Read Maru 2 KHO:KHAM 13 Bible Online

2 KHO:KHAM 13 - Maru bible

2 KHO:KHAM 13

¹Ahazia nho: yauggai zo: Yoasha wa Yuda kho:kham khyo" eib: ru shid' xe: sam zin ein: zin mae Yehu nho: yauggai zo: Yehoaha wa Israel kho:kham boe" lo: ra". Yao: wa Samari mae daxe: nhad' zin eib: na: ra".

²Yao" qhid' mae" kho:kham Yeroboam we' dakhyo: yao: wa ASANG re qobo shad' mung: Israel byu qere qobo jhui" shad' nhao: ra". Yao: wa yao" makhyang" ra" khyo re khonhae" re: mato" pye' ngad: ra".

³Aimung: ASANG wa Israel re nhag' yo" ra". Yao: wa Suri kho:kham Hazae we' yao" yauggai zo: Benhadad re alhang lhang aung: pye' nhao: ra".

⁴Ailao" Yehoaha wa ASANG re akyu" mho' ra". Amung: ASANG wa Suri kho:kham Israel byu qere khoqhi" thin: sho' zo" rure myao: mung: yao" akyu" mho' dao: re tau: byid' ra".

⁵ASANG wa Israel re au: jhaung dayaug nhao: ke' byid' ra". Aiyaug wa Suri byu qe: lo, mae" yao: bam re loe; beim nhao: ra". Aimung: Israel byu qe wa qhid' phyao: we' dakhyo: ngaui pyo: yaug yo: za: qo" na: ako".

⁶Ngadqere: yao: bam wa kho:kham Yeroboam yang Israel byu qere qobo jhui" shad' ra" qobo jham re mato" pye' shiko" ngad: ra". Aijham re xo' yang: shad' lhoe" na: ako". So myhi" Ashe nho: khyao dau so alho jham wa Samari vogaung: mae dang: jo; ashi".

⁷Yehoaha wa myao: jui: gyezo: ngo" xe yaug- gyekhe' myao: lhin" daxe lam:- khyid su: gyezo: datug mae" je yang: gyetab maqo" ngad: ra". Pe"mung:ga"re Suri kho:kham wa dang: ra" gu re se' tam" pye' mung: bodan reru: aibam re zab: nhe" pye' ra".

⁸Yehoaha kad' ra" gatau lo, mau" ja: khao: ngo" yao" mazag mavae kad' ra" lo, mau" alhab' re Israel kho:kham qe: mhomyi: paug' mae tung" xam" to" ako".

⁹Yao: wa shid: lo" mung: Samari mae nyhab' shaung: pye' ako". Amung: yao" yauggai zo: Yehoasha wa yao" khug mae kho:kham xo' kad' ra".

¹⁰Yuda kho:kham Yehoasha eib: ru sam xe: nhad' zin ein: zin mae Yehoaha nho: yauggai zo: Yehoasha wa Israel kho:kham boe" lo: ra" yao: wa Samari mae daxe: khyaug' zin: eib: na: ra".

¹¹Yao: re: ASANG re qobo shad' lhoe" mung: Israel byu qere qobo jhui" shad' ra" kho:kham Yeroboam nho: makhyang" ra" ave, aso: re cao" ra".

¹²Yehoasha kad' ra" gatau lo,mau" ja: khao: ngo" Yuda kho:kham Amazia we' gye jho" khe' rumae yao" mazag mavae: ra" lo, mau" bo:bo mung: Israel kho:kham qenho: mhomyi: tung" xam: paug' mae tung" to" ako".

¹³Yehoasha wa shid: lo" mung: Samari mae" kho:kham lab mae nyhab' shaung: pye' ako". Amung: yao" yauggai zo: Yeroboam II wa yao" khu mae kho:kham xo' kad' ra".

¹⁴Lapa Elisha wa shid no no: lo" ra". Yao: shid: lo" na: au: Israel kho:kham Yehoasha wa yao: jhao" lae" ye: ra". Yao: wa nga" pho" we"- nga" pho" we"- nao wa Israel nho: qi" qhang: ra" gye gug: gam yaug boe" lai: lo: ava"- ga: ngug zo" re" ta" ra".

¹⁵Elisha wa yao: re- lo, la: daphau: we' myo: dajhid' yu: lo ri:- ga: amyin" byid' ra".

¹⁶Yehoasha wa aijham re yu: yu: ra". Elisha wa yao: re bag nae" seim" wa,- ga: ta" ra". Kho:kham re: airu: kad' ra".

¹⁷Elisha wa yao" lo, kho:kham pho" lo, dao mae kai" ra". Amung: lapa pho" ta" rure cao" mung: yao: wa Suri mung" khyo myo, khung: qang: ra" bao: zo: kham: re phung" ra". Elisha wa myo: bag: ke' wa,- ga: amyin" byid' ra". Kho:kham pho" myo: bag: ke' we'- Lapa pho" wa nao wa ASANG: myo: ngad: ra". Ai: myo" yang yao: wa Suri mung" re aung: doe; pye' li" nae". Nao wa Suri byumyu" qe mae" Apheg vogaung: mae re: yao: bam re aung: pye' sho' gyekhe' li" nae"- ga: ta" ra".

¹⁸Ai: thao Elisha wa Kho:kham pho" re myo: gatau yu: yu mung: aijham: yang myid gaung re be, nae" ta" ra". Kho:kham pho" wa myid gaung re sam lhang be, mung: thang: pye' ra".

¹⁹Ceru wa Elisha re nhag' yo: nhao: ra". Amung: kho:kham pho" re- nao wa ngo"- khyaug' lhang be; ang: ra". Aire nao wa Suri re bin: sho' aung: pye' nae" ngad: ra". Ngadqere: ana" nao wa yao: bam re sam lhang za: aung: li" nae"- ga: ta" ra".

²⁰Elisha wa shid: lo" mung: nyhab' shaung: pye' ako". Zin khao: ngo" Moba byu qe wa Israel mug: myid khyo lhaung" jhin" vao li" ako".

²¹Dalhang mae Sushid poe dalam" ayo, gyo: mae ai: Moba gyekhe' jhin" vao li" ra" gyephung: daphung: re myao mung: byu qe wa mao gaung re Elisha nho: lab mae shapye' to: co' mung: tao" phao: lo" ako". Mao gaung wa Elisha nho: shoqug: we' the' tin: we' dalhang: dae byu aiyaug wa dam: daui: li" mung: to" ye; li" ra".

²²Suri kho:kham Hazae wa Yehoaha eib: ra" gyo: mae Israel byu qere zag zo" ra".

²³Ngadqere: ASANG wa yao: bam re nhag' khyag' nhag' myan: byid' ra". Yao: wa yao: bam re mase' tam" pye' nhao ngad: ra". Yao: bam re bao" thaug' byid' ra". Pe"mung:ga"re Abraham- Isag- Yaku we' kad' to" ra" yao" dao: thang" mathao mae ngad: ra". Yao: wa yao" byumyu" re khonhae" re: mato" myhid' pye' ngad: ra".

²⁴Suri kho:kham Hazae shid mung: yao" yauggai zo: Benhadad wa kho:kham boe" lo: ra".

²⁵Ai: thao Israel kho:kham Yehoasha wa Benhadad re sam lhang aung: pye' mung: Yehoasha nho: yao: pho" Yehoaha eib: ra" gyo: mae Benhadad yang yu: pye' byid' ra" vogaung: jham re dam: sang: yu: pye' ra".