Read Maru 2 KHO:KHAM 10 Bible Online

2 KHO:KHAM 10 - Maru bible

2 KHO:KHAM 10

¹Samari vogaung: mae Ahab nho: myid:zo: qe nhad' xe yaug na: ako". Yehu wa vhin tung" dakhye' tung" yang: aire kai" tung" mung: vomo" mae" zug: qere- byumyu" au: jhaung qere- Ahab nho: myid:zo: qere zaung" ra" gyezo: qere vhin: ke' byid' ra". Vhin tung" mae-

²Naonhaung" wa kho:kham pho" nho: myid:zo: qere au: she: ra" mo, ngad gemung:- gyekhe' myao: lhin" jham- myao: jham- shae lhae jham- gyetab vogaung: jham naonhaung" qo" ako". Aimung: naonhaung" ce: vhin tung" re qo" yu we'-

³Kho:kham myid:zo: qemae" boe" thao"- doe; thao" yaug re naonhaung" khyin: yu mung: yao: re kho:kham kad' nhao ge,- yao: re gug: gam byid: ge,- ga: bo: ra".

⁴Samari mae" zug: qe wa gyaug: nin" pye' ako". Yao: bam wa kho:kham Yoram we' kho:kham Ahazia lhao" gye maqo" kad' re ngonhaung" wa Yehu re khoru: gye qo" kad' nae" i? ga: ta" ako".

⁵Aimung: kho:kham kho" mae" au: jhaung pho" we' vomo" mae" au: jhaung zug:- byumyu" au: jhaung qe- gug: gam gyezo: qe wa daga" za: Yehu re- ngonhaung" wa ni" daui daui mo, ngad:- nao ta" ru pe" ja: rere: kad' nae". Ngonhaung" jin" jin" ngad:- ngadqere: khag' rere: kho:kham makad' nhao nae". Nao je: gai: ga: myid: ra" ja: pe" ngad ngad kad' wa, ga: ra" ce: mungdao: re pyang: ke' ako".

⁶Yehu wa vhin tung" gatau dakhye' yao: bam re dam: tung" ke' ra". Aiwa naonhaung" nga" bo: de, geyang: nga" amyin" dao: re cao" nae" jin" jin" ngad ko" re wa Ahab nho: myid:zo: qenho: au: lam: jham alhab' re ne, mo" ba ce: ayo, mae Yezre khyo ngojhao" cili" geri: ga: bo: ra". Kho:kham Ahab nho: myid:zo: qe nhad' xe yaug wa yao: bam re jhui" qhi" lo ko" ra" Samari mae" byumyu" au: jhaung qe: gun caung: ra" qao: mae na: jo; ako".

⁷Yehu nho: vhin tung" re qo" yu gelao"- Samari mae" au: jhaung qe wa Ahab nho: myid:zo: nhad' xe yaug geim" re se' pye' gemung: aibam: au: re gyan jham mae ke' yang: aijham re Yezre mae na: ra" Yehu jhao" vhin: ke' ako".

⁸Ahab nho: myid:zo: qenho: au: jham ce joe" lo va" khyo Yehu re ta" kyo" ako". Yao: wa aibam re vomo" kham: mae shid' bam bam: to: mung: aijham re thao: ba ne,kao joe" sho' to" to: nae" amyin" byid' ra".

⁹Ne, kao re yao: wa kham: khyo ye: mung: aimae na ko" ra" vobyu qere- kho:kham Yoram re tau: lhan: yang: yao: re se' pye' yaug wa ngo ngad:. Ai: qhid' mae" qo naonhaung" mae mabo- ngadqere: cebam alhab' re khag' yang se' pye' ra" i?

¹⁰Ahab nho: myid:zo: qe: khyo we' sin: yang: ASANG ta" to" ru ja: khao: ngo" jab byang" li" nae" ga" rure- ceru wa sagse: qhu" byid' ra". ASANG wa yao" lapa Elia nho: nhad' khyo" yao: dao:so: byid' to" rure kad' ru ngad: ra"- ga: ta" ra".

¹¹Ai: thao Yehu wa Yezre mae na ko" ra" Ahab nho: amyu" ba nam qe gatau alhab' yao" gyezug: qe- tin: te' ra" ba nam qe- khinjaung qe alhab' rere: se' pye' ra". Aibam mae" dayaug rere: matang" to: ngad: ra".

¹²Yehu wa Samari khyo ye: nae" qhid' mae" Yezre mae" to" lo" ra". Khyole; mae yao lhaug' mo; Jamu- ga: mhang" ra" jo, qo mae-

¹³Yuda kho:kham Ahazia nho: amyu" ba nam daqhae: we' jho" qhug' mung: yao: bam re naonhaung" khag' bam ngad ko" i? ga: myid' ra". Yao: bam wa- Ahazia nho: amyu" ba nam qe ngad:- ngonhaung" wa kho:kham myhi" Yezebe nho: zoshao qere we' dang: ra" kho:kham yham khaung byu qere ngonhaung" ye phug' myao: byid: nae" qhid' mae" Yezre khyo ye" lo" na: ru ngad: ga: tau" ako".

¹⁴Yehu wa yao" byu qere- aibam re adaui taung: ge,- ga: amyin" byid' ra". Yao: bam wa ai bam re taung" ako". Yao: wa aitau mae jo; ra" dungkhung: dalam: mae aibam alhab' re se' zaui: pye' ra". Alhab' byid xe: shid' yaug ngad: mung: yao: bam mae" dayaug rere: matang" to: ngad: ako".

¹⁵Yehu wa dam: xo' ye" lo" mung: khyole; mae Rekhab nho: yauggai zo: Yonadab yang li" tug: yu: ra". Yehu wa yao: re lham: au" mung:- nao we' ngo myid: ru jho" dau: ra"- nao ngore bao" thaug' nae" i? ga: ta" ra". Yonadab wa- ngo bao" thaug' nae"- ga: tau" ra". Ailao" Yehu wa ni" lo, byid' ke' la,- ga: phaug' tau" ra". Yao: shid' yaug lo, jho" zaui: mung: Yehu wa gyekhe' myao: lhin" khyo bao" she: to' yu yang:-

¹⁶Ngo we' daga" li" mung: ngo ASANG re khoqhi" kao bau yaug ngad: rure nao yao: li" qu" yu wa,- ga: ta" ra". Amung: yao: shid' yaug wa Samari khyo daga" zaung: ye" lo" ako".

¹⁷Yao: shid' yaug aikhyo joe" ye: gelao"- Yehu wa Ahab nho: amyu" ba nam alhab' re dayaug rere: matang" to: lo: se' pye' ra". Ceru wa ASANG: yang Elia re boe" nae" ga: ta" to" ra" khyo ngad: ra".

¹⁸Yehu wa Samari byu qere khai: zhang" yu mung:- kho:kham Ahab wa Bala re dajhid' za: caung da" byid' ra". Ngo wa yao: re je yang: caung da" byid: ra". Ngo wa yao: re je yang: caung da" byid: nae".

¹⁹Amung: Bala lapa qe alhab' -yao: re caung:pa" mo, alhab'- yao" khinjaung qe alhab' re khai: zhang: ge,- khag' re: magai: na: gyo" genae". Ngo wa Bala re ngaui" xeim: aqi: ngaui" byid: nae". Amung: majoe" li" ra" yaug re wa se' pye' nae"- ga: ta" ra". (Yao: wa Bala re caung:pa" mo, alhab' re se' pye' nug yang: Yehu nho: pha,jhi" khyug' ru ngad: ra".)

²⁰Ai: thao Yehu wa Bala re nga: yhe' caung:pa" ra" ba na ein: ta" hau ge, ga:- amyin" byid' ra". Ai: ta" hau: dao: tung" mung: Yehu wa Israel mung" geim" khyo jao: sho' ta" hau: nhao: ke' ra".

²¹Bala caung:pa" mo, alhab' joe" li" ako". Yao: bam mae" dayaug re: madang lo: joe" li" ako". Yao: bam alhab' mo, Bala caung:pa" yham khyo vao ye: mung: aimae to, za: yena: jo; ako".

²²Ai: thao re Yehu wa gyang" lho" bau: qhang we' sin" ra" khinjaung au: jhaung pho" re bau: qhang jham re cithug' lo mung: caung:pa" mo, re byid: nae" qhid' mae" amyin" khyo" ke' ra".

²³Ai: thao re- Yehu wa Rekhab nho: yauggai zo: Yonadab we' daga" caung:pa" yham khyo vao ye: mung: aimae na ko" ra" mo,byu qere- Bala re caung:pa" mo, za: na: jo, mung: ASANG re caung:pa" mo, khag' re: mali" rure ba ge,- ga: ta" ra".

²⁴Ailao" yao: we' Yonadab shid' yaug wa Bala re ngaui" xeim: we' phad' ngaui" xeim: ngaui" byid: nae" vao ye" lo" ako". Yao: wa caung:pa" yham taung gaung mae byu she' xe zo: nha: to: mung:- cebyu qe alhab' re naonhaung" se' pye' ge,. Aibam mae" dayaug yaug re loe; lo" nhao: ra" yaug khag' ngadqere: ai qhid' mae" yao" kao so' byid' pye' ca" nae" ga:- ta" to" ra".

²⁵Yehu wa ngaui" xeim: re qhaug' ke' we' yao: wa zaung" mo, we' gyezug: qere vao ye: yang: alhab' re se' pye' ge,- dayaug rere: daloe, nhao ge,- ga: ta" ra". Yao: bam wa shae pyang: she: ci mung: aibam alhab' re se' pye' ako". Aimung: mao gaung jham re taung gaung shad' khyo she: khyad' thug' to" ako". Ai: thao yao: bam wa Caung:pa" Yham akhug shad' mae" gyang" lho" jo, qo khyo vao ye: mung:-

²⁶Aimae jo; ra" gyang" lho" zang baung: re dao: thug' lo mung: aire ngha" pye' ako".

²⁷Airu: yao: bam wa gyang" lho" zang baung: we' phan yham re phyo' qheim" pye' mung: ai: phan yham re: ngha ye: jo, qo boe" byaug: ra". Aiwa ana" ba joe" sho' jo; jo; ra".

²⁸Airu wa Israel mung" mae" Bala caung:pa" rure Yehu yang khoru: sham" pye' ra" khyo ngad: ra".

²⁹Ngadqere: yao: wa Bethela we' Dan mae Yeroboam zhaug' to" ra" qhang nung: jaung nau" lho jham re caung:pa" byid' ru khyo" yang Israel byu qere qobo jhui" shae: ra" kho:kham Yeroboam qobo re lag qu" yu: ra".

³⁰ASANG wa Yehu re- Ahab myid:zo: qere ngo nao re kad' nhao nug: gu: ja: khao: ngo" re nao kad' ava". Aimung: ni" myid:zo: qe 4 xag' joe" sho' Israel kho:kham kad' li" genae" ein: ngo nao re dao:so: byid' ra"- ga: ta" ra".

³¹Ngadqere: Yehu wa Israel nho: Mao"So ASANG: tarha" re yao" aung khug nhag' lam: alhab' we' maphug' cao" ngad: ra". Ai: atha" yao: wa Israel byu qere qobo jhui" shad' ra" yaug ngad: ra" Yeroboam nho: ave, aso: re cao" ra".

³²Ai: ayo, mae ASANG wa Israel nho: mug: myid re ngai: lo" nhao: ra". Suri kho:kham Ahazia wa Yodan gyaung: ba thug' shad' mae" Israel mug: myid alhab'- mug: thao shad' Arnon qid gyaung: dao: mae jo; ra" Aroe vogaung: joe" sho'- ceru wa Gilead we' Bashan mug: myid alhab' bobo: ra". Aimae Gad- Rubin- ba thug' shad' Manashe byumyu" kaung qe na: ra" mug: myid jham re aung: yu: pye' ako".

³⁴Yao" nho: mazag mavae lo, mau" jham bobo mung: Yehu kad' ru gatau ja: khao: ngo" re Israel kho:kham qe: mhomyi: paug' mae tung" xam" to" ako".

³⁵Yao: wa shid: lo" mung: Samari mae nyhab' pye' ako". Yao" yauggai zo: Yehoaha wa yao" khu mae kho:kham xo' kad' ra".

³⁶Yehu wa Israel kho:kham khyo" Samari mae shid' xe: she' zin eib: na: ra".