Read Maru 2 SAMUELA 18 Bible Online

2 SAMUELA 18 - Maru bible

2 SAMUELA 18

¹Kho:kham Davi wa yao" byu alhab' re zhang" yu mung: yao: bam re dataung phung: dayo yo phung: kho' yang: ai bam: dao mae zug: san: to" ra".

²Ai: thao yao: wa ai bam re Yoab we' Yoab nho: yao: nhaung: Abishai- Gat mae" Itai bam re daphung: re dayaug yaug zug: kad' nhao mung: sam phung: khyo" yang: nhao: ke' ra". Kho:kham pho" wa yao" byu qere- ngo yao: re: naonhaung" we' daga" cao" nae"- ga: ta" ra".

³Yao: bam wa- nao ngonhaung" we' magai: cao" nae"- ngonhaung" dang: ra" gu: tao" phao qere:- ngonhaung" mae" agaung: kho' se' pye' qhug' qere: gyevo qe: qhid' mae" shai" zai mangad:- ngadqere: nao wa ngonhaung" datug tho' je: phug' de; ra". Nao ce: vogaung: mae na yang: ngonhaung" re bao" nae" byu nhao: ke' nae" ngad: re wa je: gai nae"- ga: tau" ako".

⁴Kho:kham wa naonhaung" je: gai: ga: myid ru pe" ngadqere: ngo kad' nae" ga: tau" ra". Amung: yao" byu qe dataung phung:- dayo phung: kad' yang: to" lo" ko" au: yao: wa kham: dung: nhae mae ye; jo; ra".

⁵Yao: wa Yoab- Abishai- Itai bam re- nga" mathao mae zolau: pho" Absalom re dae date' ge,- ga: amyin" byid' ra". Yao" gyezug: qere Davi ce: amyin" byid' ra" khyo gyezo: qe alhab' the' gyo" ako".

⁶Davi gyetab wa seyo khyo ye" lo" mung: Ephrim sag' mo" yo mae Israel byu qe we' gye ye jho" zin" ako".

⁷Davi byu qeyang Israel byu qere khe' aung: pye' ako". Gyai xo sho' seim" byaug; ako". Ai: ba mae byu shid' tug se' pye' qhug' ako".

⁸Gye jho" zin" ru wa seyo: vogaung: khyo byo: lo" mung: gye poe mae tho' sag' mo" yo mae byu je: shid: ako".

⁹Absalom wa nyag din taung" Davi nho: byu daqhae: we' jho" qhug' ra". Absalom wa loze jui" ra". Yao: wa shakhai: gae mo" qao: khyo" lai: lo" au:- Absalom nho: au: lam: wa sag' ku" mae lo" qae" jo; ra". Loze wa su" lai: lo" byaug mung: Absalom wa mug: le; mae myi" lao" jo; ra".

¹⁰Davi nho: byu qemae" dayaug yao: re myao mung: Yoab re zug: mo" we"- Absalom wa shakhai: gae mae myi" lao" jo; ra" ga: lau lokyo" ra".

¹¹Yoab wa nao yao: re the' myao: re wa yao: re ai: mae yao: pe"mung: mase' pye' i? Ngaui daxe kye' we' phyid' cui dalam: ngo yao: nao re byid: nae" ru- ga: tau" ra".

¹²Ngadqere: aiyaug wa nao ngore ngaui kye' dataung byid' re lhao" re: kho:kham pho" yao: zo: re gye kad' nae" lo,nyhug' danyhug' lhao" ngo matau nae"- kho:kham pho" wa nao we' Abishai- Itai bam re nga" mathao mae zolau: pho" Absalom re dae date' ge,- ga: amyin" byid' rure ngonhaung" alhab' the' gyo: va".

¹³Ngadqere: kho:kham pho" mho dao: re ngo matae" gyo: lo:- Absalom re ngo se' pye' ngad: re- yao: wa ai: khyo re the' gyo" li" nae"- yao: wa ja: khao: ngo" re gyo" ra" ai lao" nao ngore gug: gam byid: nae" mangad:- ga: tau" ra".

¹⁴Yoab wa ngo nao we' yo, khyin: mazai" gan: na: nae"- ga: ta" ra". Yao: wa lhae tad' sam khe' yu: yu mung: shakhai: gae mae adaui myi" lao" jo; shi" ra" Absalom nho: qao gao mae ai lhae tad' jham: yang thug' kyao" pye' ra".

¹⁵Ai: thao Yoab nho: gyezo: qe Absalom khyo te' ye: yang: yao: re se' pin" pye' ako".

¹⁶Yoab wa gyekhe' poe thang: pye' nae" qhid' mae" labo" mad nae" amyin" byid' ke' ra". Yao" gyezo: qe wa Israel byu qere cao" khe' zin" rumae" tug' lo: ako".

¹⁷Yao: bam wa Absalom nho: mao gaung re dao: yu yang: sag' mo" yo mae" dungkhung: no, mae pye' zaui: pye' mung: laug baui qi: jham bam" yang: nghoe' pye' ako". Israel byu qe alhab' wa yao: yaug yao" yham khyo phao: lo" byaug: ako".

¹⁸Absalom wa yao" pyad mae kho:kham lao: khaung: mae yao" qhid' mae" axam: laug zang re tau: zhaug' to" ra". Pe"mung:ga"re yao: wa yao" yham khaung mang xo' vin nae" yauggai zo: maqo" ngad: ra". Aimung: yao: wa ai: jo, qo re yao" mang re cao" yang: mhang" to" ra". Ana" ba joe" sho' aire Absalom nho: axam: laug zang ga: mang qi" jo; ra".

¹⁹Ai: thao Zadog nho: yauggai zo: Ahima wa Yoab re ASANG wa yao" gyevo qe: lo, mae" yao: re khyad' yu va" ra" khyo lau dao: gai re kho:kham pho" re lo" ta" kyo: ngore tao" lo" nhao la,- ga: ta" ra".

²⁰Yoab wa mangad: nae" ana" ba nao pe" lau dao: re: vin: lo" nae" mangad:- ne, mo" sao pho" nao airu: gai: kad' nae". Ngadqere: ana" ba mangad:- pe"mung:ga"re kho:kham nho: yauggai zo: shid: ra" ba na ngad: ra"- ga: ta" ra".

²¹Ai: thao yao: wa yao" Sudan byu jeim pho" re- nao the' myao: ra" rure kho:kham pho" re lo" ta" kyo: wa,- ga: ta" ra". Jeim pho" wa goe; pa" mung: tao" thug' lo" ra".

²²Ahima wa- pe" boe" rure ngo pe" shui manho- jeju khyo" ngo rere: ai: lau dao: vin: lo" nhao la,- ga: maqad maqui" mho' ra". Yoab wa nga" zo: we"- aire nao pe"mung: kad' nug: i? Nao wa ai qhid' mae" pe" aphug' jhaung qhu" the' nae" mangad:- ga: ta" ra".

²³Ahima wa pe" boe" re boe"- ngo lo" nug: ga: dam: ta" ra". Yoab wa ailao" wa lo" wa,- ga: ta" ra". Aimung: Ahima wa Yodan lao: khaung: khyo" lo" ra" khyo cao" yang: tao" gyo" lo" mung: mataung" myao" re ai: jeim pho" re lai: to: co' ra".

²⁴Davi wa kham: taung gaung shad' we' akhug shad' mae" jo, qo agyo: mae zaung: jo; ra". Lhaug' yaug wa vang tho' khyo do, lo" mung: kham: au: tho' khaung dao mae lo" ye; jo; ra". Yao: byu: ke' re byu dayaug yao: za: tao" lo: na: rure myao: ra".

²⁵Yao: wa kho:kham pho" re yao yang: ta" kyo" ke' ra". Kho:kham pho" wa yao: wa dayaug za: ngad: re wa lau dao: gai vin yaug ngad: nae"- ga: ta" ra". Tao: yaug wa je: je te' lo: ra".

²⁶Ai: thao lhaug' yaug wa gatau dayaug re: yao: za: tao" lo: na: rure myao mung: kham: zaung" yaug re qu" wa,- gatau dayaug tao" lo: na: ra" ga: yao yang: ta" ke' ra". Kho:kham pho" wa ce yaug re: lau dao: gai vin: lo yaug ngad nae"- ga: ta" ra".

²⁷Lhaug' yaug wa sao qhid' mae tao" lo yaug wa Ahima we' dau: rure ngo qo" myao: ra"- ga: ta" ra". Kho:kham pho" wa yao: wa byu gai dayaug ngad:- yao: wa lau dao: gai re vin lo: li" nae"- ga: ta" ra".

²⁸Ahima wa kho:kham pho" re au" dao: ta" mung: yao" qhid' kheim: mae yao" gaung re pye' lhang" ke' mung: ASANG kho:kham re tau: lhan" ra" byu qere aung: pye' nhao: ra" ni" Mao"So ASANG re caung:khin" byid: wa,- ga: ta" ra".

²⁹Kho:kham pho" wa zolau: pho" Absalom pe" maqo i? ga: myid' ra". Ahima wa ASANG we"- ni" gye zug: pho" Yoab ngore nhao: ke' au:- gyai mo,thaui: mo,yaug boe" na: rure ngo myao:- ngadqere: pe" ngad: ru ngo maqo" ta"- ga: ta" ra".

³⁰Kho:kham pho" wa- thoe mae ye; jo; wa, ga: ta" mung: yao: ye" lo" mung: aimae ye ye; jo; ra".

³¹Ai: thao Sudan jeim pho" lo mung: ASANG kho:kham we" ni" qhid' mae" lau dao: gai ngo qo"- ana" ba- ASANG wa nao re tau: lhan: mo, alhab' dao mae aung doe; ru nao re byid' ava"- ga: kho:kham re ta" ra".

³²Kho:kham pho" wa zolau pho" Absalom pe" maqo i? ga: myid' ra". Jeim pho" wa ASANG we" ni" gyevo qe alhab' wa yao: mae boe" ruru: boe" vageshao: wo"- ga: ta" ra".

³³Kho:kham pho" wa xo sho' gyo" kaug' pye' ra". Yao: wa kham: dao mae" qe, khyo do, ye: mung: ngug: ra". Yao ye" lo" zo" re" o" nga" zo: we"- nga" zo: Absalom we"- Absalom nga" zo: we"- ni" jo, qo mae ngo lam: shid: ngad: qa: we"- nga" zo Absalom- nga" zo: we" ga: ngug: ra".