Read Maru 1 KHO:KHAM 3 Bible Online

1 KHO:KHAM 3 - Maru bible

1 KHO:KHAM 3

¹Sholamon wa Egutu kho:kham pho" nho: myiqe: zo: re lo,xo' yu: ra" khyo" yao: we' myid vang" ba nam kad' yu: ra". Yao: wa aiyaug re Davi nho: vomo" mae- yao" kho:kham kho"- Caung:pa" Yham we' Yerusalem vogaung: lhang" gam: vang re bin kad' ra" ayo, joe" sho' lojhui" nha: to" ra".

²ASANG qhid' mae" caung:pa" yham re makad' shiko" ruyang amyu" byu qere majho" dau: ra" phan aja: ja: mae ngaui" xeim: jham re ngaui" byid' na: ashiko".

³Sholamon wa ASANG re jhid'de; mung: yao" yao: pho" Davi nho: mho" ra" dao: jham re phug' cao" ra" ngadqere: yao: re: gug'nyhug' jham re se' mung: aijham re xeim: khyo" phan aja: ja: dao mae xeim: ngaui" byid' ra".

⁴Dalhang yao: wa xeim: ngaui" byid: nae" qhid' mae" Gibeon khyo ye" ra". Pe"mung:ga"re mang qi" thao" ra" phan ai: tau mae jo, yang: ngad: ra". Yao: wa lai: lo: ra" ayo, mae ai: phan mae phad' ngaui" xeim: yo khyo"- taung khyo" ngaui" byid' qu" va" ra".

⁵Ai: myi mae ASANG wa yab mo, mae yao: jhao" li" na: qhu" mung:- nao ngore pe" ja: byid: nhao nug: i? ga: Sholamon re myid' ra".

⁶Sholamon wa nao wa ni" daui daui yaug nga" pho" Davi re qi" qhang: ra" jhid' myid khonhae" re: qhu" byid' lo: ra". Amung: yao" kho:kham khu mae ana" ba kho" zaung nae" qhid' mae" yauggai zo: dayaug yao: re byid' ra" khyo" yang- ni" nho: qi" qhang gang: tang: ra" jhid'de; myid xo' yang: yao: re qhu" byid' ava".

⁷O"- Mao"So nga" ASANG we"- ngo wa gyai ngai: ru we' khoru: eib nae" rure ngo maba sho' ngadqere: kho:kham khyo" nga" pho" khu mae nao ngore xo' kad' nhao: ava".

⁸Ngo wa matho' nghe' lasho' gyai myo" ra" amyu" byu qe- naoyao" byumyu" toe' yu nae" qhid' mae" nao khyin: yu: to" ra" ce: byumyu" phaung gaung: mae na: jo;-

⁹Airumung: ni" byumyu" re tarha" din: nyang: ru we' eib mung: gai: ru we' makhyang" rure ba: kho' nae" qhid' mae" ngore pha,jhi" byid: la,- mangad: re- ceqhi" myo" ra" ni" byumyu" re ngo khoru: qo" eib nae" i? ga: phaug' tau" ra".

¹⁰Sholamon ceru: mho' rure ASANG o ngaui: ra".

¹¹Aimung: yao: wa Sholamon re- nao yao" gaung qhid' mae" kao qhang nae"- jo,nho" jham- ni" gyevo qe shid nae" rure mho' nae" atha"- tarha" din: nyang: ra" khyo" qo" eib nae" ra" pha,jhi" re nao ngore mho' va" ruyang-

¹²Nao mho' rure ngo byid: nae". Ngo wa nao re ganhae" khag' re: maqo" qu" mung: khag' re: magai: dam: qo" ra" pha,jhi" we' ba: gyo" ru myo: sho' ngo nao re byid: nae".

¹³Ngo wa nao mamho' ra" ja: rere: nao re byid: nae". Nao kao so' daui: na: ra" ayo, gu: mae kho:kham gaje qe tho' jo,nho"- nga: je: qo" nhao nae".

¹⁴Nao wa ni" pho" Davi kad' ru we' dakhyo: ngore mho dao: gyo: mung: nga" tarha" jham we' amyin" dao: jham re phug' cao" ngad: re wa- ngo nao re kao qhang nhao nae"- ga: ta" ra".

¹⁵Sholamon wa so" li" mung: ASANG wa yao: re yab mo, mae dao: jhau va" rure beim" ra". Ai: thao yao: wa Yerusalem khyo ye: yang: ASANG: Dao: Thang" Ban" qhid' au: mae ye; jo, mung: phad' ngaui" byid' ra" ngaui" xeim: we' zam" khug: ra" ngaui" xeim: jham ASANG re qhaug' byid' ra". Ai: thao- yao: wa yao" zug: qere zo: shaug' poe dapoe da" byid' ra".

¹⁶Daba na mae shava myhi" shid' yaug wa Sholamon kho:kham pho" qhid' kheim khyo joe" vao ye" ako".

¹⁷Shid' yaug mae" dayaug wa ASANG kho:kham we"- myiqe: ceyaug we' ngo wa dayham mae za: daga" na: ru ngad:- yham mae yao: na: jo, au: yauggai nau" dayaug re ngo khau:-

¹⁸Nga" zoshao khau thao shid' ba re yao: re: yauggai nau" dayaug re khau: ra". Yham mae nga" shid' yaug za: ana:- gatau khag' re: mana.

¹⁹Ai: thao damyi mae yao: wa mabeim: lo: yao" zonau" dao mae gaung lhag' lhag' nhai" ke' mung: so' kho' kho' shid: lo" byaug: ra".

²⁰Yao: wa myi" mae to" li" mung: ngo yab: myhid' jo; au: nga" nhae mae" nga" yauggai zo: re vo; yu yang: yao" yab jaung: khyo vo; lo" ra". Ai: thao re yao: wa zoshao ashid re nga" yab jaung: dao mae lodam: vo; to" ra".

²¹Thao: ba ne, kao ngo so" li" mung: nga" zonau" re nug' jhaug' nae" seim" re- zonau" shid: jo; rure the' myao:- ngo wa zonau" re nyang" za: te' te' nyhang" qu" re- nga" zonau" mangad' rure the' myao:- ga: ta" ra".

²²Ngadqere: gatau dayaug wa- mangad:- zonau" adaui yaug wa nga" zonau" angad:- ashid yaug wa yao" zonau" ngad: ra"- ga: ta" ra". Sao qhid' mae" myiqe: yaug wa mangad:- ashid yaug wa ni" zo: ngad: ra". Adaui yaug wa nga" zo: ngad: ga: tau" ra". Airu: yao: shid' yaug wa kho:kham qhid' kheim: mae jho" ta" ngag: ako".

²³Sholamon kho:kham wa- ni" shid' yaug yaug khao: ngo" zoshao adaui yaug wa yao" mae" ngad:- zoshao ashid yaug wa gayaug: mae" ngad: ga: ta" ako"- ga: ta" ra".

²⁴Aimung: yao: wa shae pyang dakhyae: yu nhao: ke' ra". Shae pyang: cijoe" lo gelao"-

²⁵Ai: daui: na: ra" zoshao re shid' gao kho' mung: dayaug re dagao byid: ge,- ga: ta" ra".

²⁶Yao: myhi" agyang" yaug wa yao" yauggai zo: re gyai jhid'de; ruyang kho:kham pho" re- ASANG kho:kham we"- zoshao re dase' wa,- yao: re byid: wa,- ga: ta" ra". Ngadqere: gatau myiqe: yaug wa ai: zoshao re nga" shid' yaug khag' rere: dabyid: la,- shid' gao za: kho' pye' wa,- ga: ta" ra".

²⁷Ailao" Sholamon wa zoshao re dase' ge,- ai: sao qhid' mae" myiqe: yaug re byid: ge,- yao: wa yao: myhi" agyang" ngad: ra"- ga: ta" ra".

²⁸Israel amyu" byu qe Sholamon nho: dao: kho' rure the' gyo: gelao"- jho" ta" ngag: byo; ra" mau" re nyang nyang za: qo" ta" sho' nae" pha,jhi" Mao"So yao: re byid' to: va" rure yao: bam ba geyang: yao: re gyai phug' myao" ako".