Read Maru 1 KHO:KHAM 16 Bible Online

1 KHO:KHAM 16 - Maru bible

1 KHO:KHAM 16

¹ASANG wa Hanani nho: yauggai zo: lapa Yehu re dao: jhau mung: Basha nho: qhid' mae" ce: mungdao: yao: re byid' ra".

²Aiwa- nao wa pe" mangad: yaug ngad: lo qere: ngo wa nao re nga" Israel byumyu" nho: au: jhaung kad' nhao va". Ana" nao wa Yeroboam re" ru: qobo shad' lhoe" mung: nga" byumyu" re qobo shad' nhao: ava". Yao: bam: qobo jham wa ngore nhag' jam: yo: nhao: ra".

³Aimung: ngo wa Yeroboam nho: yham khaung re kad' ru we' dakhyo: nao we' ni" yham khaung byu qere yu: pye' nae".

⁴Ni" yham khaung byu qemae" vogaung: mae shid: ra" yaug wa lakha" yang zo" pye' li" nae". Pa: din" mae shid: ra" yaug wa lang da: yang zo" pye' li" nae" ga" ru ngad: ra".

⁵Basha kad' ra" lo,mau" gatau we' yao" mazag mavae lo, mau" jham wa Israel kho:kham qenho: mhomyi: paug' mae tung" xam" to" ako".

⁶Basha wa shid: lo" mung: Tiza mae nyhab' pye' ako". Yao" yauggai zo: Ela wa yao" khu mae kho:kham xo' kad' ra".

⁷Yao: wa yao" qhid' mae" kho:kham Yeroboam we' dakhyo: yao: kad' ra" makhyang" ra" lo,mau" mathao mae za: mangad:- Yeroboam nho: yham khaung byu alhab' re se' pye' ra" mathao mae re: ASANG: re nhag' jam: yo: nhao: ra".

⁸Yuda kho:kham Asa eib: ru shid' xe: khyaug' zin mae Basha nho: yauggai zo: Ela wa Israel kho:kham boe" lo: ra". Yao: wa Tiza mae shid' zin eib: ra".

⁹Kho:kham nho: gyekhe' myao: lhin" jham nho: agaung: daqi" re au: jhaung kad' ra" yao" gyezug: pho" Zimri wa yao: re gye kad' ra". Daba mae Ela wa Tiza vogaung: mae" kho:kham kho" mae au: jhaung kad' ra" Arza nho: yham mae yhid yid: na: ra".

¹⁰Zimri wa yham khug khyo vao ye: mung: Ela re khug' se' pye' ra". Amung: yao" khu mae kho:kham xo' kad' ra". Ceru wa Yuda kho:kham Asa eib: ra" shid' xe: nhad' zin mae boe" ru ngad: ra".

¹¹Zimri wa kho:kham boe" we' Basha nho: yham khaung byu alhab' re se' pye' ra". Yauggai amyu" ba nam we' ba nam yaug khao: ngo" re se' pye' ra".

¹²Lapa Yehu nhad' khyo" yang ASANG Basha re qobo ta" to" rure cao" yang: Zimri wa Basha nho: yham khaung byu alhab' re se' pye' ra".

¹³Yao: bam: so alho re caung:pa" ra" mau" mathao mae re:- Israel byu qere yao: bam qobo shad' nhao: ra" mau" mathao mae re: Basha we' yao" yauggai zo: Ela wa Israel Mao"So ASANG re nhag' jam: yo: nhao: ako".

¹⁴Ela kad' ra" gatau lo, mau" ja: khao: ngo" re Israel kho:kham qe: mhomyi: paug' mae tung" xam" to" ako".

¹⁵Yuda kho:kham Asa eib: ru shid' xe: nhad' zin ein: zin mae Zimri wa Tiza mae Israel mung" re nhad' ba eib: ra". Israel gyephung: wa Philisti mung" mae" Gibethon vogaung: re vang" to" ako".

¹⁶Yao: wa kho:kham pho" re Zimri gye kad' tau: lhan: mung: khug' se' pye' ra" khyo re the' gyo: gelao"- aimae yao: bam alhab' mo, wa yao: bam: gye zug: pho" Omri re Israel kho:kham ga: ta" pyo: ako".

¹⁷Omri we' yao" gyephung: wa Gibethon mae" thug' mung: Tiza re lo" vang" to" ako".

¹⁸Zimri wa vogaung: gyo" lo" byaug rure myao lao"- yao: wa kho:kham kho" akhug shad' gyetab khyo vao ye: mung: kho:kham kho" re ngha" ke' yang: myishae mae nga" shid: lo" ra".

¹⁹Ceru wa ASANG re gye kad' ra" yao" qobo mathao mae boe" ru ngad: ra". Yao" qhid' mae" Yeroboam re" ru: yao: yao" qobo jham: yang we' Israel byu qere qobo shad' lhoe" nhao: ra" khyo" yang yao: wa ASANG re mangaui nhao: ra" lo, mau" kad' ra".

²⁰Zimri kad' ra" gatau lo, mau" ja: khao: ngo" yao" gye khug' kad' ra" khyo bobo mung: Israel kho:kham qe: mhomyi: paug' mae tung" xam" to" ako".

²¹Israel byu qe wa jho" kho' lo" byaug: ako". Yao: bam mae" daqhae: wa Ginat nho: yauggai zo: Tibni re kho:kham kad' nhao nug mung: gatau daqhae: wa Omri re ngaui: ako".

²²Lo" thao" mae Omri re ngaui: ra" mo, aung: yu: pye' ako". Tibni wa shid: lo" mung: Omri wa kho:kham boe" lo: ra".

²³Aimung: Yuda kho:kham Asa eib: ru sam xe: dazin ein: zin mae Omri wa Israel kho:kham boe" lo mung: yao: wa daxe: shid' zin mung"dan: re eib: ra". Yao: wa sao qhid' khyaug' zin gu: mae Tiza mae eib: ra".

²⁴Ai: thao yao: wa Sheme ga: mang: ra" yaug mae" ngaui khyaug' yo kye' yang Samari bug gaung re vai: yu: ra". Omri wa bug gaung re gyetab kad' mung: aimae vogaung: te" ra". Amung: aire azhao ai: bug gaung re sang: ra" yaug Sheme mang re cao" yang: Samari ga: mhang" ra".

²⁵Omri wa yao" qhid' au: mae" mo, alhab' tho' mae je yang: ASANG re qobo shad' lhoe" ra".

²⁶Yao" qhid' au: mae" yaug ngad: ra" Yeroboam re" ru: yao" qobo jham: yang re:- Israel byu qere qobo shad' lhoe" nhao: ru we' so alho jham re caung:pa" nhao: ra" qobo mathao: yang yao: wa Israel nho: Mao"So ASANG re nhag' jam: yo: nhao: ra".

²⁷Omri kad' ra" lo, mau" gatau ja: khao ngo" we'- yao" zaui" pin" ra" mau" alhab' khyo re Israel kho:kham qe: mhomyi: paug' mae tung" to" ako".

²⁸Omri wa shid: lo" byaug mung: Samari vogaung: mae nyhab' pye' ako". Yao" yauggai zo: Ahab wa yao" khu mae kho:kham xo' kad' ra".

²⁹Yuda kho:kham Asa eib: ru sam xe: she' zin mae Omri nho: yauggai zo: Ahab wa Israel kho:kham boe" lo: ra". Yao: wa Samari mae shid' xe: shid' zin eib: na: ra".

³⁰Yao: wa yao" qhid' au: mae" mo, alhab' tho' mae je yang: ASANG re qobo shad' lhoe" ra".

³¹Yao: wa Yeroboam re" ru: qobo kad' rure za: ga" thoe magyo: ngad: ra". Yao: wa je sho'- Sidon kho:kham Ethba nho: myiqe: zo: Yezebe re lo,xo' yu mung: Bala re caung:pa" ra".

³²Yao: wa Samari mae Bala qhid' mae" caung:pa" yham kad' mung: yao" qhid' mae" phan dalam: kad' yang: caung:pa" yham mae ke' to" ra".

³³Yao: wa Ashe so myhi" khyao dau alho rere: ke' to" ra". Yao: wa yao" qhid' au: mae" Israel kho:kham qe alhab' tho' je yang: ASANG re nhag' jam: yo: nhao: ra".

³⁴Yao: eib: ra" yo, gyo: mae Bethela mae" Hiela wa Yerikho re dam: zao: ra". Nun nho: yauggai zo: Yoshu nhad' khyo" yang ASANG ta" to" ru we' dakhyo: Hiela wa Yerikho apan aqao: re zao: ra" au: yao" zoqhid' yauggai zo: Abiram shid: lo" ra". Amung: kham: dung: re kad' au: yao" zothao" yauggai zo: Segu shid: lo" ra".