Read Maru 2 SAMUELA 21 Bible Online

2 SAMUELA 21 - Maru bible

2 SAMUELA 21

¹Davi eib: ra" yo, mae bao" khug' mo" sam zin lam: lam: khug' ra". Aimung: Davi wa ai we' sin: yang: ASANG we' byin phyo: zin" ra". ASANG wa Sholu we' yao" yham khaung byu qe wa byu se' ra" qobo qo" ako". Yao: wa Gibeon byu qere se' pye' ra".

²Gibeon mae na mo, Israel byu qe mangad: ko" ngad: ra".(Yao: bam wa Israel byu qeyang gug: gam byid: nae" ga: dao:so: byid' to: ko" ra" Amori byuphung: ngai daphung: ngad: ako". Ngadqere: Sholu wa Israel byu we' Yuda byu qe: myid saung" bo yang: ai bam re se' pye' nae" seim" ra".)

³Aimung: Davi wa Gibeon byu qere khai: zhang" yu mung: yao: bam re- ngo naonhaung" qhid' mae" pe" qo" kad' byid: nae" i? ASANG: byu qere naonhaung" qo" shaman" byid: gesho'- naonhaung" re kad' shad' lo: ru qhid' mae" ngo vhang" byid nug: ra".

⁴Yao: bam wa Sholu we' yao" yham khaung we' ngonhaung" jho" byo; ru wa ngaui- qhang- mangad lao"- Israel byu alhab' re ngonhaung" se' pye' nug ngadqere: magai: ta" sho' pye' ngad: ra"- ga: tau" ako". Davi wa aire wa naonhaung" qhid' mae" ngo pe" kad' byid' re gai: ein: myid ko" i? ga: myid' ra".

⁵Yao: bam wa Sholu wa ngonhaung" re se' tam" pye' mung: Israel mung" khyi" khao: ngo" mae ngonhaung" adaui dayaug re: madang: jo; losho' kad' pye' nug: lo: ra".

⁶Airumung: yao" myid:zo: yauggai nhad' yaug re ngonhaung" lo, mae ke' byid: la,- ngonhaung" wa ai bam re- ASANG khyin: yu: to" ra" kho:kham Sholu nho: vogaung: Gibea ASANG qhid' kheim: mae ngonhaung" cui" lhao" to: nae"- ga: tau" ako". Kho:kham pho" wa- ai bam re ngo ab byid: nae"- ga: tau" ra".

⁷Ngadqere: yao: we' Yonathan agyo: mae yao: cao: jho" to" ra" gyang" lho" dao:so: mathao mae Davi wa Yonathan nho: yauggai zo: Sholu yao: myid: Mephiboshed re wa tang" to" ra".

⁸Ngadqere: Aia nho: myiqe: zo: Rizpa yang Sholu re khau byid' ra" yauggai zo: tao Armoni we' Mephiboshed shid' tao re jhui" yu: ra". Yao: wa Sholu nho: myiqe: zo: Merab yang Mehola mae" Barzilai nho: yauggai zo: Aia re khau byid' ra" yauggai zo: ngo" yaug rere: jhui" yu: ra".

⁹Davi wa ai bam re Gibeon byu qere ab byid' pye' ra". Yao: bam wa ai bam re ASANG: qhid' kheim: bam dao mae cui" lhao" pye' ako". Yao: bam nhad' yaug alhab' mo, daga" shid: lo" ako". Yao: bam se' pye' qhug' ko" au: wa zin vao kheim: lai bale yad: qhid: ra" ayo, ngad: ra".

¹⁰Ai: thao Sholu nho: myingai Aia nho: myiqe: zo: Rizpa wa mao gaung jham jo; ra" laug bam dao mae jid: mo" pin" yang yao" qhid' mae" ba sham kad' yu mung: yao: wa aimae gaug yad: qhid mae" mug: qu yo, joe" sho' aimae na: jo; ra". Na" gaung gyo: mae wa ngho' jham re khe' na mung: myi" re ngad lao" wa yao: wa seyo: gug'nyhug' lhe: jham re khe' ra".

¹¹Rizpa kad' ra" khyo re Davi the' gyo: lao"-

¹²Yao: wa ye: yang: Sholu we' yao" yauggai zo: Yonathan nho: shoqug: jham re Gilead mung" mae" Yabe byu qe: lo, mae" ye: yu: yu: ra". (Yao: bam wa aijham re Gilboa bam dao mae yao: bam Sholu re se' ra" ba na mae mao gaung jham re Philisti byu qeyang cui" lhao" to: ko" ra" jo, qo ngad: ra" Beth shan shava jao: mae" ye khug' yu: to" ako".)

¹³Davi wa Sholu we' Yonathan pha" nho: shoqug: jham re yu mung: cui" se' pye' qhug' ko" ra" byu nhad' yaug: nho: shoqug: jham rere: gaug: zhang: yu: ra".

¹⁴Ai: thao yao: wa Sholu we' Yonathan nho: shoqug: jham re Benyamin mug: myid mae jo; ra" Zela mae" Sholu nho: yao: pho" Kisha nho: lab mae nyhab' shaung: ako". Kho:kham pho" amyin" byid' to" ru alhab' re kad' ako". Ai: thao Mao"So wa mung"dan: qhid' mae" yao: bam akyu" mho' dao: re tau: byid' ra".

¹⁵Philisti byu qe we' Israel byu qe: agyo: mae gyekhe' poe gatau dapoe boe" ra". Davi we' yao" byu qe wa Philisti byu qere yekhe' zin" ako". Gye khe' poe dapoe gyo: mae Davi wa myaung" li" ra".

¹⁶Gyid: lhae tad' shid' joe: la" ra" ru ci mung: shae pyang: asag' vin: ra" yaug Ishbibeno ga: mang: ra" byuqi dayaug wa Davi re yao: qo" se' nae" ga: jho: ra".

¹⁷Ngadqere: Zeruia nho: yauggai zo: Abishai wa ai: byuqi: aiyaug re li" bao" zin mung: aiyaug re se' pye' ra". Ai: thao Davi nho: byu qe wa yao: bam we' daga" gye poe khyo khonhae" re: madam: ye: nae" khyo Davi re dao: so kad' nhao: ako". Yao: bam wa yao: re- nao wa Israel byu qenho: myid: lao" khyo ngad:- ngonhaung" nao re manug: ciyhan" pye' ngad: ra"- ga: ta" ako".

¹⁸Ceru thao Goba jo, qo mae Philisti byu qe we' gyekhe' ako". Ai: gye poe mae Husha mae" Sibekhai wa Sapha ga: mhang" ra" byuqi: dayaug re se' pye' ra".

¹⁹Goba jo, qo mae Philisti byu qe we' gye jho" khe' ra" gye poe gatau dapoe jo, mung: Betlehem mae" Yaira nho: yauggai zo: Elhanan wa Gat mae" Goliad re se' pye' ra". Yao" lhae tad' wa qo, mo" khao: qhi" thau: ru ngad: ra".

²⁰Ai: thao Gat mae gye poe gatau dapoe dam: boe" ra". Ai mae gyekhe' kao bau: ra" byuqi: dayaug na: ra". Yao: wa lo, dashad' mae lo, nyhug' khyaug' nyhug' de; ra". Khyid nyhug' re: shid' shad' geim" dashad' khyaug' nyhug' nyhug' de; ra".

²¹Yao: wa Israel byu qere masan masin" kad' mung: Davi yao: mao: Shama nho: yauggai zo: Yonathan yang se' pye' ra".

²²Cebam byid yaug wa Gat vogaung: mae" byuqi: qe: myid:zo: qe ngad: ako". Yao: bam wa Davi we' yao" byu qeyang se' pye' ru qhug' ako".