Read Maru 1 KHO:KHAM 9 Bible Online

1 KHO:KHAM 9 - Maru bible

1 KHO:KHAM 9

¹Kho:kham Sholamon wa Caung:pa" Yham kho:kham kho" we' gatau yao: kad' nug: ra" gu: bin: kad' thao-

²Gibeon mae yao: kad' lo: ru we' dakhyo:- ASANG wa Sholamon jhao" dam: li" na: qhu" ra".

³ASANG wa yao: re ngo ni" akyu" mho' dao: re the' gyo: va"- apyad ato mae ngore caung:pa" nae" jo, qo khyo" nao kad' to" ra" ce: Caung:pa" Yham re ngo gyang" lho" nhao va". Ngo wa aire lhaug' zaung" mung: yo, byang" gug: gam byid' na nae".

⁴Ni" pho" Davi kad' ru we' dakhyo: nao ngore dangman" jhaug' za: caung: da" byid' ngad: re- nga" tarha" jham re we' nao re ngo amyin" byid' to" ru ja: khao:ngore nao phug' cao" ngad: re-

⁵Israel mung"dan: re khonhae" re: yao" myid:zo: qeyang eib: li" nae" ein: ngo yao: re ta" ra" au: ni" pho" Davi re ngo byid' to" ra" dao:so: re ngo jhaug' zaug nae".

⁶Ngadqere nao we' ni" myid:zo: qe nga" thao cao" ru thang: pye' ko" re- naonhaung" wa tarha" jham re we' ngo naonhaung" re byid' to" ra" amyin" jham re maphug' cao" gelo:- so gatau re caung:pa" ko" ngad: re-

⁷Ngo yang yao: bam re byid' to" ra" mung"dan: mae" nga" byumyu" Israel re ngo yu: pye' nae". Ngo re caung:pa" nae" jo, qo khyo" ngo gyang" lho" nhao: to" ra" ce: Caung:pa" Yham rere: ngo shapye' pye' nae". Khyi" khao ngo" mae" byumyu" qe wa Israel byu qere jung" mung: maphug' makhyad' kad' li" genae".

⁸Ce: Caung:pa" Yham wa byo; gyo" bam: jo; li" nae". Su" lai: lo" ra" mo, yaug khao: ngo" din: mo; byaug: li" genae". Yao: bam wa Mao"So" wa ce: mung" re we' ce: Caung:pa" Yham re pe"mung: ceru: kad' laug i? ga: myid' li" genae".

⁹Byu qe wa yao: bam: phug' pho" qere Egutu mung" mae" jhui" thug' lo: ra" yaug ngad: ra" yao: bam: Mao"So re yao: bam shapye' pye' geyang: ngad: ra" ga: phaug' tau" li" genae". Yao: bam phug' myao: byid' ru wa gatau: jham re byid' pye' mung: aijham re caung:pa" ako". Ai: mathao mae ASANG wa yao: bam dao mae ce: qug: khai: kyi" khyag' ru boe" nhao ru ngad: ra".

¹⁰Sholamon wa Caung:pa" Yham we' kho:kham kho" re shid' xe zin myao" sho' kad' ra".

¹¹Ture kho:kham Hiram wa yao" mau" qhid' mae" yao: o: ra" shaug'- qhoje; qhang alhab' re Sholamon re byid' ra". Cere bin: kad' thao kho:kham Sholamon wa Galile mung" mae" vogaung: shid' xe Hiram re byid' ra".

¹²Hiram wa ai: vogaung: jham re yequ" mung: aijham re yao: ma- o ngad: ra".

¹³Airumung: yao: wa Sholamon re- nga" mao:nhaung: pho" we"- nao: yang ngore byid' to" ra" ai: vogaung: jham wa khoru: i? ga: ta" ra". Ce: mathao mae ai: khaung: re khabu ga: mhang" to" ashiko".

¹⁴Hiram wa qhang talenta dayo: shid' xe je sho' Sholamon re vhin: ke' byid' ra".

¹⁵Kho:kham Sholamon wa Caung:pa" Yham we' kho:kham kho" re kad' nae" vogaung: ba thug' shad' mae" myid gaung re pyang" nae"- vogaung: vang re zao nae" qhid' mae" mau" qam: byid: nhao: ra". Yao: wa mau" zaui: mo, re Hazora- Megido- Geze vogaung: jham te" ra" mau" mae kad' nhao: ra".

¹⁶(Egutu kho:kham wa Geze re gye zin: mung: aung: yu: pye' ra". Ai mae na mo, re se' pye' mung: vogaung: re ngha" pye' ra". Ai: thao yao: wa yao" myiqe: zo: we' Sholamon lo,xo' ra" au:- lo,xo' jhaung qhu" khyo" yao" myiqe: zo: re aijham byid' ra". Sholamon wa aire dam: te" ra".)

¹⁷Yao" nho: mau" qam: byid: mo, re Sholamon wa Bethoron o: dau:-

¹⁸Balad- Yuda din"pyad' yo mae" Tama vogaung:-

¹⁹Yao" zokho to: nae" vogaung: yao" myao: jham we' gyekhe' myao: lhin" jham: qhid' mae" we' Yerusalem- Lebanon mae we' yao" mung"dan: mae khyi" khao: ngo" rere: zao nhao: ra".

²⁰Sholamon wa- yao" mau" qam: byid: mo, re yao: bam: jao khae mung"dan: re sang: yu ko" au:- Israel byu qeyang mase' pye' ra" Khanan byu qenho: myid:zo: qere re: ci: ra". Aibam wa Amori byu- Hiti byu- Perizi byu- Hivi byu Yebusi byu qe bobo mung: ai bam: myid:zo: qe wa xo' yang: ana" ba joe" sho' jeim kad' lo: ako".

²²Sholamon wa Israel byu qere jeim makad' ngad: ra". Yao: bam wa yao" gyezo:- zug: qe- gyezug: qe- gyekhe' myao: lhin" keim: zug:- myao: keim: mo, khyo" mau" zaui" ako".

²³Sholamon nho: yham kad' yham zhaug' ra" mau" myo: sho' ja: mae mau" qam: byid: mo, qe au: jhui" she: ra" mo, wa 550 yaug ngad: ako".

²⁴Sholamon wa yao" yham sang myhi" ngad: ra" Egutu kho:kham pho" nho: myiqe: zo: Davi vogaung: mae" Sholamon yang kad' byid' ra" kho:kham kho" khyo qui" lo" thao re vogaung: ba thug' shad' mae" myid gaung re pyang" pye' ra".

²⁵Sholamon wa ASANG qhid' mae" yao" yang kad' to: byid' ra" phan dao mae dazin re sam lhang lhang phad' ngaui" byid' ra" ngaui" xeim: jham we' zam" khug: ra" ngaui" xeim: jham re ngaui" byid' ra". Yao: wa ASANG re sheim nae pyo: ja: rere: phad' nhae" byid' ra". Aimung: yao: wa Caung:pa" Yham re kad' pin" ra".

²⁶Kho:kham Sholamon wa Edom mung" tham ne qid kaui qid yae mae jo; ra" Elad nhae mae" Eziongebe mae" sang pho jham rere: zhaug' ra".

²⁷Kho:kham Hiram wa Sholamon nho: byu qe we' mau" daga" zaui: nae" thaung" qhug' ru myo: sho' qhug' qu" vako" ra". Yao" qid sang pho jham mae" byu daqhae: re nhao: ke' ra".

²⁸Yao: bam wa Ophi mung" khyo gau" de; ye: gemung: Sholamon jhao" qhang joe: 10000 je tho: lo: ako".