Read Maru 1 KHO:KHAM 11 Bible Online

1 KHO:KHAM 11 - Maru bible

1 KHO:KHAM 11

¹Sholamon wa taung bug myiqe: myo: sho' re jhid'de; ra". Egutu kho:kham myiqe: zo: mae gatau Hiti- Moba- Amon- Edom- Sidon mae" myiqe: qere lo,xo' yu: ra".

²Yao: bam: yang Israel byu qere gatau: so jham re yao: bam: jhaug' zaug myid byid' pye' nhao geyang:- ASANG wa Israel byu qere ai: byumyu" qe we' myi: majho" yu nae" amyin" byid' to: sho' ngadqere: Sholamon wa ai bam re lo,xo' yu: ra".

³Sholamon wa kho:kham zomyi: nhad' yo we' myingai sam yo rere: lo,xo' yu: ra". Aibam wa yao: re Mao"So mae" phaug' lo" nhao mung:-

⁴Yao: mao" lo" ra" ayo, mae yao: bam wa yao: re taung bug so jham re caung:pa" nae" jhui" phaug' lo" byaug: ako". Yao: wa yao: pho" Davi ru: yao" Mao"So ASANG re jhaug' mazaug lo:ngad: ra".

⁵Yao: wa Sidon so myhi" Astared- Amon byu qenho: maca' majhad' so Moleg re caung:pa" ra".

⁶Yao: wa ASANG re qobo shad' mung:- yao: pho" Davi kad' lo: ru we' dakhyo: ASANG re dangman" ra" khyo" makad' ngad: ra".

⁷Yerusalem ba thug' shad' bam dao mae Moba byu qenho: maca' majhad' so ngad: ra" Khemo we' Amon byu qenho: maca'- majhad' so ngad: ra" Moleg re caung:pa" nae" jo, qo kad' ra".

⁸Yao: wa yao" taung bug yham sang myhi" qe alhab' yao: bam: so jham re sheim nae pyo: ja: phad' ngaui" nae" we' ngaui" xeim: ngaui" byid: nae" caung:pa" jo, qo jham re kad' ra".

⁹Israel nho: Mao"So ASANG wa Sholamon re shid' lhang li" na: qhu" mung: taung bug so jham re macaung:pa" nae" qhid' mae" amyin" byid: sho' ngadqere: Sholamon wa ASANG: mho dao: re matae" gyo: lo: yao: mae" phaug' lo" ra". Aimung: ASANG wa Sholamon re nhag' yo" ra".

¹¹Amung: yao: re nao wa thaug kad' yang: ngo we' to" ra" ni" dao: thang" re phyo' pye' mung: nga" amyin" dao: jham re matae" gyo" ruyang kho:kham mung"dan: re nao mae" yu: pye' mung: ni" zug: qemae" dayaug re ngo byid' pye' nae" ein: dao:so: to" ra".

¹²Ngadqere: ni" pho" Davi mathao mae ni" pyad mae ngo cere makad' nae". Ni" zo: eib: ra" pyad mae ngo cere kad' nae".

¹³Ngo wa mung"dan: geim" re yao" lo, mae" mayu: pye' nae". Ai: atha" ngo wa nga" daui daui yaug Davi mathao mae we' ngoyao" qhid' mae" kad' to" ra" Yerusalem vogaung: mathao mae byumyu" kaung dakaung re tung" to: nae"- ga: ta" ra".

¹⁴Aimung: ASANG wa Edom kho:kham yham byu Hadad re Sholamon re gye phaug' kad' nhao: ra".

¹⁵Ce: ayo, qhid' phyao: myao" sho' mae"- Davi yang Edom re aung: yu: ra" au:- yao" gyezug: pho" Yoab wa ai: khyo byu shid ye nyhab' ra". Yao: we' yao" byu qe wa Edom mae lho" khyaug' khye' yethang: na: ako". Ai: ayo, gyo: mae yao: bam wa-

¹⁷Hadad we' Egutu mung" khyo phao: loe; lo" ko" ra" yao: pho" nho: Edom byu daui daui mo, mae" je yang:- Edom mae na ko" ra" yauggai yaug khao: ngo" re se' pye' ako". (Ai: ayo, mae Hadad wa zoshao za: shi" angad: ra".)

¹⁸Ailao" yao: bam wa Median mung" mae" thug' lo" mung: Paran khyo lo" ako". Ai mae byu daqhae: yao: bam we' ye qhan" na: ako". Ai: thao yao: bam wa Egutu khyo gyaung: su" ye: mung: Hadad re mug: myid daqhae: we' yham- zo:ve byid' ra" kho:kham pho" jhao" vao ye" ako".

¹⁹Hadad' wa kho:kham pho" re ba nam ngaug: aung: yu mung: kho:kham wa yao: re yao" yham sang myhi" kho:kham myhi" Tahpene nho: yao: nhaung: re Hadad re byid: zho" ra".

²⁰Yao: wa Hadad re Genubad ga: mhang" ra" yauggai zo: dayaug re khau byid' ra". Ai: yaug wa kho:kham kho" mae kho:kham myhi" yang khau: qhi: byid: mung:- yao: wa kho:kham nho: yauggai zo: qe we' daga" na: ra".

²¹Egutu mung" mae na: ra" Hadad jhao" Davi we' gyezug: pho" Yoab shid: ra" khyo re lau dao: joe" lo" lao"- Hadad wa kho:kham pho" re ngoyao" mung" khyo dam: tug' lo" nhao la,- ga: ta" ra".

²²Kho:kham pho" wa- pe"mung: i? Nao re ngo daja: ja: mabyid: yang: i? Aimung: nao yham phao nug: i? ga: myid' ra". Hadad wa ngore nhao: ke' la, kho:kham re- ga: phaug' tau" ra". Amung: yao: wa yao" mung"dan: khyo phao: lo" ra". Edom kho:kham Hadad wa makhyang: yaug ngad: ru we' dakhyo:- Israel byu qenho: gyevo ngad: ra".

²³Mao"So wa Eliada nho: yauggai zo: Rezon re Sholamon re gye phaug' kad' nhao: ra". Rezon wa yao" ASANG Zoba kho:kham Hadadeze nho: lo, mae" phao: lo" mung:-

²⁴Tarha" mavao: ra" phung: daphung" nho: au: jhaung boe" lo: ra" (Ceru wa Davi yang kho:kham Hadadeze re khe' aung: pye' thao- yao" Suri ba nam phung: qere se' pye' thao re boe" ru ngad: ra") Rezon we' yao" byu qe wa Damasku mae yena: ako". Amae yao" byu qe wa yao: re Suri kho:kham kad' nhao: ako".

²⁵Yao: wa Sholamon nho: apyad gyo: mae Israel byu qenho: gyevo dayaug ngad: ra".

²⁶Sholamon re gye phaug' kad' ra" gatau dayaug wa Ephrim mae jo; ra" Zereda mae" yao" zug: pho" Nebad nho: yauggai zo:- Yeroboam ngad: ra" yao: myhi" wa Zerua ga: mang: ra" cug' mo" myhi" ngad: ra".

²⁷Ceru wa tau: lhan" ra" mhomyi: ngad: ra". Sholamon wa Yerusalem ba thug' shad' myid gaung re myid zhai: ke' pyang" mung: vomo" vang jham re nyhang" na: ra".

²⁸Yeroboam wa gyai boe" ra" zolau: dayaug ngad mung: yao: mau" zaui: kyid: rure Sholamon qu" ba: yu lao"- yao: re- Manashe we' Ephrim kaung qenho: mug: myid mae mau" zaui" ra" mo, alhab' nho: au: jhaung kad' nhao: ra".

²⁹Daba mae- Yeroboam Yerusalem mae" gyaung: su" na: au:- Shilo mae" lapa Ahiya wa pa: din" mae" khyodang mae yao: dayaug re za: li" qhug' ra".

³⁰Ahiya wa yao: ve; ci: ra" bau: qhang asag' re khyad' yu mung: aire daxe: shid' cug' lao" cad' pye' ra".

³¹Amung: Yeroboam re- naoyao" qhid' mae" daxe cug' yu wa,- pe"mung:ga"re Israel nho: Mao"So ASANG wa mung"dan: re Sholamon lo, mae" ngo yu pye' mung: ngo nao re byumyu" kaung daxe byid: nae".

³²Nga" daui daui yaug Davi mathao mae we' Israel mung"dan: geim" mae" ngoyao" qhid' mae kad' nae" ngo khyin: to" ra" Yerusalem mathao mae Sholamon wa byumyu" kaung dakaung re zam" cili" nae".

³³Sholamon ngore ha: pye' mung: taung bug so jham ngad: ra" Sidon so myhi" ngad: ra" Astared- Moba qenho: so Khemo- Amon qenho: so Moleg- jham re caung:pa" va" ruyang ngo ceru re kad' nae". Sholamon wa ngore mho dao: magyo:- shad' ra" mau" kad' yao: pho" Davi kad' ruru: nga" tarha" jham re we' nga" amyin" dao: jham re maphug' cao" lo:ngad: ra".

³⁴Ngadqere: mung"dan: geim" re wa Sholamon lo, mae" mayu: pye' nae". Yao: daui: na: ra" myhao" ngo wa yao: re kheim: so' qo" nhao nae". Ngo yang khyin: yu mung: nga" tarha" jham re we' amyin" dao: jham re phug' cao" yaug ngad: ra" nga" daui daui yaug Davi mathao mae ngo ceru: kad' nae".

³⁵Ngo wa mung"dan: re Sholamon nho: yauggai zo" lo, mae yu: pye' mung: nao re byumyu" kaung daxe kaung byid: nae".

³⁶Ngadqere: ngore caung:pa" nae" jo, qo khyo" ngo khyin: to" ra" vomo" Yerusalem mae eib: ra" nga" daui daui yaug Davi nho: myid:zo: khonhae" re: na: nae" qhid' mae" ngo wa Sholamon nho: yauggai zo: re byumyu" kaung dakaung re sang: to: nhao nae".

³⁷Yeroboam we"- ngo wa nao re Israel kho:kham kad' nhao nae". Nao wa nao o: ra" mug: myid alhab' dao mae eib: li" nae".

³⁸Nao ngore bin sho' mho dao: gyo: mung:- nga" tarha" yang kao so' daui: lo: ru we' dakhyo: nga" amyin" dao: jham re cao" ra" khyo" yang nga" myid vang" rure nao qo" yu: re- ngo wa khonhae" re: nao we' daga" na nae". Ngo wa nao re Israel kho:kham kad' nhao nae". Davi qhid' mae" ngo kad' lo: ru we' dakhyo: ni" thao mae ni" myid:zo: qe eib genae" rure ba nhao nae".

³⁹Sholamon nho: qobo mathao mae ngo wa Davi nho: myid:zo: qere qobo dae byid: nae". Ngadqere: ayo, byang" mangad: nae"- ga: ta" ra".

⁴⁰Airumung: Sholamon wa Yeroboam re se' nae" seim" ra". Ngadqere: Egutu kho:kham Shishag jhao" phao: loe; ye: mung: Sholamon shid sho' ai: mae yena: ra".

⁴¹Sholamon kad' ra" lo, mau" gatau ja: khao: ngo"- yao" mau"- yao" pha,jhi" jham alhab' wa Sholamon nho: mhomyi: mae tung" xam" to" ako".

⁴²Yao: wa Yerusalem mae na mung: Israel mung" geim" re byid xe zin kho:kham kad' ra".

⁴³Yao: shid: lo" mung: Davi vomo" mae nyhab' to" ako". Yao" yauggai zo: Rehoboam wa kho:kham khyo" yao" khu mae kho:kham kad' ra".