Read Maru 2 KHO:KHAM 19 Bible Online

2 KHO:KHAM 19 - Maru bible

2 KHO:KHAM 19

¹Hezekia kho:kham wa yao: bam ta" ra" lau re the' gyo: we' kaug' yang: yao" mai bau: jham re lao" cad' pye' mung: jid: mo" mai bau: gaug: ve, yang: ASANG: Caung:pa" Yham khyo ye" ra".

²Yao: wa kho:kham kho" au: jhaung Eliakim- Kho:kham kho" mugsug' tung" yaug Shebna- khinjaung yin" qere Amod nho: yauggai zo: lapa Esaia jhao" nhao: ke' ra". Yao: bam re: jid: mo" pin: ve; ci: ako".

³Ceru wa Esaia re yeta" kyo: nae" qhid' mae" yao: ta" ke' ra" mungdao: ngad: ra". Ana" ba wa qug: khai: dayin dayo: kham zo" ra" ba na ngad:- ngonhaung" wa qobo dae byid' ru we' nga: yeim: ru qhug' na: bam va". Ngonhaung" wa zoshao khau nae" ba na nghe ngadqere: khau: nae" qhid' mae" qam: nang" jo; ra" myiqe: dayaug we' dau: ra".

⁴Asuri khosin" pho" wa daui: na: ra" Mao"So re maphug' makhyad' roe" nae" yao" gyezug: mo" re nhao: ke' ava". Ni" Mao"So ASANG wa ce:- maphug' makhyad' ta" ra" dao: re the' gyo: mung: airu: jhau mo, re qobo dae byid: vashao:. Aimung: daui: na: ra" ngonhaung" mung" byu qe: qhid' mae" Mao"So re akyu" mho' wa,- ga" ra" ce: mungdao: re yeta" kyo: nae" yao: bam re ta" ra".

⁵Esaia wa kho:kham Hezekia nho: mungdao: re qo" yu lao"-

⁶Yao: wa ASANG: yang naonhaung" re maqo" khyad' yu nae" ga: ta" ra" yao: bam: dao: we' Asuri byu qeyang nao re kyaug' rure dagyaug wa,-

⁷ASANG wa khosin" pho" re yao: yao" mung"dan: khyo dam: phao: lo" nhao nae" ra" la dao: lae" re the' gyo: nhao: li" nae". Aimung: ASANG wa yao: re aimae se' pye' qhug' nhao: li" nae"- ga: ASANG nao re ta" ra" ga" ra" ce: mungdao: dam: tug' pyang: ke' ra".

⁸Asuri gyezug: pho" wa khosin" pho" Lakhi mae" to" lo" mung: Libna vogaung: nhae mae gyekhe' na: rure ba mung: yao: wa khosin" pho" we' yejho" qham nae" aikhyo ye" lo" ra".

⁹Egutu gyetab wa Kusha kho:kham Tirhaka yang au: she yang: yao: bam re gyekhe' nae" qhid' mae" joe" li" na: ga" ra" lau dao: Asuri byu qejhao" joe" lo: ra". Khosin"" pho" cere the' gyo: lao"- Yuda kho:kham Hezekia re vhin tung" vhin: ke' mung:-

¹⁰Yao: re nao wa nga" lo, mae magyo" seim" lo" nae" ga: nao lam khug: na: ra" so wa nao re ta" ra". Ngadqere: nao re damhug' pyag' nhao wa,-

¹¹Asuri khosin" wa phyo' pye' nae" yao: myid: phyid' to" ra" mung"dan: re khoru: kad' ra" khyo re nao the' gyo: gau ngad: ra". Nao gai: loe, nae" jho: i?

¹²Nga" phug' pho" qe wa Gozan- Haran- Rezep vogaung: jham re phyo' pye' mung: Telasa mae na ko" ra" Betheden byu qere se' pye' ako". Yao: bam: so jham khoyaug re: yao: bam re maqo" khyad' yu ngad: ra".

¹³Hamad- Arpad- Sepharaim- Hena- Iva vogaung: jham: nho: kho:kham qe khai: mae ngad: ako" i? ga: ta" ke' ra".

¹⁴Kho:kham Hezekia wa vhin tung" re lagyo: qe: lo, mae" yu: yu yang: nghe' ra". Ai: thao yao: wa Caung:pa" Yham khyo ye: mung: vhin tung" re ASANG: qhid' kheim: mae ye to" ra".

¹⁵Amung: yao: wa o"- Israel nho: Mao"So kherubin dao mae zaung: jo; ra" ASANG we"- nao dayaug za: mug: myid alhab' mae" mung"dan: alhab' re eib: ra" Mao"So ngad: ra". Nao wa mug:gaung we' myid gaung re phan" to" ra".

¹⁶ASANG we"- ana" ngonhaung" pe" boe" na: rure qu" byid: la,- daui: na: ra" Mao"So nao re Senakherib yang maphug' makhyad' ta" na: ru alhab' re tae" gyo: byid: la,-

¹⁷ASANG we"- ngonhaung" alhab' ba:- Asuri khosin" qe wa byumyu" mung"dan: jham re phyo' pye' mung: yao: bam: mung"dan: jham re cae: jhug tag kad' pye' ra".

¹⁸Amung: xao su byu qe:- lo, yang kad' to" ra" sag' we' laug baui khyao dau jham za: ngad mung: so jham mangad: ko" ra" yao: bam: so jham re ngha" pye' ako".

¹⁹O"- ASANG we"- nao za: Mao"So ngad: rure mug: myid dao mae" byumyu" mung"dan: alhab' yang ba genae" qhid' mae" ngonhaung" Mao"So ASANG we"- ana" ngonhaung" re Asuri byu qe: lo, mae" khyad' yu la, wo"- ga: akyu" mho' ra".

²⁰Ai: thao re Esaia wa kho:kham pho" nho: akyu" mho' thoe re ASANG dao: phyid' byid' ra" khyo mungdao: kho:kham Hezekia re ta" kyo" ke' ra". ASANG- Senakherib we"- Yerusalem vogaung: wa nao re qi: jung" pye' mung: maphug' makhyad' kad' ava".

²²Nao: yang maphug' makhyad' jung" gaui: pye' yaug khag' ngad: ein: nao jho: i? Nao wa Israel nho: gyang" lho" ra" Mao"So ngore maphug' makhyad' kad' ru ngad: ava".

²³Ni" nho: gyekhe' myao: lhin" jham alhab' yang myhao: thao" ra" Lebanon bam jham re aung: pye' ra" khyo ngore phug: kyo: nae" ni" lagyo: jham re nao nhao: ke' ra". Aimae nao wa qhang: thao" ra" shaug' gae jham we' gai: thao" ra" qhoje; gae jham re thau: pye' mung: no; thao" ra" sag' mo" yo khug khyo joe" ye: va" ra" khyo nao phug: ta" ra".

²⁴Nao wa taung bug mung"dan: jham mae qid thaung: jham re dau: mung: qid re nao shaug' yang: ni" gyezo: qe: khyid: yang Nila gyaung: re zab: nhe" kin" pye' va" ga: nao phug: lo: ra".

²⁵Cegu: alhab' re ngo ganhae" mae" yaung: to: va" rure nao khonhae" re: magyo" qu" i? Amung: ana" ngo aire kad' va". Ngo wa gyetab vogaung: jham re zhogam: je, bam boe" lo" nhao nae" qam: so' ngo nao re byid' to".

²⁶Ai: vogaung: jham mae na: ra" mo, wa qam: so' mabo ko" ngad: ra". Yao: bam gyaug: din yang: mo; byaug: ako". Yao: bam wa ba thug' shad' la laung: yang aijham re lolhe' mhai: pye' au: mae" pa: din" mae" mhin: gae jham we' dakhyo: re: khaung dao mae" mhin: gae jham we' dakhyo: boe" byaug: ako".

²⁷Ngadqere: ngo wa nao pe" kad' ru- nao khai: ye" ru- ni" khyo ja: khao: ngo" re ngo ba:- nao ngore khoqhi" nhag' yo" rure ngo ba:-

²⁸Ngo wa nao yao" ra" khyo- ni" nhag' lam: myhao: ra" khyo lau thoe re ngo the' gyo: va". Amung: ni" nho re nhoyu ke' mung: ni" nhad' mae nhad' kho' ke' yang: nao li" ra" khyo khyo" yao: nao re dam: tug' jhui" yu nae".

²⁹Ai: thao Esaia wa kho:kham Hezekia re- ce wa aso: khyo" boe" li" nae" ngad:- ana" zin we' thao: zin mae gaug lae" za: nao qo" zo: nae". Ngadqere: thao: zin gu: mae wa ni" gaug zo re qho: mung: qo" yad: yu: li" nae". sabyi naui jham re qho: mung: sabyi shi: jham the' zo" li" nae".

³⁰Yuda mae na: dang: ra" mo, wa myid khug khyo no, sho' agyi: cin" agae jham re" ru: gai mung: ashi: zaui" li" genae".

³¹Yerusalem we' Ziun bam mae na mo, wa na: dang: jo; li" genae". Pe"mung:ga"re ceru: boe" nae" qhid' mae" ASANG myid: phyid' to: yang: ngad: ra".

³²Asuri khosin" khyo we' sin: yang: ASANG ceru: ta" to" ra". Yao: wa ce: vogaung: khyo mavao nae"- myo: dakhe' re: mabag: zaui nae". Go ve; ra" gyezo: qe vogaung: nhae khyo dayaug re: mate' li" nae". Aire myid bam" re: makad' nae".

³³Yao: wa ce: vogaung: khyo mavao lo: yao: li" ra" khyo khyo" yao: dam: tug' lo" li" nae". Ngo ASANG ta" va".

³⁴Ngoyao" gaung re nga: yhe' ru qhid' mae" we' nga" daui daui yaug Davi re ngo byid' to" ra" dao:so: mathao mae ngo wa ce: vogaung: mae gye vha byid: mung:- gug: gam byid: nae"- ga: ta" ra".

³⁵Ai: myi mae ASANG: mug: lagyo: dayaug wa Asuri byu qe: jamu khyo gyo" li" mung: gyezo: 185,000 yaug re se' pye' ra". Ai: thao: ba mug: bo" zo" mae aimae alhab' mo, shid: lhang" jo; ako".

³⁶Ailao" Asuri kho:kham Senakherib wa zad: phao mung: Nineve khyo tug' phao: lo" ra".

³⁷Daba na mae caung:pa" yham khug mae yao" so Nisrog re yao: caung:pa" na: au:- yao" yauggai zo: tao ngad ko" ra" Adrameleg we' Shareze tao wa yao: shid' tao: shae pyang" yang yao: re se' pye' ako". Athao Ararad mung" khyo phao loe; lo" ako". Yao" yauggai zo: gatau dayaug ngad: ra" Esarhadon wa yao" khu mae khosin" xo' kad' ra".