Read Maru 2 SAMUELA 24 Bible Online

2 SAMUELA 24 - Maru bible

2 SAMUELA 24

¹ASANG wa Israel byu qere dalhang dam: nhag' yo: mung: ASANG: yang Davi re yao: bam dao mae qug: khai: boe" nhao: ra". ASANG wa yao: re- Israel we' Yuda byu qere byu japhin: yegaug: yu wa,- ga: ta" ra".

²Airumung: Davi wa yao" gyezug: pho" Yoab re- ni" zug: qe we' mung"dan: khyi" khao: ngo" mae" Israel byu amyu" kaung qe alhab' mo, jhao" ye: mung: amyu" byu qere byu japhin: ye gaug yu ge,- yao: bam khonho" ngad ko" rure ngo ba nug: ra" ga: amyin" byid' ra".

³Ngadqere: Yoab wa kho:kham re- ASANG kho:kham we"- ni" Mao"So ASANG wa Israel byu qere ana: tho' je: laug sho' dayo zhao" je" li" nhao mung:- yao: airu: kad' rure nao the' myao vashao:. Ngadqere: ASANG kho:kham we" cere nao pe"mung: kad' nug: i? ga: tau" ra".

⁴Ngadqere: kho:kham wa Yoab we' yao" zug: qere yao" amyin" dao: re cao" nhao: ra". Yao: bam wa Davi qhid' kheim: mae" to" mung: Israel byu qere byu japhin: gaug: yu nae" ye" lo" ako".

⁵Yao: bam wa Yodan gyaung: re gau" de; ye: mung: Gad mug: myid mae" lao: khaung: agaung: mae jo; ra" vogaung: Aroe mug: thao shad' mae jamu yekad' na: ako". Aitau mae" yao: bam wa mug: am: shad' Yaze.

⁶Gilead- Hiti byu qe: mug: myid mae" Kade khyo ye" ako". Ai: thao yao: bam wa Dan khyo- Dan mae" ba vao shad' Sidon khyo ye" ako".

⁷Ai: thao yao: bam wa mug: thao shad' mae" Ture byu qenho: gyetab vogaung: khyo- Hiti byu qe we' Khanan byu qe: vogaung: alhab' jham khyo- lo" thao" mae Yuda mung" mug: thao shad' mae" Bersheba khyo ye" ako".

⁸Aimung: lho" mo" gug khye' shid' xe ba thao re yao: bam Yerusalem khyo dam: tug' lo: ako". Yao: bam wa mung"dan: geim" jao: sho' mae gyaung: su" lo: ako".

⁹Yao: bam wa kho:kham pho" re Israel mung" mae gye mau" qo" vin: ra" mo, 800,000 Yuda mung" mae 500,000 na ko" ra" khyo re lau lokyo" ako".

¹⁰Ngadqere: Davi byu japhin: bin: gaug thao yao" aung khug nhag' lam mae myid: qug: myid: ci" li" ra". Amung: yao: wa ASANG re- ce: mau" kad' rumae ngo wa qu" gyaug qu" lhaung sho' ra" qobo re shad' lhoe" pye' va". Jeju khyo" ngore qobo khyad' pye' byid: la,- ngo wa adu: adae: mau" kad' va"- ga: ta" ra".

¹¹ASANG wa Davi nho: lapa pho" Gad re ngo wa yao: re khyin: yu nae" sam ja: byid: nae" khyo Davi re yeta" kyo: wa,- yao: khyin: yu: ra" ja: re ngo kad' byid: nae"- ga: ta" ra" thao: ba ne, kao Davi yab so: bin: to" thao-

¹³Yao: jhao" ye: mung: ASANG ta" ra" khyo yao: re yeta" kyo" ra". Amung: yao: re- ni" mung"dan: mae sam zin bao" khug' khug' ru- mangad: lao"- lho" sam khye' ni" gyevo qe: lo, mae" phao: vho' qin" nae"-mangad: lao"- ni" mung"dan: mae sam ba qam" gyo" nae" ru- aimae" kholam re khyin: yu nae" i? Ana" myid: qu" wa,- pe" dao: phyid ASANG jhao" ci tug' lo" nae" ru ngore ta" la,- ga: myid' ra".

¹⁴Davi wa ngo wa nhag' cad' noyaug boe" na:- ngadqere: ngo wa byu qeyang qobo dae byid: nae" rure wa ngo ma o. Mao"So yao: yao: ngonhaung" re qobo dae byid: vashao:- pe"mung:ga"re yao: wa nhag' ba: khyag' yaug ngad: ra"- ga: tau" ra".

¹⁵Aimung: ASANG wa Israel mung" dao mae qam" daja: re nhao: ke' ra". Aiwa ai: ne, kao mae" yao: khyin: to" ra" ayo, joe" sho' myao" ra". Mung"dan: jao: sho' mae" Israel byu nhad' tug shid: lo" ako".

¹⁶ASANG: mug: lagyo: wa Yerusalem re alaug se' tam" pye' nae" ngad lao"- ASANG wa amyu" byu qere qobo dae byid: nae" khyo we' sin: yang: yao" myid re lhai" pye' mung: ai bam re se' na: ra" mug: lagyo: pho" re ga" va"- thang: pye' se,- ga: ta" ra". Mug: lagyo: pho" wa- Yebusi byu Arauna nho: gaug nao: zam jao: nhae mae na: ra".

¹⁷Amyu" byu qere se' na: ra" mug: lagyo: re Davi the' myao lao"- ASANG re- qobo qo" yaug wa ngo lam: ngad:- shad' ra" mau" kad' yaug re: ngo lam: angad:- ce: amyu" byu qe pe" kad' avako" i? Nao wa ngore we' nga" yham khaung re qobo dae byid: nae" ang: ra" ga: ta" ra".

¹⁸Aiba mae yao: Gad wa Davi jhao" ye: mung: yao: re- Arauna nho: gaug nao: zam jao: khyo do, ye: wa,- ASANG: qhid' mae" phan dalam: yekad' wa,- ga: ta" ra".

¹⁹Davi wa ASANG: amyin" dao: re mho dao: gyo: mung: ASANG: yang yao: re ta" va" ru we' dakhyo: ye" lo" ra".

²⁰Arauna wa qu" khyo" ke' re kho:kham we' yao" zug: qe yao: jhao" do, li" na ko" rure myao: ra". Yao: wa Davi qhid' kheim: mae yao: yao" gaung re myid gaung khyo pye' lhang" ke' mung:-

²¹ASANG kho:kham pho" we"- pe"mung: cekhyo li" i? ga: myid' ra". Davi wa qam" re tam" pye' nae" qhid' mae" ni" gaug nao: zam jao: re vai: yu yang: ASANG: qhid' mae" phan dalam: kad' byid: nae" joe" li" ru ngad:- ga: tau" ra".

²²Arauna wa ASANG kho:kham pho" we"- yu wa,- nao o: ra" ja: ASANG re qhaug' byid: wa,- phan dao mae xeim: khyo" phad' ngaui" nae" ai: nung: jaung lo: jham cemae na: ra". Myi: zo khyo" kad' nae" ai: jham: nung: kyau: we' gaug be, the: re: cemae jo; ra"- ga: ta" ra".

²³Arauna wa aijham alhab' re kho:kham pho" re byid: mung: yao: re- ni" Mao"So ASANG wa ni" xeim: ngaui" re khae: yu vashao: wo"- ga: ta" ra".

²⁴Ngadqere: kho:kham pho" wa airu: mangad:- ai: qhid' mae" ngo nao re aphug' byid: nae". Pe" aphug' magyo" ra" xeim: ngaui" re nga" Mao"So ASANG re ngo xeim: mangaui" byid: nae" ga: tau" ra". Aimung: yao: wa ai: gaug nao: zam jao: re we' nung: jaung lo: jham re ngaui ngo" xe kye' byid: yang: vai: yu: ra".

²⁵Ai: thao yao: wa ASANG: qhid' mae" phan dalam: kad' mung: phad' ngaui" byid' ra" xeim: we' zam" khug: ra" xeim: ngaui" re ngaui" byid' ra". ASANG wa yao" akyu" mho' dao: re tau: byid: mung:- Israel mung" mae gyo" ra" qam" wa thang: byaug: ra".