Read Maru 2 KHO:KHAM 14 Bible Online

2 KHO:KHAM 14 - Maru bible

2 KHO:KHAM 14

¹Yehoaha nho: yauggai zo: Yehoasha wa Israel kho:kham kad' na: ru shid' zin ein: zin mae Yoasha nho: yauggai zo: Amazia wa apyad shid' xe ngo" zin mae Yuda kho:kham boe" lo: ra".

²Amung: yao: wa Yerusalem mae shid' xe: gug zin eib: na: ra". Yao: myhi" wa Yerusalem mae" Yehoadin ga: yaug ngad: ra".

³Yao: wa ASANG o ngaui: ra" khyo re kad' ra". Ngadqere: yao: wa yao" phug' pho" Davi we' madau ngad: ra". Ai: atha" yao: wa yao: pho" Yoasha kad' lo: ra" mau" re kad' ra".

⁴Yao: wa tarha" taung bug qe: caung:pa" jo, qo so alho jham re maphyo' khyang: pye' ngad: ra". Amung: mung" byu qe wa xo' yang ngaui" xeim: we' sheim nae pyo: ja: aimae phad' ngaui" byid' ako".

⁵Amazia wa kheim: so' re tang sho' qo" yu we' yao: pho" kho:kham re se' pye' ra" gyezug: qere se' pye' ra".

⁶Ngadqere: yao: wa aibam: nho: zo: dau qere wa mase' pye' ngad: ra". ASANG: yang Moshe tarha" mae amyin" byid' to" ra" gu: re phug' cao" ra". Aiwa- yao: myhi" yao: pho" qe wa yao: zo: qe shad' lhoe" ra" qobo mathao: yang se' pye' ru magai: qhug' mung: yao: zo: qe wa yao: myhi" yao: pho" qe shad' lhoe" ra" qobo mathao mae se' pye' ru magai: qhug' nae". Byu dayaug wa yao: yao: shad' lhoe" va" ra" qobo yug: qhid' mae" za: se' pye' qhug' nae" ngad: ra"- ga" ru ngad: ra".

⁷Amazia wa Xo: Lao:khaung: mae Edom gyezo: datug re se' pye' ra". Yao: wa gyekhe' poe mae Sela vogaung: re sang: yu mung: aire Yokthe ga: mhang" ra". Ai: mang wa ana" ba joe" sho' mang qo" jo; ra".

⁸Ai: thao Amazia Israel kho:kham Yehoasha re lagyo: qe nhao: ke' mung: gye jho" khe' nae" lhaung: ke' ra".

⁹Ngadqere: kho:kham Yehoasha wa- yao: re ganhae"- Lebanon bam mae" zau: bao wa shaug' gae re- ni" myiqe: zo: nga" yauggai zo: re byid: zho: la,- ga: lagyo: nhao: ke' ga". Seyo: gug'nyhug' dadau: li" yang ai: zau: bao re zab: nhae" lai: lo" byaug: ga".

¹⁰Ana" Amazia we"- nao wa Edom byu qere khe' aung: pye' ava". Amung: nao wa gyai ngad beim" ra". Ni" lahau: qi" rumae nhag' dag mung: yham mae na: jo, wa,- nao we' ni" mung" byu qere za: boe" li" nhao: nae" ra" qug: khai: kyi" khyag' rure nao pe"mung: lhau: zhung" ra" i? ga: dao: tug' pyang: ke' ra".

¹¹Ngadqere: Amazia wa matae" gyo: ha: pye' ra". Aimung: Yehoasha wa yao" byu qe we' daga" to" lo" mung: yao: re Yuda mung" mae" Bed Sheme jo, qo mae gye yezin" ra".

¹²Amazia nho: gyetab wa seim" byaug: ra". Amung: yao" gyezo: qe alhab' wa yao: bam yao" yham khyo phao: lo" ako".

¹³Yehoasha wa Amazia re kyam: byu khyo" taung" yu mung: Yerusalem khyo jhin" ye" lo" ra". Amung: Ephrim kham: dung: mae" Ajheim kham: dung: joe" sho' mae" vang re phyo' khyo" pye' ra". Alaug byid yo daung" ko qhang sho' ngad: ra".

¹⁴Yao: wa ngaui we' qhang yao: myao: gu: alhab' Caung:pa" Yham mae" zai kug jham alhab'- kho:kham kho" mae" jo,nho" alhab' re yu mung: Samari khyo vin: lo" ra". Yao" nho: byu qere re: yao: we' daga" jhui" lo" byaug: ra".

¹⁵Yehoasha kad' ra" gatau: lo, mau" ja: khao: ngo" Yuda kho:kham Amazia we' gye jho" khe' rumae yao" mazag mavae: ra" lo, mau" jham bobo mung:- Israel kho:kham qe: mhomyi: tung" xam: paug' mae tung" xam" to" ako".

¹⁶Yehoasha wa shid mung: Samari mae" kho:kham lab mae yao: re nyhab' pye' ako". Amung: yao" yauggai zo: Yeroboam II wa yao" khu mae kho:kham xo' kad' ra".

¹⁷Yuda kho:kham Amazia wa Israel kho:kham Yehoasha shid thao daxe: ngo" zin: na: jo; ashi"-

¹⁸Amazia kad' ra" gatau lo, mau" ja: khao: ngo" re Yuda kho:kham qenho: tung" xam: paug' mae tung" to" ako".

¹⁹Yerusalem mae Amazia re khug' se' nae" gye tau: lhan" ako". Aimung: Lakhi vogaung: khyo phao: ye" ra". Ngadqere: yao" gyevo qe wa yao" thao cao" li" mung: aimae yao: re se' pye' ako".

²⁰Yao" mao gaung re wa myao: dao mae Yerusalem khyo dam: tug' tho: lo: mung: Davi nho: vogaung: mae" kho:kham lab mae nyhab' shaung: pye' ako".

²¹Ailao" Yuda mung" byu qe wa daxe: khyaug' zin za: ngad shi" ra" yao" yauggai zo: Uzia re kho:kham khyo" ba maug: zhaung: byid' ako".

²²Uzia wa dam: aung: yu mung: yao: pho" shid thao re Elad vogaung: re dam: te" ra".

²³Yoasha nho: yauggai zo: Amazia Yuda kho:kham khyo" eib: ru daxe: ngo" zin mae Yehoasha nho: yauggai zo: Yeroboam wa Israel kho:kham boe" lo: ra". Yao: wa Samari mae byid xe: dazin eib: na: ra".

²⁴Yao: wa ASANG re qobo shad' mung: yao" qhid' au: mae" Israel byu qere qobo jhui" kad' yaug ngad: ra" Nebad nho: yauggai zo: kho:kham Yeroboam nho: makhyang" ra" ave, aso: re cao" ra".

²⁵Yao: wa Israel sang: ra" mug: myid alhab' mug: am: shad' Hamad bam gyo: mae"- mug: thao shad' tham: shid joe" sho' re aung: pye' ra". Ceru wa Israel nho: Mao"So ASANG: yang Gat Hephera mae" yao" daui daui yaug Amitai nho: yauggai zo: lapa Yona nho: nhad' khyo" dao:so: byid' to" ru ngad: ra".

²⁶ASANG wa Israel byu qe qug: khai: dayin dayo: qu" gyaug qu" lhaung sho' kham zo" na: rure myao: ra". Yao: bam re bao" thaug' nae" dayaug re: mana ngad: ra".

²⁷Ngadqere: Israel byu qere bin sho' apyad ato mae phyo' qheim" pye' nae" ASANG: yao: wa yao: bam re Yeroboam II nho: lo, khyo" khyad' yu: ra".

²⁸Yeroboam II kad' ra" gatau: lo,mau" ja: khao: ngo" gye poe mae yao" mazag mavae lo, mau" Damasku we' Hamad re Israel khyo khoru: dam: qo" yu: ra" khyo- alhab' re Israel kho:kham qenho: mhomyi: paug' mae tung" xam" to" ako".

²⁹Yeroboam II wa shid mung: kho:kham lab mae yao: re nyhab' pye' ako". Amung: yao" yauggai zo: Zekharia wa yao" khu mae kho:kham xo' kad' ra".