Read Maru 2 SAMUELA 19 Bible Online

2 SAMUELA 19 - Maru bible

2 SAMUELA 19

¹Kho:kham pho" wa Absalom mathao mae ngug yang: kaug' na: ra" ga" ra" khyo Yoab re ta" kyo" ako".

²Aimung: ai: ba mae Davi nho: gyezo: qe alhab' mo; qhid' mae" aung doe; yang: ngaui bau" ru wa kaug' ru shad' phaug' lo" byaug: ra". Pe"mung:ga"re kho:kham pho" wa yao" yauggai zo: mathao mae kaug' na: ra" khyo re yao: bam the' gyo: geyang: ngad: ra".

³Yao: bam wa gye poe mae" tao" phao: lo yang: qho' phau: ko" ra" gyezo: qeru: vomo" khug khyo sae za: vao lo: ako".

⁴Kho:kham pho" wa yao" myo, khung: re nghoe' yang: nga" zo: we"- nga" zo: Absalom we"- Absalom nga" zo: we"- ga: thoe qi: we' gyi: ngug: ra".

⁵Yoab wa kho:kham pho" yham khyo ye: mung: ni" kao so' ni" yauggai myiqe: zo: qe: kao so' ni" yham sang myhi" qe we' ni" myingai qe: kao so' re khyad' yu: ra" mo, ngad ko" ra" ni" byu qere ana" ba nao qho' phyo' ava".

⁶Nao re jhid'de; mo, re nao ngag: thaug' mung: nao re nghang: mo, re nao bao" thaug' byid' ra". Ni" gye zug: qe we' ni" byu qe wa- ni" qhid' mae" pe" lajheim: mabo- ga" rure nao de: de: za: qhu" ava". Ana" ba Absalom yaug daui: na mung: ngonhaung" alhab' bam: shid: shao" byaug: re nao ngaui nae" rure ngo ba: qu" ra".

⁷Aimung: ana"- ni" byu qere ba: gyo: sho' yeta" wa,- nao airu: maye: kad' re wa ne, mo" ba ne, seim dayaug re: nao we' daga" mana genae" ein: ra" khyo ASANG: mang re lao: yang: ngo jham tang" ra". Aiwa ni" apyad geim" mae nao kham zo" lo: ra" kyi" khyag' ru alhab' mae de xo: thao" ru ngad: li" nae"- ga: ta" ra".

⁸Ailao" kho:kham pho" wa- to" li" mung: vomo" kham: nhae khyo ye: yang: ye zaung: jo; ra". Yao: aimae na: ra" thoe re yao" byu qe the' gyo: gemung: yao: bam alhab' yao" lhang" gam: mae yezang" ham: na: ako". Ai: ayo, mae Israel byu qe wa yaug khao: ngo" yao: yaug yao" yham khyo phao: lo" byaug: ako".

⁹Mung"dan: geim" mae yao: bam yao: cao: jho" byo; li" ako". kho:kham Davi wa ngonhaung" re ngonhaung" nho: gyevo qe: lo, mae" khyad' yu va"- ga: yao: cao: yao: jho" ta" ako". Yao: wa ngonhaung" re Philisti byu qe: lo, mae" khyad' yu: ra". Ngadqere: ana" yao: wa Absalom mae" phao: lo" mung:- mung"dan: re to: co' ra".

¹⁰Ngonhaung" wa Absalom re ngonhaung" kho:kham khyo" xau gyad byid: ngadqere: yao: wa gye poe mae se' pye' qhug' ra". Aire Davi re ye jhui" tug' yu nae" dayaug re: maseim" ko" i? ga: yao: cao: jho" ta" ako".

¹¹Israel byu qe ta" na ko" ra" khyo lau dao: kho:kham Davi khyo joe" lo" ra". Aimung: yao: wa khinjaung Zadog we' Abiatha re Yuda au: jhaung qere- yao: re lo" thao" bao" byid' ra" khyo" kho:kham pho" re yao" kho:kham kho" khyo pe"mung: naonhaung" majhui" lo genae" i?

¹²Naonhaung" wa nga" sho: ba nam ug zo: ngo yao" gaung sho: ngo yao" sa: qe ngad: ako". Naonhaung" wa kho:kham re yao" kho:kham kho" khyo dam: jhui" yu nae" qhid' mae" pe"mung: lo" thao" mae ngad: na ko" i?

¹³Davi wa Amasa rere:- nao wa nga" ba nam ug zo: ngad:- ana" mae" thoe gu: nao re Yoab nho: jo, qo mae nga" gyetab re au: jhaung kad' nhao nae". Ngo airu: makad' re wa Mao"So ngore se' pye' vashao:- ga: ta" nhao: ke' ra".

¹⁴Davi nho: dao: jham wa Yuda mung" mae" mo, alhab' re jab byang" sho' jhaug' zaug: bode; rure qo" yu nhao: ra". Yao: bam wa yao: re yao" zug: qe alhab' we' daga" tug' lo nae" qhid' mae" dao: pyang: ke' ako".

¹⁵Yao: dam: tug' lo phyao: Yodan gyaung: gau" de; ra" jo, qo mae Yuda byu qe kho:kham pho" re li" qhug' ako". Aibam wa yao" qhid' au: mae qid gyaung: re jhui" gau: nae" Gilgala khyo joe" li" ko" ra" mo, ngad: ako".

¹⁶Ai: ayo, mae yao:- Bahurim mae" Benyamin kaung mae" Gera nho: yauggai zo: Shimi re: kho:kham Davi re li" tug: yu nae" tao" li" ra".

¹⁷Yao: wa yao: we' daga" Benyamin kaung mae" byu dataung yaug jhui" ra". Amung: Sholu yham khaung nho: daui daui yaug Ziba re: yao" yauggai zo: daxe: ngo" yaug we' daui daui okaung shid' xe yaug we' kho:kham pho" qhid' kheim: mae Yodan gyaung: khyo joe" li" ako".

¹⁸Yao: bam wa kho:kham pho" byuphung: re gau" qhid' she nae" qhid' mae" we' kho:kham o: rure kad' pyang" byid: nae" qhid' mae" qid gyaung: re gau" de; ye" ako". Kho:kham pho" qid gau: nae" jin" lao"- Shimi wa yao" gaung re Davi qhid' kheim: mae pye' lhang" ke' mung:-

¹⁹ASANG kho:kham we" jeju khyo" nao Yerusalem mae" thug' lo" ra" ba mae ngo kad' shad' lo: ra" mau" re to" myhid' pye' byid: la,- ngore gye kad' ra" khyo" aire daxam" ci wa, myid re damyid lo:-

²⁰ASANG we" ngo qobo shad' lo: rure ngo ba mung: ce: mathao mae ana" ba ASANG kho:kham- nao re li" tug: yu nae" qhid' mae" mug: am: shad' amyu" kaung qemae" ngo sao qhid' joe" li" ru ngad:- ga: ta" ra".

²¹Zeruia nho: yauggai zo: Abishai wa dao: jhau: thug' li" mung:- ASANG: yang kho:kham khyo" khyin: to" ra" yaug re yao: nhang" ra" mathao mae Shimi re se' pye' ang: ra"- ga: ta" ra".

²²Ngadqere: Davi wa Abishai we' yao: mao: Yoab re- ni" shid' yaug: nho: myid: jho: rure khag' myid' ra" i? Ni" shid' yaug ngore qug: khai: boe" nhao genae" i? Ana" ngo wa Israel kho:kham dayaug ngad va". Ana" ba Israel byu dayaug re: se' pye' ru magai: qhug' nae"- ga: ta" ra".

²³Aimung: yao: wa Shimi re- nao se' pye' maqhug' nae" ein: ra" khyo nga" dao: thoe nao re byid' ra"- ga: ta" ra".

²⁴Ai: thao Sholu nho: yao: myid: Mephiboshed wa kho:kham pho" re yetug: yu nae" joe" gyo" lo: ra". Kho:kham pho" Yerusalem mae" thug' lo" ra" ba na mae" aung doe; ru we' yao: dam: tug' lo: ra" yo, joe" sho' yao" khyid macid- nhad' maui: maqaug- yao" mai bau: jham re mazab ngad: ra".

²⁵Mephiboshed wa kho:kham pho" re yetug: yu nae" Yerusalem mae" joe" lo lao"- Kho:kham pho" wa yao: re- Mephiboshed we"- nao ngo we' daga" macao: li" ngad: ra". Pe"mung: i? ga: lham: myid' ra".

²⁶Yao: wa ASANG kho:kham we"- nao ba: ru we' dakhyo:- ngo wa khyid qeim ngad:- nao we' daga" cao" zaung: ye: nae" qhid' mae" nga" loze re do: ke' byid: la, ein: nga" daui daui yaug re ngo ta" va". Ngadqere: yao: wa ngore ngag: thaug' co' ra".

²⁷Yao: wa ASANG kho:kham re nga" khyo mhug' ta" ra". Ngadqere: nao wa Mao"So: mug: lagyo: we' dakhyo: ngad: ra". Amung: nao jo: ein: jho: ra" khyo" kad' wa,.

²⁸Nga" pho" yham khaung byu qe alhab' wa nao kho:kham: yang se' pye' nae" man: qi" mo, ngad: ra". Ngadqere: nao wa ni" zozo: jaung: mae cao: zo: nae" akhang" ngore byid' ra". ASANG kho:kham we" ngo wa nao mae" mho' nae" akhang" pe" maqo" lo:- ga: ta" ra".

²⁹Kho:kham pho" wa- nao pe" ta" nae" khyo majo, lo:- Sholu nho: jo,nho" re nao we' Ziba jho" gae: yu genae" rure ngo myid: phyid' to: va" ga: tau" ra".

³⁰Mephiboshed wa aigu: alhab' re Ziba ngho" vashao:- ASANG kho:kham nao gug: gam za: yham khyo dam: joe" lo: ru wa nga" qhid' mae" ga" va"- ga: tau" ra".

³¹Gilaed mae" Barzilai re: kho:kham re qhid' she yang: Yodan gyaung: re jhui" gau: nae" Rogelim mae" joe" gyo" li" ra".

³²Barzilai wa apyad she' xe zin bo mung: gyai mao" ava". Yao: wa jo,nho" gyai qo" yaug ngad mung: Davi Mahanaim mae na: jo; ra" ayo, gyo: mae kho:kham re zo:ve bao" byid: yaug ngad: ra".

³³Kho:kham pho" wa- Yerusalem khyo ngo we' daga" cao" li" ri:- nao re ngo gun caung nae"- ga: ta" ra".

³⁴Ngadqere: Barzilai wa ngo myao" na lo nae" mangad: ASANG kho:kham we' daga" Yerusalem khyo ngo pe"mung: cao: li" nae" i?

³⁵Ngo wa she' xe: zin dau va". Amung: pe" yang re: ngore maqo" pyo: nhao lo:- ngo wa pe" zo: pe" shaug' ngadqere: myho' thoe magyo: lo:- nghaui" caung: mo; thoe rere ngo mathe' gyo: lo:- ngo wa ASANG kho:kham re qola: za: boe" nhao: li" nae".

³⁶Ngo wa ai qhi" sho' ra" aphug' jhaung qhu" we' maman: qi"- amung: ngo wa nao we' daga" Yodan gyaung: dajhid' lai sho' za: cao" li" nae".

³⁷Ai: thao ngore yham khyo phao: lo" nhao mung: nga" myhi" pho" qenho: lab nhae mae lo" shid nhao la,- ce: nga" yauggai zo: Khimham wa nao re caung da" byid' li" nae". ASANG kho:kham we"- yao: re jhui" lo" mung: nao gai: thao" ein: myid ru we' dakhyo: yao: re kad' byid: wa,- ga: tau" ra".

³⁸Kho:kham pho" wa- yao: re ngo we' daga" jhui" lo" mung:- nao o: ru pe" ngadqere: yao: re kad' byid: nae". Amung: nao mho' ja: pe" ngadqere: ni" qhid' mae" kad' byid: nae"- ga: ta" ra".

³⁹Ai: thao Davi we' yao" byu qe alhab' Yodan gyaung: re gau" de; ako". Yao: wa Barzilai re bobaug baug mung: yao" shaman" dao: byid' ra". Amung: Barzilai wa yham khyo tug' phao: lo" ra".

⁴⁰Kho:kham pho" wa Yuda byu qe alhab' we' Israel byu qe agaung: kho' yang: gau: qhid she mung: qid bin: gau: lao"- yao: wa Gilgala khyo ye" lo" ra". Khimham re: yao: we' daga" cao: ye" lo" ra".

⁴¹Ailao" Israel byuqe alhab' mo, kho:kham jhao" ye: mung: yao: re- ASANG kho:kham we" ngonhaung" mao:nhaung: qe ngad ko" ra" Yuda byu qe wa nao re jhui" yu mung: ni" qhid' au: mae- ni" yham byu qe qhid' au: mae yao: bam gau qhid' she yang: Yodan gyaung: gau" de; nae" akho: akhang" yao: bam qo" ga: pe"mung: myid ko" laug i? ga: myid' ako".

⁴²Yuda byu qe wa kho:kham pho" wa ngonhaung" byu dayaug ngad: ruyang- ngonhaung" airu: kad' ru ngad:- aire ceru re pe"mung: naonhaung" nhag' yo: ang ko" i? Yao: wa ngonhaung" zokho phug' rere: mabyid:- yao: wa ngonhaung" re pe" re: mabyid: ngad: ra"- ga: tau" ra".

⁴³Israel byu qe wa- yao: wa naonhaung" byu dayaug ngad sho' ngadqere: naonhaung" ta" nae" qo" ra" tho' Davi we' sin: yang: ngonhaung" ta" nae" daxe zhao" qo" ra". Ngonhaung" re naonhaung" pe"mung: qu" ngai ko" i? Kho:kham pho" re jhui" yu nae" khyo sao qhid' ta" ra" mo, wa ngonhaung" ngad: rure dato" myhid' ge,- ga: phaug' tau" ako". Ngadqere: Yuda byu qe wa Israel byu qe ta" ru tho' yao: bam ta" ru je: aqan alan ta" ako".