Read Maru 2 SAMUELA 22 Bible Online

2 SAMUELA 22 - Maru bible

2 SAMUELA 22

¹ASANG wa Sholu we' yao" gyevo gaje qe: lo, mae" Davi re bin: khyad' yu lao"- Davi wa ASANG re ce: nghaui" caung: yang: caung" ra".

²ASANG wa nga" gug: gam yaug- yao: wa gang" tang: ra" nga" gyetab ngad: ra".

³Nga" Mao"So wa nga" nho: gug: gam ngad mung: yao" khug mae ngo gug: gam: na:- Yao: wa go we' dakhyo: ngore gug: gam byid' ra". Yao: wa ngore vha byid: mung: ngore gug: nhao: ra". Yao: wa nga" khyad' yu ASANG ngad: ra". Yao: wa ngore gug: gam byid: mung: aqan alan mae" ngore khyad' yu: ra".

⁴Ngo ASANG re yao mung: yao: wa nga" gyevo qe: lo, mae" khyad' yu: ra". ASANG re caung:khin" ra" wo"-

⁵Shid: ra" bang: lhung" jham wa ngore lhang" kham" to" ako". Phyo' qheim" ru bang: lhung" jham wa ngore lonhai" pye' ako".

⁶Shid: ru nho: gyaug ci" ca" ru wa ngore lhang" kham" to: mung: lab wa nga" qhid' mae" lha" khae: to" ra".

⁷Nga" qug: khai: mae" ngo ASANG re khai: ke' ra". Bao" thaug' ru qhid' mae" nga" Mao"So re ngo khai: ke' ra". Yao: wa nga" thoe re yao" yham mo" khug mae" gyo: byid' ra". Bao" thaug' ru qhid' mae" nga" gyi: hug' thoe re yao: tae" gyo" ra".

⁸Ailao" myid gaung wa ko, ko, laui" nin" mung: mug:gaung apan wa thug' jhu: yang: nin" ra". pe"mung:ga"re mao"So wa nhag' yo" ra".

⁹Yao" nho mae" myikhug' mad: thug' ke' ra". Yao" nhad' mae" myishae we' gyang" ra" myi:gyoe: phoe" thug' ke' ra".

¹⁰Yao: wa mug:gaung re akhao: khao: lao" cad' phung" pye' mung: gyo" li" ra". Yao" khyid qao: mae jham no, thaui: to" to" ra".

¹¹Yao" kherubin daung dao mae qao: ra" khyo" yao: dao" lo" ra". Yao: wa la: nho: daung jham: dao mae su" lhau: ra".

¹²Yao" gaung re mug: cad' yang nghoe' ci: ra". Qid byang" jo; ra" thau: ra" jham thaui: yao: re lham" kham" to" ra".

¹³Yao" qhid' kheim: lhe' cad' mae" myi:gyoe: gyang" mae myishae de; thug' li" ra".

¹⁴Ailao" ASANG wa mug:gaung mae" mug: gyug: gyug: mung: qam: bo: thao" ra" Mao"So: thoe re the' gyo" ra".

¹⁵Yao: wa yao" myo: jham re bag: ke' mung: yao" gyevo qere byo: sin" lo" nhao: ra". Lhe' cad' cad' yang: yao: bam re tao" phao: lo" nhao: ra".

¹⁶Qid mung" panglai: jo, gyae: wa acin mae ngad mung: myid gaung: nho: apan aqao: wa manghoe' to: ngad: ra". ASANG yao" gyevo qere qeim: ke' lao"- nhag' yo: nhag' gyid' yao: bam re kyid' ke' ra".

¹⁷ASANG wa tho' mae" yheim" ke' mung: ngore zaui" yu: ra". Yao: wa ngore qid no, mae" she: thug' yu: ra".

¹⁸Yao: wa qam: bo: ra" nga" gyevo qe: lo,mae" we' ngore ngang: mo, alhab' lo, mae" ngore khyad' yu: ra". Nga" qhid' mae" wa yao: bam gyai qam: bo: ako".

¹⁹Ngo qug: khai: qhug' au: yao: bam ngore gyekhe' ako". Ngadqere: ASANG wa ngore gug: gam byid' ra".

²⁰Yao: wa gyaug ci" ca" rumae" ngore bao" yu ra". Yao: wa ngore ngaui yang: khyad' yu: ra".

²¹Ngo jo: ru kad' yang: ASANG wa ngore aphug' jhaung qhu" byid' ra". Ngo qobo maqo" yang: yao: ngore shaman" byid' ra".

²²Ngo wa ASANG: tarha" re phug' cao" va". Ngo wa nga" Mao"So mae" maphaug' lo"-

²³Yao" tarha" alhab' re ngo cao" va". Yao" amyin" dao: re maphug' cao" makad'.

²⁴Ngo qobo maqo" ra" khyo rere:- shad' ra" mau" re ngo makad' lo: zang" pye' ra" khyo rere: yao: ba: ra".

²⁵Ngo jo: ru kad' yang: yao: ngore aphug' jhaung qhu" byid' ra". pe"mung:ga"re ngo qobo maqo" rure yao: ba: ra".

²⁶O" ASANG nao wa nao re jhaug' zaug mo, re jhaug' zaug yaug ngad: ra". Jab byang" mo, re jab byang" sho' gai kad' ra".

²⁷Nao wa gyang" san: ra" mo; dao mae gyang" san: ra". Ngadqere: makhyang" ra" mo; dao mae wa gye kad' ra".

²⁸Nhag' lam: nyham: khyo" ra" mo, re nao khyad' yu: ra". Ngad beim: mo, re kam" wa nao nyham khyo" pye' ra".

²⁹Nao ASANG wa nga" bo" bao ngad:- nga" mug: cad' re nao baui" lo" nhao: ra".

³⁰Nga" gyevo qere khe' zin: nae" qam: so' we' yao: bam: gyetab re aung: pye' nae" qam: so' nao ngore byid' ra".

³¹Ce: Mao"So yao" lo, mau" jham wa khoqhi" jab byang" i? Yao" dao: thoe jham wa khoqhi" lam ga" i? Yao" nho: gug: gam re qho: ra" mo, alhab' qhid' mae" yao: wa go we' dakhyo: ngad: ra".

³²ASANG dayaug za: Mao"So ngad: ra". Mao"So dayaug za: ngonhaung" gye vha ngad: ra".

³³Ce: Mao"So wa qam: bo: ra" nga" phao: khug jo, qo ngad: ra". Yao: wa nga" khyo re gug: gam byid' ra".

³⁴Yao: wa xe' re" ru: ngore khuxam tang nhao: ra". Yao: wa bam jham: dao mae ngore gug: nhao: ra".

³⁵Kyaung: thao" lo,la: re ngo qo" bag nae" qhid' mae" yao: wa ngore gye poe qhid' mae" mho" byid' ra".

³⁶O"- ASANG we"- nao wa ngore gug: gam byid: mung: ngore khyad' yu: ra". Ni" nho: bao" thaug' byid' ru wa ngore qi" qhang nhao: ra".

³⁷Su: yang mathe' taung: sho' nao ngore zam" ci: ra". Amung: ngo wa khonhae" re: malang:-

³⁸Nga" gyevo qere ngo cao" khe' mung: yao: bam re aung: pye' ra".

³⁹Yao: bam re ngo be; lhang" ke' mung: yao: bam maqo" to" ngad: ako". Yao: bam nga" qhid' kheim: mae seim" yang: lang" jo; ako".

⁴⁰Gyekhe' poe qhid' mae" nao ngore qam: o: byid: mung:- nga" gyevo qere aung: pye' nhao: nae".

⁴¹Nao wa nga" gyevo qere ngo mae" tao" phao: lo" nhao: ra". Ngo re nghang" ra" mo, re ngo se' tam" pye' va".

⁴²Yao: bam wa bao" yu nae" rure qho: ako". Ngadqere: yao: bam re khag' mabao" ngad: ako". Yao: bam ASANG re khai: ako". Ngadqere: yao: wa matau: ngad: ra".

⁴³Yao: bam re ngo khyoe' pye' mung: yao: bam wa phalhug boe" pye' ako". Ngo wa hau" mo" mae" tham: bab: reru: yao: bam re zab: nhe" pye' va".

⁴⁴Nao wa tau: lhan" ra" nga" byu qe: lo, mae" ngore khyad' yu mung:- byumyu" qe: dao mae nga" eib: ra" aya: re dang: jo; nhao: ra". Ngo maba ra" byumyu" qe ana" ngo eib: ra" qao: mae" mo, boe" lo: ako".

⁴⁵Yao: bam nga" thoe re gyo: gelao"- taungbug byu qe wa nga" qhid' kheim: mae goe; gyo" mung: nga" mho dao: gyo" ako".

⁴⁶Yao: bam vae" ra" myid baui" byaug mung: yao: bam: gyetab jham mae" ko, ko, nin" thug' li" ako".

⁴⁷ASANG daui: na: ra"- ngore gug: gam yaug re caung:khin" ge,. Ngo re khyad' yu: ra" yaug Mao"So: qam: bo: ra" qi" qhang khyo re ta" hau: ge,.

⁴⁸Yao: wa ngore nga" gyevo qere aung: pye' nhao: ra". Yao: wa byumyu" qere nga" qao: mae na nhao mung:-

⁴⁹Nga" gyevo qemae" ngore khyad' yu: ra". O"- ASANG we"- ngore nga" gyevo qere aung: pye' nhao la,- Aqan alan byu qe: lo, mae" ngore gug: gam byid: la,-

⁵⁰Aimung: byumyu" qe: phaung mae ngo nao re caung:khin" ra". Ngo nao re nghaui" caung: yang: caung:khin" ra".

⁵¹Mao"So wa yao" kho:kham re qi" qhang: ra" aung doe; ru byid' ra". Yao: wa yao" yang khyin: san: to" ra" yaug Davi re we' yao" myid:zo: qere apyad ato mae mabaui mabyo; ra" jhid'de; myid qhu" byid' ra".