Read Maru 1 KHO:KHAM 18 Bible Online

1 KHO:KHAM 18 - Maru bible

1 KHO:KHAM 18

¹Ai: thao- mug: maqu: ru sam zin ein zin mae ASANG wa Elia re- kho:kham Ahab jhao" naoyao" gaung re lo" qhu" wa,- ngo mug: qu nhao nae"- ga: ta" ra".

²Ailao" Elia thug' lo" ra" bao" khug' wa Samari mae gyai xo: ra".

³Aimung: Ahab wa kho:kham kho" mae" au: jhaung ngad: ra" Obadia re khai: yu: ra". (Obadia wa ASANG re kao bau caung:pa" ra" byu dayaug ngad: ra".

⁴ASANG: lapa qere Yezebe se' ra" au: Obadia wa lapa qe dayo re jhui" yu mung: yao: bam re ngo" xe xe shid' phung: kad' yang: laug aug' mae nyham" to" ra". Yao: bam re zo:ve we' shaug' qid byid' ra".)

⁵Ahab wa Obadia re mung"dan: mae jo; ra" qid thug'- qid gyaung: khao: ngo" khyo- myao: jham we' loze jham: re mashid losho' zho: nae" mhin: yeqho nae" ye: lang: ngonhaung" nho: gug'nyhug' jham re mase' ca" maba- ga: ta" ra".

⁶Yao: shid' yaug wa mung"dan: mae" khoyaug khotam" khyo yeqho nae" rure jho" vang" mung:- dayaug dashad' khyo to" lo" ako".

⁷Obadia wa yao" khyo mae ye" lo" na: au: yao: wa nyag din taung" Elia we' jho" qhug' ako". Yao: wa Elia re qu" xam: mung: yao" qhid' kheim: mae goe; gyo" mung:- nao Elia yao: ngad va" i? ga: myid' ra".

⁸Elia wa ngad:- ngo wa Elia yao: ngad va". Ngo cemae na: rure ni" ASANG kho:kham re lo" ta" kyo: wa,- ga: tau" ra".

⁹Obadia wa- Ahab yang se' pye' nae" gyaug ci" ca" ru khyo nao ngore nhao: ke' nug sho' ngad: ra" lo, mau" ngo pe" shad' va" i?

¹⁰Daui: na: ra" ni" Mao"So ASANG: mang khyo" yang ngo jham tang: yang: ta" ra". Kho:kham pho" wa mug: myid geim" mae" mung"dan: khao: ngo" khyo nao re qho nae" kad' to: va" khyo re ta" ra". Yao" mung"dan: mae nao mana: ra" khyo re mung"dan: dalam" nho: zug: pho" lau shid' khao: ngo" Ahab wa nao re mamyao: ra" khyo re ai: zug: re jham lhaung" tang: nhao: ra".

¹¹Ana"- nao cemae na: rure yao: re lo" ta" nae" ngore nhao: ke' nug: i? Ngo to" lo" we' ASANG: byo: yang maba: ra" jo, qo dakhyo khyo jhui" lo" byaug: ngad: re- pe" ru: kad' nae" i?

¹²Ailao" ngo wa nao cemae na: rure Ahab re lo" ta" kyo: mung: nao re yao: mali" myao lao"- yao: wa ngore se' pye' li" nae". Ngo wa zolau: yo, mae" ASANG re kao bau caung:pa" lo yaug ngad: rure myid: beim: byid: la,.

¹³ASANG: lapa qere Yezebe se' ra" au: dayo zo: re ngo" xe xe mung: shid' phung: khyo" yang: yao: bam re laug aug' mae ngo ye nyham" to: mung: zo:ve we' qid yao: bam re byid' ra" khyo re nao magyo: i?

¹⁴Aire nao cemae na: ra" khyo kho:kham pho" re lo" ta" kyo: nae" nao khoru: ngore amyin" qo" khyo" i? Yao: wa ngore se' li" nae"- ga: tau" ra".

¹⁵Elia wa ngo caung da" byid' ra" daui: na: ra" ASANG: mang khyo" ana" ba kho:kham pho" re ngoyao" gaung qhu" nae" ngad: rure ngo dao:so: to" ra"- ga: tau" ra".

¹⁶Aimung: Obadia wa kho:kham Ahab jhao" lo" ta" kyo: mung:- Ahab wa Elia re qhug' nae" qhid' mae" to" lo" ra".

¹⁷Ahab yao: re myao lao"- Israel mung" mae xo: thao" sho' qug: khai: byid: yaug nao cetau mae na nhaung i? ga: ta" ra".

¹⁸Elia wa qug: khai: byid: yaug wa ngo mangad:- nao yaug lam: ngad: ra". Nao we' ni" pho" ngad: ako". Ni" shid' pha: wa ASANG: amyin" dao: jham re maphug' cao" lo: Bala so alho jham re caung:pa" ako".

¹⁹Khame bam mae ngore li" qhug' genae" qhid' mae" Israel byu alhab' re ana" yao: amyin" khyo" wa,- kho:kham myhi" Yezebe yang bao" thaug' byid' ra" Bala lapa 450 yaug we' Ashe so myhi" nho: lapa 400 yaug re bo jhui" li" geri:- ga: ta" ra".

²⁰Ailao" Ahab wa Israel byu alhab' we' Bala lapa qere Khame bam mae jho" qhug' nae" khai: zhang" yu: ra".

²¹Elia wa amyu" byu qejhao" do; ye: mung: naonhaung" myid: phyid' yu nae" ayo, khomyhao" myao" sho' yu genae" i? Mao"So wa ASANG: ngad: re wa- yao: re caung:pa" byid: ge,. Ngadqere: Bala wa Mao"So ngad lao" re: yao: re caung:pa" byid: ge,- ga: ta" ra". Amyu" byu qe kam" wa dakheim: re majhau ko" ngad: ra".

²²Ailao" Elia wa ngo wa ASANG: yang nha: tang" to" ra" dayaug za" lapa ngad:- ngadqere: Bala lapa qe wa 450 na: ako".

²³Nung: jaung lo: shid' dau: she: lo geri:- Bala lapa qere dadau: yu nhao mung: aire se' nhao ge,- adau dau je, mung:- thao: bam dao mae vo; kai: ge,- ngadqere: myi: date' ge,- Nung: jaung gatau dadau: re airu: yao: ngo kad' nae".

²⁴Ai: thao Bala lapa qe wa yao: bam: so re akyu" mho' vageshao:- ngo wa ASANG re akyu" mho' nae". Myi" yang tau" ra" yaug yao: wa Mao"So ngad: ra"- ga: ta" ra". Amyu" byu qe wa yao: bam: myid vang" ra" khyo zag hug' ako".

²⁵Elia wa Bala lapa qere naonhaung" gyai laug geyang: nung: jaung lo: re yu mung: aire sao qhid' nyhang" ge,. Naonhaung" so re akyu" mho' ge,- thao: bam re myid: date' ge,- ga: ta" ra".

²⁶Yao: bam wa yao: bam: qhid' mae" she: to" ra" nung: jaung lo: re she: yu mung: aire nyhang" jaung: ako". Amung: ba khaung tau sho' Bala re akyu" mho' ako". Yao: bam wa Bala we"- ngonhaung" re tau: byid: la,- ga: hug' mung: yao: bam kad' to" ra" phan re go" lhang qin" ako". Ngadqere: dao: phyid wa majoe" li" ngad: ra".

²⁷Ba khaung tau yo, mae Elia wa yao: bam re jung" qi: ra". Je: hug' yang: mho' ge,- yao: wa so ngad: ra". Yao: wa myid: mo; na: laug- ngha ye" na: laug- gyaung: qe su" na laug to" qe yab myhid' jo, maba- naonhaung" qe ye nhug' ca" ko" maba lhe"- ga: qi: jung" ra".

²⁸Airumung: lapa qe wa thoe je: qi sho' akyu" hug' mho' mung: yao: bam: caung:pa" thung" re cao: yang: sa: thug' sho' shae we' shae tho" yang yao: bam yao" gaung re lhai" cad' ako".

²⁹Yao: bam wa myi" thao ba gae: sho' kyi: wa gu wa ga: zag: hug' ako". Ngadqere: pe" dao: phyid re: majoe" li"- pe" ga: thoe re: magyo: ngad: ra".

³⁰Ailao" Elia wa Israel byu qere- ngojhao" te' lo geri:- ga: ta" ra". Yao: bam alhab' mo, yao" lhang" gam: mae zang" ham: lo: ako". Yao: wa byo; gyo" byaug: ra" ASANG: phan re nyhang" to" ra".

³¹Yao: wa laug baui daxe: shid' baui re yu mung: ASANG: yang Israel ga: mang mhang" byid: qhug' ra" yaug Yaku nho: yauggai zo: daxe: shid' kaung: mang re cao" yang: amyu" kaung dalam" qhid' mae" dabaui baui kad' ra".

³²Yao: wa ce: laug baui jham: yang ASANG re caung:pa" ra" phan dalam: kad' ra". Yao: wa aire gam: sho' qid khyo: dau" ra". Qid byid ga:lan: vao sho' qi" ru dau: ra".

³³Ai: thao yao: wa phan dao mae thao: ke' ra". Nung: jaung lo: re adau dau je, mung: thao: bam dao mae kai" ke' ra". Yao: wa yae: byid yae: mae qid byang" sho' ke' mung:- aire ngaui" xeim: we' thao: bam re vhe' sheim: ge,- ga: ta" ra". Yao: bam airu kad' ako".

³⁴Yao: wa airu: dam: sheim: shige,- ga: ta" mung: yao: bam sheim" ako". Yao: wa dalhang dam: sheim: shige,- ga: dam: ta" lao"- yao: bam dam: sheim" ako".

³⁵Qid wa phan lhang" gam: mae" qid khyo: khyo yug: gyo" lo" mung: qid: khyo: byang" sho' ngad: ra".

³⁶Myi" thao ngaui" xeim: ngaui" byid: ayo, mae Elia wa phan khyo qui" ye: mung: o"- Abraham- Isag- Yaku qenho: Mao"So ASANG we"- nao wa Israel nho: Mao"So ngad mung: ngo wa ni" daui daui yaug ngad: ru we' ni" amyin" khyo" cegu: alhab' re ngo kad' lo: rure ana"- sagse: qhu" byid: wa,-

³⁷Nao wa ASANG Mao"So ngad: mung: nao wa yao: bam re nao yao: jhao" dam: jhui" tug' yu yaug ngad: rure ce: amyu" byu qe ba genae" qhid' mae" ngore dao: phyid byid: la,- ASANG we"- ngore dao: phyid' byid: la,- ga: akyu" mho' ra".

³⁸ASANG wa myi: nhao: khyo" ke' mung: ngaui" xeim: thao: bam- laug baui jham- myid gaung re mhai: kyaug' pye' mung: qid khyo: mae bo: ra" qid jham wa kin" ho: lo" byaug: ra".

³⁹Amyu" byu qe ceru re myao gelao"- yao: bam yao" gaung re myid gaung khyo gyang be; lo" gemung: ASANG wa Mao"So ngad: ra"- ASANG dayaug za: Mao"So ngad: ra" wo"- ga: ta" ako".

⁴⁰Elia wa Bala lapa qere taung: ge,- yao: bam re dayaug rere: dalhoe' ke' ge,- ga: amyin" byid' ra". Amyu" byu qe wa ai bam alhab' re taung: mung: Elia wa ai bam re Kishon gyaung: khyo jhui" gyo" ye: mung: yao: bam re se' pye' ra".

⁴¹Ai: thao Elia wa kho:kham Ahab re ana"- zo:ve lo" zo: se,- mug: myang thoe jhao" li" na: rure ngo the' gyo"- ga: ta" ra".

⁴²Ahab zozo: nae" lo" na: au:- Elia wa Khame bam au: khyo do, lo" mung: aimae yao" pad' laug gyo: mae yao" au: to: mung: myid gaung khyo goe; gyo" ra".

⁴³Yao: wa yao" daui daui yaug re panglai: shad' khyo yequ" ke' wa,- ga: ta" ra". Daui daui yaug wa ye: yang: dam: tug' lo mung: ngo pe" rere: mamyao ga: lota" ra". Elia wa nhad' lhang yequ" nae" ta" ra".

⁴⁴Nhad' lhang ein: lhang re yao: tug' lo mung: lo, tho' maje: qi" ra" jham thaui: anau" zo: panglai: mae" do, li" rure ngo the' myao:- ga: ta" ra". Elia wa yao" daui daui yaug re kho:kham Ahab jhao" lo" mung: yao" gyekhe' myao: lhin" khug khyo vao: zaung yang: yao: re mug: qu: yang matam" pye' shire yham khyo phao: lo" nae" yeta" wa,- ga: nhao: ke' ra".

⁴⁵Dazab za" mae mug:gaung wa nhag' qhid' no; yang nghoe' pye' mung: la hug' li" ra". Mug: qi: sho' qu: li" ra". Ahab wa yao" gyekhe' myao: lhin" khug khyo do; zaung mung: Yezre khyo tug' phao: lo" ra".

⁴⁶ASANG: qam: so' wa Elia dao mae joe" li" mung: yao" mai bau: re yao" phyid' dam: mae tang sho' kad' mung: Ahab nho: qhid' au: mae Yezre joe" sho' khyo thao" qang" tao" ra".