Read Maru 2 KHO:KHAM 16 Bible Online

2 KHO:KHAM 16 - Maru bible

2 KHO:KHAM 16

¹Remalia nho: yauggai zo: Peka Israel kho:kham kad' ru daxe: nhad' zin ein: zin mae Yotham nho: yauggai zo: Ahaza wa apyad shid' xe zin mae Yuda kho:kham boe" lo: ra".

²Amung: yao: wa Yerusalem mae daxe: khyaug' zin eib: na: ra". Yao: wa yao" phug' pho" kho:kham Davi nho: gai: ra" ave, aso: re macao" ngad: ra". Ai: atha" yao: wa yao" Mao"So ASANG re mangaui nhao: ra" mau" re kad' ra".

³Yao: wa Israel kho:kham qenho: ave, aso: re cao" yang ngad: ra". Yao: wa Israel byu qe: qhid' au: khyo jhin" vao ye" lo" ko" au: mung"dan: mae" ASANG: yang khe' thug' ke' ra" byumyu" qenho: maca' majhad' lo, mau" re lag qu" yu yang: yauggai zo: re lhao" re: so alho jham re phad' ngaui" byid' ra" xeim: khyo" ngaui" xeim: ngaui" byid' ra".

⁴Ahaza wa tarha" taung bug so re caung:pa" ra" jo, qo jham ngad: ra" bug gaung jham- ba sham gae jham: qao: mae ngaui" xeim: we' sheim nae pyo: ja: jham re phad' ngaui" byid' ra".

⁵Suri kho:kham Rezin we' Israel kho:kham Peka wa Yerusalem re gye li" zin: mung: vang" ci: ako". Ngadqere: Ahaza re maaung ngad: ako".

⁶(Ai we' dayo, mae za: Edom kho:kham wa Elad vogaung: re dam: sang: yu mung: aimae na ko" ra" Yuda byu qere khe' thug' pye' ra". Edom byu qe wa Elad mae te" na mung: ana" joe" sho' na: jo; ako".)

⁷Ahaza wa Asuri kho sin" Tiglad Pilese re- ngo ni" daui daui yaug ngad:- amung: ngore gye zin" na ko" ra" Suri we' Israel kho:kham shid' yaug: lo, mae" ngore li" khyad' yu la,- ga" ra" mung: dao: we' byu nhao: ke' ra".

⁸Ahaza wa Caung:pa" Yham we' kho:kham kho" jo,nho" mae" ngaui we' qhang re yu: yu yang: khosin" pho" re jhaung qhu" khyo" vhin: ke' ra".

⁹Tiglad Pilese wa Ahaza mho' ra" khyo re tau: mung:- yao" gyetab we' to" ye" lo" mung: Damasku re gye yezin: yang: aung: yu: pye' ra". Kho:kham Rezin re se' pye' mung: mung" byu qere kyam: byu qekhyo" Kira khyo jhui" lo" ra".

¹⁰Kho:kham Ahaza khosin" Tiglad Pilesa re yeqhug' nae" Damasku khyo ye" lo" au:- yao: wa aimae phan dalam: re myao mung: ai we' yhoe' dau sho' kad' ra" akhyao dalam: re khinjaung Uria jhao" tug' vhin: ke' ra".

¹¹Amung: Uria wa ai we' dau: ra" phan dalam: kad' ra". Ahaza madam: joe" lo shire aire bin sho' kad' ra".

¹²Damasku mae" yao: dam: joe" lo: re phan bin: kad' to: va" rure Ahaza lomyao: ra".

¹³Aimung: yao: wa ai: dao mae gug'nyhug' phad' ngaui" xeim: we' cin man" ngaui" xeim: jham re phad ngaui" byid' mung: sabyi qang: ngaui" xeim: we' zam" khug: ra" ngaui: xeim: sa: ai: dao mae ngaui" byid' ra".

¹⁴ASANG re qhaug' byid' to" ra" gyid: phan wa ai: phan asag' we' Caung:pa" Yham agyo: mae ngad: ra". Aimung: Ahaza wa yao" phan asag' lam: re mug: am: shad' khyo qhui" to" ra".

¹⁵Ai: thao yao: wa Uria re- ce: nga" nho: phan aqi: lam: mae ne, seim phad' ngaui" ra" xeim:- myi" thao mae" cin man" ngaui" xeim: kho:kham we' mung" byu qenho: phad' ngaui" byid' ra" xeim: we' cin man" ngaui" xeim:- mung" byu qenho: sabyi qang: ngaui" xeim: ngaui" byid' rumae ci wa,- ngaui" xeim: ngaui" byid' ra" gug'nyhug' alhab' nho: sa: re ai: dao mae vhe' sheim: wa,- ngadqere: gyid: phan re wa boe, phyid' nae" qhid' mae" nga" qhid' mae" jaung: to: wa,- ga: amyin" byid' ra".

¹⁶Uria wa kho:kham pho" amyin" byid' ru we' dakhyo: kad' ra".

¹⁷Kho:kham Ahaza wa Caung:pa" Yham mae ci: ra" gyid: lhin" re phyo' pye' mung: ai: dao mae jo; ra" jarung: jham re yu: pye' ra". Yao: wa gyid: nung: jaung lo: daxe: shid' dau" nho: dao gaung: mae" gyid qid lhao: rere: yu: pye' ra". Amung: aire laug baui dao mae kai" to" ra".

¹⁸Ahaza wa Assorikhosin" pho" re ngaui nhao nae" qhid' mae" Caung:pa" Yham we' kho:kham tao" agyo: mae" khyo su: jao: rere: yu: pye' mung: Caung:pa" Yham khyo kho:kham pho" vao: ye: kham: re pyid' pye' ra".

¹⁹Kho:kham Ahaza kad' ra" gatau lo, mau" ja: khao: ngo" re Yuda kho:kham qenho: mhomyi: paug' mae tung" xam" to" ako".

²⁰Ahaza wa shid mung: Davi nho: vogaung: kho:kham lab mae nyhab' shaung: pye' ako". Amung: yao" yauggai zo: Hezekia wa yao" khu mae kho:kham xo' kad' ra".