Read Maru 2 SAMUELA 12 Bible Online

2 SAMUELA 12 - Maru bible

2 SAMUELA 12

¹ASANG wa lapa Nathan re Davi jhao" nhao: ke' ra". Nathan wa yao: jhao" ye: mung:- vomo" dalam: mae za: byu shid' yaug daga" na: ako". Dayaug wa jo,nho" qo" mung: dayaug wa myaung sho" ra".

²Jo,nho" qo" yaug wa nung: we' yao- myao: myo: sho' qo" ra".

³Myaung sho: yaug wa yao: vai: to" ra" yao dadau: za: qo" ra". Yao: wa aire nyang" za: caung: to" ra". Ai: yao wa yao" yham mae yao" zoshao qe we' daga" qi" li" ra". Yao: wa ai: yao re yao" zo:ve zho: mung: yao" keim: mae" shaug' nhao: yang: yao" tao: kheim" mae vo; ci: ra". Ai: yao nau" wa aiyaug qhid' mae" yao" myiqe: zo: we' dakhyo: ngad: ra".

⁴Daba mae ai: jo,nho" qo" yaug: yham khyo bang" vo dayaug joe" li" ra". Jo,nho" qo" yaug wa aiyaug: qhid' mae" zo damyo: nyhang" byid: nae" yao" gug'nyhug' jham mae" dadau: re: manug: se' ngad: ra". Ai: atha" yao: wa ai: myaung yaug: nho yao nau" re taung" yu mung: yao" bang" vo qhid' mae" zo damyo: yhaung" byid' ra"- ga: ta" ra".

⁵Davi kho:kham wa ai: jo,nho" qo" yaug re nhag' gyai yo: mung: ceru: kad' ra" yaug wa shid ca" ra" khyo re daui: na: ra" ASANG re lao: yang: ngo jham tang" ra".

⁶Airu" ra" nhag' khyag' myid mabo: ra" lo,mau" kad' va" ru qhid' mae" yao: yu: ra" nho" byid zhao" dam: tug' byid: ca" ra"- ga: ta" ra".

⁷Nathan wa Davi re- nao wa byu aiyaug ngad: ra". Amung: ce wa Israel nho: Mao"So ASANG ta" ru ngad: ra". Ngo wa nao re Israel kho:kham kad' nhao mung: Sholu lo, mae" nao re khyad' yu va".

⁸Ngo wa nao re yao" mung"dan: we' yao" yham sang myhi" jham re byid: va". Ngo wa nao re Israel we' Yuda mung" alhab' re kho:kham kad' nhao va". Cegu: za: malaug shire wa ngo wa nao re shid' zhao" dam: byid: shinae".

⁹Aire pe"mung: nao nga" amyin" dao: jham re maphug' cao" i? Ce: makhyang" ra" mau" re nao pe"mung: kad' i? Nao wa Uria re gyekhe' poe mae se' pye' qhug' nhao: ra". Nao wa yao: re Amon byu qere yao: re se' pye' nhao: ra". Ai: thao yao" yham sang myhi" re nao yu: ra".

¹⁰Ana"- nao ngore mho dao: magyo: kad' mung: Uria nho: yham sang myhi" re nao yu va" ra" mathao mae byuqae: khao: ngo" mae" ni" myid:zo: qe daqhae: wa mai: shid mung: li" genae".

¹¹Ngo wa ni" yham khaung byu qe mae" dayaug: yang nao re qug: khai: boe" nhao nae" khyo re nao re ngo jham tang" to" ra". Ngo wa ni" yham sang myhi" jham re nao mae" yu: pye' mung: ai bam re yauggai gatau dayaug re byid' li" nae". Yao: wa na" gaung de: de: mae ai bam we' gaung sho: jho" zam" na: rure nao myao: li" nae".

¹²Nao wa azug: anyham: mae qobo shad' lhoe" ra". Ngadqere: Israel byu qe alhab' myao genae" qhid' mae" na" gaung de: de: mae ceru re ngo boe" nhao nae"- ga: ta" ra".

¹³Davi wa ngo wa ASANG re qobo shad' lhoe" va"- ga: ta" ra". Nathan wa ASANG nao re qobo khyad' pye' byid' ra". Nao wa mashid nae".

¹⁴Ngadqere: nao ceru: kad' yang: ASANG re pe" xan: masun: kad' rure qhu" byid: ra" ruyang ni" zoshao wa shid: li" nae"- ga: phaug' tau" ra".

¹⁵Ai: thao Nathan wa yham phao: lo" ra". ASANG wa Uria yham sang myhi" yang Davi re khau byid' ra" zoshao re gyai no: li" nhao: ra".

¹⁶Davi wa zoshao gai: li" maba ga: Mao"So re akyu" mho' ra". Yao: wa zo:ve pe" re: mazo: lo: na: pye' ra". Myi khao: ngo" yao: wa yao" qe, khyo vao ye: mung: phyao: gaung mae myi geim" geim" lang" jo; ra".

¹⁷Yao" kho:kham kho" mae" zug: qe wa yao: jhao" ye: mung: yao: re yetau: to' ako". Ngadqere: yao: wa ha: pye' mung: yao: bam we' daga" pe" re:- mazo: ngad: ra".

¹⁸Dalaban thao re ai: zoshao shid: lo" ra". Davi nho: zug: qe wa ai: lau dao: Davi re ta" kyo: nae" gyaug: ako". Yao: bam wa zoshao daui: na shi" gyo: mae lhao" ngonhaung" yao: re ye jhau: re Davi wa ngonhaung" re dao: matau: ngad: ra". Yao" zoshao shid va" khyo re ngonhaung" khoru: yao: re qo" ta" kyo: zai i? Yao: yao" gaung re yao: dae te' li" maba- ga; ta" ako".

¹⁹Davi wa yao: bam yao: cao: dao so' jho" so' na ko" rure ba: qu" lao"- zoshao shid va" rure yao: beim" ra". Aimung: yao: wa yao: bam re zoshao shid: ava" i? ga: myid' ra". Yao: bam wa ngad:- yao: shid: ava" ga: tau" ako".

²⁰Davi wa phyao: gaung mae" to" mung: gaung cid' pye'- au: kyo' pye' mung: mai bau: tha" ve; ra". Ai: thao yao: wa ASANG: yham khyo vao ye: yang: ye caung:pa" ra" kho:kham kho" khyo yao: dam: tug' lo lao"- zo:ve mho' ra". Bin: jaung we' zo" ra". Yao" nho: zug: qe wa yao: re-

²¹Cere ngonhaung" maba: gyo:- zoshao daui: na: ra" gyo: mae nao wa yao" mathao mae ngug mung: zo mazo: ngad: ra". Ngadqere: yao: shid we' nao wa to" li" mung: zozo" ra" ga: ta" ako".

²²Davi wa ngad:- yao: daui: na shi" gyo: mae ngo wa zo:ve jao" mung: ngug: lo: ra". ASANG wa ngore nhag' khyag' yang: zoshao re mashid nhao maba ein: ngo myid: ra".

²³Ngadqere: ana" wa yao: shid: byaug: ava". Zoshao nho: kao so' re dam: qo" qhug' yu nae" i? Ngo pe"mung: zo:ve jao" ang nae" i? Zoshao nho: kao so' re dam: qo" qhug' yu nae" i? Ngo wa daba ba mae yao: ye" lo" ra" jo, qo khyo ye" lo" nae" ngad:- ngadqere: yao: wa ngojhao" khonhae" re: madam: tug' lo lo nae" ngad: ra" ga: tau" ra".

²⁴Ailao" Davi wa yao" yham sang myhi"- Betsheba re nhag' tang" byid' ra". Davi wa yao: we' gaung sho: jho" zam" mung: yao: yauggai zo: dayaug khau: ra". Davi wa yao: re Sholamon ga: mhang" ra". ASANG wa ai: yauggai nau" re jhid'de; ra".

²⁵Yao: wa lapa Nathan re ai: yauggai zonau" re Yedidia ga: mhang" nhao: ra". Pe"mung:ga"re ASANG yao: re jhid'de; ra".

²⁶Ai: ayo, gyo: mae Yoab wa Amon vomo" Raba re xo' yang: vang" to: mung: alaug laug qo" sang: yu: ra".

²⁷Yao: wa Davi re lagyo: nhao: ke' mung: ngo wa Raba re khe' zin: mung: qid yu: ra" jo, qo re qo" sang: yu va".

²⁸Ana" dang: jo, ra" gyetab jham re zhang: yu: yang: ai: vogaung: re mang: li" zin: mung: nao yao: li" sang: yu: pye' wa, airu ngo sang: yu: ru qhid' mae" ngo mang gai ma- o ga: lau kyo" ke' ra".

²⁹Aimung: Davi wa yao" gyezo: qere zhang mung: Raba khyo ye: yang: mang: yezin: mung: ai: vogaung: re aung: yu: ra".

³⁰Davi yu: yu: ra" Amon byu qe: so Moleg nho: so alho au: mae" qhang ba maug: wa Talenta dalam ko la: mung: laug sin" te' to" ra". Davi wa ai: laug sin" re yu: yu mung: yao" ba maug: mae te' ra". Yao: wa vomo" mae" lanyab re myo: sho' sham" yu: ra".

³¹Ai: vobyu qere wa sag' qhag' qhag'- khoe' mo" be, vozaung: be, mau" we' zhogam: thaung: kad' mau" mae khyo" to" ra". Yao: wa Amon vogaung: gatau jham mae" vobyu qere re: dakhyo: za: kad' ra". Ai: thao yao: we' yao" byu qe wa Yerusalem khyo tug' lo: ako".