Read Maru 1 KHO:KHAM 13 Bible Online

1 KHO:KHAM 13 - Maru bible

1 KHO:KHAM 13

¹Yeroboam wa ngaui" xeim: ngaui" byid: nae" qhid' mae" phan mae ye; jo; au:- ASANG: amyin" khyo" Yuda mung" mae" lapa dayaug wa Bethela khyo ye: mung: aikhyo joe" ye" lo" ra".

²ASANG: amyin" dao: re cao" mung: lapa pho" wa ai: phan re- o"- phan we"- phan we"- ASANG ceru: ta" ra". Yoshia ga: mhang" nae" ra" zoshao dayaug wa Davi nho: yham khaung mae" khau: li" li" nae". Yao: wa ni" dao mae ngaui" xeim: ngaui" byid' ra" yaug ngad: ra" khinjaung qere ni" dao mae se' bam" li" nae". Yao: wa ni" dao mae xao su byu: shoqug: jham re ngha" li" nae" ga: ta" phoe: ra".

³Lapa pho" wa xo' yang:- ce: phan wa adau dau gyang: gyug' lo" li" nae". Ai: dao mae" myiqe, jham wa sin" lo" li" genae". Ailao"- ASANG wa ngo khyo" yang dao: jhau: ra" khyo re nao ba: li" nae"- ga: ta" ra".

⁴Kho:kham Yeroboam ceru re the' gyo: lao"- aiyaug re lo, nyhug' ceim: mung: byu aiyaug re taung: ge,- ga: amyin" byid' ra". Ailao" jao" kho:kham pho" lo, wa shid: lo" byaug mung: maqo" dam: she: yu lo:ngad: ra".

⁵ASANG: mang mae lapa pho" lapa pa: to" ru we' dakhyo: phan wa nyag din taung" adau dau gyang: gyug' lo" mung: myiqe, jham wa myid gaung khyo sheim: gyo" lo" ako".

⁶Kho:kham Yeroboam wa lapa pho" re- jeju khyo" ni" Mao"So ASANG re nga" qhid' mae" akyu" mho' byid: la,- nga" lo, re gai byid: nae" yao: re mho' byid: la,- ga: ta" ra". Lapa pho" wa ASANG re akyu" mho' mung: kho:kham pho" lo, gai: lo" byaug: ra".

⁷Ailao" kho:kham wa lapa pho" re- ngo we' yham khyo cao" lo mung: zo:ve dajhid' zo: wa,- nao kad' ra" mau" qhid' mae" ngo nao re aphug' jhaung qhu" byid: nae"- ga: ta" ra".

⁸Lapa pho" wa- ni" jo,nho" agaung: daqi" nao ngore byid: sho' ngadqere: nao we' daga" macao nae" nao we' daga" pe" re: mazo:- pe" re: mashaug' nae".

⁹ASANG wa pe" re: mazo:- mashaug' nae" azhao li" ra" khyo khyo" yham khyo madam: tug' lo nae" ngore amyin" byid' to" ava"- ga: tau" ra".

¹⁰Aimung: yao: wa azhao li" ra" khyo khyo" madam: tug' lo" lo:- khyo gakhe' khyo" phao: lo" ra".

¹¹Ai: ayo, mae Bethela mae lapa mao: dayaug na: ra". Yao" yauggai zo: qe joe" lo mung: Yuda mung" mae" lapa pho" ai: ba na mae Bethela mae kad' ra" khyo we' kho:kham Yeroboam re pe" ta" ra" khyo yao: re ta" kyo" ra".

¹²Ailao"- lapa mao: wa yao: phao: lo" au: khyo khogau: khyo" lo" ra" i? ga: yao: bam re myid' ra". Yao: bam wa yao: re khyo ceim" shid' ako".

¹³Aimung: yao: wa yao: bam re yao" qhid' mae" loze do: nyhang" byid: nae" ta" ra". Yao: bam airu: nyhang" byid' ako".

¹⁴Yuda mung" mae" lapa pho" lo" ra" khyo khyo cao" zaung: ye: lo" ra". Shikhai: pan qao: mae zaung: jo; rure ye myao: ra". Ailao" yao: wa nao Yuda mung" mae" lapa pho" ngad: i? ga: myid' ra". Ai: yaug wa- ngo ngad: ga: tau" ra".

¹⁵Yao: wa- yham khyo lo mung: ngo we' daga" zo lozo: ri:- ga: ta" ra".

¹⁶Ngadqere: Yuda mung" mae" lapa pho" wa- ngo wa nao we' daga" maqo" cao" nae"- ni" bang" da" byid' rure re: ngo makhae: yu nae". Ngo wa cemae nao we' daga" pe" re" mazo:- mashaug' nae".

¹⁷Pe"mung:ga"re ASANG wa ngore pe" re: mazo:- mashaug' nae" we'- ngo li" ra" khyo khyo" madam: tug' lo" nae" qhid' mae" amyin" byid' to" ra"- ga: tau" ra".

¹⁸Ailao" Bethela mae" lapa mao: wa yao: re- ngore: nao we' dakhyo: lapa dayaug ngad:- ASANG: amyin" khyo" mug: lagyo: dayaug wa nao re ngo we' daga" yham khyo jhui" lo" mung: bang" da" byid: nae" ngore ta" ra"- ga: ta" ra". Ngadqere: lapa mao: wa mhug' na: ru ngad: ra".

¹⁹Aimung: Yuda mung" mae" lapa pho" wa lapa mao: we' daga" cao" lo" mung: yao: we' daga" zo lo" zo" ra".

²⁰Yao: shid' yaug saboe" mae zaung: jo,ko" au:- ASANG: mungdao: lapa mao: jhao" joe" li" mung:-

²¹Yuda mung" mae" lapa pho" re- nao wa yao" mho dao: re magyo:- yao: amyin" byid' to" rure nao makad' ngad: ra".

²²Ai: atha" nao dam: tug' lo mung: nao re zo dazo: ga: ta" to" ra" jo, qo mae nao zozo" ra". Ce: mathao mae nao se' pye' ru qhug' li" nae". Ni" mao gaung re wa naomho' yao" lab mae nyhab' pye' genae" mangad:- ga: hug' ta" ra".

²³Yao: shid' yaug zo: bin: zo: gethao lapa mao: wa Yuda mung" mae" lapa pho" qhid' mae" loze do: nyhang" byid: mung: zaung: phao: lo" ra".

²⁴Khyo le; mae khang khyi dadau" yang yao: re li" bin" se' pye' ra". Mao gaung wa khyodang mae lang" jo, mung: loze we' khang khyi wa ai: ayae mae ye; jo; ako".

²⁵Su" lai: lo" mo, daqhae: maogaung wa khyo mae lang" jo, mung: ayae mae khang khyi ye; jo; rure myao: ako". Yao: bam Bethela khyo phao: lo" mung: yao: bam myao: va" rure lau lo" ta" kyo" ako".

²⁶Lapa mao: wa ai: khyo re the' gyo: lao"- ce wa ASANG: amyin" dao: re mho dao: magyo" ra" lapa ngad: ra" wo"- aimung: ASANG: yang yao: airu: qhug' nae" ta" to" ru we' dakhyo: ASANG wa khang khyi re nhao: ke' mung: yao: re bin" se' pye' nhao: ra"- ga: ta" ra".

²⁷Ailao" yao" yauggai zo: qere nga" qhid' mae" loze do: nyhang" byid: gela,- ga: ta" ra". Yao: bam airu nyhang" byid' ako".

²⁸Yao: zaung: thug' lo" mung: lapa pho" nho: maogaung wa khyo mae lang" jo, mung: loze we' khang khyi wa ayae mae ye; jo, shiko" rure ye myao: ra". Khang khyi wa mao gaung re mazo: ngad: ra". Loze rere: mabin: ngad: ra".

²⁹Lapa mao: wa mao gaung re gaug: yu mung: loze dao mae vo; kai: yang: Bethela khyo kaug' ngug yang: nyhab' pye' nae" dao: lo: ra".

³⁰Yao: re yao mho' yao" lab mae nyhab' pye' mung: yao: we' yao" yauggai zo: qe kaug' ngug zo" re"- nga" mao:nhaung: pho" we"- nga" mao:nhaung: pho" we"- ga: ta" ako".

³¹Bin: nyhab' pye' thao lapa pho" wa yao" yauggai zo: qere- ngo shid lao" ce: lap mae nga" maogaung re yao" nhae mae to: mung: nyhab' gela,-

³²ASANG: amyin" we' Bethela mae jo; ra" phan re gye kad' dao: ta" mung: Samari mung" mae" vogaung: jham mae jo; ra" caung:pa" jo, qo alhab' re yao: gye kad' dao: ta" ra" khyo wa dang za: boe" lo: li" nae"- ga: ta" ra".

³³Israel kho:kham Yeroboam wa yao" makhyang" ra" lo,mau" mae" maphaug' lo shi ngad: ra". Yao: kad' to" ra" phan mae caung da" nae" yu" yu" yham khaung qe mae" xo' yang: khinjaung qere khyin: yu: ra". Yao: wa o: ra" yaug khag' rere: khinjaung khyo" lo, kai: yang: san: yu: ra".

³⁴Ce: qobo wa yao: re byo; qeim: lo" nhao mung: yao" kho:kham yham khaung re phyo' qheim" pye' ra".