Read Maru 2 KHO:KHAM 1 Bible Online

2 KHO:KHAM 1 - Maru bible

2 KHO:KHAM 1

¹Israel kho:kham Ahab shid thao re Moba mung"dan: wa Israel re gye kad' ako".

²Kho:kham Ahazia wa Samari mae" yao" kho:kham kho" yham khaung dao mae jo; ra" qe, bao: zo: kham: mae" byid: gyo" mung: xo sho' dae de; ra". Aimung: yao: wa yao: gai nae"- magai nae" ga" rure ba nae" qhid' mae" Ekron vogaung: mae" Philisti qe: so ngad: ra" Balzebu re yemyid: nae" lagyo: daqhae: re nhao: ke' ra".

³Ngadqere: ASANG: mug: lagyo: wa Tishbe mae" lapa Elia re kho:kham Ahazia nho: lagyo: qe we' yeqhug' mung:- yao: bam re Ekron so Balzebu re dao: myid: nae" qhid' mae" naonhaung" pe"mung: ye: ko" i? Israel mung" mae so mana ein: naonhaung" myid: jho geyang: ngad ko" i?

⁴Kho:kham re ni" dae magai nae"- nao shid:li" nae" ga: ASANG ta" ra" ein: lo" ta" kyo: ge,- ga: ta" ra". Elia wa ASANG: yang amyin" byid' to" ru we' dakhyo: kad' ra".

⁵Alao" lagyo: qe wa kho:kham pho" jhao" dam: tug' lo" ako". kho:kham pho" wa naonhaung" pe"mung: dam: tug' lo ko" i? ga: lham: myid' ra".

⁶Ngonhaung" wa dam: tug' lo" nae" ngonhaung" re ta" mung: nao re- Ekron so Balzebu re dao: myid: nae" nao pe"mung: lagyo: nhao: ke' i? Israel mung" mae so mana ein: nao myid: jho yang: ngad: i? Nao wa dae magai nae"- nao shid: li" nae" ga: ASANG ta" ra" ein: lo" ta" kyo: ge, ga: ta" ra" yaug we' yeqhug' yang: ngad: ga: tau" ako".

⁷Kho:kham pho" wa byu aiyaug khoru" ru ngad: ra" i? ga: myid' ra".

⁸Yao: bam wa- gug'nyhug' shoqid: yang kad' ra" bau: qhang ve; ci mung: shoqid phyid' cui: cui" ci: ra" ga: tau" ako". Kho:kham pho" wa- Elia ngad: ra"- ga: ta" ra".

⁹Alao" kho:kham wa Elia re yejhui" yu nae" qhid' mae" zug: dayaug re byu ngo" xe zo: we' nhao: ke' ra". Zug: pho" wa bug gaung dao mae Elia zaung: jo; rure ye myao mung: yao: re- Mao"So: byu we"- nao re gyo" lo nae" kho:kham pho" amyin" byid' ra"- ga: ta" ra".

¹⁰Elia wa ngo Mao"So: byu ngad: re wa mug:gaung mae" myi: gyo" li" mung:- nao we' ni" byu qere li" ngha" se' pye' vashao:- ga: tau" ra". Alao" jao"- myi: wa gyo" li" mung: zug: pho" we' yao" byu qere ngha" se' pye' ra".

¹¹Kho:kham pho" yang byu ngo" xe yaug we' nhao: ke' ra" zug: gatau dayaug wa do, ye: mung: nao ana" jao" gyo" lo nae" kho:kham pho" nao re amyin" byid' ra"- ga: yeta" ra".

¹²Elia wa ngo Mao"So byu ngad: re wa mug:gaung mae" myi: joe" gyo" li" mung: nao we' ni" byu qere li" ngha" se' pye' vashao:- ga: tau" ra". Alao" jao" Mao"So: myi: joe" li" mung:- zug: pho" we' yao" byu qere li" ngha" se' pye' ra".

¹³Kho:kham pho" wa zug: dayaug we' byu ngo" xe yaug re dalhang dam: nhao: ke' ra". Ai: zug: pho" wa bug gaung khyo do, ye: mung: Elia nho: qhid' kheim: pad' thaug' ye thaug' mung:- Mao"So: byu we"- ngo we' nga" byu qere nhag' khyag' yu la,- ngonhaung" kao so' re loe, nhao la,- ga: yemho' ra".

¹⁴Gatau zug: shid' yaug we' yao: shid' yaug: nho: byu qe wa mug:gaung mae" myi" yang ngha" se' pye' qhug' ako". Ngadqere: ngore nhag' khyag' yu la, wo"- ga: ta" ra".

¹⁵ASANG: lagyo: pho" wa Elia re yao: we' daga" cao" gyo" lo" wa,- dagyaug wa,- ga: ta" ra". Aimung: Elia wa ai: zug: pho" we' daga" kho:kham jhao" cao" ye" lo" mung:-

¹⁶Yao: re ASANG ceru: ta" ra" nao wa Israel mung" mae dao: myid: nae" so mana lo" ruru: kad' mung: Ekron so Balzebu re dao: myid: nae" lagyo: qere nhao:ke' ruyang nao wa no dae magai nae"- nao shid: li" nae"- ga: ta" ra".

¹⁷Elia nhad' khyo" ASANG ta" ru we' dakhyo: Ahazia shid: lo" ra". Ahazia wa yauggai zo: maqo" mung: yao: nhaung: Yoram wa Yuda kho:kham Yehoshaphad nho: yauggai zo: Yehoram eib: ru shid' zin ein: zin mae yao" khu mae kho:kham xo' kad' ra".

¹⁸Kho:kham Ahazia kad' ra" lo, mau" gatau ja: khao: ngo" wa Israel kho:kham qe: mhomyi: paug' mae tung" xam" to" ako".