyid: nae" yao: bam wa shid ba: ra" mo, ngad: ako". Ana" mae" thoe gu: yao: bam wa 120 zin mae" lai yang: maqo" na logenae".

⁴Ai: pyad mae we' thao myao" sho' lhao" re: myid gaung dao mae xao su byu myiqe: we' mug:gaung dao mae" Mao"So: yauggai zo: qenho: myid:zo: qe ngad ko" ra" gyai qam: bo qi" qhang: ra" mo, na: ako". Yao: bam wa ganhae" pyad mae" gyai qam: bo: ra" sulhe: qe we' lahau: qi: mo, ngad: ako".

⁵ASANG wa myid gaung dao mae" byu yaug khao: ngo" wa khoqhi" sho' makhyang: kad' ru we' yao: bam: myid: ra" khyo khoqhi" makhyang" ru the' myao: ra".

⁶Amung: yao: wa xao su byu qere phan" mung: myid gaung dao mae nha: to" rure nhag' kaug' byaug; ra". Yao: wa gyai nhag' kaug' mung:'-

⁷Ngo wa ngo yao: phan" to" ra" ce: byu qere jhad' za: sham" pye' nae"- gug'nyhug' jham ngho' jham rere: jhad' za: sham" pye' nae". Pe"mung:ga"re ngo wa yao: bam re phan" phaug' to" rure nhag' kaug' ra"- ga: ta" ra".

⁸Ngadqere: Noa re kam" wa ASANG ngaui: ra".

⁹Ceru wa Noa nho mhomyi: ngad: ra". Yao: wa Shem ,Ham, Yaphed ga" ra" yauggai zo: sam yaug qo" ra". Noa wa pe" qobo vhin nae" khyo majo, mung: yao" pyad ban: mae byugai wa yao: dayaug za: ngad: ra". Yao: wa Mao"So we' zam" khug yang: kao so' daui: ra".

¹¹Ngadqere: gaje qe alhab' wa Mao"So: qhid' kheim: mae makhyang: mo, ngad mung: khyi" khao: ngo" mae aqan alan se' da: be, khyad' mau" byang" jo; ra".

¹²Mao"So wa mug: myid re qu" ke' re byu re wa alhab' mo, makhyang: mashab ra" khyo" kao so' daui: na geyang: makhyang" rure myao: ra".

¹³Ailao" Mao"So wa Noa re Ngo wa xao su byu alhab' re se' tam" pye' nae" qhid' mae" myid: phyid' pye' va". Mug: myid wa xao su byu qe yao: bam: aqan alan se' da: be, khyad' lo, mau" jham byang" jo; ruyang ngo wa yao: bam re bin sho' phyo' qheim" pye' naeva".

¹⁴Sag' the: gai: yang nao yao" qhid' mae" qid sang pho dalam: zhaug' wa,- qe, jham ke' wa,- akhug we' adao: mae sag' gyid: gyad wa,-

¹⁵Aire qhang phyao: 450 pe: lu phyao 75 pe:- Myhao phyao: 45 pe: kad' wa,-

¹⁶Qid sang pho re mhao: mug: te' wa- aire mug: khyo- dadaung" to' mung: ayae khyo dadaung" daung" ze yang: te' wa,- qid sang pho re sam pyae zhaug' mung: ayae shad' mae kham: mo" dung: dalam: te' wa,-

¹⁷Kao so' daui: ra" ja: alhab' re phyo' qheim" pye' nae" qhid' mae" ngo wa myid gaung dao khyo daqid shi: nhao: ke' naeva". Myid gaung dao mae ja: khao: ngo" wa shid: li" genae".

¹⁸Ngadqere: Ngo wa nao we' dao: thang" to: nae". Ni" yham sang myhi"- ni" yauggai zo: qe we' yao: bam: yham sang myhi" qe we' daga" qid sang pho khug khyo vao ye: wa,

¹⁹Daui: na nae" qhid' mae" gug'nyhug' ja: khao: ngo" we' ngho' ja: khao: ngo" mae" apho" we' amyhi" zham" mung: qid sang pho khug khyo nao we' daga" jhui" vao ye: wa,-

²¹Naonhaung" qhid' mae" we' aijham alhab' mo; qhid' mae" zo:ve cao jab civao ye: wa,- ga: ta" ra".

²²Noa wa Mao"So: yang amyin" byid' ra" gu: ja: khao: ngo" re kad' ra".