Read Maru 1 KHO:KHAM 5 Bible Online

1 KHO:KHAM 5 - Maru bible

1 KHO:KHAM 5

¹Ture kho:kham Hiram wa khonhae" re: Davi nho: ba nam boe" lo: ra". Sholamon wa yao: pho" khu mae kho:kham khyo" xo' kad' ra" khyo re the' gyo: lao"- yao: wa Sholamon jhao" mug: va: lagyo: qere nhao: ke' ra".

²Sholamon wa Hiram re-

³Nga" pho" Davi wa mathang mano: yao: re lhang" kham" to" ra" gyevo mung"dan: jham re gyekhe' ca" ruyang ASANG: yang yao" gyevo qe alhab' re aung doe; nhao: ra" ayo, joe" sho' yao" Mao"So ASANG re caung:pa" nae" Caung:pa" Yham maqo" kad' rure nao ba: ra".

⁴Ngadqere: Ana"- nga" Mao"So ASANG wa nga" mug: kyo: alhab' we' ngaui pyo: yaug yo: ru ngore byid' to" ava". Ngo gyevo maqo"- gyekhe' rure gyaug ci" nae" majo, lo:-

⁵ASANG wa nga" pho" Davi re- ni" thao re ngo kho:kham kad' nhao nae" yaug ni" yauggai zo: wa nga" qhid' mae" caung:pa" yham dalam: kad' li" nae"- ga: dao:so: byid' to" ra". Amung: ana" ngo wa nga" Mao"So ASANG re caung:pa" nae" qhid' mae" caung:pa" yham dalam: kad' nae" myid: phyid' to: va".

⁶Aimung: ni" byu qere nga" qhid' mae" shaug' gae jham thau byid: nae" Lebanon khyo nhao: ke' byid: la,. Nga" byu qe wa yao: bam we' daga" mau" zaui" li" genae". Nao ta" phyid' ra" aphug' ngo yao: bam re byid: nae". Nao nyang" za: ba: ru we' dakhyo:- nga" byu qe wa sag' gae re khoru: thau nae" rure ni" byu qe ba: ruru: nga" byu qe maba ngad: ako" ga" ra" mungdao: we' dam: tug' pyang: ke' ra".

⁷Hiram wa Sholamon nho: dao: re the' gyo: lao"- gyai gyo" ngaui: ra". Amung: yao: wa qi" qhang: ra" byumyu" nho: kho:kham kad' nae" yao" khu mae kho:kham xo' kad' nae" airu" ra" pha,jhi" bo: ra" yauggai zo: Davi re byid' to" ruyang ana" ba ASANG re caung:khin" ra" wo"- ga: bau" ra".

⁸Ai: thao Hiram re- ngo wa ni" dao: re the' yu va". Nao mho' to" ru alhab' re ngo kad' byid: nae" jin" jin" ngad:- ngo wa nao re shaug' gae jham we' qhoje; gae jham byid: nae".

⁹Nga" byu qe wa sag' thaung: jham re Lebanon mae" panglai: joe" sho' tai: gyo" lo mung: aijham re pug zag yang: nao khyin: yu: ra" qid yae khyo myung: cigyo" lo: li" genae". Aimae nga" byu qe wa aijham re pheim mung: ni" byu qe wa tai: thug' yu: li" genae". Nao shad' khyo" nga" byu qere zokho bao" thaug' byid: nhao nug: ra" ga: byu dayaug nhao yang: pyang: ke' ra".

¹⁰Aimung: Hiram wa Sholamon re yao: o: ra" shaug' gae we' qhoje; sag' thaung: jham re byid' ra".

¹¹Amung: Sholamon wa Hiram re yao" byu qere zho: nae" zin khao: ngo" jung: gaug tang 62500 we' zhanlun xau gyang" 110000 ga:lan: byid' ra".

¹²ASANG wa yao" dao:so: re jhaug' zaug mung: Sholamon re pha,jhi" byid' ra". Hiram we' Sholamon agyo: mae ngaui pyo: yaug yo: ru jo, mung: yao: cao: thao: ce' mugsug' kad' to" ako".

¹³Sholamon wa Israel byu alhab' mo, mae" mau" zaui: byu khyo" 30,000 yaug re lhaung: yu: ra".

¹⁴Adoniram re au: jhaung kad' nhao: ra". Yao: wa 10,000 yaug- sam phung: kho' yang: phung: khao: ngo" lho" dakhye' khye' Lebanon mae mau" yezaui: mung: lho" shid' khye' khye' yham mae na nhao: ra".

¹⁵Sholamon wa bam mug: mae laug kho' na mo, 80,000 yaug we' tai mo, 70,000 yaug re: qo" ra".

¹⁶Aibam: mau" re qu" pyo byid' ra" au: jhaung qe wa 3,300 yaug ngad: ako".

¹⁷Kho:kham amyin" khyo" to" ra" khyo:- yao: bam wa Caung:pa" Yham apan aqao: qhid' mae" gai: ra" laug baui qi: jham re kho' ako".

¹⁸Sholamon we' Hiram nho: mau" zaui: mo, we' Biblo vobyu qe wa laug baui jham we' sag' the: jham re Caung:pa" Yham kad' nae" yham vo; seim" jaung: ako".