Read Maru 2 KHO:KHAM 24 Bible Online

2 KHO:KHAM 24 - Maru bible

2 KHO:KHAM 24

¹Yehoiakim kho:kham kad' na: au: -Babelon kho:kham Nebugkhaneza wa Yuda mung" khyo jhin" vao ye: mung: sam zin Yehoiakim re yao: eib: ra" qao: mae maqad maqui" na: nhao: ra". Ai: thao yao: wa tau: lhan" ra".

²Yao" nho: daui daui mo, lapa qe: nhad' khyo" yang yao: kad' nae" ga: ASANG ta" to" ru we' dakhyo: ASANG wa Yehoiakim re gye kad' yang: Yuda mung" re phyo' qheim" pye' nae" qhid' mae" Babelon- Suri- Moba- Amon byu qe: gyetab jham re nhao: ke' ra".

³Kho:kham Manashe shad' lhoe" ra" qobo alhab' mathao mae we' je mung: yang qobo maqo" ra" mung" byu qere yao" yang se' pye' ra" mo, alhab' mo, mathao mae- Yuda byu qere yao" myo, jao: mae" khe' thug' pye' nae" qhid' mae" ceru re ASANG: amyin" khyo" boe" nhao: ru ngad: ra". ASANG wa ai: qhid' mae" Manashe re qobo maqo" khyad' byid: ngad: ra".

⁵Yehoiakim kad' ra" gatau lo, mau" ja: khao: ngo" re Yuda kho:kham qe: mhomyi: paug' mae tung" xam" to" ako".

⁶Yehoiakim wa shid mung: yao" yauggai zo: Yehoiakin wa yao" khu mae kho:kham xo' kad' ra".

⁷Ana" Egutu sang: ra" mug: myid ngad: ra" Uphrad gyaung: mae" Egutu mug: am: shad' mug: kyo: joe" sho' mae" mug: myid re Babelon kho:kham: yang sang: pye' va" ruyang Egutu kho:kham we' yao" gyetab wa khonhae" re: Egutu mung" mae" mathug' loko" ngad: ra".

⁸Yehoiakhin wa Yuda kho:kham boe" lo: au: apyad daxe: she' zin ngad: ra". Yao: wa Yerusalem mae lho" sam khye' eib: ra". Yao: myhi" wa Yerusalem mae" Elnathan nho: myiqe: zo: Nehushta ga: mang yaug ngad: ra".

⁹Yao: pho" Yehoiakim nho: ve, so: re cao" mung: Yehoiakhin wa ASANG re qobo shad' lhoe" ra".

¹⁰Yao: eib: na: ra" gyo: mae kho:kham Nebugkhaneza nho: gyezug: qeyang jhui" ra" Babelon gyetab wa Yerusalem re gye kad' nae" to" li" mung: li" vang" to" ako".

¹¹Vang" ci: ra" ayo, gyo: mae Nebugkhaneza yao: yao: re: Yerusalem khyo joe" li" ra".

¹²Amung: kho:kham Yehoiakhin wa yao: myhi" yao" yauggai zo: qe- yao" gye zug: qe we' kho:kham kho" mae" zug: qe we'daga"- Babelon byu qere aseim" byid: lo, tau: pye' ako". Nebugkhaneza eib: ru she' zin ein: zin mae yao: wa Yehoiakhin re kyam: byu khyo" taung" yu mung:-

¹³Caung:pa" Yham we' kho:kham kho" mae" phug' de; ra" jo,nho" alhab' re Babelon khyo yu: lo" ra".ASANG gau: qhid' khae" yang: ta" to" ru we' dakhyo: Nebugkhaneza wa Caung:pa" Yham re ci nae" qhid' mae" kho:kham Sholamon yang kad' to" ra" qhang khug' qhang keim alhab' re be; kho' pye' ra".

¹⁴Nebugkhaneza wa Yerusalem vobyu qe- Kho:kham kho" mae" zug: qe alhab'- au: jhaung qe- alhab' byu datug re kyam: byu khyo" pyaung" jhui" lo" ra". Yao: wa lo,mau" jhao mo, shae kad' mo, alhab' rere: pyaung" lo" ra". Yuda mung" mae wa myaung sho" ra" mo, re za: tang" to: co' ra".

¹⁵Nebugkhaneza wa Yehoiakhin re- yao: myhi" yao" yham sang myhi" qe- yao" gye zug: qe- Yuda mung" mae" au: jhaung qe we' daga" kyam: byu khyo" Babelon mung" khyo pyaung" jhui" lo" ra".

¹⁶Nebugkhaneza wa akhyag: ra" byu alhab' nhad' taung yaug re we' shae be, mo, bobo mung: lo,mau" jhao mo, dataung yaug- re Babelon khyo pyaung" jhui" lo" ra". Alhab' wa gye mau" qo" zaui: mo, ngad: ako".

¹⁷Nebugkhaneza wa Yehoiakhin nho: yao: gan Matania re Yuda kho:kham kad' nhao mung: yao" mang re Zedekia ga: tha" mhang" byid' ra".

¹⁸Zedekia wa Yuda kho:kham boe" lo: au: apyad shid' xe: dazin ngad: ra". Yao: wa Yerusalem mae daxe: dazin eib: na: ra". Yao: myhi" wa Libna vogaung: mae" Yeremia nho: myiqe: zo: Hamuta ga: mang yaug ngad: ra".

¹⁹Kho:kham Zedekia wa kho:kham Yehoiakhin we' dakhyo: za: ASANG re qobo shad' lhoe" ra".

²⁰ASANG wa Yerusalem we' Yuda mung" byu qere nhag' gyai yo" lo" mung: yao" qhid' kheim: mae" yao: bam re khe' thug' pye' ra".