Read Maru 2 KHO:KHAM 11 Bible Online

2 KHO:KHAM 11 - Maru bible

2 KHO:KHAM 11

¹Kho:kham Ahazia nho: yao: myhi" Athalia wa yao" yauggai zo: re se' pye' rure ba lao"- yao: wa kho:kham yham khaung byu alhab' mo, re se' pye' nae" qhid' mae" amyin" byid' ra".

²Ahazia nho: yauggai zo: Yoa dayaug za: phao: loe; lo" byaug: ra". Yao: re: gaje qe we' daga" alaug se' pye' qhug' ra". Ngadqere: kho:kham Yehoram nho: myiqe: zo:- Ahazia nho: nhae mo" bye" ngad: ra" yao: na Yehosheba yang khyad' yu: to" ra".

³Yao: se' pye' maqhug' nae" qhid' mae" we' yao: re jhui: yang: Caung:pa" Yham khug mae" yab qe, khyo jhui" vao ye: mung: Athalia mamyao sho' ye nyham" to" ra". Yehosheba wa yauggai nau" re khyaug' zin gun caung mung: Athalia kho:kham myhi" khyo" eib: ra" yo, gyo: gu: mae Caung:pa" Yham mae yao: re nha: to" ra".

⁴Ngadqere: nhad' zin ein: zin mae khinjaung Yehoiada wa kho:kham kho" kao zaung" ra" gyezug: qe we' kho:kham kho" zaung" ra" mo, re caung" pa" yham khyo li" genae" qhid' mae" yao: bam re ta" nhao: ke' ra". Aimae yao: wa yao: kad' nae" yaung to" ra" mau" re jham tang: yang: yao: bam we' myid: vang" khyo kad' ra". Yao: wa kho:kham Ahazia nho: yauggai zo: Yoasha re yao: bam re qhu" byid' ra".

⁵Aimung: o mae" we' amyin" dao: jham yao: bam re byid' ra". Aiwa Dugno: Ba mae mau" khyo" naonhaung" joe" li" gelao"- naonhaung" sam bam mae" dabam wa kho:kham kho" re zaung" ge,.

⁶Gatau dabam wa Sura kham: mo" mae zaung" ge,. Amung: gatau dabam wa gatau zaung" mo; nhaung thao" mae" kham: dung: mae zaung" ge,.

⁷Dugno: Ba mau" maang: ra" shid' phung: wa kho:kham re gug: gam byid: nae" qhid' mae" Caung:pa" Yham mae zaung" genae" ngad: ra".

⁸Naonhaung" wa shae pyang: phoe' ci yang:- kho:kham Yoasha re zaung" mung: yao: khai: ye: khai: yao: we' daga" na ge,- naonhaung" jhao" te' li" ra" yaug khag' rere: se' pye' ge,- ga" ru ngad: ra".

⁹Gyezug: qe wa Yehoiada ta" ra" dao: re tae" gyo" ako". Amung: Dugno: Ba mae mau" ma ang mo, we' mau" ang mo, ngad ko" ra" yao: bam: byu qere yao: jhao" jhui" lo: ako".

¹⁰Yao: wa gyezug: qere lhae tad' jham we' kho:kham Davi sang: qu" ra" go jham re byid: mung: Caung:pa" Yham mae nha: to" ra".

¹¹Kho:kham re gug: gam nae" qhid' mae"- yao: wa shae pyang: ci: ra" mo, re Caung:pa" Yham qhid' kheim: lhang" gam mae nha: to" ra".

¹²Ai: thao Yehoiada wa Yoasha re jhui" thug' lo mung: yao" au: mae ba maug: zhaung: byid' ra". Kho:kham qe phug' cao" nae" tarha" mugsug' dapaug' yao: re byid' to" ra". Amung: Yoasha re xau gyad byid: mung: kho:kham khyo" ta" hau" ke' ra". Mo,byu qe wa lo, pyo' pyo' mung: kho:kham pho" kao qhang vashao: wo"- ga: hug' ako".

¹³Kho:kham myhi" Athalia wa zaung" mo, we' mo,byu qeyang yhau: ra" thoe re the' gyo: mung: yao: wa Caung:pa" Yham khyo hin hin za: ye" lo" ra". Aimae mo, byu qe zang" ham: na: ako".

¹⁴Yao: wa thung" we' dakhyo: kho:kham sag' wa Caung:pa" Yham kham: mae" zang baung: nhae mae ye; jo; rure ye myao: ra". Yao: re gyezug: qe- labo" mad mo; yang lhang" kham" ci mung: mo,byu qe alhab' wa ngaui bau taung" zag: hug' yang: labo" jham mad: ako". Athalia wa nhag' lam: thao" ru we' yao" mai bau: re lao" cad' pye' mung: gyevo wo"- gyevo wo"- ga: hug' ra".

¹⁵Yehoiada wa Athalia re Caung:pa" Yham jo, qo mae manug: se' ngad: ra". Aimung: yao: wa gye zug: pho" re- yao: re zaung" mo; agyo: mae" jhui" thug' lo" ge,. Yao: re khyad' yu nae" seim" yaug khag' rere: se' pye' ge,- ga: amyin" byid' ra".

¹⁶Yao: bam yao: re taung" yu mung: kho:kham kho" khyo jhui" ye: yang: myao: kham: dung: mae yao: bam yao: re se' pye' ako".

¹⁷Khinjaung Yehoiada wa kho:kham Yoasha we' mung" byu qere- yao: bam: ASANG: byumyu" kad' nae" ASANG we' kad' to" ra" dao: thang" khug khyo dam: vao nae" kad' ra". Yao: wa kho:kham we' mung" byu qe: gyo: mae re: dao: thang" kad' ra".

¹⁸Aimung: mung" byu qe wa Bala caung:pa" yham khyo ye: mung: aire phyo' khyo" pye' ako". Yao: bam wa phan jham re we' so alho jham re be; khyoe' pye' mung: Bala khinjaung pho" Mathan re phan jham: qhid' kheim: mae se' pye' ako". Yehoiada wa Caung:pa" Yham re zaung" mo, nha: to" ra".

¹⁹Ai: thao yao:yao: we' gyezug: qe- kho:kham kao zaung"- kho:kham kho" zaung" mo, wa kho:kham pho" re Caung:pa" Yham mae" kho:kham kho" khyo zaung" mung: jhui" lo" ako". Mung" byu alhab' mo; cao" lo" ako". Yoasha wa Gug: Gam Kham: Dung: khyo" vao lo" mung: kho:kham tao" khau" mae jo, qo lo" yu: ra".

²⁰Mung" byu qe alhab' mo, gyai bau" ako". Vomo" wa sae: za: ngad: jo, mung:- pe"mung:ga"re ana" Athalia wa kho:kham kho" mae se' pye' qhug' ra".

²¹Yoasha wa apyad nhad' zin ein: zin mae Yuda kho:kham boe" lo: ra".