Read Maru 1 KHO:KHAM 12 Bible Online

1 KHO:KHAM 12 - Maru bible

1 KHO:KHAM 12

¹Rehoboam wa Shekhem khyo ye" ra". Ai mae mug: am: shad' mae" Israel byu qe alhab' zang" ham mung: yao: re kho:kham kad' nhao: ako".

²Kho:kham Sholamon nho: lo,mae" Egutu mung" khyo phao: loe; lo" yaug ngad: ra" Nebad nho: yauggai zo: Yeroboam wa ce: lau dao: re the' gyo: lao"- yao: wa Egutu mung" mae" tug' lo: ra".

³Mug: am: mae" amyu" kaung mae" byu qe wa yao: re khai: yu nhao: ke' mung:- yao: bam alhab' Rehoboam jhao" zang" ham: ye: yang: yao: re-

⁴Ni" pho" Sholamon wa ngonhaung" re gyai thin: ra" khyo" kad' mung: ngonhaung" re qola: vhin: lo: ra". Nao wa ai: qo jham re seim: nhao mung: yo yo za: ngonhaung" re kad' re wa ni" qao: mae ngonhaung" jhaug' zaug za: na: bam nae" ga:- ta" ako".

⁵Yao: wa- Sam ba lao" dam: li" geri:- nga" dao: phyid naonhaung" re ngo byid: nae"- ga: phaug' tau" ra". Aimung: yao: bam thug' lo" ako".

⁶kho:kham Rehoboam wa yao: pho" Sholamon nho: pha,jhi" byid: yaug khyo" caung da" byid' lo: ra" lau: de, mao: zo: qe we' jho" qham: ra" yao: wa- ce: byu qere ngo dao: phyid byid: nae" qhid' mae" naonhaung" ngore pe" pha,jhi" byid: genae" i? ga: myid' ra".

⁷Yao: bam wa nao ce: byu qere nyang" za: caung da" byid: nhao nug: re wa yao: bam: dao: myid: re gyo" ngaui taung" mung: ra" dao: phyid byid: wa,- ailao" yao: bam khonhae" re: nao re jhaug' zaug za: caung da" byid' li" genae"- ga: tau" ako".

⁸Ngadqere: yao: wa ai: lau: de, mao: zo: qenho: pha,jhi" byid' rure pe" shui manho: lo:- yao: we' daga" qi" li" mo,- ana" yao" pha,jhi" byid: lau: de, boe" na ko" ra" apyad ngai: ra" mo, jhao" ye" ra".

⁹Yao: wa yao: bam re- naonhaung" ngore pe" pha,jhi" byid: genae" i? Yao: bam: qo re seim: nhao byid: nae" ngore mho' na ko" ra" mo, re ngo pe" ta" nae" i? ga: myid' ra".

¹⁰Yao: bam wa yao: re nao ceru: ta" ang: ra"- nga" lo,nhaung: thao" nyhug' wa nga" pho" nho: phyid' dam: tho' je: thau: ra".

¹¹Nga" pho" wa naonhaung" re qo la: vhin: ra". Ngo wa je lhao" re: ai: qo jham re la: nhao nae". Yao: wa naonhaung" re taui: vose" yang be; ra". Ngo wa to' zaui te' to" ra" be, vose" yang naonhaung" re be, nae" ein: yao: bam re ta" wa,- ga: pha,jhi" byid' ako".

¹²Sam ba kyo thao re Yeroboam we' amyu" byu qe alhab' yao" yang ta" to" ru we' dakhyo: kho:kham Rehoboam jhao" dam: li" ako".

¹³Kho:kham pho" wa lau: de, mao: zo: qeyang pha,jhi" byid' rure pe" shui manho lo:- apyad ngai: ra" mo; yang pha,jhi" byid' to" ru we' dakhyo: amyu" byu qere thin thin za: dao: jhau: ra".

¹⁴Yao: wa- nga" pho" wa naonhaung" dao mae qola: vhin: lo: ra". Ngo wa je: lhao" re: aijham re la: nhao nae". Yao: wa naonhaung" re taui: vose" yang be; ra"- ngo wa naonhaung" re to' zaui te' to" ra" myao: be, vose" yang be, nae" ga: yao: bam re ta" ra".

¹⁵Aiwa Shilo mae" lapa Ahiya nho: nhad' khyo" Nebad nho: yauggai zo: Yeroboam re ASANG ta" to" ra" khyo re ASANG nho: myid o: ru boe" li" nhao nae" qhid' mae" boe" ru ngad: ra". Ceru wa amyu" byu qere kho:kham pho" yang matae" gyo: byid' ra" khyo ngad: ra".

¹⁶Amyu" byu qe wa yao: bam: dao: re kho:kham pho" manug: tae" gyo: byid' rure ba gelao"- yao: bam wa Davi we' yao" yham khaung gyoe; gyo" vashao: wo"- yao: bam ngonhaung" re pe" kad' byid' qu" ko" ra" i? Israel byu qe we"- yham phao: lo" gelang:- Rehoboam wa yao: yao" gaung re lha" yang: na vashao: ga: zag: hug' ako". Ailao" Israel byu qe wa geim lau to" mung:-

¹⁷Rehoboam re Yuda mug: myid mae na ko" ra" amyu" byu qenho: kho:kham khyo" za: kad' nhao: to: co' ako".

¹⁸Ai: thao kho:kham Rehoboam wa mau" zaui: byu qenho: au: jhaung ngad: ra" Adoniram re Israel byu qejhao" ye: nhao: ke' ra". Ngadqere: yao: bam wa laug baui: yang yao: re pye' se' pye' ako". Ailao" Rehoboam wa yao" gyekhe' myao: lhin" khug khyo phyad phyad do; zaung mung: Yerusalem khyo phao: loe; lo" byaug: ra".

¹⁹Ai: ayo, mae" mug: am: shad' mae" Israel mung" byu qe wa Davi kho:kham nho: kho:kham kaung qere gye kad' ako".

²⁰Yeroboam Egutu mung" mae" dam: tug' lo va" ra" khyo re Israel byu qe the' gyo: gelao"- amyu" byu qenho: zab phaung mae yao: re khai mung: yao: re Israel kho:kham kad' nhao: ako". Yuda mung" kaung dakaung za: Davi myid:zo: qere jhaug' zaug: ako".

²¹Rehoboam Yerusalem khyo joe" lo lao"- yao: wa Yuda we' Benyamin amyu" kaung mae" gai: thao" ra" gyezo: 180,000 re khai: zhang" yu: ra". Yao: wa gye kad' poe khyo ye: mung: mug: am: shad' mae" Israel amyu" kaung qere yao" yang dam: qo" eib nae" qhid' mae" yaung: to" ra".

²²Ngadqere: Mao"So wa lapa Shemia re-

²³Rehoboam we' Yuda we' Benyamin amyu" kaung mae" byu qere-

²⁴Naonhaung" mao:nhaung qe ngad ko" ra" Israel byu qere gye dazin: ge,- naonhaung" alhab' yham phao: lo" ge,. Boe" li" ra" khyo wa nga" myid o: ra" khyo ngad:- ga" ra" mungdao: re ta" kyo: nae" ta" ra". Yao: bam alhab' mo, wa ASANG: amyin" dao: jham re mho dao: gyo: mung:- yham khyo phao: lo" ako".

²⁵Israel kho:kham Yeroboam wa Ephrim bam mug: mae jo; ra" Shekhem vogaung: re gyetab vang mung: aimae dayo, zo: na: ra". Ai: thao yao: wa aimae" thug' lo" mung: Penue vogaung: mae gyetab vang kad' ra".

²⁶Yao: wa yao: yao" gaung re ana"- nga" mung" byu qe wa Yerusalem khyo ye: mung:- aimae jo; ra" Caung:pa" Yham mae ASANG re ngaui" xeim: ye ngaui" byid: geyang: ngad: re- yao: bam: jhaug' zaug phug' myao" ra" myid wa Yuda kho:kham Rehoboam shad' khyo de; lo" mung: ngore se' pye' li" genae"- ga: ta" ra".

²⁸Ceru: bin: myid lao"- yao: wa qhang nung: jaung lo: nau" lho shid' lam: kad' mung: yao" mung" byu qere- caung:pa" nae" qhid' mae" Yerusalem khyo naonhaung" ye: nae" saung" va" ra". Israel byu qe we"- naonhaung" re Egutu mung" mae" jhui" thug' lo: ra" naonhaung" so wa cemae ngad: ra"- ga: ta" ra".

²⁹Yao: wa qhang nung: jaung nau" lho dalam: re Bethela mae- gatau dalam: re Dan mae to" to" ra".

³⁰Aimung: amyu" byu qe wa Bethela we' Dan mae caung:pa" nae" ye: mung: qobo shad' lhoe" ako".

³¹Yeroboam wa bug gaung au: jham mae re: caung:pa" nae" jo, qo jham kad' ra". Amung: yao: wa Levi kaung mae" mangad' ra" mo; yham khaung jham mae" khinjaung qere khyin: yu: ra".

³²Yeroboam wa Yuda mung" mae kad' ra" poe ru:- lho" she' khye' ein: khye' daxe: ngo" ba ein: ba mae caung:pa" thung" poe kad' nae" qhid' mae" tarha" kad' to" ra". Bethela mae" phan dao mae yao: wa- yao: kad' to" ra" qhang nung: jaung nau" lo: jham re ngaui" xeim: ngaui" byid' ra". Amung: ai: Bethela mae yao: kad' to" ra" caung:pa" jo, qo jham mae caung da" byid' ra" khinjaung qere re nhao: to" ra".

³³Yao: yao: mhai" to" ra" ba na ngad: ra" lho" she' khye' khye' daxe: ngo" ba: ba: mae yao: wa Bethela khyo ye: mung:- Israel byu qe: qhid' mae" yao: seim" kad' to" ra" poe phan dao mae ngaui" xeim: ngaui" byid' ra".