Read Maru 2 SAMUELA 9 Bible Online

2 SAMUELA 9 - Maru bible

2 SAMUELA 9

¹Daba re Davi wa Sholu nho: yham khaung mae" dayaug re: mana loko" ra" i? Dayaug yaug na: ngad: re wa Yonathan mathao mae ngo wa yao: re nhag' khyag' ru qhu" byid: nug: ra"- ga: myid' ra".

²Sholu nho: yham khaung nho: daui daui yaug Ziba ga: mang ru dayaug na: ra". Davi jhao" ye: nae" yao: re ta" ako". Kho:kham pho" wa nao Ziba ngad: i? ga: myid' ra" yao: wa kho:kham pho" we"- ngo ngad: ga: tau" ra".

³Kho:kham pho" wa yao: re- ngo kad' nae" ein: Mao"So re ngo dao:so: byid' to" ru we' dakhyo: jhaug' zaug: ru we' nhag' khyag' rure ngo qo" qhu" byid: nae" yaug Sholu yham khaung mae" byu dayaug yaug na: dang shi" ra" i? ga: myid' ra". Ziba wa Yonathan nho: yauggai zo: dayaug na: ashi". Yao: wa khyid qeim ngad: ra" ga: tau" ra".

⁴Kho:kham pho" wa- yao: khai mae na ra" i? ga: myid' ra". Ziba wa Lodeba mae" Ammie nho: yauggai zo: Makhira nho: yham mae na: ra" ga: tau" ra".

⁵Aimung: kho:kham Davi wa yao: re khai nhao: ke' ra".

⁶Yonathan nho: yauggai zo:- Sholu yao: myid: Mephiboshed joe" lo lao"- Davi qhid' kheim: mae phug' myao" ru we' goe; gyo" ra". Davi wa Mephiboshed we"- ga: khai: ra". Yao: wa kho:kham pho" we"- ngo ni" qhid' kheim: mae na:- ga: tau" ra".

⁷Davi wa- dagyaug wa,- ngo wa ni" pho" Yonathan nho: mathao mae nao re nhag' khyag' nae". Ni" phug' Sholu sang: ra" mug: myid alhab' nao re dam: tug' byid: nae". Amung: khonhae" re: nao re nga" zozo: jaung: mae khae: yu nae"- ga: phaug' tau" ra".

⁸Mephiboshed wa dam: goe; gyo" mung: kho:kham pho" we"- ngo wa lakha: shid dadau: tho' pe" maje: gai ngad: ra". Nao ngore pe"mung: ai qhi" gai kad' nug: i? ga: ta" ra".

⁹Ai: thao kho:kham pho" wa Sholu nho: daui daui yaug Ziba re khai: yu mung: ngo wa Sholu we' yao" yham khaung sang: ra" zai ja: khao: ngo" re ni" asang: yao: myid: Mephiboshed re byid: nae".

¹⁰Nao we' ni" yauggai zo: qere:- ni" daui daui mo, wa ni" nho: asang Sholu nho: yham khaung qhid' mae" ai: mug: myid mae qhovo: qho: mung: yao: bam re zo:ve bao" thaug' byid' li" genae". Ngadqere: Mephiboshed yao: yao: wa khonhae" re: nga" zozo: jaung: mae bang" vo we' dakhyo: bozo" li" nae"- ga: ta" ra". (Ziba wa yauggai zo: daxe: ngo" yaug we' daui daui okaung shid' xe yaug qo" ra".)

¹¹Ziba wa nao ASANG kho:kham amyin" dao: ja: khao: ngo" re ngo kad' nae"- ga: tau" ra". Aimung: Mephiboshed wa kho:kham pho" nho: yauggai zo: dayaug we' dakhyo: kho:kham zozo: jaung: mae bozo" ra".

¹²Mephiboshed wa Mikha ga: mang: ra" yauggai zo: zoshao dayaug qo" ra". Ziba nho: yham khaung mae" mo, alhab' wa Mephiboshed nho: daui daui mo, boe" lo: ako".

¹³Aimung: shid' khyid geim" qeim: ra" Mephiboshed wa Yerusalem mae na mung: myo: khao: ngo" kho:kham pho" nho: zozo: jaung: mae bozo" na: ra".