Read Maru APAN AQAO: 8 Bible Online

APAN AQAO: 8 - Maru bible

APAN AQAO: 8

¹Mao"So wa Noa qid sang pho khug mae yao: we' daga" ngad ko" ra" gug'nyhug' alhab' re mato" myhid' pye' ngad: ra". Yao: wa la re hug' nhao mung: qid wa kin" gyo" lo" na: ra".

²Myid gaung gye, mae" qid khyo: jham we' mug:gaung mae" qid kham: jham wa pyid' lo" ako". Mug: qu: ru thang: lo" mung:-

³Qid wa zo" mae" gyo" lo" mung:150 ba re kin" lo" byaug: ra".

⁴Qid sang pho wa lho" nhad' khye' ein: khye' daxe: nhad' ba re Ararad bam dao mae lo" kai" jo; ra".

⁵Qid wa xo' yang: gyo" lo" mung: lho" daxe khye' ein: khye' sao qhid' ba re bam au: jham myao: thug' li" ako".

⁶Byid xe ba thao re Noa wa bao: zao: kham: re phung" mung:-

⁷Kano, dadau: re nhao: thug' ke' ra". Ai: Kano, wa madam: tug' lo lo: qid bin sho' kin" lo" yo, joe" sho' dao" lhang: qin" ra".

⁸Ai: agyo: mae qid kin: makin" rure qu" nae" qhid' mae" Noa wa phaung" kyug' dadau: re nhao: ke' ra".

⁹Qid wa myid gaung alhab' re nhai" to: shi mung: phaung" kyug' wa no: nae" jo, qo mamyao ngad: ra". Ai: phaung" kyug' wa qid sang pho khyo dam: tug' lo mung:- Noa wa lham: taung" yu yang: akhug mae nha: ra".

¹⁰Yao: wa gatau nhad' ba lao" yang: phaung" kyug' re dam: nhao: ke' ra".

¹¹Ai: phaung" kyug' wa myi" thao re zhanlun vho' ajam: nhad' mae bin" zag: ci yang: Noa jhao" dam: tug' lo: ra". Ailao" Noa wa qid gyo" lo" byaug va" rure ba: ra".

¹²Ai: thao yao: wa gatau nhad' ba dam: lao" mung:- phaung" kyug' re dalhang dam: nhao: ke' ra". Celhang mae phaung" kyug' wa madam: tug' lo lo:ngad: ra".

¹³Noa apyad 601 zin loe" mung: lho" sao qhid' khye' ein: khye' sao qhid' ba mae qid wa kin" lo" byaug: ra". Noa wa qid sang pho anghoe' re phung" pye' mung: gam: sho' qu" ke' re myid gaung ho: lo" na: rure myao: ra".

¹⁴Lho" shid' khye' ein: khye' shid' xe: nhad' ba mae myid gaung wa bin sho' ho: byaug: ra".

¹⁵Ailao" Mao"So Noa re-

¹⁶Ni" yham sang myhi"- ni" zo: qe we' yao: bam: yham sang myhi" qe we' daga" qid sang pho mae" thug' ge,

¹⁷Ngho' jham alhab' gug'nyhug' jham alhab' nao we' daga" jhui" thug' lo" wa,- yao: bam wa je" li" mung: myid gaung geim" alhab' mae byo: sin" lo" zai ngad: ra"- ga: ta" ra".

¹⁸Airumung:- Noa wa yao" yham sang myhi" yao" yauggai zo: qe we' yao: bam: yham sang myhi" jham we' daga" ai: qid sang pho khug mae" thug' lo" ako".

¹⁹Gug'nyhug' alhab' we' ngho' jham wa yao: bam yao" amyu" ja: aphung: phung: mung: qid sang pho mae" thug' lo" ako".

²⁰Noa wa ASANG: qhid' mae" phan dalam: kad' ra". Goe; pa" thung" khyo" san sin" ra" gug'nyhug' ngho' cao jab alhab' mae" daja: mae" dadau: dau: yu mung:- phan dao mae xeim: khyo" dau: geim" geim" re phad' ngaui" byid' ra".

²¹ASANG wa ngaui" xeim: byid' ra" sheim re ngaui mung: ngo wa xao su byu kad' ra" lo, mau" mathao mae myid gaung re khonhae" re: nhang: kheim: make' lo nae". Yao: wa ngai: mae" yao: myid: ra" khyo jham wa makhyang" ru ngad: rure ngo ba va". Ngo wa ana" celhang kad' va" ru we' dakhyo: khonhae" re: madam: phyo' qheim" pye' lo nae".

²²Mug: myid ajo, jo, wa qhovo: qho: nae" ayo, we' qhovo: jham" yu nae" ayo, jo; li" nae". Gyo; ru- laung: ru- lam yo, we' gyo, yo, myi" na" wa khonhae" re: jo; jo, li" nae" ga: yao" aung khug mae ta" ra".