Read Maru 2 SAMUELA 15 Bible Online

2 SAMUELA 15 - Maru bible

2 SAMUELA 15

¹Ceru: thao- Absalom wa gyekhe' myao: lhin" we' myao: jham re yao" qhid' mae" qho: yu mung: qhid' au: mae ye: nae" byu ngo" xe zo: re nyhang" byid' to" ra".

²Yao: wa ne, seim no' to" yang: vomo" kham: khyoyae mae lhaung" yeye; jo; ra". Byu dayaug yaug kho:kham: yang ta: sho' byid: nae" ru o yang: jho" ta" ngag: byo; ra" mau" we' ai: khyo li" khao: ngo" Absalom wa yao: re khai: yu mung: yao: khai: mae" ngad: rure lhaung" myid' ra". Byu aiyaug yao: pe" ja" amyu" kaung we' khai: mae" joe" li" rure yao: re bin: ta" kyo: thao-

³Absalom wa qu" wa, tarha" wa ni" shad' mae ngad: ra". Ngadqere: ni" mung mau" re tae" gyo: byid: nae" kho:kham nho: gaung tha" dayaug re: mana ngad: ra" ga: lhaung" ta" ra".

⁴Aitho' mago" ngo tarha" agyi ngad: qa: we"- aire wa jho" ngag: byo, mau" qo" yaug- mung mau" bo yaug wa ngojhao" qo" li" zai ngad: ra". Ngo wa yao: re tarha" din: nyang: ru kad' byid: nae" ngad: ra" ga: lhaung" ta" ra".

⁵Byu dayaug yaug yao" qhid' kheim mae goe; gyo" nae" yao: jhao" te' li" lao"- lo, yheim" ke' yang: zaui" yu mung: bobaug lhaung" baug byid' ra".

⁶Absalom wa tarha" din: nyang: ru qhid' mae" kho:kham pho" jhao" li" ko" ra" Israel byu yaug khao ngo" re ceru: kad' ra". Amung: yao: wa yao: bam: yang phug' myao: byid' rure qhug' yu: ra".

⁷Byid zin kyo thao- Absalom wa kho:kham Davi re- ngore Hebron khyo ye: mung: ngo ASANG re dao:so: byid' to" rure yezaui" pyang" nhao la,.

⁸Ngo Suri mung" Geshu mae na: ra" gyo:- yao: ngore Yerusalem khyo dam: jhui" tug' lo" ngad: re ngo wa yao: re Hebron mae caung:pa" byid: nae" ein: ASANG re ngo dao:so: byid' to"- ga: ta" ra".

⁹Kho:kham pho" wa- ngaui pyo: yaug yo za: ye: wa,- ga: ta" ra". Aimung: Absalom wa Hebron khyo ye" lo" ra".

¹⁰Ngadqere: yao: wa Israel byu qe alhab' khyo- labo" thoe- hug' thoe re naonhaung" the' gyo: gelao"- Absalom wa Hebron mae kho:kham boe" va" ein: hug' ge,- ga: ta" nae" lagyo: qere nhao: ke' ra".

¹¹Yerusalem mae" Absalom khai yang: yao: we' daga" ye" lo" ra" mo, byu shid' yo zo: ngad: ako". Yao: bam wa ai: khug lhang mau" khyo re pe" maba geyang: lam lam za: ye" lo" ako".

¹²Absalom wa yao: xeim: ngaui" ngaui" byid' na: au:- Gilo vogaung: mae" kho:kham Davi nho: pha,jhi" byid: mo, mae" dayaug ngad: ra" Ahithophe rere: khai nhao: ke' ra". Kho:kham re khug lhang tau: lhan" ru wa qam qo" li" mung: Absalom nho: thao cao" mo, wa myo" laug: li" ako".

¹³Lagyo: dayaug wa Davi re- Israel byu qe wa Absalom shad' de, nae" dao:so: to" na: avako"- ga: lota" kyo" ra".

¹⁴Ailao" Davi wa yao: we' daga" Yerusalem mae na ko" ra" yao" gyezug: qe alhab' re ngonhaung" Absalom nho: lo, mae" phao: loe, nug: re wa ngonhaung" ana" yao: phao: lo" ca" va". Phyad mung ge,- mangad: re yao: wa mamyao" re cekhyo joe" lo mung: ngonhaung" re lokhe' zin" aung: pye' yang: vomo" mae" yaug khao: ngore lose' pye' li" nae"- ga: ta" ra".

¹⁵Yao: bam wa gai va" ASANG kho:kham we" ngonhaung" wa nao ta" ru pe" ngadqere: kad' nae" jin" jin" ngad: ga: tau" ako".

¹⁶Aimung: kho:kham pho" wa kho:kham kho" re qu" caung nae" to: co' ra" yao" myingai daxe yaug mae" je: gu: alhab' yao" yham byu qe- yao" zug: qe alhab' bobo yang: to" lo" ra".

¹⁷Kho:kham we' yao" byu qe alhab' vomo" mae" thug' lo" na ko" au: yao: bam wa lo" thao" ra" yham mae thang: ako".

¹⁸Kho:kham kao zaung" mo, yao" qhid' au: khyo" su" lai: lo" ko" au:- yao" zug: qe alhab' wa yao" thao mae ye; ako". Gat vogaung: mae" yao" thao cao" ko" ra" gyezo: khyaug' yo zo: re: lai: ye" lo" ako".

¹⁹Aimung: kho:kham wa yao: bam: au: jhaung Itai re- nao pe"mung: ngonhaung" we' daga" cao" li" i? Tug' lo" mung: kho:kham asag' we' lo" na ge,- naonhaung" yao" mug: mae" li" phao: khug: na mo, ngad: ako".

²⁰Ngo wa cemae dazab daso' za: na: lo: ra". Aire pe"mung: ngo wa naonhaung" re ngo we' daga" jhui" du" lae" qin" nae" i? Ngo khai: ye" na: ru lhao" ngo maba- Tug' lo" mung: ni" byu qere nao we' daga" jhui" lo" wa,- ASANG wa nao re nhag' khyag' mung: ni" dao mae jhaug' zaug vashao: wo"- ga: ta" ra".

²¹Ngadqere: Itai wa- ASANG kho:kham we" nao khai: ye: khai: ngo wa khonhae" re: nao we' daga" ye: nae" ein: ASANG mang re lao yang: nang: kheim: ke' to: va"- ga: tau" ra".

²²Davi wa- gai: ye" lo" wa,- ga: ta" ra". Itai wa yao" byu qe alhab' we' yao: bam: yham byu qere jhui: yang: ye" lo" ra".

²³Davi thao cao" mo, to" lo" ko" au:- mo,byu qe gyi: ngug: ako". Kho:kham pho" wa yao" byu qere cao" yang: Kidron qid zo: gyaung: re gau: de, mung: yao: bam wa daga" za: din"pyad' yo shad' khyo ye" lo" ako".

²⁴Khinjaung Zadog wa Levi byu qe we' daga" dao: thang" ban" vo, mung: ai: mae na: jo; ra". Yao: bam wa aire khyo" to: mung: vomo" mae" mo,byu qe alhab' bin: to" thug' lo" gesho' aire madam: gaug: dao ngad: ako". Khinjaung Abiatha re: aimae na: ra".

²⁵Ailao" kho:kham pho" wa Zadog re- ai: Dao: Thang" Ban" re vomo" khyo dam: dao: tug' lo" wa,- ASANG ngore o ngaui: ru ngad: re wa daba ba mae aire we' ai jo; ra" jo, qo re loqu" nae" ngore dam: tug' lo nhao: li" nae".

²⁶Ngadqere: yao: ngore mangaui ngad: re wa- gai va". Alao" yao: myid o: khyo" ngore kad' vashao:- ga: ta" ra".

²⁷Aimung: yao: wa Zadog re xo' yang:- qu" wa, ni" yauggai zo: Ahima we' Abiatha nho: yao: zo: Yonathan re jhui: mung: vomo" khyo yaug yo za: tug' lo" wa,.

²⁸Ana" au:- nao mae" lau dao: re ngo maqo" yu yu wa din"pyad' yo mae" qid gyaung: re gau" de; ra" jo, qo mae ngo lao" na nae"- ga: ta" ra".

²⁹Aimung: Zadog we' Abiatha wa Dao: Thang" Ban" re yu: dao mung: Yerusalem khug khyo tug' lo" mung: lo" na: jo; ako".

³⁰Davi wa zhanlun bam dao khyo do, ye: yang: ngug: ra". Yao: wa khyid cin ngad mung: kaug' ra" aso: khyo" au: mae nghoe' ci: ra". Yao" thao cao" mo, alhab' re: yao: bam: au: jham mae nghoe' ci mung: ngug: ako".

³¹Davi wa Absalom nho: tau: lhan: mau" mae Ahithophe bobo va" ga" ra" thoe re the' gyo: lao"- yao: wa ASANG we"- Jeju khyo" yang Ahithophe nho: pha,jhi" byid: dao: re lajheim: mabo: ru boe" lo" nhao wa,- ga: akyu" mho' ra".

³²Davi wa caung:pa" jo, qo dalam: jo; ra" bug gaung au: khyo joe" do, lo" lao"- lam ga" ra" ba nam pho" Arkhi byu Hushai wa yao: re li" qhug' mung: yao" mai bau: lao" cad' yang: yao" au: mae phalhug gag: sin" yu: ra".

³³Davi wa yao: re nao ngo we' daga" cao: li" re wa nao ngore pe" maqo" bao" nae".

³⁴Ngadqere: vomo" khyo tug' lo" mung:- Absalom re ngo wa ni" pho" re jhaug' zaug za: caung: da" byid' lo: ru we' dakhyo: nao re caung da" byid: nae" ein: lo" ta" ra" khyo" yang ngore qo" bao" li" nae". Amung: Ahithophe byid' ra" pha,jhi" byid: dao: alhab' re nao gai boe" qhi" ngag: thaug' wa,.

³⁵Khinjaung Zadog we' Abiatha wa aimae na lao: genae". Kho:kham kho" mae nao the' gyo" ru ja: khao: ngo" yao: shid' yaug re ta" kyo: wa,.

³⁶Yao: shid' yaug we' daga" yao: shid' yaug: nho: yauggai zo: Ahima we' Yonathan re jhui" na: ako". Amung: nao qo" zhang: yu: ra" lau dao: alhab' re ngojhao" yao: shid' yaug re nao gai: ta" nhao: ke' ra"- ga: ta" ra".

³⁷Aimung: Davi nho: ba nam pho" Hushai wa Yerusalem khyo dam: tug' lo: na ra" au: Absalom re: vogaung: khyo joe" vao lo: na: ra".