Read Maru 1 KHO:KHAM 20 Bible Online

1 KHO:KHAM 20 - Maru bible

1 KHO:KHAM 20

¹Suri kho:kham Benhadad wa yao" gyephung: alhab' re khai: zhang" yu: ra". Zug: sam xe: shid' yaug wa yao: bam: myao: jham gyekhe' myao: lhin" jham we' daga" yao: re bao" thaug' byid' ako". Yao: wa Samari re ye vang: mung: gye yezin: nae" qhid' mae" to" ye" lo" ra".

²Yao: wa vogaung: khyo Israel kho:kham Ahab re lagyo: nhao: ke' mung:- ni" ngaui- qhang- ni" myiqe: qe- qam: bo: thao" ra" ni" zo: dau qere yao: re ab byid: nae" qhid' mae" kho:kham Benhadad mho' ra" khyo ta" nhao: ke' ra".

⁴Ahab wa nga" ASANG kho:kham Benhadad re ngo myid' vang" ra"- yao: wa ngore we' ngo sang: gu: ja: khao: ngo" re qo" yu: ra"- ga: tau" ke' ra".

⁵Thao re lagyo: jham wa Benhadad mho' ra" mho' dao: gatau we' daga" dam: tug' joe" li" yang:- ngo wa nao re ni" ngaui- qhang- ni" myiqe: qe- ni" zo: dau qe ngore ab byid: nae" dao: pyang: ke' ru ngad:-

⁶Ngadqere: ana"- ngo wa ni" kho:kham kho" ni" zug: qenho: yham jham re paui: qho mung: yao: bam phug' de; ga: jho: ra" ja: alhab' re yu pye' nae" qhid' mae" nga" zug: qere nhao: ke' nae". Ne, mo" ba ce: ayo, mae yao: bam aikhyo joe" na: li" genae"- ga: lota" ako".

⁷Kho:kham Ahab wa mung"dan: nho: au: jhaung alhab' re khai: yu mung:- byu ce yaug wa ngonhaung" re phyo' qheim" pye' nug: na: ra" khyo re naonhaung" ba: ako". Yao: wa ngojhao" lagyo: qere nga" yham sang myhi" qe zo: dau qe- nga" ngaui we' qhang re mho' nhao: ke' mung:- aire ngo myid vang" byid: va"- ga: ta" ra".

⁸Au: jhaung qe we' amyu" byu qe wa- yao" dao: re datae" gyo: wa,- lo, datau wa,- ga: tau" ako".

⁹Aimung: Ahab wa Benhadad nho: lagyo: qere yao: sao qhid' mho' ra" ja: re ngo myid vang" byid: ngadqere: shid' ja: ein: ja: re wa ngo myid maqo" vang" ein: ra" khyo ASANG kho:kham re lo" ta" kyo: ge,- ga: ta" ra". Lagyo: qe wa to" phao: lo" mung:- Benhadad mae" mungdao: gatau vin yang: dam: tug' joe" li" ako".

¹⁰Aimung dao: wa- ce: ni" vogaung: re phyo' pye' nae" byu laug sho' jhui" li" mung: zhogam: phaui: jham re yao: bam: lo, mae cilo" li" genae". Ngo airu: makad' re wa nga" so jham: yang ngore se' pye' vageshao:- ga" ru ngad: ra".

¹¹Kho:kham Ahab wa gyezo: agyang" wa gyekhe' poe bin thao re phug: ra"- qhid' re maphug ngad: ra"- ein: ra" khyo kho:kham Benhadad re lo" ta" kyo: ge,- ga: tau" ra".

¹²Benhadad wa Ahab nho: dao: re yao: we' yao: yao" myid vang" ba nam phung: qe- zug: gaje qe wa yao: bam: zaung jham mae yhid shaug' na: au: gyo" yu: ra". Yao: wa vogaung: re ye khe' zin: nae" seim" nyhang" genae" qhid' mae" amyin" byid' ra". Aimung: yao: bam jo, qo yu: ako".

¹³Ai: au: re- lapa dayaug wa kho:kham Ahab re ASANG wa- ai gyetab mo" re dagyaug wa,- ana" ba ngo wa aung doe; ru nao re byid: nae". Ngo ASANG ngad: rure nao ba: li" nae"- ga: ta" ra"- ga: ta" ra".

¹⁴Ahab wa khoyaug au: she yang: khe' zin: nae" i? ga: myid' ra". Lapa pho" wa- mung"dan: zug: qenho: qao: mae" gyezo: zolau: qe aire au: she nae" ngad: ako"- ga: ASANG ta" ra" ga: tau" ra". Kho:kham wa gyetab ajhaung re khag' amyin" byid: nae" i? ga: myid' ra". Lapa pho" wa nao ngad: ga: tau" ra".

¹⁵Aimung: kho:kham pho" wa mung"dan zug: qe: qao: mae" gyezo: zolau: qere khai: yu: ra". Alhab' 232 yaug ngad: ra". Ai: thao yao: wa Israel gyetab re khai: yu mung: alhab' nhad' taung yaug ngad: ra".

¹⁶Benhadad we' yao" ba nam phung: sam xe: shid' yaug yao: bam: zaung jham mae yhid yid: na: au: ba khaung tau: au: gyekhe' qhid: ako".

¹⁷Gyezo: zolau: qe sao qhid' mae ngad: ako". Benhadad yang jin" byu kad' nhao: to" ra" mo, wa Samari vogaung: mae" gyezo: daphung: thug' li" na ko" ra" khyo yao: re lau dao: lota" kyo" ako".

¹⁸Yao: wa yao: bam ngonhaung" re gyekhe' nae" ngad: re ngad- mang dae: ru mho' nae" ngad: re ngad thug' li" ra" gu: re adaui taung: ge,- ga: amyin" byid' ra".

¹⁹Gyezo: zolau: qe wa gye jhui" khe' mung: Israel gyetab wa thao mae cao" ako".

²⁰Yaug khao: ngo" wa yao: we' jho" zin" ra" yaug re se' ako". Suri byu qe wa tao" phao mung: Israel gyetab wa cao" phin" khe' ako". Ngadqere: Benhadad wa myao: jui: mo, daqhae: we' myao: dao mae phao: loe; lo" ra".

²¹Kho:kham Ahab wa aung: pye' mung: myao: jham- gyekhe' myao: lhin" jham re sham" yu yang: Suri byu qere mhan" ke' pye' ako".

²²Ai: thao lapa pho" wa kho:kham Ahab jhao" ye: mung: tug' lo" yang: ni" gyetab re qam: lo" pyang" wa,- nyang" za: yaung: to: wa,- pe"mung:ga"re Suri kho:kham wa thao: zin xaung: gaung mae gye dam: li" khe' li" nae"- ga: ta" ra".

²³Kho:kham Benhadad nho: zug: qe wa yao: re- Israel byu qenho: so jham wa bam so jham ngad: ako". Airumung: Israel byu qe ngonhaung" re khe' aung: pye' ru ngad: ako". Ngadqere: ngonhaung" yao: bam re pa: din" mae khe' zin: yang: ngad: re wa yao: bam re ngonhaung" dang za: aung: pye' li" nae" ga: ta" ako".

²⁴Ana" ai: ba nam phung: zug: sam xe: shid' yaug re yu: pye' mung: ai khu mae gye zug: mo" qere tha" ke' wa,.

²⁵Amung: nao re phao: xug' to: co' ko" ra" gyezo: qenho" we' daga" myao: jham- gyekhe' myao: lhin" jham re khai: zhang" yu wa,- ngonhaung" wa Israel byu qere pa: din" mae khe' zin: nae"- ce lhang wa yao: bam re ngonhaung" aung: pye' li" nae" ga: ta" ako". Kho:kham Benhadad wa aire myid vang" mung: yao: bam: pha,jhi" byid: dao: re cao" byid' ra".

²⁶Thao: zin xaung: gaung mae yao: wa yao" byu qere khai: yu mung: Israel byu qere gye yekhe' zin: nae" qhid' mae" Apheg vogaung: khyo yao: bam ye" lo" ako".

²⁷Israel byu qere re: khai: zhang" yu mung: gyekhin nyhang" byid' ako". Yao: bam to" thug' lo" mung: Suri byu qere myo, khung: qang mung: shid' phung: khyo" yang: jamu yekad' na: ako". Israel byu qe wa bam khyid byang" sho' mae na: ko" ra" Suri byu qe we' tai" re cad' be, kyaung" nau" shid' kyaung" ru" ru ngad: ako".

²⁸Lapa pho" wa kho:kham Ahab jhao" ye: mung: ASANG wa ceru: ta" ra". Suri byu qe wa ngo wa bam jham: so ngad:- pa: din" so mangad: ga: ta" geyang ngo wa yao: bam: gyetab mo" dao mae naonhaung" re aung doe; ru byid: nae". Ailao" ni" mung" byu qe wa ngo ASANG ngad: rure ba: li" genae"- ga: ta" ra".

²⁹Nhad' ba lam: lam: Suri byu qe we' Israel byu qe wa yao: bam yao" jamu jham mae yao: cao: myo, khung: jho" qang yang: na: jo; ako". Nhad' ba ein: ba mae yao: bam gye jho" khe' qhid: ako". Israel byu qe wa Suri byu datig re se' pye' ako".

³⁰Na dang: ra" mo, wa Apheg vogaung: khug khyo phao: lo" ako". Amae vogaung: vang: yang shid' tug: nhad' taung: re gyang: nhai" se' pye' ra". Benhadad re: vogaung: khug khyo phao: loe; lo" mung: yham dayham: nhaung thao" qe, mae lo" khug: na: ra".

³¹Yao" gyezug: qe wa yao: jhao" ye: mung:- Israel kho:kham qe wa nhag' ba: khyag' mo, ngad ko" ga" rure ngonhaung" the' gyo" to"- ngonhaung" nho: phyid' dam: mae jid: mo" mai bau: yang" ci- Ngonhaung" lang zang: mae taui jham yag: ci mung: Israel kho:kham jhao" ye: nae" ngonhaung" re akhang" byid: la,- ni" kao so' re yao: qe tang" to" li" nae" maba- ga: ta" ako".

³²Aimung: yao: bam wa yao: bam: phyid' dam: mae jid: mo" mai bau: yang" yao: bam lang zang: mae taui: yag: ci mung: Ahab jhao" ye: yang:- ni" daui daui yaug Benhadad wa yao" kao so' re lhoe' byid: nae" mho' ke' ra"- ga: ta" ako". Ahab wa yao: daui: na: ashi i? Gai: ra"- yao: wa nga" mao:nhaung: ru"ru ngad: ra"- ga: tau" ra".

³³Benhadad nho: gyezug: qe wa ave, gai re lhaug' qu" na: ako". Nga" nhaung: we"- ga: Ahab ta" lao"- yao: bam wa yao: re ai jao" ye jhui" yu: ako". Amung: nao ta" ru we' dakhyo:- Benhadad wa ni" nhaung: ngad: ra" wo"- ga: ta" ako". Ahab wa yao: re ngojhao" jhui" lo geri:- ga: amyin" byid' ra". Benhadad joe" lo lao"- Ahab wa yao: we' gyekhe' myao: lhin" mae daga" khai: zhaung: yu: ra".

³⁴Benhadad wa yao: re- ni" pho" lo, mae" nga" pho" yang yu: to" ra" vogaung: jham nao re dam: byid: nae". Samari mae nga" pho" kad' ru we' dakhyo:- Damasku mae nao yao" qhid' mae" phaga: jo, qo ajhaung gai: kad' ra"- ga: ta" ra". Ahab wa ailao" wa- ce: dao: kheim: jham mathao mae nao re ngo lhoe' ke' nae"- ga: phaug' tau" ra". Yao: wa Benhadad we' myid vang" thao: ce' to: mung: yao: re lhoe' ke' ra".

³⁵Lapa phung: mae bobo: ra" lapa dayaug wa ASANG: amyin" re cao" yang: yao: re thaung: nae" qhid' mae" yao" lapa cao: dayaug re amyin" byid' ra". Ngadqere: yao: wa ha: pye' ra".

³⁶Aimung: lapa wa yao: re- nao ASANG: amyin" dao: re maphug' cao" ruyang nao to" lo" we' khang khyi: yang nao re bin" se' pye' li" nae"- ga: ta" ra". Yao: to" lo" we' khang khyi dadau: cao" lo mung: yao: re bin" se' pye' ra".

³⁷Ai: thao ai: lapa yaug yao: gatau dayaug jhao" ye: mung: ngore thaung: la,- ga: yeta" ra". Aiyaug wa airu: kad' ra". Yao: re qam: phin: mung: dadae thaung" ke' re yao: dae de; byaug: ra".

³⁸Lapa pho" wa yao" myo,khung: re phacug' yang thab'- yao: yao" gaung re geim kad' ci mung: khyoyae khyo ye: yang: Israel kho:kham su" lai: lo" nae" rure yelao" na: ra".

³⁹Kho:kham pho" su" lai: lo" au: lapa pho" wa yao: re khai mung: ASANG kho:kham we"- ngo wa gyekhe' poe mae gyekhe' na: au: gyezo: dayaug wa the' taung" ra" gyevo dayaug re ngojhao" jhui" lo mung: ce yaug re zaung" wa,- yao: phao: loe; lo" ngad: re wa ai: qhid' mae" nao yao" kao so'- mangad: lao"- ngaui sam taung kye' khyug' ca" li" nae"- ga: ta" ra".

⁴⁰Ngadqere: ngo wa gatau mau" mae kad' na: au: byu aiyaug phao: loe; lo" byaug: ra"- ga: ta" ra". Kho:kham pho" wa nao wa naoyao" gaung re dao: kho' yu: ava"- ai: qobo jhin re nao byid: ca" li" nae"- ga: tau" ra".

⁴¹Lapa pho" wa yao" myo,khung: mae" phacug' re lao" cad' pye' ra". Ailao" jao"- kho:kham pho" wa yao: re lapa qe mae" dayaug ngad: rure qu" xam" ra".

⁴²Ailao"- lapa wa kho:kham re ce wa ASANG: mungdao: ngad:- nao wa ngo se' pye' nae" amyin" byid' to" ra" yaug re phao: loe; lo" nhao: ruyang ai: qhid' mae" nao yao" kao so' re byid' pye' ca" li" nae". Amung: ni" gyetab wa yao" gyetab re phao: loe; nhao ko" ruyang phyo' pye' ru qhug' li" nae".

⁴³Kho:kham pho" wa Samari mae" yham khyo myid myo: myid laug myid: ci" ru we' phao: lo" ra".