Read Maru 2 KHO:KHAM 5 Bible Online

2 KHO:KHAM 5 - Maru bible

2 KHO:KHAM 5

¹Suri gyezug: Naman wa Suri kho:kham pho" yang phug' myao: mung: nga: yhe' byid' ru qhug' ra". Pe"mung:ga"re ASANG wa Naman khyo" yang Suri gyetab jham re aung doe; ru byid: yang: ngad: ra". Yao: wa gyai lhe" ra" gyezo: dayaug ngad: ra". Ngadqere: yao: wa mao gae: no de; ra".

²Yao: bam Israel byu qe we' gye dalhang jho" khe' rumae Suri byu qe wa Israel myiqe: nau" dayaug re jhui" lo" byaug: ako". Ayaug wa Naman nho: yham sang myhi" nho: daui daui yaug boe" lo: ra".

³Daba na mae yao: wa yao" jeim sang myhi" re- ngo wa nga" ASANG re Samari mae na: ra" lapa pho" jhao" ye: nhao nug: ra". Lapa wa yao" no re qo" gai byid' ra"- ga: ta" ra".

⁴Naman ceru re the' gyo: lao"- yao: wa kho:kham pho" jhao" ye: mung: myiqe: nau" ta" ra" khyo re yeta" kyo" ra".

⁵Kho:kham pho" wa Israel kho:kham jhao" ce: vhin tung" ci yang: ye" lo" wa,- ga: ta" ra". Aimung: Naman wa ngaui sam tug- qhang khyaug' taung- mai bau: daxe zam" vin yang: to" ye" lo" ra".

⁶Yao: vin ra" vhin tung" mae- ce: vhin tung" wa nga" gyezug: pho" Naman re bang" se" byid' li" nae". Yao" no re nao ya: gai byid: nae" rure ngo o: ra" ga" ru ngad: ra".

⁷Israel kho:kham ai: mugsug' re bin nghe' lao"- yao" wa yao" mai bau: jham re lao" cad' pye' mung: myid: gyaug: ru we'- khoru: mung: Suri kho:kham wa byu ceyaug re ngo: yang qo" ya: gai byid' nae" myid: lam: laug i? Yao: wa ngore kao so' daui: ru we' shid: nhao: ra" kheim: so' qo" ra" Mao"So ga: ngore jho: ra" i? Ceru wa ngore myo,byo, qho: na: ru de: de: za: ngad: ra"- ga: ta" ra".

⁸Boe" ra" khyo re lapa Elisha the' gyo: lao"- kho:kham pho" re- nao pe"mung: ai qhi" nhag' lam: thao" myid myo" na: i? Byu aiyaug re ngojhao" nhao: ke' wa,- Israel mung" mae lapa dayaug na: ra" khyo re ngo yao: re qhu" byid: nae"- ga: dao: pyang: ke' ra".

⁹Aimung: Naman wa yao" myao: jham gyekhe' myao: lhin" we' daga" ye" lo" mung: Elisha nho: yham kheim: mae yethang: ra".

¹⁰Elisha wa daui daui yaug re nhao: ke' mung: Yodan gyaung: mae nhad' lhang yao" gaung re yecid' lao" yao" no bin sho' gai lo" nae" ngad: ra" khyo Naman re ta" nhao: ke' ra".

¹¹Ngadqere: Naman wa nhag' yo: mung: -nang" thao" yao: wa ngojhao" thug' li" mung: yao" Mao"So re akyu" mho' yang: yao" lo, re no dae khu dao mae vhag' byid: mung: gai byid: nae" ein: ngo myid: jho: ra".

¹²Aitho' mago" Damasku nhaung thao" mae" Abana gyaung: we' Pharpa wa Israel mung" mae" qid gyaung: tho' maje: gai i? Ngo wa ai shid' gyaung: mae cid' mung: gai: lo" nae"va"- ga: ta" yang: thug' lo" ra".

¹³Yao" daui daui mo, wa yao: jhao" ye: mung: zug: pho" we"- lapa pho" wa qug' ra" ja: daja: ja: kad' nae" nao re kad' nhao: re- nao kad' ca" nae". Yao: ta" ru we' dakhyo:- ana" pe"mung: naoyao" gaung re cid' yang: maqo" ya: yu i? ga: ta" ako".

¹⁴Aimung: Naman wa Yodan gyaung: khyo gyo" ye: mung: Elisha ta" ru we' dakhyo: yao" gaung re nhad' lhang ye jam: ra". Ailao" yao: wa bin sho' gai: lo" byaug: ra". Yao" sho: wa zoshao dayaug we' dakhyo: tang: li" mung: qao" zin" li" ra".

¹⁵Yao: wa yao" byu alhab' mo, we' daga" Elisha jhao" tug' lo mung: Israel nho: Mao"So mae" je yang: so gatau mana: rure ana" ngo ba va". Aimung: jeju khyo" nga" jhaung qhu" re khae: yu byid: la,- ga: ta" ra".

¹⁶Elisha wa- ngo caung da" byid' ra" yaug daui: na: ra" ASANG: mang khyo" ngo wa jhaung qhu" re makhae: yu nae" ein: jham tang" to" ga: tau" ra". Naman wa aire khae: yu nae" jhan" ra". Ngadqere: Elisha wa makhae: yu ngad: ra".

¹⁷Ailao" Naman wa nao nga" jhaung qhu" re makhae: yu lao" wa loze shid' dau: mae yham khyo myid zhai: gag: vin: lo" nae" ngore akhang" byid: la,- pe"mung:ga"re ngo wa ana" ba mae"- ASANG mae" je yang: pe" ja" so rere: xeim: we' phad' ngaui" ra" ngaui" xeim: mangaui" byid: lo nae".

¹⁸Aimung: Suri so Rimmon caung:pa" yham mae nga" kho:kham pho" we' daga" na mung: ai: so re caung:pa" na: au: ASANG ngore qobo khyad' byid' li" nae" ein: ngo myid: lao" ra". Dang za: ASANG wa ngore qobo khyad' byid' li" nae"- ga: ta" ra".

¹⁹Elisha wa ngaui pyo: yaug yo za: lo" wa,- ga: ta" ra". Ailao"- Naman to" lo" ra". Yao: va: sho' malo" shire-

²⁰Elisha nho: daui daui yaug Gehazi wa yao" aung khug mae- nga" ASANG wa Naman re pe" aphug' mayu lo: nhao: ke' ava". Yao: wa ai: Suri byu: yang byid' ra" jhaung qhu" re khae: yu ang: ra". Daui: na: ra" ASANG: mang khyo" ngo wa yao" thao cao" khe' ye: mung: yao: mae" daja: ja: yeyu nae"- ga: ta" ra".

²¹Aimung: yao: wa Naman nho: thao khyo cao" khe' ye" ra". Naman wa yao" thao khyo byu dayaug cao" khe' li" na rure myao lao"- yao" gyekhe' myao: lhin" mae" yao: re qhug' nae" gyo" ra". Amung: pe" qo: i? ga: myid' ra".

²²Gehazi wa pe" maqo- ngadqere: nga" ASANG wa ngore- Ephrim bam mug: mae na: ko" ra" lapa phung: mae" lapa shid' yaug ana" za: joe" li" ako". Amung: yao: wa nao re- ngaui sam taung we' mai bau tha" shid' zam" yao: shid' yaug re byid: nhao nug: ra" ga: ngore ta" nhao: ke' ra"- ga: yeta" ra".

²³Naman wa jeju khyo" ngaui khyaug' taung kye' yu wa,- ga: phaug' tau" ra". Naman wa maqad maqui" jhan" byid: mung: ngaui thaung shid' thaung re tai: mung: yao" daui daui okaung shid' yaug re mai bau: tha" shid' zam" byid: mung: Gehazi qhid' au: khyo nhao: ke' ra".

²⁴Yao: bam wa Elisha na: ra" bug gaung khyo joe" ye: gelao"- Gehazi wa ai: thaung shid' thaung yham khug khyo vo; vao lo" ra". Ai: thao yao: wa Naman nho: daui daui okaung shid' yaug re dam: nhao: ke' ra".

²⁵Yao: wa yham khug khyo tug' vao lo" ra". Ailao" Elisha wa yao: re nao khai: ye" i? ga: myid' ra". Yao: wa ASANG we" khai: maye: ga: tau" ra".

²⁶Ngadqere: Elisha wa nao re qhug' nae" byu aiyaug yao" gyekhe' myao: lhin" mae" gyo" ra" au:- ngo wa byo khyo" aitau mana ngad: ra" i? Ce: ayo, wa ngaui- mai bau: jham- zhanlun khyae jham- sabyi khyae jham- yao thaung nung: jham- daui daui okaung qe khae: yu nae" ayo, mangad:-

²⁷Ana" Naman nho: no wa ni" dao mae boe" li" nae"- nao we' ni" myid:zo: qe wa ai: no apyad ato mae qo" jo; li" nae"- ga: ta" ra". Gehazi to" thug' lo" we' yao: wa no de; li" mung: yao" shoqid wa gyu: re" ru: phyu: lo" byaug: ra".