Read Maru 2 SAMUELA 4 Bible Online

2 SAMUELA 4 - Maru bible

2 SAMUELA 4

¹Hebron mae Abne se' pye' qhug' va" khyo re Sholu nho: yauggai zo: Ishboshed the' gyo: lao"- yao: wa gyaug: ra". Israel byu qe alhab' wa lha" na: ako".

²Ishboshed wa mang: khe' zin" ra" phung: re au: jhaung kad' ra" Ba na we' Benyamin amyu" kaung qe: mug: Berod mae" Rimmon nho: yauggai zo: Ba na we' Tekhab we' Rekhab ga" ra" zug: shid' yaug qo" ra". (Berod re Benyamin mae bobo: ra" khyo" bonghe' ako".

³Azhao: mae" na xug' qe wa Gitain khyo phao: lo" mung: yao: bam wa aimae ana" ba joe" sho' ai tau mae na: jo; ako".)

⁴Sholu nho: myid:zo: gatau dayaug wa Yonathan nho: yauggai zo: Mephiboshed ngad: ra". Yao: wa Sholu we' Yonathan pha: se' pye' qhug' ko" au: apyad ngo" zin: shi" ngad: ra". Ai: shid' pha" nho: shid: ra" khyo lau dao: re Yezre vomo" mae" joe" li" lao"- yao: re jhui: yaug wa yao: re gaug: ba yang: phao: lo" ra". Ngadqere: zojhui: yaug saung" hin yang: yao: re ba; khyo" pye' ra". Aimung: yao: wa khyid qeim boe" byaug: ra".

⁵Rekhab we' Ba na wa Ishboshed nho: yham khyo ye" lo" ako". Yao: shid' yaug wa aikhyo ba gae: zo" re joe" ye" ako". Ai: au: Ishboshed wa na" gaung re dug no" na: jo; ra".

⁶Kham: zang mae na: ra" myiqe: myhi" wa jung: gaug kyang" na: au: yab nghoe" nghoe" li" mung: yab: myhid' lo" byaug: ra". Aimung: Rekhab we' Ba na wa sae za: jhug' vao ye" lo" ako".

⁷Yao: shid' yaug wa mabeim: maso: yab: jo; ra" Ishboshed nho: yab qe, khyo dalhang: dae vao ye: yang: yese' pye' ako". Ai: thao yao" au: re qam" phyid' yu mung: yao: shid' yaug aire vin yang: damyi khyeim Yodan lao: khaung: re su" phyid' lo" ako".

⁸Yao: shid' yaug wa ai: au: lam: re Hebron vomo" mae Davi re lo" byid: mung: nao re se' seim" seim" lo: ra" ni" gyevo Sholu nho: yauggai zo: Ishboshed nho: au: lam: cemae ce ngad:- ana" ba ASANG wa Sholu we' yao" myid:zo: qe dao mae lage, phaug' nae" akhang" nao ASANG kho:kham pho" re byid' ava"- ga: yao: re ta" ako".

⁹Davi wa yao: shid' yaug re- ngore gyaug ci" ca" ru alhab' mae" ngore khyad' yu yaug daui: na: ra" ASANG re lao: yang: ngo jham tang" to".

¹⁰Ziglag mae ngojhao" joe" li" ra" lagyo: pho" wa Sholu shid: ra" khyo ngore li" ta" kyo" rure yao wa lau dao: gai vin: li" byid' ru ngad: ga: jho: ra". Ngo wa yao: re taung" yu yang: yao: re se' pye' nhao va". Aiwa yao" lau dao: gai qhid' mae" ngo byid' ra" aphug' jhaung qhu" ngad: ra".

¹¹Qobo maqo" yaug yao" yham mae yab; jo; rure se' pye' ra" byu qe: qhid' mae" wa khoqhi" sho' je: xo nae" i? Ana" ngo wa ni" shid' yaug re yao: re se' pye' ko" ru qhid' mae" ngo lage, phaug' nae". Amung: ni" shid' yaug re myid gaung mae" sham" pye' nae"- ga: tau" ra".

¹²Davi amyin" byid: mung: yao" gyezo: qe wa Rekhab we' Ba na shid' yaug re se' pye' mung: yao: shid' yaug lo, we' khyid jham re qam" phyid' pye' ako". Aijham re Hebron mae" qid kyaung" nhae mae yao: bam lhao" to" ako". Yao: bam wa Ishboshed nho: au: lam: re gaug: yu yang: Hebron mae" Abne nho: lab mae nyhab' pye' ako".