Read Maru 2 SAMUELA 7 Bible Online

2 SAMUELA 7 - Maru bible

2 SAMUELA 7

¹Kho:kham Davi wa yao" kho:kham kho" mae na: jo; mung: ASANG wa yao: re yao" gyevo qe alhab' mae" gug: gam byid' ra".

²Ai: thao kho:kham pho" wa lapa Nathan re ngo wa ce: qhoje; sag' yang kad' ra" yham khug mae na: jo; ngadqere: ASANG: Dao: Thang" Ban" wa zaung khug mae jo; jo; ra"- ga: ta" ra".

³Nathan wa- ni" myid mae bo: rure kad' wa,- pe"mung:ga"re ASANG wa nao we' daga" ngad: ra" ga: tau" ra".

⁴Ngadqere: ai: myi mae ASANG wa Nathan re-

⁵Nga" daui daui yaug Davi re- nao wa ngo na nae" caung:pa" yham mo" kad' nae" yaug mangad:-

⁶Israel byu qere Egutu mung" mae" ngo khyad' yu: ra" yo, mae" ana" joe" sho'- ngo wa caung:pa" yham mo" mae khonhae: re: mana lo: ngo wa su" lhang: qin" mung: zaung khug mae na: lo: ra".

⁷Israel byu qe we' ngo daga" gyaung: su" qin" ra" gyo: gu: mae ngo yang: san: to" ra" au: jhaung qe mae" dayaug rere: qhoje; sag' yang caung:pa" yham mo" ngore pe"mung: makad' byid: ko" i? ein: ngo yao: bam re khonhae" re: mata" lo ein: yeta" kyo: wa,.

⁸Aimung: nga" daui daui yaug Davi re ceru: ta" wa,- qam: bo: thao" ra" ASANG ngo wa nao re pa: din" mae yao lhaug' na: rumae" jhui" yu mung: nga" byumyu" Israel re eib nae" zug: ngo nao re kad' nhao va".

⁹Nao khai: ye: khai: ngo wa nao we' daga" na: lo: ra". Nao qhid' au: khyo jhin" ye" lo" au: ngo wa ni" gyevo qe alhab' re aung: pye' nhao va". Ngo wa nao re mug: myid dao mae" qi" thao" ra" au: jhaung qe qhi" lahau: qi: nhao va".

¹⁰Ngo wa nga" byumyu" Israel qhid' mae" jo, qo dalam: re khyin byid: mung: yao: bam re aimae te" na nhao va". Aimae yao: bam wa zag zo" ru majo, lo: qo" li" genae". Yao: bam ce: mung" khyo li" ko" ra" yo, mae" yao: bam wa aqan alan ngad ko" ra" byu qeyang mang: khe' zin" rure qhug' lo: ako". Ngadqere: ceru: dam: boe" lo nae" mangad:- ni" gyevo alhab' mae" gug: gam byid: nae" we' nao re myid:zo: qe byid: nae" nao re ngo dao:so: byid: va".

¹²Nao shid: lo" byaug mung: ni" phug' pho" qe we' daga" nyhab' pye' qhug' lao"- ngo wa ni" yauggai zo: qemae" dayaug re kho:kham kad' nhao mung: yao: wa yao" mung"dan: re qam: bo sho' kad' li" nae".

¹³Yao: wa nga" qhid' mae" Caung:pa" Yham mo" kad' byid: nae" yaug ngad: li" nae". Yao" kho:kham tao" wa apyad ato mae ngad: jo; nae" khyo re ngo gang" tang nhao nae".

¹⁴Ngo wa yao" yao: pho" ngad mung: yao: wa nga" zo: ngad: li" nae". Yao: mau" zaui" shad' lao"- yao: pho" wa yao: zo: re qobo dae byid' ruru: yao: re ngo qobo dae byid: nae".

¹⁵Ngadqere: nao kho:kham qo" boe" sho' ngo yu: pye' ra" yaug Sholu mae ngo kad' ru we' dakhyo: ngo yao: re bo: bode; rure ngo mato" pye' nae".

¹⁶Nao wa khonhae" re: myid:zo: qo" li" nae". Ni" mung"dan: re apyad ato mae dang: jo, nhao nae". Ni" kho:kham tao" wa khonhae" re: mathao" nae" ein: rure yeta" kyo: wa,- ga: ta" ra".

¹⁷Nathan wa Mao"So: yang yao: re qhu" byid' va" ru ja: khao: ngo" re Davi re yeta" kyo" ra".

¹⁸Ai: thao Davi wa ASANG: qhid' kheim: Zaung khyo vao ye: mung: yezaung: jo, yang: phungbao qi" qhang: ra" ASANG we" ngo we' nga" yham khaung re nao kad' va" ra" mau" wa ngo we' maman: qi" ngad: ra".

¹⁹Ngadqere: phungbao qi" qhang: ra" ASANG we" ana" nao wa aitho' lhao" re: je: kad' na: ra". Nao wa joe" lo nae" ayo, mae" nga" myid:zo: qe: khyo re dao:so: byid' ava". Phungbao qi" qhang: ra" ASANG we"- nao wa ceru re myao nhao: ava".

²⁰Je yang: ngo pe" ta" nae" i? Nao wa ni" daui daui yaug ngore ba: ra".

²¹Ceru: kad' na nae" wa ni" myid o: ru we' ni" au: qang khyo ngad: ra". Ngo re mho" shid' nae" qhid' mae" ce: qi" qhang: ra" mau" alhab' re nao kad' ava".

²²Phungbao qi" qhang: ra" ASANG we"- nao wa khoqhi" qi" qhang yaug ngad: i? Nao we' dau ru khag' mana ngad: ra". Nao za: Mao"So ngad: rure ngonhaung" khonhae" re: ba: ra".

²³Yao: bam re naoyao" byumyu" kad' yu nae" jeim doe; na: rumae" nao: yang khyad' yu: ra". Israel byumyu" we' dau: ru myid: gaung dao mae pe" ja" amyu" re: mana ngad: ra". Yao: bam: qhid' mae" nao kad' ra" qi" qhang: ru we' mug' pho: mau" jham wa mug: myid jao: sho' khyo hau" nhao" lo" nhao: ava". Ni" byumyu" qe qhid' au: khyo jhin" ye" lo" na ko" au:- nao wa gatau: byumyu" qe we' yao: bam: so jham re khe' thug' pye' mung: Egutu mung" mae" nao: yang lhoe' ke' ra" byumyu" re nao yao: mae" kad' yu: ra".

²⁴Israel byu qere apyad ato: qhid' mae" nao yao" byumyu" kad' yu: ava". ASANG we"- nao wa yao: bam: Mao"So boe" lo: ava".

²⁵Ana" Mao"So ASANG we"- ngore we' nga" myid:zo: qere nao byid' to" ra" dao:so: alhab' re zaui" pyang" byid: la,- nao kad' nae" lhaung" ta" rure kad' wa,.

²⁶Ni" lahau: wa qi: mung: amyu" byu qe wa apyad ato mae qam: bo: thao" yaug ngad: ra" Mao"So ASANG wa Israel dao mae Mao"So kad' na: ra" ga: ta" li" genae". Amung: nao wa khonhae" re: nga" kho:kham tao" re tang nhao: ra".

²⁷Israel nho: Mao"So qam: bo: thao" ra" Mao"So we"- nao re ce: akyu" mho' dao: mho' nae" ngo qam: qo" va". Pe"mung:ga"re nao wa ni" daui daui yaug ngore ceru alhab' re qhu" byid' ava". Amung: nao nga" myid:zo: qere kho:kham kad' nhao nae" ga: nao ngore ta" to" ra".

²⁸Ana"- Phungbao qi" qhang: ra" ASANG we"- nao wa Mao"So ngad: ra". Nao wa ni" dao:so: re khonhae" re: jhaug' zaug yaug ngad: ra". Nao wa ce: mug' pho: dao:so: ngore byid' to" ra".

²⁹Yao: bam xo' yang: ni" myo, nho byid' rure qo" kham zo: genae" qhid' mae" nga" myid:zo: qere nao shaman" byid: nae" rure ngo mho' ra". Nao phungbao qi" qhang: ra" ASANG wa- ce: dao:so: re byid' to" ava". Ni" shaman" jeju wa nga" myid:zo: qe: dao mae apyad ato bo: jo, vashao: wo"- ga: mho' ra".