Read Maru 1 KHO:KHAM 8 Bible Online

1 KHO:KHAM 8 - Maru bible

1 KHO:KHAM 8

¹Ai: thao kho:kham Sholamon wa Davi nho: vogaung: Ziun mae" ASANG: Dao: Thang" Ban" re Caung:pa" Yham khyo dao: yu nae" qhid' mae" Israel byumyu" kaung- yham khaung jham: nho: au: jhaung qe alhab' re yao: jhao" Yerusalem khyo khai: zhang" yu: ra".

²Yao: bam alhab' wa lho" nhad' khye' ein: khye' ngad: ra" Ethanim lho" khye' zaung poe ayo, gyo: mae zang" ham: ako".

³Au: jhaung qe alhab' bin: zang" ham: na gelao"- khinjaung qe wa Dao: Thang" Ban" re tau: to' yu mung:-

⁴Aire Caung:pa" Yham khyo dao: ye" lo" ako". Levi byu qe we' khinjaung qere: ASANG qhid' kheim: Zaung re khyad' mung:- khin zai jham alhab' re Caung:pa" Yham khyo vo; ye" ako".

⁵Kho:kham Sholamon we' Israel byu qe alhab' wa Dao: Thang" Ban" qhid' au: mae ham: phaung: na mung: matho' nghe' losho' myo" ra" yao jham- nung: jham re xeim: ngaui" byid' ako".

⁶Ai: thao khinjaung qe wa Dao: Thang" Ban" re Caung:pa" Yham khyo dao: ye: mung: Gyang" Lho" thao" jo, qo- kherubin qao: mae yeto" to" ako".

⁷Ai: kherubin daung phyid' lhu: to" ruyang ai: ban" re we' dao: ra" gyang: yao: re nghoe' to" ra".

⁸Gyang: yao: athao re Gyang" Lho" thao" jo, qo qhid' au: mae yeye; ra" yaug khag' re: gai: myao: ra". Ngadqere: jo, qo gatau khai: mae" re: magai: myao ngad: ra". (Gyang: yao: wa ana" ba joe" sho' jo; ashi")

⁹Yao: bam Egutu mung" mae" thug' lo: na ko" au: Israel byu qe we' ASANG Dao: Thang" kad' ra" ayo, Sina bam mae Moshe yang ai: khug mae ke' to" ra" laug pye: shid' pye: mae" je yang: Dao: Thang" Ban" khug mae gatau pe" mabo ngad: ra".

¹⁰Khinjaung qe Caung:pa" Yham mae" phao: lo" na ko" au:- nyag din taung" jham thaui: byang" thug' li" mung:-

¹¹ASANG qhid' kheim: mae bao qhui: ra" bo" bao bao: jo; ra". Amung: yao: bam: mau" re maye: qo" zaui: ko" ngad: ra".

¹²Ailao"- Sholamon wa- ASANG we"- nao wa ba re mug:gaung mae te' to" ava". Nao wa jham thaui: we' mug: cad' khug mae na nae" khyin: yu: to" ava".

¹³Ana" ngo wa ni" qhid' mae" khid: ra" caung:pa" yham ni" qhid' mae" apyad ato na nae" jo, qo kad' to: va" ga: akyu" mho' ra".

¹⁴Ai mae amyu" byu qe ye; jo, ko" au:- Kho:kham Sholamon wa yao: bam shad' khyo myo, khung: phaug' mung:-

¹⁵Israel nho: Mao"So ASANG re caung:khin" ge,- yao: wa nga" pho" Davi re- Egutu mung" mae" nga" byumyu" re ngo jhui" thug' lo: ra" ayo, mae" ngore caung:pa" nae" caung:pa" yham kad' nae" ra" jo, qo re Israel mung" alhab' mae vogaung: dalam: rere: ngo makhyin yu- ngadqere: nga" byumyu" qe eib nae" qhid' mae" nao Davi re ngo khyin: yu: ga: dao:so: to: byid' rure yao: jhaug' zaug: ava"- ga: ta" ra".

¹⁶

¹⁷Sholamon wa xo' mung:- nga" pho" Davi wa Israel nho: Mao"So ASANG re caung:pa" nae" caung:pa" yham kad' nae" yaung: to" ra".

¹⁸ASANG kam" wa yao: re nga" qhid' mae" caung:pa" yham kad' byid: nae" nao o kao bau: ra" khyo wa jo: ru ngad: ra".

¹⁹Ngadqere: nao aire khonhae" re: maqo" kad' nae". Aire ni" yauggai zo:- nao yao" yauggai zo: wa nga" caung:pa" yham re kad' li" nae"- ga: ta" ra".

²⁰Ana"- ASANG wa yao" dao:so: re jhaug' zaug: ava". Israel nho: kho:kham khyo" nga" pho" khu mae ngo xo' kad' mung:- Israel nho: Mao"So re caung:pa" nae" Caung:pa" Yham re ngo kad' to: va".

²¹Ngo wa ngonhaung" nho: phug' pho" qere Egutu mung" mae" yao: jhui" thug' lo: ra" au: ASANG: yang yao: bam re dao: thang" to" ra" laug pye: shid' pye: ke' to" ra" Dao: Thang" Ban" qhid' mae" re: Caung:pa" Yham mae jo, qo dalam: byid: va"- ga: ta" ra".

²²Ai: thao amyu" byu qenho: qhid' kheim: mae Sholamon ye: mung: phan qhid' au: mae yeye; jo, yang: aimae yao" lo, re tau mung:-

²³Israel nho: Mao"So ASANG we"- mug:gaung tho' mae re: myid gaung o: pyae mae re: nao we' dau: ra" so mana ngad: ra". Nao wa ni" byumyu" qe we' to" ra" dao: thang" re jhaug' zaug mung:- yao: bam aung khug nhag' lam: alhab' yang nao re mho dao: gyo: gelao"- ni" jhid'de; myid yao: bam re nao qhu" byid' ra".

²⁴Nao wa nga" pho" Davi re kad' to" ra" dao:so: re jhaug' zaug: ava". Ana" ba dao: kheim: khao: ngo" wa jab byang" lo: ava".

²⁵(Amung: ana"- Israel nho: Mao"So ASANG we"- yao: nao re nyang" za: mho dao: gyo" lo: ru we' dakhyo:- yao: bam rere: nao re mho dao: gyo: ko" ngad re nao wa nga" pho" re yao: myid:zo: dayaug wa khonhae" re Israel nho: kho:kham khyo" eib: na: li" nae" ga: dao:so: byid' to" ra" gatau: dao:so: rere: jhaug' zaug: li" nae".

²⁶Aimung: ana"- O"- Israel nho: Mao"So we"- ni" daui daui yaug nga" pho" Davi re nao dao:so: byid' to" ra" gu: ja: khao: ngo" re boe" li" nhao wa,-

²⁷Ngadqere: O"- Mao"So we"- myid gaung dao mae nao gaigai: qo" na: i? Mug:gaung alhab' qhi" ngad: re lhao" re: ni" qhid' mae" maqui" ngad: ra". Aire ce: ngo kad' to" ra" Caung:pa" Yham wa khoru: gai: qui" nae" i?

²⁸Nga" Mao"So ASANG we"- ngo wa ni" daui daui yaug ngad:- nga" akyu" mho' dao: re tae" gyo: byid: mung:- ana" ba ngo mho' rure byid: la,.

²⁹Nao re caung:pa" nae" nao khyin: to" ra" ce: jo, qo- ce: Caung:pa" Yham re myi" re: na" re: lhaug' wa,- ce: Caung:pa" Yham khyo ngo myo, khung: qang yang: akyu" mho' au: ngore gyo: byid: la,.

³⁰Nga" akyu" mho' dao: re gyo: byid: mung: ni" byumyu" qe ce: jo, qo khyo yao: bam: myo, khung: qang yang: akyu" mho' gelao"- yao: bam: akyu" mho' dao: rere: gyo: byid: wa,- mug:gaung dao mae jo, ra" ni" yham mae" ngonhaung" re gyo: byid: mung: qobo khyad' byid: la,.

³¹Byu dayaug gatau dayaug re shad' ra" ga: qobo zhaug' ru qhug' mung: yao: qobo maqo" ra" khyo re jham tang: nae" qhid' mae" ce: Caung:pa" Yham mae jo, ra" phan khyo jhui" lo qhug' lao"-

³²O"- ASANG we"- mug:gaung mae" tae" gyo: byid: mung:- ni" daui daui mo, re dao: kho' byid: wa,- qobo qo" yaug re yao: man: qi" ru we' dakhyo: qobo dae byid: wa,- qobo maqo" ra" yaug re lhoe' ke' wa,.

³³Ni" byumyu" Israel byu qe yao: bam nao re qobo shad' geyang: yao: bam: gyevo qeyang khe' aung: pye' qhug' gelao"- yao: bam nao jhao" phaug' lo mung: ce: Caung:pa" Yham khyo li" yang: qobo khyad' byid: nae" qhid' mae" nhag' lam: nyham: khyo" mung: nao re akyu" mho' gelao"-

³⁴Yao: bam re mug:gaung mae" tae" gyo: byid: wa,- ni" byumyu" qenho: qobo re khyad' pye' byid: mung: nao: yang yao: bam: phug' pho" qere byid' to" ra" mug: myid khyo yao: bam re jhui" tug' lo byid: wa,.

³⁵Ni" byumyu" qe nao re qobo shad' geyang: nao: yang mug: maqu nhao tam" pye' lao"- yao: bam myid tha" lo mung: ce: Caung:pa" Yham khyo myo,khung: qang yang: nhag' lam: nyham: khyo" zo" re" nao re akyu" mho' gelao".

³⁶Yao: bam re mug:gaung mae" tae" gyo: byid: wa,- kho:kham nho qobo jham re we' Israel byu qenho: qobo jham re khyad' byid: wa,- jo: ru kad' genae" qhid' mae" yao: bam re mho" byid: wa,. Ailao" o"- ASANG we"- nao: yang ni" byu qere malaui: malab: ra" jo,nho" khyo" byid' to" ra" ce: ni" nho: mug: myid mae mug: qu nhao wa,-

³⁷Mung"dan: khug mae bao" khug' khug' qam" gyo" ru la laung: yang khyag' phaung" jham: yang- qhovo: jham re zai" qheim" pye' qhug' lao"- ni" byumyu" qe yao: bam: gyevo qeyang khe' zin" ru qhug' lao"- yao: bam: phaung mae no yo" ga:- no phyo: boe" lao"-

³⁸Yao: bam: akyu" mho' dao: re tae" gyo: byid: wa,- ni" byumyu" Israel qemae" dayaug yaug nhag' lam: gyug: sho' kaug' mung: akyu" mho' yang: yao: bam: lo, ni" Caung:pa" Yham shad' khyo yheim" ke' gelao"-

³⁹Yao: bam: akyu" mho' dao: re tae" gyo: byid: wa,- mug:gaung mae jo; ra" ni" yham mae" yao: bam re tae" gyo: byid: mung:- yao: bam re qobo khyad' byid: wa,- yao: bam re bao" thaug' byid: wa,. Nao dayaug za: xao su byu qera" nhag' lam: re ba yaug ngad: ra". Yaug khao: ngo" re yao: bam man: qi" ru we' dakhyo: kad' byid wa,.

⁴⁰Airulao" nao yang ngonhaung" re- nao: yang ngonhaung" phug' pho" qere byid' to" ra" mung" mae yao: bam na: ra" ayo, alhab' mae ni" byumyu" qe nao re mho dao: gyo: li" genae". Yaug khao: ngo" re yao: man: qi" ru we' dakhyo: kad' byid: wa,.

⁴¹Va: mae na: ra" taung bug byu dayaug ni" nho: lahau: qi" ru we' ni" byumyu" qe: qhid' mae" qi" qhang: ra" mau" kad' va" ra" khyo re the' gyo: mung: nao re caung:pa" nae" we' ce: Caung:pa" Yham mae akyu" mho' nae" joe" li" lao"-

⁴²

⁴³Yao" nho: akyu" mho' dao: re tae" gyo: byid: wa,- mug: myid byu qe alhab' wa ni" amyu" Israel byu qe we' dakhyo:- nao re ba mung: nao- re mho dao: gyo: genae" qhid' mae" nao na: ra" jo, qo mug: khaung dao mae" yao: re tae" gyo: byid: mung: yao: nao re mho' ra" ja: re kad' byid: wa,. Ailao"- ce: ngo kad' to" ra" Caung:pa" Yham wa nao re caung:pa" nae" qhid' mae" kad' to" ra" jo, qo ngad: rure yao: bam ba: li" genae".

⁴⁴Ni" byumyu" re yao: bam: gyevo qere gyekhe' nae" nao amyin" byid: mung: yao: bam khai: mae na na- nao: yang khyin: yu: to" ra" ce: vogaung: we' ni" qhid' mae" ngo kad' byid' to" ra" ce: Caung:pa" Yham khyo myo,khung: qang yang: yao: bam nao re akyu" mho' gelao"-

⁴⁵Yao: bam: akyu" mho' dao: re tae" gyo: byid: wa,- mug: khaung mae" yao: bam re gyo: byid: mung: yao: bam re aung doe; ru byid: wa,.

⁴⁶Ni" byumyu" qe nao re qobo shad' ru we' qobo mashad' ru dayaug re: mana mung:- ni" nhag' yo" ruyang yao: bam re yao: bam: gyevo qeyang nao khe' aung: pye' nhao: ru we' yao: bam re gatau: mung"dan: khyo kyam: byu qekhyo" taung" yu: lo" gelao"- ai: mung"dan wa gyai va: sho' ngadqere:-

⁴⁷Ni" byumyu" qe: akyu" mho' dao: re tae" gyo: byid: wa,. Ai: mung"dan: mae yao: bam myid tha" mung: nao re akyu" mho' yang: khonho" qobo shad' ru we' yao: bam khoqhi" nhag' lam: kaui: lo ko" rure qobo lhang: yu ko" ngad: re- O" ASANG we"- yao: bam: akyu" mho' dao: re gyo: byid: wa,.

⁴⁸Ai: mung"dan: mae yao: bam dangman" ru we' nhag' lam: din: din: za: myid tha" pye' yang:- ngonhaung" phug' pho" qere nao: yang byid' to" ra" ce: mung"- nao khyin: to" ra" ce: vogaung:- ni" qhid' mae" ngo kad' to" ra" ce: Caung:pa" Yham- khyo yao: bam myo, khung: qang ko" au:-

⁴⁹Yao: bam: akyu" mho' dao: re tae" gyo: byid: wa,- mug: khaung dao mae jo; ra" ni" yham mae" yao: bam re gyo: byid: mung: yao: bam re nhag' khyag' shagu byid: wa,.

⁵⁰Yao: bam qobo alhab' we' nao re tau: lhan" ra" gye mau" alhab' re qobo khyad' byid: mung: yao: bam: gyevo qere nhag' khyag' myid we' yao: bam re zam" khug nhao wa,.

⁵¹Yao: bam wa myishae de; ra" myikhyeim" ngad: ra" Egutu mung" mae" nao: yang jhui" thug' lo: ra" nao yao" byumyu" qe ngad: ako".

⁵²Phung qi" ra" ASANG we"- ni" byumyu" qe: dao mae re: yao: bam: kho:kham we' khonhae" re: myo, nho byid: mung: bao" thaug' ru qhid' mae" ayo, khao: ngo" yao: bam mho' yao: ra" akyu" mho' dao: re gyo: byid: vashao:-

⁵³Ngonhaung" phug' pho" qere Egutu mung" mae" nao jhui" thug' lo: au: ni" daui daui yaug Moshe khyo" yang nao yao: bam re ta" ru we' dakhyo:- nao wa yao: bam re byu alhab' mae" nao yao" byu kad' yu nae" khyin: to" ra".

⁵⁴Sholamon ASANG re akyu" bin: mho' thao lo, tau: ci mung: yao: pad' thaug' thaug' ra" phan qhid' au: mae to" ye; ra".

⁵⁵Yao: wa thoe qi: we' aimae ham: phaung: na: ra" amyu" byu qe: qhid' mae" Mao"So: shaman" jeju re mho' byid' ra".

⁵⁶Yao: byid: nae" ga: dao:so: to" ru we' dakhyo: yao" byumyu" re ngaui pyo: yaug yo: ru byid' va" ra" ASANG re caung:khin" ge,- yao: wa yao" daui daui yaug Moshe khyo" yang dao:so: byid' to" ra" gai: thao" ra" dao:so: alhab' re jhaug' zaug: ava".

⁵⁷Ngonhaung" phug' pho" qe we' yao: daga" na: ru we' dakhyo: ngonhaung" Mao"So ASANG wa ngonhaung" we' daga" na vashao:- yao: wa ngonhaung" mae" khonhae" re: maphao: xug' to: co' vashao:- ngonhaung" re khonhae" re: dashapye' vashao:-

⁵⁸Ngonhaung" phug' pho" qere yao: byid' to" ra" tarha" alhab' we' amyin" dao: jham re phug' cao" mung:- ngonhaung" re: yao: re mho dao: gyo: nhao vashao:. Airulao" yao: ngonhaung" re kao so' daui nae" o ngaui ru we' dakhyo:- ngonhaung" khonhae" re: kao so' qo" daui nae" ngad: ra".

⁵⁹Ngonhaung" Mao"So ASANG wa ce: nga" akyu" mho' dao: we' yao: re ngo mho' yao: ra" thoe jham re ayo, khao: ngo" mae myid: beim: byid: vashao:- yao: bam ba khao: ngo" mae qo ca" rure cao" yang: Israel byumyu" we' yao: bam: kho:kham re khonhae" re: yao: nhag' khyag' shogu byid: vashao:-

⁶⁰Ailao"- mug: myid dao mae" byumyu" alhab' wa nao dayaug za: Mao"So ASANG ngad mung: gatau mana lo" rure ba: li" genae".

⁶¹Naonhaung" ana" ba kad' ko" ru we' dakhyo:- yao" byumyu" naonhaung" wa ngonhaung" Mao"So ASANG re yao" tarha" alhab' we' amyin" dao: alhab' re khonhae" re: jhaug' zaug: na vageshao: wo"- ga: ta" ra".

⁶²Ai: thao Sholamon kho:kham we' aimae na ko" ra" amyu" byu qe alhab' wa ASANG re xeim: ngaui" byid' ako".

⁶³Yao: wa nung: 22,000 dau:- yao 120,000 dau: re zam" khug: ra" xeim: jham khyo" xeim: ngaui" byid' ra". Aimung: kho:kham we' amyu" byu qe alhab' wa Caung:pa" Yham re qhaug' byid' ako".

⁶⁴Aiba mae yao:- yao: wa vang" agaung: dau Caung:pa" Yham qhid' kheim: jo, qo rere: qhaug' byid: mung:- ai:thao yao: wa aimae dau: geim" phad' ngaui" ra" xeim:- cin man" xeim: jham zam" khug: ra" xeim: jham qhid' mae" gug'nyhug' xau jham re xeim: ngaui" byid' ra". Gyid: phan wa ce: xeim: ngaui" jham: qhid' mae" saung" ngai yang: yao: ceru: kad' ru ngad: ra".

⁶⁵Caung:pa" Yham mae Sholamon we' Israel byu qe alhab' wa zaung poe re nhad' ba lam: lam: kad' ako". Ai mae mug: am: shad' Hamad bam gyo: we' mug: thao shad' Egutu mug: kyo: joe" sho' mae" mo, byu phung: mo" zang na; jo; ako".

⁶⁶She' ba ein: ba Sholamon wa amyu" byu qere yham phao nhao: ke' ra". ASANG wa yao" daui daui yaug Davi we' yao" Israel byumyu" qere byid' to" ra" shaman" jeju alhab' nho: mathao mae yao: bam alhab' yao: re caung:khin" mung: pyo: pyo: za: yham phao: lo" ako".