Read Maru 2 SAMUELA 23 Bible Online

2 SAMUELA 23 - Maru bible

2 SAMUELA 23

¹Yese nho: yauggai zo: Davi wa Mao"So yang qi" qhang nhao: yaug ngad: ra". Yao: wa Yaku nho: Mao"So yang kho:kham kad' nae" khyin: to: qhug' yaug ngad: ra". Israel byu qe: qhid' mae" gyai gai: ra" nghaui" caung: jham re tung" yaug ngad: ra". Cejham wa Davi nho: lo" thao" pyang dao: jham ngad: ra".

²Aiwa ASANG: byo wa nga" nhad' khyo" jhau: ra". Yao" mungdao: wa nga" nhad' qid dao mae ngad: ra".

³Israel nho: Mao"So wa dao: jhau: ava". Israel nho: gug: gam yaug wa ngore tarha" din: nyang: ru we' eib: ra" kho:kham ASANG re phug' cao" yang: eib: ra" yaug wa-

⁴Jham thaui majo; ra" ne, seim mug: bo" mae bao qhui byid' ra" ba we' dakhyo:- mug: bin: qu thao mhin: gae re kyi nhao byid' ra" ba we' dakhyo: ngad: ra"- ga: ngore ta" ra".

⁵Aiwa nga" myid:zo: qere Mao"So khoru: shaman" byid: nae" ru ngad: ra". Pe"mung:ga"re yao: wa ngo we' apyad ato dao: thang" magai: byo; qeim: ra" myid: vang" khyo- magai: tha" pye' ra" dao:so: to: yaug ngad: ra". Aiwa nga" nho: kao bau: ru alhab'- ai wa nga" aung doe; ru ngad: mung:- Mao"So wa aire dang za: byid' li" nae".

⁶Ngadqere: Mao"So malam: ra" mo, wa shapye' pye' qhug' ra" zau: kyin jham we' dau: ra". Lo,cin: yang aijham re khag' maqo" tin: ngad: ako".

⁷Ai: zau: kyin re zaui: nae" qhid' mae" aire jo, to' zai we' lhae tad' ci yang: kad' qo: ra". Ai: zau: kyin jham jhad' za: nga" lo" li" genae".

⁸Cebam wa Davi nho: mang qi" ra" gyezo: qe ngad: ako". Sao qhid' yaug wa Takhemon mae" Yosheb Bashebed ngad mung: yao: wa sam yaug: nho: au: jhaung ngad: ra". Yao: wa lhae tad' yang byu she' yo re gye kad' mung: yao: bam alhab' re gye poe dapoe mae za: se' pye' ra".

⁹Shid' yaug ein: yaug ngad: ra" mang qi" ra" gyezo: sam yaug mae" dayaug wa- Aho kaung mae" Dodo nho: yauggai zo: Eleaza ngad: ra". Daba mae yao: we' Davi wa gye poe qhid' mae" zang" ham: na ko" ra" Philisti byu qere myo, byo; lhaung: ako". Israel byu qe wa thao khyo zad: phao: ako".

¹⁰Ngadqere: yao: wa yao" jo, qo mae ye; jo, mung: shae zhaug' mae" yao" lo, zhab' magai: pheim lo: de, byaug sho' Philisti byu qere khe' zin" ra". ASANG wa ai: ba mae qi: sho' aung doe; ra". Ceru bin thao Israel byu qe wa Eleaza na: ra" jo, qo khyo tug' lo mung: shid mo, mae" gyezai jham re khyad' yu: ako".

¹¹Sam yaug ein: yaug ngad: ra" mang qi" ra" gyezo: sam yaug mae" dayaug wa- Harara mae" Agee nho: yauggai zo: Shamma ngad: ra". Philisti byu qe wa shagyao: yo jo; ra" Lehi jo, qo mae zang" ham: na: ako". Israel byu qe wa Philisti byu qe: lo, mae" tao" phao: ako".

¹²Ngadqere:- Shamma wa ai: yo mae" yao" jo, qo mae ye; jo, mung: aibam re lham: khe' zin: mung: Philisti byu qere se' pye' ra". ASANG wa ai ba mae qi: sho' aung doe; ra".

¹³Byao gin yo, joe" lo qid re byu sam xe yaug mae" sam yaug wa Philisti byu qe daphung: Rephaim lao: khaung: mae na: jo, shiko" au: Davi na: ra" Adulam laug aug' khyo gyo" ye" ako".

¹⁴Ai: ayo, mae Davi wa gyetab bug gaung mae na: jo; ra". Philisti byu qe daphung: wa Betlehem re sang: yu: pye' ako".

¹⁵Davi wa yham khyo myid mung:- Betlehem qid thaung: mae" qid re dayaug yaug: yang ngore ye khae jhaug' ko" qa: we"- ga: ta" ra".

¹⁶Mang qi" ra" ai: gyezo: sam yaug wa Philisti byu qe: jamu khyo" jhui" kho' lai: ye: gemung:- qid thaung: mae" qid dajhid' re ye khae: yu yang: Davi jhao" cilo: ako". Ngadqere: Davi aire mashaug' ngad: ra". Ai: atha" ASANG re qhaug' byid' ra" xeim: khyo" aire vhe' sheim: khyo" pye' mung:-

¹⁷ASANG we"- ngo cere khonhae" re: maqo" shaug' yao: bam kao so' dam: pye' ko" ra" mo; sa: re shaug' rure: boe" li" nae"- ga: ta" ra". Aimung: yao: wa aire mashaug' lo: ha: pye' ra". Aijham wa mang qi" ra" gyezo: qenho: vae" ra" lo,mau" jham ngad: ra".

¹⁸Yoab nho: yao: nhaung: Abishai (yao: bam: yao: myhi" wa Zeruia ngad: ra") wa mang qi" ra" sam xe: nho: au: jhaung ngad: ra". Yao: wa yao" lhae tad' yang byu sam yo re mang: zin: mung: ai bam re se' pye' ra".

¹⁹Amung: sam xe qe: phung mae mang qi" li" ra". Yao: wa sam xe mae" mang je: qi" thao" yaug ngad mung: yao: bam: au: jhaung boe" lo: ra". Ngadqere: yao: wa ai: sam yaug qhi" mang maqi: ngad: ra".

²⁰Kabze mae" Yehoiada nho: yauggai zo: Benaia wa mang qi" ra" gyezo: dayaug ngad: ra". Yao: wa gyai mang qi" ra" Moba gyezo: shid' yaug re se' pye' ru bobo mung: sulhe: mau" myo: sho' re kad' lo: ra". Yao: wa dalhang mae" gyu: khyo" ra" ba daba mae dungkhung: dalam: khyo gyo" ye: mung: khang khyi dadau: re yese' pye' ra".

²¹Yao: wa lhae tad' ci: ra" byu gaung qi" ra" Egutu byu dayaug rere: se' pye' ra". Benaia wa yao" thaung kang: yang ai Egutu pho" re lhe: mung: aiyaug nho: lo,mae" lhae tad' re lhad' khyad' yu yang: ai: yaug yao: re se' pye' ra".)

²²(Cejham wa sam xe mae" dayaug ngad: ra" Benaia nho: sulhe: lo,mau" jham ngad: ra".

²³(Yao: wa yao: bam: phaung mae baug thug' ra" yaug ngad: ra". Ngadqere: ai: sam yaug qhi" mang maqi: ngad: ra". Davi wa yao: re yao" kao zaung" au: jhaung kad' nhao: ra".

²⁴Sam xe mae bobo: ra" gaje qe wa Asahe- Yoab nho: yao: nhaung: Betlehem mae" Dodo nho: yauggai zo: Elhanan Harod mae" Shamma we' Elika Peled kaung mae" Heleza Tekoa vogaung: mae" Ike nho: yauggai zo: Ira Anathod vogaung: mae" Abieze Husha amyu" kaung mae" Mebunai Aho amyu" kaung mae" Zalmon Netopha mae" Maharai Netopha mae" ba na nho: yauggai zo: Heleb Benyamin mug: Gibea vogaung: mae" Ribai nho: yauggai zo: Itai Pirathon amyu" kaung mae" Benaia Gashe vogaung: lao: khaung: nhae mae" Hiddai Araba amyu" kaung mae" Abialbon Behurim amyu" kaung mae" Azamaved Shalbon amyu" kaung mae" Eliahba Yashen nho: yauggai zo: qe Yonathan Harara amyu" kaung mae" Shamma Harara amyu" kaung mae" Shara nho: yauggai zo: Ahiam Maka amyu" kaung mae" Ahasbai nho: yauggai zo: Elipheled Gilo amyu" kaung mae" Ahithophe nho: yauggai zo: Eliam Khame amyu" kaung mae" Hezra Araba amyu" kaung mae" Parai Zoba vogaun(...)