Read Maru 1 KHO:KHAM 10 Bible Online

1 KHO:KHAM 10 - Maru bible

1 KHO:KHAM 10

¹Sheba kho:kham myhi" wa Sholamon nho: lahau: qi" rure the' gyo: mung: qug' ra" dao: myid: jham: yang yao: re jham" qu" nae" qhid' mae" Yerusalem khyo gyaung: su" lo" ra".

²Yao: wa yao: we' daga" byu myo: sho' we'- zoxeim: sheim nae pyo: cid'- laug sin" jham qhang myo: sho' tho: ra" gola:u jham re bojhui" ye" ra". Sholamon we' yao: jho" qhug' lao"- yao: myid: ci: ra" dao: myid: alhab' Sholamon re myid' ra".

³Sholamon wa alhab' re dao: phyid byid' ra". Aijham re ta" pheim ta" sho' kyo: nae" yao" qhid' mae" gyai qug' ra" ja: mabo ngad: ra".

⁴Sheba kho:kham myhi" wa Sholamon nho: pha,jhi" dao: re the' gyo: mung: yao: kad' to" ra" kho:kham kho" re myao: ra".

⁵Yao: wa Sholamon nho: zozo: jaung: mae jaung: to" ra" zo:ve- jham yao" zug: qe na yham jham yao" kho:kham kho" mae" mau" zaui" ra" mo, we' yao: bam ve, ra" ve,mai ve,bau: khin- zo: shaug' poe mae yao: re caung da" byid: ko" ra" daui daui mo,- Caung:pa" Yham mae yao" yang ngaui" byid' ra" xeim: jham rere: myao: ra". Aijham wa yao: re so' maba she losho' mug' byaug nhao: ra".

⁶Yao: wa Sholamon kho:kham re ngoyao" mung"dan: mae ni" khyo re ngo the' gyo: mung: nao pha,jhi" bo: ru wa dang: nhaung-

⁷Ngadqere: ngo joe" li" mung: ngo yao" myo; yang yao: aijham alhab' re mathe' myao myao wa ngo malam". Ngadqere: aire agaung: daqi" re lhao" re: ngo mathe' gyo: nhaung- ni" pha,jhi" we' jo,nho" wa ngo the' gyo" ra" tho' je: myo" ra".

⁸Ni" yham sang myhi" qe wa khoqhi" zhau: vha: bo: i? Ni" qhid' kheim: mae khonhae" re: na mung: ni" pha,jhi" dao: khyo jham re the' gyo" yu nae" akho: akhang" qo" ko" ra" mo, ni" daui daui mo, wa khoqhi" zhau: vha: bo ko" ra" i?

⁹Ni" Mao"So ASANG re caung:khin" ra". Yao: wa nao re khoqhi" o ngaui: rure nao re Israel kho:kham kad' nhao: ra" khyo" yang qhu" byid' ava". Pe"mung:ga"re Israel qhid' mae" yao" jhid'de; myid wa apyad ato ngad: ra". Tarha" we' tarha" dangman" rure nao qo" zaui" ci nae" qhid' mae" yao: wa nao re yao: bam: kho:kham kad' nhao: ava".

¹⁰Yao: wa Sholamon re yao: vin: li" ra" jhaung qhu" jham byid' ra". Qhang joe: 3000 je sho'- zoxeim: nae pyo: cid' we' laug sin" jham myo: sho' ngad: ra". Sheba kho:kham myhi" yang byid' ra" nho" laug sho' zoxeim: nae cid' re yao: khonhae" re: maqo" khae: yu: qu" ngad: ra".

¹¹(Hiram nho: qid sang pho jham wa Ophi mung" mae" qhang jham- almuga sag' myo: sho' we' laug sin" myo: sho' re: tho: lo: ako".

¹²Sholamon wa ai: sag' jham re Caung:pa" Yham we' kho:kham kho" mae" daung" zang lang" jham kad' mung:- nghaui" thoe ba: ke' mo; qhid' mae" she tang:- be, tang: kad' rumae ci: ra". Aijham wa Israel mung" khyo tho: zaui: qu" ra" gu: mae" gai: thao" ra" Almuga sag' jham ngad: ra". Airu" ru khonhae" re: madam: the' myao: qu" lo:ngad: ra".)

¹³Kho:kham Sholamon wa Sheba kho:kham myhi" mho' gu: ja: khao: ngo" re byid: mung:- gatau thung" li we' byid' ra" jhaung qhu" jham myo: sho' re mabyag maqhag' lo: byid' ra". Ai: thao yao: we' yao" byu qe wa Sheba mung" khyo tug' lo" ako".

¹⁴Kho:kham Sholamon wa zin khao: ngo"- qhang 16000 ko qo" yu: ra".

¹⁵Aitho' mago"- gau pai: kad' mo, aung: zo: aung shaug' mau" mae" khang: ke' ru- Arabi kho:kham jham: yang we' Israel mung"dan: jham: mang: zug: qeyang byid' ra" khang: jham re: bobo: ra".

¹⁶Sholamon wa go aqi: shid' yo re lam: khao: mae qhang shekela khyaug' yo yo ke' yang: kad' ra".

¹⁷Yao: wa go angai sam yo rere:- lam: khao: ngo" mae qhang dajoe: joe: ke' yang: kad' ra". Yao: wa ce: go jham alhab' re Lebanon Sag' Mo" yo Qe mo" mae ke' to" ra".

¹⁸Yao: wa tao" khau" qi: dalam: rere: kad' ra". Ai: tao" khau" dadau re xao zaui: yang thab' mung: dang: ra" gu: re gyang" thao" ra" qhang: yang thab' to" ra".

¹⁹Tao" khau" wa Kham mhai" khyaug' lam: de; mung: zam thao lam: khao: ngo" athao thao mae khang khyi lho dalam: lam: te' to" ra". Khang khyi lho alhab' daxe: shid' lam: ngad: ra". Tao" khau" au: nhaung thao" shad' mae lang" lang" mung: ru ngad mung: ayae mae" lo,zaui: shid' lam: wa khang khyi lho ngad: ra". Kho:kham mung"dan: dalam: mae re: ce we' dau: ra" tao" khau" majo; qu" ngad: ra".

²¹Sholamon nho: keim alhab' wa qhang: yang kad' to: mung: Lebanon Sag' Yo yham qe, mo" mae" keim kang: alhab' re qhang gyang" yang kad' to" ra". Sholamon kho:kham pyad mae ngaui re phug' de; ra" ja: khyo" majho: ruyang ngaui maci ngad: ra".

²²Yao: wa Hiram nho: qid sang pho jham we' daga" Nammugdara re gau" ra" qid sang pho jham qo" ra". Ce: qid sang pho jham wa sam zin re dalhang qhang- ngaui- xao zaui- myaug daung: jham we' myaug ne jham re tho: lo: ako".

²³Kho:kham Sholamon wa kho:kham gaje qe tho' jo,nho" je: qo"- pha,jhi" je: bo: ra".

²⁴Mao"So: yang yao: re byid' to" ra" pha,jhi" dao: re mug: myid geim" mae" mo, li" tae" gyo: nug: ako".

²⁵Joe" li" ra" mo, yaug khao: ngo" wa yao: re- ngaui zai jham- qhang zai jham bau: qhang jham- shae lhae jham- zoxeim: nae cid' jham- myao: jham- loze jham- jhaung qhu" vin: li" byid' ako". Ceru wa zin khao: ngo" xo' yang: xo' yang: ngad: ra".

²⁶Sholamon wa gyekhe' myao: lhin" dataung: byid yo we' jui: myao: datug: shid' taung dau: bo: ra" gyetab re te" to" ra". Aijham mae" daqhae: re Yerusalem mae to: mung: dang: ra" gu: re wa gatau: vogaung: myo: sho' mae nha: to" ra".

²⁷Yao: eib: ra" gyo: mae ngaui wa Yerusalem mae jo; ra" laug baui we' dakhyo:- shaug' the: re Yuda bam khyid mae" yu" yu" pho' ham" gae we' dakhyo: magan: mago" boe" jo; ra".

²⁸Kho:kham mau" zaui: mo, wa Musri we' Khilikia mung" mae" myao: jham re vai: yu: mung: Egutu mung" mae" gyekhe' myao: lhin" vai: ke' yu: ra" mau" re zaui" pye' ako".

²⁹Yao: bam wa Hiti we' Suri kho:kham qere myao: we' gyekhe' myao: lhin" jham aung: byid' ako". Gyekhe' myao: lhin" dalam: re ngaui 600 kye'- myao: dadau: re 150 kye' yang aung: byid' ako".