Read Maru 2 SAMUELA 3 Bible Online

2 SAMUELA 3 - Maru bible

2 SAMUELA 3

¹Sholu nho: yham khaung shad' bo: bode; ra" gyetab qe we' Davi shad' bo bode; ra" mo; gyo: mae mang: jho" zin" ru wa myao" sho' xo' yang: boe" ra". Davi wa je: je: qam: bo: li" au:- yao" gyevo qe wa je: je: qam: nang" lo" ako".

²Hebron mae khau ko" ra" Davi nho: yauggai zo: khyaug' zo: wa Yezre mae" Ahinoam kham: mae"- Amnon-

³Khame mae" Naba nho: cug' mo" myhi" Abigai kham: mae" Khileab- Geshu kho:kham Talmai nho: myiqe zo: Makha kham: mae" Absalom-

⁴Hagid kham: mae" Adoniya- Abita kham: mae" Shephatia-

⁵Egla kham: mae" Itream- ai: yauggai zo: alhab' wa Hebron mae khau: ako".

⁶Davi nho: gyetab qe we' Sholu nho: yham khaung re: jhaug' zaug ko" ra" gyetab qe: agyo: mae mathang lo: mang: jho" zin" na: au:- Abne wa Sholu thao cao" ra" mo; phaung mae jeje yang: kheim: so' qo" li" ra".

⁷Daba mae Sholu nho: yauggai zo: Ishboshed wa Abne re Sholu nho: myingai Rizpa ga" ra" Aia nho: myiqe: zo: we' yab: ra" ga: qobo zhaug' ra".

⁸Ce wa Abne re nhag' jam: yo: nhao: ra". Yao: wa ngo wa Sholu re dao: so mazaung nae" ein: nao jho: i? Ngo wa Yuda mung" re caung da" byid' na: ein: gaigai: jho: i? Ngo wa sao qhid' mae" ni" pho" Sholu- yao" mao:nhaung: qe- yao" ba nam qere dao: so zaung: lo: yaug ngad: amung: Davi yang aung: pye' ru maqhug' sho' nao re ngo khyad' yu va". Ngadqere ana" ba nao wa myiqe: dayaug: khyo we' sin: yang: ngore qobo qho: nhaung i?

⁹ASANG wa Davi re- yao: wa mung"dan: re Sholu lo, mae" we' yao" myid:zo: qe: lo, mae" yu: pye' yang: Davi re Israel we' Yuda mung" shid' lam" geim" mung"dan thao" sho' re kho:kham kad' nhao nae" ga: dao:so: byid' to" ra". Ana"- ngo ceru re mazaui" pyang" re wa Mao"So ngore se' pye' vashao: ga: sho' kyo" ra".

¹¹Ishboshed wa Abne re gyai gyaug: pye' mung: dao: dakheim: re: maqo" jhau ngad: ra".

¹²Abne wa ai: ayo, mae Hebron mae na: jo; ra" Davi jhao" lagyo: nhao: ke' mung:- ce: mung"dan: re khag' eib nae" i? Ngo we' jho" vang" khyo kad' mung: Israel mung" alhab' re ni" shad' khyo aung: yu sho' nao re ngo bao" thaug' byid: nae"- ga: ta" nhao: ke' ra".

¹³Davi wa gai va" khyo daja: mae za: nao we' myid vang" khyo kad' nae". Aiwa nao ngore li" qhug' ra" au: re Sholu nho: myiqe: zo: Mikha re ngojhao" nao jhui" li" byid: ca" ra" ga: tau" ra".

¹⁴Amung: Davi wa Ishboshed jhao" re: nga" yham sang myhi" Mikha re ngore dam: tug' byid: la,- ngo wa yao: re lo, xo' xo' yu nae" qhid' mae" Philisti byu dayo zo" nho: au: qid jham re byid' to: va"- ga: lagyo: jham re ta" nhao: ke' ra".

¹⁵Aimung: Ishboshed wa Mikha nho: yham sang pho" Laisha nho: yauggai zo: Paltie mae" jhui" yu: pye' ra".

¹⁶Paltie wa Bahurim joe" sho' khyo thao" qang" ngug yang: cao" ye" lo" ra". Abne wa yao: re yham phao: lo" wa,- ga: ta" lao"- yao: phao: lo" ra".

¹⁷Abne wa Israel au: jhaung qejhao" ye: mung: yao: bam re ayo, myao" sho' mae naonhaung" wa Davi re naonhaung" kho:kham toe' nae" gyai kao bau: lo: ako".

¹⁸Ana" cemae naonhaung" agu gai jo; ra". ASANG wa- Philisti byu qe we' yao: bam: gyevo qe gatau qe: lo, mae" nga" byumyu" Israel re khyad' yu nae" qhid' mae" nga" daui daui yaug Davi re ngo ci nae" ga: ta" to" rure myid: beim: ge,- ga: ta" ra".

¹⁹Abne wa Benyamin amyu" kaung mae" mo, rere: dao: jhau: ra" ai:thao re Benyamin byu qe we' Israel byu qe khoru: myid vang" to: vako" ra" khyo Davi re yeta" kyo: nae" Hebron khyo ye" lo" ra".

²⁰Abne wa byu shid' xe yaug we' daga" Hebron khyo Davi jhao" joe" li" ra". Davi wa yao: bam re zo: shaug' poe da" byid' ra".

²¹Abne wa Davi re- ngo ana" lo" mung: Israel byu alhab' re ASANG kho:kham ni" qao: mae na sho' lo" kad' nae". Yao: bam wa nao re kho:kham khyo" khae: yu li" genae". Ailao" nao o: ja: re nao qo" yu nae"- amung: mung" geim" re eib: li" nae"- ga: ta" ra". Davi wa Abne re gug: gam nae" Pakham: byid: mung: yao" gyaung: khyo khyo yao: re nhao: ke' ra".

²²Thao re Yoab we' Davi nho: zug: gaje qe wa mang: ye khe' zin" rumae" lanyab myo: sho' yao: bam we' daga" cilo: ako". Ngadqere: Abne wa Davi we' daga" ai: Hebron mae mana lo ngad: ra". Pe"mung:ga"re Davi wa yao: re gug: gam: ru pakham: byid: yang: nhao: ke' ra".

²³Yoab we' yao" byu qe joe" lo gelao"- Abne wa Davi jhao" joe" li" mung: gug: gam: ru pakham: byid: yang: nhao: ke' va" ra" khyo re Yoab re ta" kyo" ako".

²⁴Ailao" Yoab wa kho:kham jhao" ye: mung: yao: re nao pe" kad' va" i? Abne wa nao jhao" joe" li" ra". Nao pe"mung: yao: re airu nhao: ke' i?

²⁵Yao: wa nao re mhug' pyag' nae" nao kad' ru ja: khao: ngo" re we' nao ye" ra" jo, qo khao: ngo" re jo" qu" nae" qhid' mae" cekhyo joe" li" ru ngad: ra". Nao aire gaigai: ba: i? ga: ta" ra".

²⁶Yoab wa Davi mae" thug' lo" thao re Abne re ye taung" yu nae" lagyo: qere nhao: ke' ra". Ngadqere: yao: bam wa yao: re Sira qid thaung: mae" dam: jhui" tug' lo: ako". Airu re Davi pe" maba ngad: ra".

²⁷Abne Hebron khyo joe" lo lao"- Yoab wa yao: re so, so, ga: jho" jhau nug nhohab kad' mung: yao: Abne re kham: nhae khyo gatau jhui" yu yang: ai tau mae yao: re vae: dug: mae shae pyang: yang thug' ke' ra". Airu: Abne wa Yoab nho: yao: nhaung: Asahe re se' pye' ruyang se' pye' ru qhug' ra".

²⁸Davi ai: lau dao: re the' gyo: lao"- ngo we' nga" mung"dan: wa Abne re se' ra" mau" mae pe" qobo maqo" rure ASANG ba: ra".

²⁹Ai: xao qug: wa Yoab we' yao" yham khaung alhab' mae jo; jo, vashao:- byuxag' khao: ngo" mae yao" yham khaung mae" byu daqhae: wa yhid' mhin: no mo,- mao gae: no mo, myiqe: nho: mau" za: gai: zaui: mo,- gye poe mae mai: shid mung: mo,- zo: laug shaug' malaug: mo, boe" vageshao: wo"- ga: ta" ra".

³⁰Aimung: Yoab we' yao: nhaung: Abishai tao wa Gibeon gye poe mae yao: shid' tao: yao: nhaung: Asahe se' pye' ru qhid' mae" Abne re lage, phaug' pye' ako".

³¹Ai: thao Davi wa Yoab we' yao" byu qere yao: bam: mai bau: jham re lao" cad' pye' mung: jid: mo" mai bau: ve, yang: Abne mathao mae kaug' ngug genae" qhid' mae" amyin" khyo" ke' ra". Sushid nyhab' shaung: rumae Davi yao: yao: re: suthaung: nhaung thao" mae su" ra".

³²Abne re Hebron mae nyhab' ako". Kho:kham pho" wa lab mae thoe qi: we' ngug: ra". Amyu" byu qe alhab' re: airu: kad' ako".

³³Davi wa Abne mathao mae ce: ngug ji: re nghaui" ra". Yao: wa Abne wa pe"mung: ago: dayaug ru: shid ca" ra" i?

³⁴Yao" lo, re mataui:- yao" khyid rere: mataui" to:- yao: wa yug: hab' qeyang se' pye' qhug' ra" byu ru: shid: ra"- ga: nghaui" ra". Amyu" byu qe wa yao" qhid' mae" dam: ngug: ako".

³⁵Daba geim" amyu" byu qe wa Davi re zo:ve zo: nae" jhan" ako". Ngadqere: ba mavao shire ngo daja: ja: zo" re wa Mao"So ngore se' pye' vashao:- ga: dao:so: to" ra".

³⁶Yao: bam ceru re qu" xam: mung: ngaui: ako". Gaigai: yao: kho:kham pho" kad' ru ja: khao: ngo" re amyu" byu qe ngaui: ako".

³⁷Davi nho: byu qe alhab' we' Israel mung" mae" mo, alhab' wa Abne se' rumae kho:kham pho" mabo:bo ga" rure ba: gyo" yu: ako".

³⁸Kho:kham pho" wa yao" zug: qere ana" ba Israel mung" mae" au: jhaung qi: dayaug shid: byaug va" rure naonhaung" beim: ko" i?

³⁹Mao"So: yang khyin: to" ra" kho:kham pho" ngo lhao" re:- ana" ba pyaung" pyaung" ga" ra". Ce: Zeruia nho: yauggai zo: qe wa ngore aqan alan kad' ako". Yao: bam man: qi" ru we' dakhyo:- ce: yug: mau" kad' mo, re ASANG qobo dae byid: vashao:- ga: ta" ra".